للحظات حسيت نفسي بتخيل انو دا صوتو هبه مسحت دموعها وقالت لي دا فياض؟؟... سمعناهو تاني بقول السلام عليكم ناس البيت وبصفق هبه لبست التوب وطلعت قالت ليهو اهلين يا فياض اتفضل..... بعدها صوتهم بقى بعيد، رجعت رقدت وغطيت وشي بالتوب قلبي كان بضرب شديد وانفاسي ما منتظمه، الجابو شنو وعرف كيف اني هنا؟؟ هبه جات خاشه شفتها لأنو التوب خفيف قالت لي فياض دايرك.. قلت ليها قولي ليهو نايمه.. قالت لي عارفك صاحيه في زول بنوم زي الوقت دا؟... قلت ليها اتصرفي قولي ليهو اي شي انا ما دايره اشوفو يا هبه حـاضعف قدامو وافضح نفسي.. قالت لي لو ما مشيتي ياداب الفضحتي نفسك قومي ياخ.... ما كان نفسي اشوفو ابدا لكن ما كان عندي خيار تاني قمت صلحت التوب وطلعت لقيتو قاعد في كراسي الجلوس الفي العريشة سلمت عليهو وقعدت هبه جات شغلت المكيف وخشت تاني، كان قاعد وشابك يدينو فوق رجولو وانا منزله راسي وبطقطق اصابعي قال لي مالك يا لينه؟.. قلت ليهو مالي؟؟.. قال لي عيانه انتي؟.. قلت ليهو لالا ما عيانه.. قال لي طيب في شنو، ليه ابيتي تجي مع ناس امك.. قلت ليهو مصدعه شويه بس والجوطه بتذيد لي الصداع.. قال لي خلاص قومي نفحص ليك.. قلت ليهو لا ما بحتاج باخد لي بندول وببقى كويسه.. قال لي خلي قوة الراس وقومي.. قلت ليهو ما ماشه يا فياض خليني... سكت شويه بعدين قال لي يعني ما حـتحضري خطوبتي؟؟... رفعت راسي وكنت عايزه اقول ليهو انت بتستهبل؟؟ في وحده بكامل قواها العقليه بتمشي برجولها عشان تحضر خطوبة حبيبها؟؟.. ابتسمت و قلت ليهو بحضر عرسك.. قال لي لينه الله يرضى عليك قومي خلينا نفحص ليك انا ما حاكون مطمن لو ما اتأكدت انك فعلا كويسه.. قلت ليهو انا كويسه ما تخاف، هسي باخد البندول والصداع بروح، الليله خطوبتك ما تشغل بالك بحاجه ما بتستاهل... نزل راسو علي وقال لي ما بتستاهل؟؟؟ دا كلام شنو يا لينه.. قلت ليهو امشي يا فياض اكيد حيكون عندك حاجات كتيره داير تنجزها قبل المساء .. قال لي ماف شي عندي اهم منك.. حسيت برعشة سرت فيني بعد قال كلامو دا، نفسي افهم فياض دا بهتم بي كدا ليه لو فعلا ما بحبني قلت ليهو انا كويسه قلت ليك..قال لي ما حـارتاح لو ما مشينا المركز.... اتنهدت وقلت ليهو خلاص خليني امشي البيت البس لي عبايه.. قال لي بستناك في العربيه... قمنا سوا واللحظه دي جات هبه طالعه قالت ماشين وين انا سويت القهوه، فياض قال ليها لالا نمشي .. قلت ليها فياض ما بشربها زي الوقت دا.. هبه قالت انا سويتها يعني ارجعها؟؟.. قلت ليهو خلاص اشربها.. قعد شربو هو وهبه قالت ليهو دي شنو المفاجآت دي.. قال ليها والله تقولي شنو كل حاجه حصلت سريع كدا.. قالت ليهو مبروك ياخ ربنا يتم ليكم على خير.. قال ليها الله يبارك فيك عقبال ليك كمان.. هبه قالت ليهو بري انا لسه صغيره.. ضحك وقال ليها فعلاً لسه صغار هسي لينه دي لو جاها عريس انا ما بقبل الا تكمل جامعتها.. هبه قالت ليهو اجييي يمكن هي دايره العرس.. قبل علي وقال لالا ماف ليها.. ضحكو وانا ابتسمت غصباً عني بقو بتونسوا ويرغو وانا قاعده منتظره وهبه كل شويه تفتح موضوع جديد، لمن قبلت علي هزيت ليها راسي بمعنى كفايه خلاص، خلصو الموضوع الكانو بتكلموا فيهو بعدين قمنا، عربيتو كانت جمب بيت ناس هبه قال لي اركبي.. قلت ليهو هدا البيت اركب شنو، خليك هنا بلبس العبايه وبجي... وقف ورا العربيه اتكل فيها وبقى شغال بتلفونو وانا مشيت بيتنا لبست العبايه وجيتو واتحركنا على اقرب مركز مننا .. خشينا لقينا كمية خلق ما طبيعيه قال لي الحاصل شنو الليله؟.. قلت ليهو ما عارفه... سجلنا وقعدنا سمعنا الناس بقولو عاملين يوم مفتوح الفحص ومقابلة الدكتور وكلو مجان قلت لي فياض خلاص انت امشي انا بتصل ليك لمن النتيجه تطلع.. عاين لي بحده قلت ليهو جاده معاك والله.. قال لي لينه اسكتي... اخر مقعدين ياهم القعدنا فيهم بعدو الناس البجو بقو يقيفو، لمن جات مرا كدا كبيره فياض قام ليها.. أثناء ما مستنين كدا شفت عبدالرحمن وامو خاشين كان ساندها وهي بتقول في حاجه شكلها هايجه معاهو وهو ساكت ساي، فياض مشا عليهم سندها معاهو لحدي ما وصلونا قمت عليهم سلمت عليها وعلى عبد الرحمن وقلت ليها اقعدي هنا قالت لي يديك العافيه يا بتي.. عبدالرحمن قال لي فياض الحاصل شنو الليله؟.. فياض قال ليهو والله سمعنا بقولو في يوم مفتوح .. عبدالرحمن قال ليهو ايواا.. عاين لي امي وقال ليها نشوف مركز تاني يا حجه؟... قالت ليهو انا قعدت تاني ما بقوم من قبيل كان تنزل تشوف الوضع كيف حتن تجي تنزلني جاي هسي بعد روحي طلعت عشان اقعد تقول لي نشوف مركز تاني؟.... اتفاجأت من طريقة ردها يعني سأل سؤال عادي ما كان في داعي لي دا كلو قال ليها حاضر راحتك بس ... فياض تلفونو ضرب عاين لي وقال لو ندهوك خشي ارد على المكالمه دي واجي.. قلت ليهو طيب... عبدالرحمن قال لي امو انا ماشي اسجل.... بعد مشا قالت لي انتي بت هنادي مش؟.. قلت ليها اي.. قالت لي ما شاء الله ربنا يحفظك.. قلت ليها تسلمي يا خالتو.. ضحكت وقالت لي خالتو؟؟ قولي لي حبوبه عادي ما بزعل... قلت ليها لالا ياخ انتي صغيره.. قالت لي صغيره وووين انا حفيدتي الكبيره اكبر منك، بالصِح انتي عمرك كم؟.. قلت ليها قربت اقفل ال١٩ سنه.. قالت لي وحلاتي صغيرونه.. رفعت راسها عاينت وراي وقالت الود دا ماشي وين ومخليني براي.. قبلت لقيتو ماشي على الباب قلت ليها بكون ماشي قريب بعدين انتي ما براك هدا انا معاك.. قالت لي انتي هسي بتخشي للدكتور.. قلت ليها ما بتجيك حاجه يا خالتو المركز هدا مليان.. قالت لي انتي عندك شنو؟.. قلت ليها ما عندي شي والله بس جاني صداع وفياض قال الا نمشي نفحص ليك.. قالت لي ايوااا الزمن دا البنات القدركن بصدعو باقل شي حناكيش خلاص ما بتستحملوا حاجه بشمس النهار ساي بتمرضو.. ضحكنا وقلت ليها اي والله، وانتي مالك؟.. قالت لي جايه افحص السكري من امس حاسه بيهو مرتفع.. قلت ليها سلامتك.. قالت لي الله يسلمك... لمن الناس الكانو قدامي طلعو عاينت لفياض لقيتو لسه بتكلم قلت ليها انا حـادخل.. قالت لي ما مشكله خشي هداك ولدي جاي... قمت دخلت الدكتور وريتو اعراضي كتب لي ورقه وقال لي افحصي الملاريا والتايفود.. لمن طلعت لقيتهم واقفين مع حجه ربيعه مشيت عليهم واديت فياض الورقه مدا لي سندوتش قلت ليهو ما جعانه قال لي عدم الاكل دا ياهو الممرضك.. حجه ربيعه قالت لي اكلي يا بت الفطور زمنو راح زاتو... شلتو ومشينا المعمل فحصو لي وطلعنا تاني قعدت اتونس مع حجه ربيعه وفياض وعبدالرحمن كانو بتونسوا سوا لحدي ما دخلو للدكتور.. قلت لي فياض جبت السندوتش دا من وين؟.. قال لي الطعميه سمحه مش؟.. قلت ليهو شديد ما كنت جعانه لكن اكلتو.. قال لي جابهم عبد الرحمن ما عارف من وين بكون من الكافتريا البي جاي دي.... استلمنا النتيجه وطلع عندي ملاريا اتفاجأت لأنو جيتي للمركز دي كانت عشان فياض بس ما افتكرت اني عيانه فعلا.. مشينا الصيدليه لقينا عبدالرحمن هناك يشيل في ادويه لي امو قال لي كفاره ربنا يواليك بالعافيه.. قلت ليهو امين يارب... شلنا الحبوب وطلعنا فياض قال لي دقيقه جاي .. مشا الكافتريا وجا شايل كيس فيهو سندوتشات اداني ليهو قلت ليهو انا برجع براي.. فتح لي الباب وبقى بعاين لي قلت ليهو جاده معاك انت حتوصلني تاني تجي راجع؟؟ اصلا المسافه ما بعيده.. قال لي اركبي.. عبدالرحمن جا طالع قال لي فياض لسه واقفين؟.. فياض قال ليهو الاخت قالت الا ترجع براها في السخانه دي دايره تكدرها للبيت.. عبدالرحمن قال ليهو انت مشوارك لو بجهه تانيه خليها ترجع معانا انا جاي بعربية عادل اخوي.. عاينت لي فياض وقبل يرد قلت ليهو خلاص برجع معاهم يلا مع السلامه.... خليتهم واقفين ومشيت ركبت ورا قلت لي حجه ربيعه حارجع معاكم.. قالت لي ما عندك اي مشكله ، اها قالو ليك شنو.. قلت ليها ملاريا.. قالت لي كر علي سلامتك يا بتي.. قلت ليها الله يسلمك... لمن عبدالرحمن جا اتحرك والطريق كلو ما اتكلم امو كانت بتتكلم معاي ما سكتت لحدي ما وصلنا.. شكرتهم ومشيت على بيت ناس هبه لمن وصلت وشافت كيس الدوا قالت لي دا شنو انتي عيانه يعني؟؟.. قلت ليها ما عارفه جاتني ملاريا من وين.. ضحكت وقالت لي شي عجيب، تلفونك دا ضرب كم مره... ياداب انتبهت اني ما شلتو معاي قلت ليها منو الضرب قالت لي فياض، هو ما وصلك ولا شنو؟؟. قلت ليها لالا.... لمن ضرب تاني شلتو و اديتها كيس السندوتشات رديت عليهو قال لي وصلتي؟؟.. قلت ليهو اي.. قال لي مشيتي البيت؟.. قلت ليهو لالا مع هبه.. قال لي كويس خليك معاها ما تقعدي براك في البيت.. قلت ليهو كويس.. سكتنا شويه بعدين قلت ليهو فياض انت القال ليك منو انا عيانه؟.. قال لي اتصلت لي عمتي عشان اقول ليها ما تطلعوا جاي عليكم قالت لي هسي ركبنا لكن لينه ما معانا وورتني.. قلت ليهو اممم طيب مع السلامه.. قال لي الله يسلمك، ما تنسي الدوا.. قلت ليهو كويس....
