الاسبوع عدا عادي لحدي يوم الجمعه، صحيت مبسوطه وكلي حماس كنست ومسحت جوا البيت وولعت البخور ومشيت على الحوش رشيتو وكنستو بمزااج بعديها وصلت الخرطوش ومشيت الشارع.. شفت رواح طالعه بلبس الشغل بنفسي قلت شغل شنو دا يوم الجمعه؟ تاني قلت اه انا مالي.. نحن بيتنا في النص بين بيت عمي فيصل وبيت عمي جلال، جات طالعه حليمه مرت عمي جلال قالت لي لينه كيفك.. قلت ليها كويسه.. خشت بيتنا وانا واصلت رش، من بعيد شفت صلاح ومعاهو واحد جايين من الزلط جريت الخرطوش من جوا عشان يحصل، الولد المعاهو دخل بيت ناس سميه جارتنا بيتهم بداية الشارع وصلاح جا من بعيد وبأشر لي بي سبابتو يعني اوعك وانا بضحك قلت ليهو تعال تعال ما بهبشك.. قال لي كل مره بتقولي كدا.. اول ما قرب رفعت الخرطوش ورشيتو بالمويه بقى بسب لي وانا مت ضحك🤣🤣.. قال لي واقسم بالله انتي بت عواليق وحيوانه، لكن اصبري لي ليك يوم.. جدعت الخرطوش في حوض النيمه الجمب بيتنا وقلت ليهو الجامعه بتغير الناس كدا؟.. قال لي عايني هنا انا وريتك من هسي عشان ما تمسكك صدمه حضاريه بعدين، اوعى يغشوك ويقولوا ليك اجتهدي في تالته عشان ترتاحي في الجامعه.. عمل حركة بي خشمو وقال لي الترابه في خشمك انا غايتو بلعت قلاب كامل لمن صدقت الكلام دا انتي ابقي واعيه واسمعي كلام مجرب ما تسمعي كلام طبيب وحيات الله من اول محاضرتين.. بقى بحسب باصباعو.. تستات كويزات تساليم بحوث وعييييك هيلماااانه لي شيت ما بتعدى العشرين صفحة، عايني شفتي اقري قدر الباص بس وخشي ليك اي تخصص اصلا كلو زي بعض ما منو فايده، هداك اخو قصي صحبي قرا طب سته سنين وهسي سايق ركشه وولد خالد جارنا دا مهندس معماري وهسي ماسك دكان ابوهو، يا زوله هي اقول ليك حاجه القرايه دي زاتا خليها والله اخير ليك تعرسي وتجيبي ليك اولاد وتقريهم خلاوي، ختي عشره خطوط تحت كلمه خلاوي، اخير ليك تخشي بيهم الجنه كان ما اتمتعتي في الدنيا تتمتعتي في الاخره انتي قايله شنو اصلا البتولد فقير دا طول عمرو بعيش فقير ما يغشوك يقولو ليك اقرا واجتهد وبالكفاح بتنال وما عارف بالسعي بتصل وكلام فارغ لالالااا دي مهزلة والله..... قلت ليهو اجيب ليك مويه تبل ريقك؟.. قال لي الاهي تتبلبلي في الدنيا دي اكتر مما انتي مبلبله انا واقف ساعه بنصح فيك تقولي لي "اجيب ليك مويه تبل ريقك".. ضحكت على الطريقه الحاكاني بيها، حليمه جات طالعه قالت ليهو يا ولد انت لسه ما مشيت البيت؟ الليله ابوك بضبحك مستني الماسورة عشان يركبها ويطلع.. صلاح نطط عيونو وختا يدو في راسو بعد داك فك الجريه وخشا بيتهم حليمه قالت لي غايتو الولد دا جنو مقابضه كان لقى ليهو كديسه ماشه ساي في الشارع بوقفها... صلاح دا ولد عمي جلال، امو خشت بيتهم وانا جبت المكنسه كنست ودخلت استحميت وسرحت شعري بعد داك مشيت لي امي في المطبخ قلت ليها عامله لينا شنو قالت لي ملاح روب، لكن شايلين الفطور وماشين لي ناس سميه.. قلت ليها ليه؟.. قالت لي ما ياهو نسيبتها دي ليهم زمن جابوها عيانه وكل مره نقول نمشي، هسي حليمه جات قالت لي امس في قعدة القهوة اتفقوا يمشو ليها الليله وجات كلمتني.. قلت ليها ايواا.. كبيت لي عصير ومشيت عشان اقرا، لمى كانت في التربيزة وبتكتب مشيت جبت كبايه تانيه ختيتها ليها وقعدت في الكرسي القصادها قالت لي شكرا، مع ابتسامه ما رديت ليها.. ختت القلم وقالت لي لينه انتي لسه زعلانه مني؟.. سكت.. قالت لي انا اعتذرت ليك كتير وقلت ليك دي اخر مره.. رفعت راسي من الكتاب ودي كانت اول مره اتكلم معاها من الحصل يوم الاحد الفات، قلت ليها ليه شلتيهم؟.. سكتت كأنها متردده تحكي ضيقت عيوني عشان اخوفها قالت لي رحمه قالت لي ارح نشيل قروش امي عشان نشتري بيهم بكرا حلويات كتيره من المدرسه وخليهم معاك عشان هنا امي ما تشوفهم... طبعاً بالصدمه ما قدرت ارد قلت ليها شنووو؟؟؟ يعني رحمه هي الحرشتك؟.. قالت لي انا قلت ليها بشيل بكرا قروش ذياده من امي بتديني لو قلت ليها قالت لي لالا امك حتديك ميه يا متين بس ودي بتشتري لينا اي شي دايرنو.. ختيت يدي في راسي وقلت ليها يعني انا اضطريت اسمع كلامهم الفارغ داك وسبب البلوه اصلا بتها؟؟ خليها تصبر لي الليله.. قمت وانا بلبس في التوب امي جات خاشه قالت لي ماشه وين؟.. حكيت ليها الحصل قالت لي خلاص الحصل حصل ما تمشي.. قلت ليها كيف يعني الحصل حصل يا امي؟ يعني نسكت على الظلم الحصل لينا والكلام الفارغ القالتو؟؟.. قالت لي حتمشي تقولي ليها شنو؟ لمى سرقت القروش عشان رحمه زنت ليها؟ وانا غطيت عليها عشان ما تشاكليها؟ اوريك حتعمل شنو؟ حتجيب بتها تسألها وبتها حتنكر تقول انا ما قلت حاجه وحيطلعونا كذابين وحراميه في النهايه.. اخدت نفس طويل واتنهدت قلت ليها كويس يا امي انا ما بفتح خشمي لكن ما تجي يوم تقولي لي دا في النهايه عمك والدم ما ببقى مويه، نحن سكتنا للناس ديل كتير ودا ياهو المخليهم يتعاملوا معانا بالطريقه دي وكل مره يدوسوا علينا عشان عارفننا بنسكت لكن تاني البيت داك انا ما بعتبو وعمي زاتو كان شفتو في الشارع ما بسلم عليهو... قالت لي ما تبقي كعبه، عمك ذنبو شنو في الحصل دا هو زاتو ما اظن عارف بيهو وشاديه دي زاتا بتفور في وقتو وبكرا بتجي تتونس وتضحك معانا عادي.. ضحكت باستهزاء وقلت ليها بتجي تتونس وقت المصالح بس وعمي عاااارف وشايف اي شي حاصل لكن بمشي بكلام مرتو وانتي خليك في مسكنتك وحسن ظنك دا لمن يجي يوم يعملو فينا عمله يخلوك تضحكي على روحك في الكنتي بتقوليه...... قلعت التوب وطلعت برا بخطوات سريعه، اتفاجأت بي فياض قاعد في كرسي في العريشه اتخلعت ورجعت بسرعه الحمدلله انو كان بعاين للتلفون وما شافني، امي جات ولاحظت لي مخلوعه قالت لي مالك؟ قلت ليها مافي شي فياض جا وقاعد برا... خشيت ولسه ضربات قلبي ماشه ذايده، بحصل لي كدا كل ما اشوفو بس المره دي غير ابتسمت وانا بتذكر شكلو وهو لابس العلى الله البيجيه ولحيتو الحالقها بشكل جذاب وشعرو المحلوق برضو على خفيف.. لقيت لمى بتعاين لي باستغراب قلت ليها مالك؟ قالت لي انا ولا انتي؟ بتضحكي مع روحك براك ليه؟.. ما رديت قمت لبست التوب وطلعت سلمت عليهو قال لي امي انتو قاعدين بالله؟ انا دقيت مسافه ولمن دخلت سلمت ماف زول رد، قلت بتكونوا طلعتو.. امي قالت ليهو نطلع كيف بدون ما نوريك ونحن عارفنك بتجي الليله؟... كنت بحاول استرق النظر كل ما يندمج في الونسه مع امي شكلو كان متغير بعد الحلاقه، وجيه شديد او يمكن انا بس الشايفه كدا واتمنى ذلك... امي استأذنت من فياض وشالت صينيتها مشت ناس سميه وانا ختيت فطورنا وفطرنا، وانا بغسل في العده فياض جاني قال لي عندك قرايه هسي؟.. قلت ليهو لالا بقرا بعد اصلي الظهر.. قال لي خلاص حاتعبك معاي، اكوي لي الجلابيه دي عليك الله.. قلت ليهو طوالي مافي اي تعب... خلصت العده سريع سريع وطلعت من المطبخ، كان بتونس في العريشة مع لمى، سبحان الله قادر يتونس ويدخل جو اي زول مهما كان عمرو.... شلت كيس الجلابيه وخشيت جوا كان فيها ريحة عطرو مسكتها شميتها مساافه.. هسي لو كان في حاجه بتحفظ ريحة العطور والواحد كل ما يشتاق للزول البستخدمها يشيلها يشمها مالو؟؟.. ضحكت في نفسي وقلت انا جنيت والله وبعدين ممكن عادي اشتريها واعمل كدا لكن ما اظن اصل المرحله دي... فرشت البطانيه في الارض وكويتها بي مزااااج يمكن قعدت نص ساعه بكوي، انا اصلا بحب المكوه ولو ما بحبها حبيتها من اللحظه دي.. ناداني بي برا مشيت قال لي لسه؟ قلت ليهو قربت.. قال لي يا زوله يدك مالا تقيله كدا ... ضحك وانا بقيت مسهيه فيهو ضبطت نفسي سريع وقلت ليهو هههه اي يدي تقيله في المكوه لكن بكوي بمزاج.. مشيت تميتها وجبتها ليهو قال لي تسلم يدك يا ستهم.. قلت ليهو العفو ما عملت حاجه.. مشا حمام الرجال عشان يستحمى وانا ركبت ليهو القهوة مع اني ما بعرف اعملها لكن هو متعود يشربها بعد الفطور وبصدع لو ما شربها ف حاجازف اعملها.. ركبت المويه ومشيت فتشت تلفون امي الحمدلله انو كان قاعد في الشاحن ما شالتو معاها شلتو وعملت بحث في قوقل عن طريقة عمل القهوه.. جاتني كم طريقه لي اي نوع قهوه وما فهمت شي، قلت حاتوكل واعملها بطريقتي والتبقى تبقى.. المهم قدَّرت كدا وعملتها ليهو، جاتني لمى شايله كرتونة شوكولاته مربيلا وشايله وحده في يدها بتفتح فيها بخشمها قالت لي هاك ختيها جوا.. قلت ليها جابها فياض ولا شنو؟ .. قالت لي اي.. قلت ليها طلع من الحمام؟.. قالت لي اي بتكلم بالتلفون هسي.. قلت ليها خلاص امشي استحمي عشان اسرحك.. ضقت من القهوه قبل اوديها وما عرفتها ظابطه ولا لا اصلا ما بحبها ولا حصل شربتها.. قلت ياربي مره ولا هي اصلا كدا؟ يا زوله خلاص وديها.. طق اتذكرت حوار كان بين هبه وايلاف قمت شلت من الماربيلا وحده وختيتها في الصينيه طلعت لقيتو خاشي على العريشه قال لي يا سلاام عملتيها لي، انا قلت الليله عمتي ماف معناها ما حاشربها.. ختيتها جمبو وقلت ليهو اول مره اعملها ما عارفاها طلعت كيف كدي شوفها.. ختا ملعقة سكر وضاقها بقيت بعاين لملامح وشو استنتج منها اذا عجبتو ولا لا، لمن كشر حواجبو لعنت نفسي بجوا مية مره وقلت دي نهاية الشلاقه يا لينه.. بعدها ختاها وضحك قال لي ظابطه والله تاني شكلي حاخليك تعمليها كل ما اجي.. قلت ليهو بالجد؟؟ سمحه يعني؟.. قال لي جداً.. حسيت نفسي حاطير بالفرح وبقيت بتكلم بي حماس قلت ليهو لو شربتها مع الماربيلا كمان بتكون احلى سمعت قبل كدا صحباتي بقولو لو ذوبتها فيها بتدي نكهة سمحه.. قال لي والله؟ مالو نجرب لكن لو ما عجبتني حتمشي تعملي لي وحده تانيه.. قلت ليهو حاضر... شال وحده ختاها وبعد شويه ساطها بالملعقه بعدها شرب منها وقال لي يا سلاااام والله دا اكتشاف عظيم صحباتك طلعو ذويقات (من التذوق).. بعد خلص كبايتو قام وقال لي شكراً على المكوه والقهوه اي وحده اخطر من التانيه تسلمي يا بت العمه... قلت ليهو العفو ما عملت شي.. قال لي يلا انا حاطلع.. قلت ليهو ما مقيل معانا؟.. قال لي لالا عندي شغل في البيت في سباك جاي يشوف ماسورة المطبخ قال بجي بعد الصلاه يلا سلمي على عمتي.. قلت ليهو الله يسلمك يصل ان شاء الله....
