" ما عارفه ابدا من وين ولا ابدا كيف.. من عملت الحادث ودخلت غيبوبه ما كنت بفكر غير في حاجه واحده بس وهي اني اعترف ليك والبحصل يحصل.. اتعذبت كتير بسبب حبي ليك، كل ما اشوفك بتتكلم مع وحده غيري كنت بزعل لو عاينت لي بت ساي كنت بغير.. كل يوم كنت بنوم وبصحى وصورتك في بالي.. انا ما قادره انساك او انسى حبي ليك، او بالاصح انا ما عايزه.. وهسي وبعد كل السنين العشتها وانا داسه الحاجه دي جوا قلبي عايزه اقول ليك اني بحبك يا فياض.. عارفه انك ممكن تفكر اني انانيه وخاينه.. بس انا ما عرست عبدالرحمن برضاي وممكن تسأل امي لو ما مصدقني حتى ممكن تسألو هو زاتو وحيوريك انو زواجنا دا في الورق بس لكن عايشين زي الاخوان.. انا عارفه انك ما بتحبني وما شايفني غير اختك الصغيره لكن انا لو ما حكيت ليك الفي قلبي ما عارفه حيحصل لي شنو وهسي ما كلمتك عشان حاجه غير اني اقول الفي قلبي وارتاح بس وما طالبه منك اي شي.. وعبدالرحمن حـاحكي ليهو اي شي، حاوريه اني ما بقدر اواصل معاهو واظلمو معاي لأني ما بقدر اعيش مع انسان ما عندي مشاعر تجاهو.. وحـ اقولها ليك للمره التانيه والاخيره.. انا بحبك يا فياض، وعمري ما حـاحب انسان زي ما حبيتك انت، عمري ما حـاحب غيرك اصلا"...
رفعت راسي لقيتو بعاين لي ومكشر، لاول مره يعاين لي بالطريقه دي قلت ليهو عبدالرحمن خليني اشرح ليك.. قال لي ماف شي داير شرح اي شي، كاتباه واضح زي الشمس... سكت ونزلت راسي رمشت كم مره وعضيت شفتي وانا بحاول امسك دموعي.. شفتو وهو بتحرك ماشي على الباب قلت ليهو ما حتقول شي؟.. قبل عاين لي مسافه وطلع بدون ما يقول اي شي.. اترميت في السرير الوراي وانا بعاين للباب دموعي جات جاريه غطيت وشي وبقيت ببكي وبتنهد بدون صوت.. بعد مسافه قمت شلت الورقه وبقيت بشرط فيها رميتها في الارض وبقيت بعفص فيها وببكي قعدت في الارض واستندت في السرير وانا بتنهد وبعاين للدولاب.... للصباح ما نمت، كان جواي خوف لأول مره احس بيهو، خوف من اني افقدو وافقد وجودو في حياتي، خوف ما حسيت بيهو حتى لمن فياض دخل في غيبوبه وسافر... اول ما الصبح اذن قمت طلعت برا وقفت في باب الصاله لحدي ما شفتو جاي من الصالون، طلعت في نفس الوقت قلت يمكن يتكلم معاي.. جا اتوضى وطلع كأنو ما شافني.. اتوضيت وصليت ومشيت المطبخ سويت الشاي وكنت مستنيه على امل يجي داخل في اي لحظه لكن ما جا.... صحيت البنات وشربنا الشاي وعملت ليهم سندوتشاتهم ولبسو ودا كلو ما جا من الصلاه الحجه قالت لي راجلك دا وينو الليله.. قلت ليها ما عارفه طلع للصلاه وما جا تاني.. قالت لي اجي يا ناس دا كلام شنو كدي دقي ليهو... اتصلت ليهو ما ردا.. ايه ولمى طلعو المدرسه وانا كنت شغاله جامعه لكن غلبني امشي بقيت قاعده بس راجياهو وبطني كانت واجعاني بالخوف... اليوم دا كان اتنين وما بجي للفطور لكن برضو اتصلت ليهو وما ردا.. حجه ربيعه قالت لي الود دا حاصل ليهو شي اصلو ما طبيعي.. قلت ليها لالا ما فيهو شي يا حجه.. قالت لي يوم متين كان بطلع قبل يجي يسلم علي في راسي لالالا انا متأكده في شي حاصل قلبي دا ما مطمن نهائي.... بقت تتكلم وتكورك وانا خفت زيادة قلت ليها طيب كدي جيبي تلفونك نحاول منو.. اتصلت وردا لي طوالي فتحت الاسبيكر واديتو ليها قالت عبدالرحمن؟؟.. قال ليها اي يا امي.. قالت ليهو وين انت.. قال ليها شغال، في شنو؟.. قالت ليهو انت يا ود ماك نصيح؟؟ مالك ما بتقول للزول طالع.. قال ليها طلع لي شغل اضطريت اطلع بدري.. قالت ليهو التلفون دا انت شايلو لشنو ما تضرب تقول انا مشيت مخلينا نقلق زي دا.. قال ليها في زبون واقف معاي يلا.. قفل الخط والحجه قعدت تكورك تاني وتقول اصلو كان ما جلطني يوم ما برتاح انا ما عارفه اسوي شنو للود دا احيااا يا الله تصبرني بس..........
