عبدالرحمن قال لي دخلي ليها حاجاتها في غرفة ايه، نحن حنمشي نسجل ليها عشان تنزل بكرا طوالي.. آيه قالت الا تمشي معاهم طلعو التلاته وانا رتبت حاجات لمى في غرفة ايه ولقيتهم مفضين ليها ضلفة ختيت ملابسها فيها.....
عدو كم يوم امي وصلت فيهم وحسيت بيها ياداب ارتاحت عبدالرحمن قال ليها ان شاء الله تجونا راجعين قريب وفياض باتم صحتو وعافيتو..... لمى وايه بقو عاملين لينا جو في البيت اي شي بعملوهوا سوا يقروا سوا ويصلو سوا وماف واحده بتنوم وتخلي التانيه صاحيه والعكس ماف واحده بتصحى وتخلي التانيه نايمه.. ذكروني زمان انا وهبه لمن كنا صغار.... يوم وانا بسوي في الفطور والبنات في المدرسه عبدالرحمن جا خاشي وهو بناديني بصوت عالي طلعت وانا مخلوعه والكمشه في يدي قلت ليهو ايوه نعم في شنو.. جا قال لي ابشري، فياض صحى... ما حسيت نفسي الا وانا ناطه وبحضنو وبضحك ضماني وقال لي الحمدلله.. قلت وانا ببكي وبضحك في نفس الوقت: الحمدلله الف حمد وشكر ليك يارب الحمدلله كنت عارفه ربنا حـيستجيب لي كنت بدعي بيقين كبير كأني بشوفوا حيقوم قدامي..... لمن وعيت لنفسي فكيتو ونزلت راسي بإحراج قرب علي وضما وشي بي يدو رفع راسي ومسح لي دموعي باصابع ابهامو كنت بنعاين لي بعض وساكتين، قطع سرحتنا صوت الحجه وهي بتنادي: عبدالرحمن يا ولد تعال هنا قول لي مالك جيت خاشي جاري كدا... فكاني ورجعت كم خطوه لي ورا باحراج اكبر عاينا لبعض تاني وضحكنا قلت ليهو حـاتصل ليهم.. قال لي تمام انا حـاكلم امي... مشيت شلت تلفوني وانا يدي بترجف وقلبي بضرب بجنون ختيت يدي في صدري واخدت نفس لقيت كمية من المكالمات من امي اتصلت ليها مكالمة فيديو ردت لي طوالي قالت لي فياض قام يا لينه فياض قام.. قلت ليها اي عبدالرحمن كلمني كيف هو كويس ؟ اديني اتكلم معاهو يا امي ولا اشوفو بس.. قالت لي اي كويس كويس شديد، هسي ابو يدخلونا كلنا دخلو بسمه وتسابيح بس، بعد شويه لمن يصحصح كويس بدخل ليهو... قلت ليها خلاص لمن تخشي دقي لي عليك الله يا امي .. قالت لي سمح سمح بدق ليك كدي هسي انا دايره اوزع الحلاوه دي على ناس المستشفى.. قلت ليها طيب طيب.. قفلت واتنهدت بارتياح كبير، كنت حاسه اني بحلم بين مصدقه وبين لا فتحت الدولاب وطلعت صورتو من تحت تيابي، مشيت اصابعي عليها وقلت اخيرا، اخيرا حـاشوفك.. لمن الباب دقا رجعتها مكانها بسرعه وقفلت الدولاب طلعت لقيتو عبدالرحمن قال لي ارح الفطور..... مشينا جمب الحجه قالت لي حمدلله على سلامتو والله فرحت ليهو فرح.. قلت ليها الله يسلمك.. عبدالرحمن قال لي سوي بليلة نوزعها في الجامع بعد نصلي المغرب...... باقي اليوم كلو كنت منتظره اتصال امي لكن ما اتصلت، لمى لمن جات كلمتها قالت لي يعني فياض حيجينا؟؟ قلت ليها اي حيجي💙... العصر الحجه قالت لي شدي البليله في الكانون عشان تطلع لحدي المغرب، ختيتها وقبل اذان المغرب بشوية عبدالرحمن جا ومعاهو كم شافع من الحله اديتهم جردل الطلس الكنت خاتاهو فيها والصحانه وطلعوا.. بعد صليت المغرب اتصلت لي امي ما ردت قلقت واتصلت لي بسمه وتسابيح برضو ما ردو، ظهرت لي حالة تسابيح كانت قبل ساعه خاته فيها " استجاب💛" وبعدها صور ليهم سوا هي وفياض وامي وخالتو بسمه وطه راجلها وصور لي فياض براهو.. ختيت التلفون وغطيت وشي وانا ببكي دموع فرح مختلطه بحزن، اتمنيت اكون معاهم في اللحظه دي.... امي رجعت لي مسحت دموعي ورديت ليها قالت لي والله ياداب لقيت فرقه ادق ليك هاك فياض سلمي عليهو... كانت اقل من ٥ ثواني لكن حسيت فيها بكمية مشاعر ما طبيعيه مشاعر مختلطه فرح على خوف على توتر على لهفة.. فياض الكنت بشوفوا تقريباً كل يوم على مدار ٨ سنين كان داخل في اي تفصيله في حياتي، نايمه صاحيه هو في بالي.. فجأة وفي لمح البصر اختفى ما كنت متخيله يجي يوم افقدو، ما جا في بالي يوم انو اكبر مخاوفي وكوابيسي تكون حاجه غير اني اشوفو مع وحده غيري لأني ما ختيت احتمال ١٪ انو يختفي بالطريقه دي... شكلو كان متغير شديد شعرو ولحيتو بقو كثيفين ومغطين وشو كلو، رجع شعرو لورا وقال عمتي انتي اديتيني منو دايره تشبكيني مع تسابيح ولا شنو.. ضحكت وقلت ليهو نستيتني خلاص؟.. قال لي لالا انتي ما لينه، يا زوله مالك اتغيرتي كدا دا العرس ولا شنو... سكت شويه بعدين قلت ليهو الف حمدلله على السلامه.. قال لي الله يسمك ياخ.. قلت ليهو انت قاعد في كرسي متحرك ولا شنو.. قال لي اي الجماعه ديل قالو الا يلفو بي.. قلت ليهو ليه مقعدنك فيهو؟.. قال لي اطمني لسه ما بقيت مشلول، حاجه طبيعيه عشان ياداب قمت.. قلت ليهو بعد الشر ما تقول كدا.... كان نفسي اقول ليهو اشتقت ليك، اشتقت اسمع صوتك واشوفك واشتقت لتشغيلاتك ونصايحك ولأي شي بخصك، بس كنت حاسه في حاجز كبير بقى بيناتنا..حسيت انو حتى هو عايز يقول حاجه لكن ما قادر.. او كنت بوهم نفسي بكدا.. امي جات مدت راسها وقالت لي يلا يلا الود دا داير يرتاح.. قلت ليها جايين متين؟.. قالت لي وين السودان؟ والله ما عارفه ما حددوا لسه لمن يشد حيلو شويه نشوف الدكتور بقول شنو... قلت ليها طيب اديني خالتو بسمه... ادتني ليها وادتني تسابيح اتكلمت معاهم بعد داك قفلت.... لمى وايه جوني قالو دايرين الغدا قمت سويتو واتصلت لي عبدالرحمن قال لي بصلي العشا وبجي اتغدوا انتو... ختيتو ليهم الحجه قالت لي اقعدي قلت ليها ما جعانه باكل بعدين..... صليت ركعتين شكر وصليت العشا وراهم لمن طلعت لقيت عبدالرحمن طالع من المطبخ شايل صينية صغيره فيها خدرة ورز قلت ليهو جيت متين؟.. قال لي قبل شويه.. قعد في الكرسي وجرا التربيزة برجلو ختا الصينيه وقعد قال لي تعالي ذودي معاي.. قلت ليهو شبعانه.. خشيت المطبخ لقيتو غسل العده الكان شايلها لمن طلعت قال لي انتي اكلتي معاهم؟.. قلت ليهو ما جعانه.. قام ساقني من يدي قعدني في كرسي الجلوس ومشا المطبخ جاب معلقه تانيه وجاب كرسي بلاستيك قعد فيهو قال لي حـتاكلي، تمام؟.. اكل من الخدره وقال لي يا سلااام في زول بفوت ملوخيه زي دي؟.. قلت ليهو ما تجامل، انت بتعملها احسن مني.. قال لي سمعتي بجملة الجمال مسألة نسبيه؟.. قلت ليهو اي.. قال لي بس التذوق نفس الشي.. ضحكت وقلت ليهو دي ما سمعتها الا عندك.. قال لي جد والله انا شايفها احسن من حقتي.. قلت ليهو اقول ليك سر؟.. قال لي سر؟ قولي.. قلت ليهو انا ما كنت بعرف اطبخ.. قال لي عارف.. قلت ليهو القال ليك منو؟ امي مش؟.. قال لي عرفت من يوم خالات آيه جو.. ضحكت وقلت ليهو يوم شاكلتني.. حكا راسو وقال لي ما تذكريني، يوم ضاعت هيبتي وانا واقف بعتذر ليك خمسه مرات.. ضحكت لمن اتشرقت قام بسرعه جاب لي مويه وهو بضحك قال لي صحه.. شربت وكنت لسه بضحك قعد وقال لي واضطريت احنس واغري محمد اشرف عشان يديني ورده من جنينتو.. قلت ليهو دا الشافع داك؟.. قال لي اي.. ضحكت قعد يعاين لي، سكت وقمت قلت ليهو الحمدلله انا شبعت.. غسلت يدي وسويت ليهو الشاي وخشيت نمت..... تاني يوم لقيت منزلين جدول المحاضرات في قروب الجامعه، نزلو لينا اشعار النزول قبل اسبوعين وياداب الجدول نزل قلت الحمدلله ما مشيت ضيعت زمني.. اليوم دا كان خميس، لحدي يوم الاحد كنت مكرهه ناس امي بالتلفونات لمن بقو ما بردوا لي، بعد نزلت جامعه وانشغلت بقيت ما بتصل كتير.. يوم رجعت تعبانه ومصدعه شديد رقدت قلت انوم شويه جاتني لمى قالت لي حلي معاي الواجب.. قلت ليها انا تعبانه يا لمى خليهو بعدين.. قالت لي بعدين انا بنوم وبكرا عندنا تفتيش.. قلت ليها بزهج: قلت ليك تعبانه ما تقعدي تنقي لي قلنا بعدين يعني بعدين... دموعها نزلت ومشت وهي بتبكي بعد شويه الباب دقا قلت منو؟.. عبدالرحمن قال لي دا انا... قمت لبست التوب وفتحت الباب قال لي انتي شاكلتي لمى؟.. اتنهدت وقلت ليهو ايوه شاكلتها.. قال لي ليه؟.. وريتو السبب قال لي البت زعلت شديد وقالت دايره امها تعالي اعتذري ليها.. طلعت لقيتها لسه بتبكي وايه جمبها قعدت جمبهم وقلت ليها لمويتي حبيبتي معليش.. ما ردت علي قلت ليها ما كان قصدي اشاكلك والله انتي عارفاني لمن ازهج بنفعل كيف... بقيت بحنس فيها وهي ما شغاله بي بعد شويتين جا عبدالرحمن ناداني براحه مشيت ليهو اداني شوكولاته وقال لي اديها ليها.. مشيت قلت ليها هاكي دي.. ما ردت قلت ليها ما عايزاها يعني ارجعها؟.. رفعت راسها عاينت لي يدي وعاينت لي قلت ليها معلييييش.. شالتها وقالت لي وينها حقت ايه.. عبدالرحمن جا قال ليها هدي .. اداها لي ايه حتى بعد داك سكتت، قال لي ارجعي ارقدي انا بحلو معاها... مشيت عشان ارقد لقيت تلفوني بدق كانت امي رديت بعد سلمت قالت لي نحن جايين الاسبوع الجاي.... بالفرحه حسيت التعب والصداع كلو راح ومشيت كلمت عبدالرحمن قال لي يصلو بالسلامه ان شاء الله..... رجعت غرفتي وما قدرت انوم طلعت الدفتر من الشنطه وقطعت منو ورقه وبقيت بكتب..
