كلنا بقينا واقفين مصدومين!! قال مرتي ولا انا بتهيأ لي؟؟.. عمي سكت، ما بقدر يقول ليهو مرتك قبضتها امس في زقاق لأنو ما صدق عقد لي.. حليمه فجأة بقت تزغرد وامي زغردت وراها وليلى وشاديه.. البيت فجأة قلب بيت عقد جد جد.. ما كنت مستوعبه الحاصل ولا فاهمه شي، عمي عمل شنو عشان عبدالرحمن يعقد علي معقوله مشى شحدو؟ ولا بعد الصلاه قال ليهم الداير يعقد على بت اخوي اليتيمه ويسترها منو ، ما بستبعدها منو.... فجأة لقيت بيتنا مليان بـناس الحله ليلى جرتني جوا وطلعت لي فستان قالت لي البسيهو، قبل ارد جات هبه جاريه قالت دا شنو يا جماعه الحاصل شنو لينه صحي عقدو ليك على عبدالرحمن؟؟.. قلت ليها ما عارفه... ليلى قعدت تضحك قالت ليها خلاص مدام جيتي جيهيهها انا امرق على النسوان ديل.. هبه ضمتني، قعدت ابكي قلت ليها هبه انا دايره فياض، لو فياض في ما كان عملو فيني كدا، لو كان معانا ما كان حيخلي زول يعرسني، انا ما دايره غير فياض ما دايرة غيرو يا هبه... فضلت ضاماني كدا مسافه بعدين فكيتها قالت لي اهدي طيب وفهميني حصل شنو.. قلت ليها انا زاتي ما فاهمه، كنت فاكره حيقعدوا لي على شادي وفجأة جا عبدالرحمن وعمي كان بشاكلني قال ليهو ما تمد يدك على مرتي وانا اتخلعت وما كنت عارفه حاجه... كنت بتكلم بسرعه ولسه ببكي هبه قالت لي اهدي طيب اهدي والبسي الفستان لحدي ما اجيب ليك مويه تغسلي بيها وشك عشان اخت ليك حاجه خفيفه فيهو.. قلت ليها فستان شنو يا هبه انا بقول ليك شنو وانتي تقولي شنو.. قالت لي لينه عايني اصلا الناس من هسي بدو يتكلموا في العقد الحصل فجأة دا وكان اتدسيتي بي جوا ياهو البقوك لبانه في خشمهم السنه كلها.. سكت ختتو لي في كتفي وقالت لي أنجزي... قفلت الباب لبستو وهبه جابت لي المويه غسلت وشي وعملت لي بدره خفيفه وروج وخططت لي حواجبي لبستني الطرحه ومسحت دمعتي الكانت حتنزل قالت لي اوعى اوعى لا اتماسكي بس لحدي ما نطلع بعدها ممكن تبكي مع ناس امك عادي... مسكتني من يدي وطلعنا الناس تاني زغردتو، قعدت في السرير والناس جات تبارك لي، فتشت امي بعيوني لكن كانت مافيشه ناديت هبه ما سمعتني كانت بتضيف الناس، لمن سألت ليلى سألتها قالت لي بري هسي كانت بي جاي.. قمت افتشها لمن مشيت الحوش هي جات طالعه من الحمام كانت بتنشف وشها وعيونها محمره، لمن شافتني وقفت ، وقفنا لثواني بنعاين لي بعض بعدها جات علي ضمتني وقالت لي الف الف مبروك يا بتي ربنا اداك راجل ود رجال.. فكيتها وقلت ليها دا شنو يا امي؟.. قالت لي تعالي جوا بعدين اعمامك بجو يفهمونا الحاصل.. قلت ليها ماف واحد حـيجي.. قالت لي تعالي.. خشينا جوا وبعد البيت بقى فاضي ليلى جات قالت يا جماعه الحصل شنو.. امي قالت ليها انا زاتي ما عارفه دقيقه ادق لي جلال يجي يفهمنا شي فيصل ولا بجي ولا شي.. اتصلت ليهو رد ليها صلاح امي قالت ليهو ابوك وينو.. قال ليها ابوي دا طلع.. قالت ليهو خلاص تعال انت سريع.. قال ليها اصلا كنت جاي عليكم مع العريس... من سمعت كلمة العريس دي جاتني رعشة.. بعد امي قفلت هبه بقت تعاين لي قالت لي ما اتوقعت عبدالرحمن دايرك يكون حباك يوم شافك بتكوركي جمب الباب.. قلت ليها هبه شايفه دا وقت ظرافه؟.. الباب اول ما دقا ناس امي اتكبكبوا وهبه جرتني جوا بقت تتكلم وتتكلم وانا ما سامعه منها شي،كنت حاسه بحاجه غريبه وما مفهومه لكن ابدا ما احساس واحده حـيجي راجلها العقد عليها قبل شويه يشوفها... سمعنا صوت بـ برا بقول السلام عليكم ورحمة الله... ياها السلام عليكم الما بتغباني... هبه قالت لي دا هو دا هو، وعليكم السلام اتفضل... طلعت وهو جا في البدايه كنت شايفاه ياهو عبدالرحمن زاتو، بلحيتو وطولو ووقارو بس لمن اتذكرت القدامي دا راجلي بقيت شايفاه مختلف كأني ما بعرفو ولا شفتو قبل كدا.. نزلت راسي وكنت متوترة شديد ما كان عاجبني الوضع ودايراهو يطلع سريع، قرب علي بخطوات هاديه واتوترت اكتر قال لي مبارك علينا.. قلت ليهو الله يبارك فيك.. قال لي جعلني الله زوجاً صالحاً لك، وجعلني سبب في دخولك الجنه.. قرب اكتر مسكني من اكتافي بالجمبه وباسني في راسي... بعد زحا مني قلت ليهو آمين.. قال لي تبارك الله طالعه جميله شديد💙.. ابتسمت بس.. بعد طلع ما لحقت استوعب الحصل قبل شويه جوني هبه وليلى جارين وهم بسألوني قال ليك شنو؟.. لمن كلمتهم هبه قالت لي من زمان نفسي اعرف الشيوخ ديل لمن يعرسوا بباركوا لي نسوانهم كيف.. ليلى قالت هو ما شيخ لكن.. هبه قالت ليها شيخ ملتزم المهم.. امي نادتني طلعت لاقاني عبدالرحمن في الصاله خاشي طرحتي كانت راجعه ورا صلحها لي بعدين طلعت وراهو صلاح قال لي اووو بت العم العروس الف مبروك ياخ.. قلت ليهو الله يبارك فيك... امي كانت بتعاين لي صلاح ،دايره تسألو لكن شكلها ما قادره عشان عبدالرحمن قاعد.. بعد استأذنو وقامو صلاح جا تاني راجع قال لي والله الله اداك راجل، تصلي ليل نهار شكر لي ربنا عليهو... امي قالت ليهو كدي تعال ورينا الحصل حصل دا كيف... صلاح قال ليها والله عبدالرحمن جا قبل كم يوم كدا لي ابوي قال ليهو اتصل لي فيصل خليهو يجي لمن جا قعدنا كلنا وقال انا داير بت اخوكم جمال رحمة الله عليهو.. اها ابوي قال ليهو خير بنديك خبر، امس فجأة عمي فيصل نادانا مشينا لقينا عبدالرحمن معاهو وقالو يعملو العقد بكرا.. امي قالت ليهو وهي فرحانه: يعني هو من زمان دايرها؟؟.. هبه قالت لي اها مش قلت ليك؟.. قلت ليها امي انتي مالك فرحانه كدا؟.. انا العرس دا ما دايراهو وحـاكلم عبدالرحمن في اقرب وقت.. قالت لي ما غبيه من يومك غبيه ودلاهه عليك الله ولد زي عبدالرحمن دا لاقياهو وين لمن تابيهو.. ليلى قالت لي انتي زوله جاحده للنعمه بس وحات الله كان ما معرسه كنت قلت ليهو طلقها وعرسني انا... صلاح قعد يضحك قال بعد دا دا كلام نسوان اقوم انا... هبه قالت انا زاتي حـامشي يلا تصبحوا على خير... امي قالت لي اسمعي كلامي دا والله تتكلمي مع الولد تقولي ليهو ما دايراك ما عافيه منك لا دنيا لا اخره هدي كلمتك.. قلت ليها دا راجل معرس وعندو بت يا امي... قالت لي مرتو اتوفت من زمان... قلت ليها انا ما دايراهو انتي لو بتريديه انا ذنبي شنو اعرسو؟.. بقت تستغفر قالت لي ليلى البت دي انا اسوي ليها شنو؟ بس وريني، خلاص امشي قولي ليهو وخليه يطلقك وعمك المره دي يعقد ليك على شادي.. ليلى قالت لي دا لو خلاك عايشه زاتو بعد علمتك دي.... قلت ليهم كويس ما بقول ليهو، افرحوا، افرحوا وخلوني انا التعيسه... خشيت وانا متضايقه شديد، دي اكتر حسيت نفسي فيها محتاجه فيها لوجود فياض معاي هو الوحيد الكان حيفهمني💔💔.. حتى الدموع ما قدرت تنزل مني، شلت تلفوني ركبت السماعه وفتحت اغاني، ضحكت وانا راقده وبسمع فيهم بقيت بضحك بصوت عالي لمن امي جات قالت لي مالك يا بت.. قلت ليها بضحك في حالي يا امي تعالي اضحكي معاي، وحده عقدوا ليها على راجل ما دايراهو وحتعيش معاهو باقي عمرها وهسي بتسمع في اغاني... رجعت اضحك تاني امي شالت التلفون وادتني كف.. وقفت ضحك وبقيت اعاين ليها قالت لي جنيتي ودايره تجننينا معاك مش؟... قلت ليها بصوت عالي: جنيت اي يا امي انتو الجننتوني.. قالت لي عمك جلال قاعد بي برا.. قلت ليها داير شنو تاني .. قالت لي حددو العرس، بعد اسبوعين... ضحكت وشلت منها التلفون، ركبت السماعات تاني ورجعت رقدت.. امي عاينت لي بـاسى ومشت.....
