لمن وصلنا المدرسه كانت ٩وخمسه دخلنا لقينا ايلاف براااها في الحوش واصوتت الاساتذة جايه بعيد من الفصول سلمنا وقلت ليها اتأخرنا؟.. قال لي لالا لي دقيقتين من جيت قلت استناكم ونمشي لي خالتو سوا قلت ليها خلاص ارح..... هبه اتصلت لاستاذ يوسف ونحن مشينا ليها في البوفي سلمنا عليها ايلاف قالت ليها ما نكون اتأخرنا.. عاينت للحاجات وعاينت لينا بعدها قالت لينا ااا معليش انا ما بقدر ابيع ليكم جبت السندوتشات معاي.... انا وايلاف عاينا لبعض في نفس اللحظه ومخلوعين قلت ليها دقيقه كيف يعني جبتي حاجاتك معاك؟؟ نحن مش الاسبوع الفات اتصلنا وكلمناك ليه وقتها ما قلتي لينا انا بجيبهم؟؟... قالت انا شفتكم متحمسين وما كنت دايره اكسفكم قلت اخليكم تشتغلو لي اول اسبوع، لكن حصلت لي ظروف وما بقدر اتحمل اي خسارات.. قلت ليها خسارات؟؟؟.. ايلاف مسكتني من ذراعي وقالت لي لينه.. قبلت على خالتو تماضر قالت ليها طيب ما بتقدري تبيعي لينا يوم الليله بس؟ عشان تعبنا في الحاجات وخمخناهم من البيت، بيعي لينا ديل وتاني ما بنجي...الخاله قالت ليها لكن انا جبت معاي ولو بعتهم حقني حيرجعوا ساي، لكن ممكن ابيع ليكم الباسطه.. قلت ليها شكراً يا خالتو ما تبيعي لينا اي حاجه، ارح يا ايلاف... شلت كيسي والصينيه ومشيت ايلاف جات بي وراي وقالت لي مالك ابيتي؟.. وقفت وقبلت عليها قلت ليها مالي ابيت؟؟؟ والله تاني لو قالت لي بديك اضعاف سعرها ما كنت بديها تبيعهم لي... واصلت مشي لحدي ما قعدت تحت الشجره المتعودين نقعد فيها ايلاف قعدت وقالت لي نحن ما عارفين ظروفها ما نلومها ساي.. قلت ليها ظروفها دي غلبها تقولها لينا بالتلفون؟؟ عندها رقمي ورقمك لو دقت تلفون قالت لينا ما تجو كان خسرت شنو؟ مخليانا من امس واقفين على رجل واحده قايمين وواقعين بنجهز... كنت زعلانه شديده وممغوضه من جواي من حركة خالتو تماضر ومستغربه من ردة فعل ايلاف لأنها كانت متحمسه اكتر مني.. قالت لي يمكن ما عندها رصيد، نحن الغلطانين كان من امس نتصل ونأكد ليها لكن ما فكرنا فيها...
... اللحظه دي قربت اكفتها لكن مسكت نفسي واخدت نفس طويل قلت ليها اسكتي يا ايلاف بالله عليك اسكتي، التانيه ديك كمان وينها خلينا نتخارج ما قادره اقعد ثانيه تاني في المدرسه دي.. قالت لي بري ما عارفاها بتكون مع استاذ يوسف في المكتب ولا حاجه.. قلت ليها ناديها عليك الله انا بقعد ثانية تاني في المدرسه دي.. قالت لي خليها تاخد راحتها، اصلا نحن الزنينا عليها عشان تجي... قلبتها في راسي لقيت فعلا كلامها صح ما ظريفه مننا.. عاينت للاكياس وقلت ليها دا اشاره لأننا تاني ما نفكر نشتغل خالص.. قالت لي لينه دا قدر ربنا حتعترضي عليهو؟ ما عندنا قسمه فيهم خلاص ما تتذمري... اتنهدت وقلت ليها الحمدلله على كل حال لكن برضو تاني ما بفكر اشتغل.. قالت لي ما تقوليها بالزهج دا البتعملي فيهو دا اسمو قنوط من رحمة ربنا قوليها وانتي موقنه من جوا انك بتشكريه على كل حاجه مكتوبه ليك لأنو لخير بعرفو هو وحدو.... قلت ليها والله ما هاين علي تعبنا دا كلو.. قالت لي ربنا كريم.. قلت ليها ونعم بالله.. عم الصمت بيناتنا لمسافه بعدها قالت لي نحن ليه ما عملنا تذكار؟؟.. انا كنت خاته يدي في خدي وسرحانه قلت ليها شنو؟؟.. قالت لي عايني قبلت مكان بتعاين لقيت البنات كاتبين اساميهم في الشجره، كسرت من فرع وبقت تنحت في اسمها بعد انتهت قالت لي هاك.. شلتو وبقيت بكتب لمن قربت اخلص قالت لي دا شنو يا بت.. قبلت عليها وقلت ليها دا تذكاري.. قعدت تضحك وقالت لي والله انتي ما نصيحه.. رجعت عاينت للشجره مكان نحت فيهو " ما تشتروا من خالتو تماضر حاجاتها غاليه دكان المصري برا ارخص منها".. شخبط الكتبتو وكتبت اسمي واسم هبه ووصلتهم بخطوط وعليها اسهم بقو عاملين زي المثلث قلت ليها عارفه الخطوط دي معناها شنو؟.. قالت لي شنو؟.. قلت ليها دي علاقتنا ببعض ما حتتقطع لحدي ما نموت.. اشرت بالقشه على الاسهم وقلت ليها دي انتي لو يوم احتجتي لي وما لقيتيني حتمشي لي هبه.. واشرت على سهم هبه.. ودي انا كذلك وهبه نفس الشي... ابتسمت وشالت مني القشة ورسمت قلب كبير حولين المثلث قالت لي عارفه القلب دا شنو؟.. قلت ليها شنو؟.. قالت لي دي حياتنا لو مشينا بالنمط دا حتكون كلها طمأنينة وامان لأنو الواحد في الدنيا دي لو لقى زول يلجأ ليهو وقت يحتاج والزول دا يقيف معاهو تاني ما ماف شي في الدنيا بكسروا.. قلت ليها حنمشي بيهو بإذن الله... رقدت في كتفي وقالت لي نعسانه ياخ ما نمت كويس بالليل وقمت قبل الصبح.. قلت ليها مالك ما نمتي؟.. قالت لي كنت بفكر.. قلت ليها في شنو؟.. قالت لي في حسان.. قلت ليها اها اها.. عاينت للشجره وقلت ليها الحياه دي لو كانت من غير رجال ما كنا حنحتاج للقلب دا لأنو ما حتواجهنا اي مشاكل وحياتنا كلها حتكون باسطه، زي الباسطه البارت دي .. قالت لي وخالتو تماضر؟.. قلت ليها ايواااا وخالتو تماضر وأمثالها... قعدت تضحك قلت ليها مالو معاك.. قالت لي لالا ما عمل شي لكن اديتو النور الاخضر... رجعت لورا شويه وعاينت ليها رفعت راسها وقالت لي امس اتلاقينا لي الشارع قال لي حاستنى لمتين؟ قلت ليهو..الخ .... قلت ليها الولد حيكون الليل كلو بفكر فيك عشان كدا ما قدرتي تنومي.. قالت لي ياربي؟.. وقعدنا نضحك..
