قاعده في المصلايه بسبح بعد ما صليت العشاء.. كنت مركبه الشاي ورسلت لمى تجيب البسكويت لحدي ما اصلي.. امي وفياض كانو جوا بتونسو، رحمه بت عمي الصغيره جات جاريه وبتنادي في امي " هنادي يا هنادي" جيتها ما طمنتني اصلا الشافعه دي ما بتخش بيتنا الا لمن تجي تشكي لي امي من لمى.. بعد خلصت خشيت ليهم لقيتها واقفه وبتحكي في حاجه وبتمتم... قالت هسي امي قالت لي نادي لمى... نظراتهم اتوجهت على لمى اختي الكانت واقفه جمب باب الصاله والكيس الفيهو البسكويت برجف في يدها.. الجو كان صاني الا من صوت برنامج الاطفال الكان شغال في التلفزيون... قلت ليهم في شنو؟.. رحمه قبلت علي وقالت لي امي قالت لي نادي لي لمى وخليها تجيب القروش السرقتها من تحت المرتبه.... عاينت لي لمى واتذكرت انها بتقيف الوقفه دي وبتدعك يدينها لمن تعمل حاجه وتكون خايفه يشاكلوها.. فياض قال لينا خليكم انا بمشي بشوف الحاصل.. طلع مع رحمه وانا بي توبي مشيت وراهو وامي جات بي ورانا وهي بتلبس توبها وبتقول استر يا رب استر.. دخلنا بالباب الفي زقاقنا والكان بفصل بين بيتنا وبيتهم، كانو واقفين في الحوش وفياض بتكلم مع شاديه مرت عمي وبتها الكبيره رواح.. لمن شافتنا انا وامي قالت لينا وينها؟؟ بتكم الحراميه وينها خليها تجيب لي قروشي هسي دا.. امي قالت ليها شاديه قولي بسم الله، لمى من متين بتسرق؟.. فياض عاين لي بنظرة نظام انا مش قلت ليكم ما تجو؟.. رواح قالت ليها ماف زول غيرها خشا البيت دا الليله والقروش دي لحدي امس بالليل انا شفتها.. قلت ليها يمكن جاكم حرامي بالليل.. ضحكو هي وامها، شاديه قالت لي حرامي حيخلي دهبي والتلفونات واللابتوبات وحيسرق الفين جنيه؟؟ اقول ليكم حاجه انا بمشي افتش بيتكم عشان اثبت ليكم صحة كلامي مدام ما مصدقين.. فياض وقف قدامها قال ليها اهدي شويه وادخلو فتشو جوا تاني كويس، لو ما لقيتوها دا كلام تاني.. شاديه قالت ليهو البيت دا قلبناهو فوق تحت كم مره نفتش؟ انتو دايرين تغطو على بتكم بس لكن انا ما بخليكم.... كانت ماشه على الباب وفياض بحاول يوقفها وامي ورواح ماشين وراها ناديتها قلت ليها شاديه اقيفي.. ما اشتغلت بي كوركت بصوت عالي: انا الشلت القروش.. فجأة كلهم وقفو.. قلت ليها امس لمن جيت انادي لمى شلتهم.. جات علي وقالت لي شنو؟؟؟ انتي السرقتيهم؟.. سكت وكنت بعاين لي فياض لقيتو بعاين لي بحيرة .. عاينت ليها تاني وقلت ليها اي انا سرقتهم... فكت ضحكة بصوت عالي وختت يدها في حنكها قالت انا اقول دي الشافعه الما بتعرف حاجه يمكن شافت ليها حلاوه ولا لعبه عجبتها وما ادوها القروش جات شالت قروشي، طلعتي انتي الكبيره العاقله!!! والله يا خسارة، خسارة تربيتك يا هنادي، دي لو كانت الصغيره كان قلنا بتقدري تديها قرصه في اضانها وتوعيها في النهايه الشافع دا ما شافع ما بعرف الصح من الغلط لكن تطلع لينه؟؟ والله وطلعتي ما هينه وكاتله ضلك ساي يا بت جمال، يا حليلو ابوك كان راجل اصيل لو عايش كان رباك زي الناس وما خلاك تصلي المرحله دي...
كنت ساكته ساي ومنزله راسي سمعت صوت خطوات بتقرب بعدها فياض بقول: كنتي مطالبانا باعتذار قبل تقولي كلامك دا، لكن بعد دا انتي ما بتستاهلي اي الاعتذار، ما حارد على كلامك لأنو انتي في مقام امي ونحن في بيتك، لكن خليك عارفه لينه متربية عشرة مرات وغصباً عن عين اي زول، وقروشك حترجع ليك الليله قبل بكرا..يلا يا لينه...
مشينا البيت وامي كانت بتبكي ما فتحت خشمها معاي نهائي يمكن لأنها عارفاني غطيت على امل، فياض قال ليها خلينا دقائق يا عمتي.. طلعت برا وفياض بقى بسألني السبب الخلاني اشيل القروش شنو.... كنت قاعده في السرير وهو واقف قدامي، بعاين ليهو بعيون مرغرغه وبانكسار.... قال لي لينه انا بتكلم معاك، وريني عملتي كدا ليه؟ انا لحدي اللحظه دي ما قادر استوعب الحاصل!! الخلاك تختي نفسك في حته زي دي شنو؟؟ انا مقصر معاكم في حاجه؟.. هزيت راسي بالنفي.. قال لي طيب ليه ماده يدك على قرش غيرك؟! امك دي ذنبها شنو تسمع كلام فارغ زي دا؟؟...
نزلت راسي وانا شابكه يديني وخاتاهم فوق رجولي المضمومه بخوف، غمضت عيوني مسافه عشان دموعي ما تخذلني..
عمري ما اتخيلت انو ممكن يجي يوم وصورتي تتشوه قدامو بالطريقه البشعه دي.. مع انها ما اتشوهت قدامو بس لكن هو الوحيد الكان هاميني اللحظه دي، بعد ما كان شايفني الملاك الما بغلط ما عارفه هسي بفكر فيني كيف.. والواجعني اكتر انو كان مصدق! كنت فاكره انو بعرفني وحافظني كويس لكن طلعت غلطانه💔 او يمكن انا ظالماه، لأني بنفسي القلت ليهم انا الشلت قروش مرت عمي...
قلت ليهو انت ما مقصر معانا لكن انا حسيت العبء بقى تقيل عليك وانا ممتحنه وطلباتي بقت كتيره.. قعد على رجولو قصادي وقال لي انا شكيت ليك؟؟.. لينه انا شغال لمنو ما عشانكم انتو، ليه ما جيتي كلمتيني، ما احسن من العملتيه دا؟؟.. سكت ساي قال لي القروش وين؟.. قلت ليهو عند صحبتي.. قال لي هبه ولا منو؟.. قلت ليهو لالا، وحده بتقرا معاي في المدرسه.. قام وقال لي قومي طيب.. عاينت ليهو بتساؤول قال لي ما عارفه بيتهم وين؟.. قلت ليهو لالا ما عارفاه، بشيلهم منها بكرا... عاين لي مسافه بعدين قال: وشلتيهم لشنو؟.. سكت قال لي قولي يا لينه.. قلت ليهو عشان عايزه اشتري مذكرات.. سكت شويه بعدين قال لي بكرا بجيك نهاية اليوم عشان نمشي المكتبه، عايزه حاجه قبل امشي؟.. هزيت راسي بالنفي بعدها طلع العريشة سمعتو بتكلم مع امي لكن ما عرفت قال ليها شنو بعدها ودعها وطلع... اول ما سمع صوت باب الشارع بقفل طلعت ، لقيت امي جايه داخله من الحوش قلت ليها بتك وين؟.. قالت لينه ما... ما سمعت باقي كلامها ودخلت الغرفه والصاله بقيت بفتش ورا الستاره وتحت السراير لكن ما لقيتها، مشيت المطبخ برضو كانت ماف، اخر حاجه مشيت الحمام وكان مقفول وفي دا كلو امي جاريه بي وراي وبتقول لي خليها انا بتكلم معاها.. بقيت بضرب الباب وبقول ليها لمى اطلعي برا، يا بت انا بتكلم معاك، حتقعدي جوا لحدي متين يعني؟.. الباب اتفتح ولمى كانت واقفه وبترجف بالخوف مسكتها من ذراعها وجريتها معاي لحدي ما وصلنا الغرفه امي مسكتني من يدي وقالت لي برجاء: لينه عليك الله خليها لي انا بتكلم معاها وافهم الحاصل شنو،. انتي لمن تزعلي ما بتشوفي قدامك تاني... مديت ليها سبابتي وقلت ليها اوعك يا امي تدخلي المره دي.. جريت الشاحن من الكوبس وبقيت بضرب فيها وبقرصها واقول ليها تفو عليك وعلى تربيتك وطيتي راسنا قدام الناس خجلتينا وكسرتي عينا.. وهي بتبكي وتقول لي معليش يا لينه والله ما بعمل كدا تاني خلاص معليش خليني عليك الله... فكيتها وجرت عند امي، قعدت في السرير وانا نفسي قايم ودموعي جاريه عشره عشره يدي وشفايفي كانو برجفو.. بعد هديت شويه قمت ووقفت جمب باب الغرفه واتكلت فيهو شفتها خاته راسها في رجول امي وامي بتمشي يدها على شعرها شكلها نامت، سمعت صوت شهقاتها البتطلع كل شويتين زي لمن الطفل ينوم وهو ببكي.. قلبي وجعني شديد وضميري انبني.. كان نفسي امشي واشيلها من امي ارقدها جمبي في السرير لكن كانت في حاجه مانعاني.. رجعت رقدت وانا بتذكر الحصل قبيل لحدي ما نمت...
____________________
