لمن طلعت من بيت ناس عمي جلال لقيت بابنا فاتح قلت تكون امي خلتو لي خشيت وجريت الطرحه وناديتها بصوت عالي اوووووومييي.. ما كان في زول في العريشة دخلت جوا ووقفت لثواني مخلوعه.. امي قالت ليهم ايوه هنا بس يديكم العافيه.. فياض وعبدالرحمن ختو اليونِت ورفعو ريسانهم هنا ياداب وعيت لنفسي لبست الطرحه ولفيتها بعشوائيه بلعت ريقي وقلت السلام عليكم قالو لي وعليكم السلام فياض قال لي ياداب دي جيتك ولا شنو؟.. قلت ليهو اي.. امي قالت لي اها الامتحان كيف.. قلت ليها كويس.. فياض قال لي حمدلله على السلامه ياخ ان شاء الله بالتوفيق يارب.. قلت ليهو امين.. امي طلعت وفياض قبل على عبدالرحمن وقال ليهو دي بت عمتي هنادي الكبيره قال ليهو ما شاء الله، كيف احوالك.. قلت ليهو الحمدلله كويسه انت كيف.. قال لي بخير وعافيه.... بعدها طلعو على برا وانا خشيت الغرفه سمعت امي وفياض بحنسو في عبدالرحمن عشان يشرب شاي المغرب قال ليهم خلاص نصلي ونجي..... شلت ملابسي وطلعت ما كان في زول قلت لي امي مشو؟؟.. قالت لي اي قالو بصلو وبجو.. قلت ليها فياض جا متين؟.. قالت لي سبحان الله بس قفلتي مني كدا هو اتصل لي قلت خلاص مادام جا اسوق معاي عبدالرحمن عشان يغيرو لي مكان اليونت ياهو كلمتو وجينا سوا... قلت ليها ايواا.. قالت لي تعالي اعجني لي الكيكه دي سريع لحدي ما اجيب اللبن من الدكان.. قلت ليها امي انتي عارفاني ما بعرف اظبطها سويها انتي وخلي لمى تجيب اللبن.. قالت لي لمى مع ناس شاديه.. قلت ليها شنو؟؟؟ الوداها هناك شنو... قالت لي اخليها براها في البيت؟.. قلت ليها خليها يا امي اخير من تمشي بيت المرا ديك، وما سوقتيها معاك بيت ناس سميه لشنو؟.. قالت لي انتي يا بت لسه خاته القصه ديك في بالك؟ المرا نست خلاص وقعد تخش بيتنا عادي وجات اعتذرت قالت لي انا انفعلت في وقتو عشان المصران وهدي هي وبتها قعد يجونا عادي.. قلت ليها دايرين يجو اهلا وسهلا ما عندنا مشكله لكن ماف واحد فينا يعتب باب بيتهم.. قالت لي انا بعتب وما بحمي بتي من بنات عمها عشان مشكله صغيره زي دي انتي كان ما دايره تمشي على كيفك خلاص بقيتي كبيره ومسؤولة من تصرفاتك قدام ربنا فترت انا كل مره اعيد واكرر ليك نفس الكلام... طلعت قروش من شعرها وقالت لي هدي قروش اللبن دايره تمشي تجيبيه امشي ما دايره خليهو انا بسوي الكيك وبمشي بجيبو براي... رجعت المطبخ وانا اتنهدت، شلت القروش وطلعت على الدكان وانا في الطريق شفت عبدالرحمن طالع من بيت ناس سميه وكان ماشي بخطوات سريعه شبه جاري والوقت دا كان ياداب بدو يقيمو قلت هسي مش قال ماشي الصلاه؟ يكون نسى حاجه في البيت هي انا مالي ومالو.. شلت اللبن ورجعت ركبتو وختيت فيهو عودين قرفه حتى دخلت استحميت وصليت.. كنت نعسانه شديد لكن عايزه اقعد مع فياض في نفس الوقت، اتذكرت انو عبدالرحمن حيجي معاهو قلت ما حاقدر استنى ف نمت طوالي وقلت لي امي تصحيني لمن العشاء يأذن.......
الصباح لقيت في سرير في الحوش بي مرتبتو وبطانيتو وواضح في زول كان راقد فيهو قلت معناها فياض بات معانا لكن مشى وين من الصباح كدا؟ والليله جمعه يعني ما حيمشي البيت ويجي تاني.. بعد صليت الصبح مشيت لي امي لقيتها بتكب الشاي في السيرمس قلت ليها فياض كان بايت؟.. قالت لي اي.. قلت ليها ومشى ولا شنو؟.. قالت لي لا قال طالع وجاي.. قلت ليها امي انتي زعلانه مني؟.. سكتت حضنتها من ورا وختيت راسي في كتفها قلت ليها يمممه ياخ الليله اول يوم اصحى فيهو وانا ما بفكر في القرايه ما تخربي لي مزاجي الرايق ياخ.. ابتسمت وقالت لي غايتو بتقدري علي.. فكيتها وضحكت شلت كيكة من الصحن اكلت منها وانا بتكل على المسطبه وقلت ليها ما اقدر عليك الا انا.. حركت قطعة الكيك يمين وشمال وقلت ليها دي باقي امس ولا عملتيها هسي؟.. قالت لي باقي امس اصلا عبدالرحمن ما جا، لمن اتأخرو في الصلاه دقيت لي فياض قال لي اول ما طلعو للصلاه لقو امو بركبوها العربيه تعبت ودوها المركز ومشى معاهم.. قلت ليها لكن انا شفتو بعد داك كان طالع من البيت وشكلو مستعجل.. قالت لي بكون نسى ليهو حاجه البعرفني شنو، هسي فياض بكون مشى ليهم يسأل منها..... بعد ربع ساعه كدا فياض جا وقال أصبحت كويسه شربنا الشاي وقعد يسألني حاعمل شنو في الاجازه.. بنفسي قلت بركه فتح الموضوع براهو قلت ليهو مفكره اشتغل.. كشر حواجبو باستغراب وقال لي تشتغلي شنو؟.. قلت ليهو اي شي ما عايزه اقعد ساي.. قال لي انزلي كورسات... قلت ليهو انا تاني ما عايزه اقرا ولا حرف الا اخش الجامعه... قعدو يضحكوا قال لي عندي ليك فكره كويسه، بجيب ليك كتب فلسفه وعلم نفس انتي بتحبي النوع دا من الكتب.. اقريها واملي بيها وقتك.. قلت ليهو انا اقول ما دايره اقرا تقول لي كتب.. قال لي قراية الكتب ما زي قراية المدرسه لكن.. قلت ليهو برضو ما عايزه.. قال لي بجيبهم ليك وخليهم معاك متى ما حسيتي نفسك عايزه تقريهم اقري... قلت ليهو طيب لكن برضو عايزه اشتغل.. امي قالت لي خلاص قمتي لي لياقتك.. فياض قال لي طيب عايزه تشتغلي شنو مفكره في حاجه معينه؟.. قلت ليهو لا اي شغل.. قال لي تمام ارتاحي من ضغطة الامتحانات الاسبوع دا وبعدها نفتش على حاجه تناسبك.. ابتسمت وهزيت راسي... بعد شربنا الشاي قال طالع قريب وجاي.. نظفت البيت وبخرتو وسرحت شعري بعدها قعدت احضر، امي جات قالت لي دايره تشتغلي عشان قروش الجامعه؟.. قلت ليها ايوه.. قالت لي حتقدري تلميهم؟ اها قولي لميتيهم فياض بخليك تدفعيهم؟.. قلت ليها حتى كان ما دفعتهم في التسجيل بفيدوني في قروش الكتب والمواصلات بخففو شويه من المصاريف... قالت لي فياض لو عرف ما بخليك تشتغلي.. قلت ليها من ناحيتي انا ما حيعرف يا امي الا انتي لسانك يزلق.. قالت لي بري ما بقول.. قلت ليها بس كدا تمام... فتحت mbc2 ولقيت فيلم ظابط شغال قلت اجيب لي تسالي من خالتو صفاء واجي احضر.. شلت لي متين من الشنطه وفتشت لمى ما لقيتها قلت خلاص اتصالحت مع رحمه ما بتقعد في البيت ثانيه.. الفاصل لمن جا لبست التوب ومشيت جبتو وكنت ماشه سريع عشان الفيلم ما يفوتني، شفت عربية فياض جات خشت شارعنا لحدي ما وصلت البيت كان هو زاتو وصل لمحت زي في زول راكب معاهو بعدها جات تسابيح نازله لمن شافتني رفعت يدها وسلمت باصبعها ودخلت بيت عمي جلال.. فياض وقف لي لمن وصلتو قلت ليهو عينك عينك كدا.. ضحك وقال لي كدي تعالي... دخلنا قلت ليهو ياداب عرفت من امس معسكر معانا لشنو.. قال لي والله ما عرفتها بي جاي الا بالليل بعد رقدت تصدقي.. قلت ليهو صدددقتك.. قال لي جيبي تسالي اديتو كيس وشلت التاني وخشيت جوا ناداني قلت ليهو قعد احضر ما فاضيه ليك.. ضحك وقال لي كويس بتجيني جاريه بعدين.... كان بتكلم معاي كأني بهظر معاهو وما شايف النار المولعه جواي..... بعد شويه سمعت صوتو هو امي كانو بتكلمو بصوت واطي ف سمعتهم بقولو شنو..
