رمضان عدا سريع وفجأة لقينا الوقفه جات، بالليل كنت بزعف جوني لمى وفطومه قالو دايرين شاي بي خبيز.... طبعا فطومه ابت ترجع بيتهم نهائي ناس ليلى جو فطرو معانا مرتين وكانو دايرين يسوقوها ابت، هناك ما بخلوها تطلع واصلا حيهم ما فيهو اطفال....قلت استغفر الله خلاص بقى موضوعكم الخبيز دا ما بديكم شاي اصبرو شويه بخت العشا عديل.. فطومه قعدت تبكي وتقول دايرة شاي بس، امي جات شالتها وقالت ليها ارح اكب ليكم .. ساقتها ولمى مشت معاهم وانا وصلت زعيف بعدها ركبنا الستائر انا وامي الا بمشاباة ومجازفات حتى ركبناها، بعد انتهيت ناس لمى كانو نامو سألت امي لو دايره عشا قالت لي بري شبعانه فطور قبيل لسه ما اتهضم لي... مشيت شربت شاي انا زاتي بعدها رقدت ومسكت تلفوني، لقيت ايهم مرسل لي " كل سنه وانتي طيبه".. قلت الود دا مالو معاي كمان، جني وجن حكحكة الاولاد دي لو م اخو ايلاف كان زمان حظرتو... رديت ليهو " وانت طيب".... فياض كالعاده ما متصل، الليله ما جا في الإفطار اتصل وقال بفطر في بيتو امي قالت ليهو اجزت وبقيت كسلان خلاص... رسلت ليهو مساء الخير.. بعدها اتصفحت شويه مع اني نعسانه لكن قلت يمكن يخش لكن ما خشا لمن خلاص بقيت ما قادره افتح عيوني اتصلت ليهو لقيت رقمو مشغول اول ما خشا جرس طوالي فصلت وختيت التلفون تحت المخده.. بعد شويه حسيت بهزتو طلع دا هو ما رديت.. اتصل كم مره قلت داير بي شنو امشي كمل كلامك مع حبيبة القلب، لمن دقا كتير رديت قلت ليهو بزهج: مالك؟.. قال لي انا ولا انتي، مالك ما بتردي؟.. قلت ليهو ما حبيت ازعجك .. قال لي شنو؟؟ انا المتصل يعني انا البزعجك ما انتي.. قلت ليهو انا الاتصلت اول.. قال لي كل سنه وانتي طيبه يا لينه.. قلت ليهو وانت طيب يا ود خالي... قال لي من ود خالي دي معناها زعلانه، في شنو قولي لي.. قلت ليهو ماف شي ما زعلانه.. قال لي لييينه.. قلت ليهو والله ماف شي بس استغربت تلفونك مشغول زي الوقت دا مع منو.. قال لي ما عارفه يعني؟.. قلت ليهو هممم عارفه تسابيح.. قال لي بتسلم عليك، طلبت رقمك لكن قلت ليها استأذنك اول.. قلت ليهو ما تديها.. قال لي لينه انتي متأكده ماف شي مزعلك؟.. قلت ليهو ماف.. قال لي اقوم نص الليل دا اجي البيت واعرف بطريقتي؟... ابتسمت وقلت ليهو تعال... ضحك وقال لي مجنونه، جد كدا في شنو؟.. قلت ليهو عشان ركبنا الستائر برانا الليله وتعبنا فيها شديد.. قال لي نسيتها عديل والله.. قلت ليهو الشاغل بالك يتهنى بيهو..قال لي آمين.. حوصت عيوني وانا بحاكيهو بصوت واطي"آمين".. قال لي يلا نومي عشان تصحي بدري تجهزي لي الشياله... قلت ليهو ماا بجهز ليك وما تجينا.. قال لي ما جاييك يا زوله؟ جاي لي عمتي.. قلت ليهو سمح تعال عيد على عمتك واتخارج .. قال لي طيييب، لكن اياك تمدي يدك على حلاوة بقر الحـاجيبها معاي.. قلت ليهو شنو؟ حتجيب حلاوه بقر؟.. قال لي ايوه.. قلت ليهو بستقبلك من الباب بالشياله.. ضحك وقال لي طيب تصبحي على خير.. قلت ليهو حترجع لي تسابيح مش؟.. قال لي اي مستنياني.... قلت ليهو طيب وانت بخير لكن ما تساهر يعني قصدي عشان بكرا عيد وحتصحى بدري... قال لي حاضر يا ماما وحـاشرب الحليب كمان... قلت ليهو نينيني ظريف...
