အချစ်ရဲ့စွမ်းအားတွေကြောင့်ထင်တယ် Matthew နေပြန်ကောင်းသွားပါပြီ။ ကိုကိုနဲ့ တွေ့လိုက်ရပြီး လျှို့ဝှက်ချက်ကိုပါ ဖွင့်ပြောလိုက်ရတော့ စိတ်ထဲလည်းပေါ့ပါးသွားတယ်။ ကိုကိုက ကြိုသိထားနေတော့ အံ့ဩမိပေမဲ့ သိနေတာတောင် သူနဲ့တွဲနေတာမလို့ ရင်ခုန်မိသွားတာတော့ အမှန်ပါ။
Matthew ဒီနေ့ ကိုကို့အိမ်ကိုလိုက်သွားမှာပါ။ တစ်မျိုးတော့ လျှောက်မထင်ကြပါနဲ့။ လျှို့ဝှက်ချက်တွေမရှိတော့တာမလို့ ကောင်လေးအိမ်ကိုလိုက်လည်တာ ပုံမှန်ပဲမလား။ ပြီးတော့ သူက ကြောင်အနေနဲ့ပဲ အိမ်ထဲကိုရောက်ဖူးတာလေ။
"စောင့်နေတာကြာပြီလား"
"ဟင့်အင်း မကြာသေးပါဘူး"
Matthew အတန်းက စောဆင်းတာမလို့ သူကပဲ လာစောင့်နေတာပါ။ မေးတာကိုဖြေလိုက်တော့ ကိုကိုက ခေါင်းညိမ့်ပြကာ သူ့လက်ကိုဆွဲခေါ်လာတယ်။
"အိမ်မှာ ဘာမှတော့မရှိဘူး၊ deli မှာစားကြမလား"
"ကိုကိုအဆင်ပြေသလိုလုပ်လေ ကျွန်တော်ကဧည့်သည်မှမဟုတ်တာ"
"ဟုတ်တာပဲ Matthew က အိမ်ကိုရောက်ဖူးတယ်နော်"
"မရောက်ဖူးပါဘူး"
"ရောက်ဖူးတယ်လေ ၂ခါတောင်မလား"
"အဲ့တာက.. ကြောင်လေ"
သူပြောနေတာကဟုတ်နေတာမလို့ Matthew ဆက်မငြင်းနိုင်တော့ပဲ လေသံလေးတိုးသွားတော့ ကိုကို့ဆီကရယ်သံထွက်လာတယ်။
"ကြောင်အဆိုးလေးလေ"
"မဟုတ်ပါဘူး"
ဘယ်သူကဆိုးလို့လဲ? သူ့အပေါ်အမြင်မှားနေတာမလား။ အဲ့လိုဆက်မြင်ခိုင်းလို့ မဖြစ်ဘူးထင်တယ်။ သူ့လောက်ချစ်ဖို့ကောင်းတဲ့ ကြောင်မျိုး မရှိနိုင်တာကို ကြောင်အဆိုးလေးလို့ ထင်စရာလားနော်။
အိမ်ကိုရောက်တော့ စားစရာကိုပဲအရင် deli မှာလိုက်ကြတယ်။ Matthew က ဒီအိမ်ကို ကြောင်အနေနဲ့ရောက်ဖူးထားပေမဲ့ အခုမှ သေချာလိုက်ကြည့်ရတာပါ။ တစ်ထပ်တိုက်လေးဖြစ်ပြီး အထဲမှာအခန်းသေချာဖွဲ့ထားကာ ကိုကိုတစ်ယောက်ထဲနေဖို့လုံလောက်ပါတယ်။ သူပါလာနေမယ်ဆိုရင်တော့ နည်းနည်းကျဉ်းမယ်ထင်တယ်။ ကျဉ်းတယ်ထင်ရပေမဲ့ တကယ်တမ်းနေမယ်ဆိုရင်တော့ အဆင်ပြေပါတယ်။
