"Jiwoong na~ ငါပြန်လာပြီ"
ခြံတံခါးဖွင့်လိုက်တာနဲ့ အပြောနဲ့အတူ ကိုယ့်ကိုဖက်လာတဲ့ မိန်းကလေးကြောင့် Jiwoong အံ့ဩကာ ကြောင်ရပ်နေမိတယ်။
"အများကြီးလွမ်းနေခဲ့တာ ငါ့ကိုသတိရနေလား ဟင်"
ကိုယ့်ကိုဖက်ထားရင်း ပြုံးရယ်ကာစကားပြောနေတဲ့ မိန်းကလေးကို သူမသိဘူးလို့ပြောရင် လိမ်ရာကျမှာပေါ့။
'Choi Daeun'
Jiwoong ရဲ့ အချစ်ဦးမိန်းကလေး။
မူလတန်းထဲက သူငယ်ချင်းဖြစ်ခဲ့တဲ့ Daeun က သူနဲ့အတော်လေးရင်းနှီးပါတယ်။ သူငယ်ချင်းအများစုကလည်း သူတို့တွဲနေကြတယ်ထင်ကြပေမဲ့ သူ့ဘက်ကပဲ တစ်ဖက်သက်သဘောကျခဲ့တာပါ။ အထက်တန်းနှစ်မှာ သူ Daeun ကိုဖွင့်ပြောခဲ့ပေမဲ့ ကျောင်းပြီးမှ အချစ်ရေးကိုစဉ်းစားမယ်ဆိုပြီး အငြင်းခံခဲ့ရတယ်။
မိဘချင်း ရင်းနှီးတဲ့အခြေအနေမလို့ သူတို့ကို သဘောတူကြောင်း စကားစမြည်ပြောထားကြတာလည်းရှိပါတယ်။ အဲ့တာကြောင့်လည်း Daeun က အချိန်တန်ရင် Jiwoong က သူ့အပိုင်ဖြစ်လာလိမ့်မယ်ဆိုတဲ့ အတွေးရှိပုံရတယ်။ အထက်တန်းပြီးတာနဲ့ နိုင်ငံခြားမှာ စာဆက်သင်ချင်ပါတယ်ဆိုပြီး ထွက်သွားခဲ့တယ်။ ဖွင့်ပြောတာအငြင်းခံလိုက်ရထဲက Jiwoong ဘက်က တစ်ဘက်သက်အချစ်ကို ရပ်ပစ်ခဲ့တာကိုတော့ Daeun က မသိရှာဘူး။
Daeun နိုင်ငံခြားကိုထွက်သွားတော့ Jiwoong ဘက်က အဆက်သွယ်ဖြတ်ပစ်ခဲ့ပါတယ်။ သူငယ်ချင်းသံယောဇဉ်ကျန်သေးပေမဲ့ အထင်အမြင်လွဲသွားမှာမျိုးကို သူမလိုချင်ပါဘူး။ တက္ကသိုလ်စတက်ရတော့ တစ်ယောက်ထဲနေဖို့ အိမ်ကပါထွက်လာခဲ့ပြီး စာကိုပဲအာရုံစိုက်ထားခဲ့တဲ့ သူ့ဘဝထဲကို ကြောင်ဆိုးလေးကတော့ ရအောင်ဝင်လာခဲ့ပါတယ်။
"ကိုကို.."
အနားကိုရောက်လာတဲ့ Matthew ရဲ့ခေါ်သံကြားမှ ဖက်ထားတဲ့ Daeun လက်တွေကို သူယူဖြုတ်လိုက်ပါတယ်။
"သူက..?"
"ငါ့ကောင်လေး"
Matthew ကိုမြင်တော့မေးလာတာမလို့ သူအမှန်အတိုင်းပဲပြောကာ ဘေးကကောင်လေးရဲ့လက်ကိုယူကိုင်လိုက်တယ်။ အခုတစ်ခါ အံ့ဩသွားတဲ့လူကတော့ Daeun ပါ။ သူနဲ့ Matthew ကို တလှည့်စီကြည့်ရင်း တအောင့်နေမှပြုံးပြလာတယ်။
