"السعاده"... الكلمه دي عندك بتتجسد في شنو؟ زول، مكان، عاده؟؟... قلت ليها نسيت.. كشرت حواجبها باستغراب مع ابتسامه مستنكره.. قلت ليها نسيت والله، نسيت اخر مره انبسطت فيها من قلبي متين يا دكتوره، انا بقيت ما بفتش على السعاده قدر ما بفتش على الراحه، عايزه اكون مرتاحه بس ما حاسه بـأي ضيق في قلبي عايزه اعيش مرتاحه من اي هم ومشاكل بالي يكون صافي ورايق.. الراحه عندي هي السعاده..... قالت لي كونك بقيتي تفتشي على الراحه دي خطوه كبيره جداً، بس برضو ما اقنعتيني طول الـ٦ شهور الفاتت ما حسيتي بالسعاده؟... قلت ليها شوفي احساس السعاده بختلف من زول لزول انا بالنسبه لي لو ما حسيت قلبي بدق بسرعه كدا معناها ما فرحت.. قالت لي ماف شعور دائم، دي حقيقه مثبته علمياً وعلى ارض الواقع، الفرح ما دايم ولا الزعل ولا الضيق ولا الراحه، الانسان دائما لمن يحس بالضيق بفتش على حاجه تحسسو بالامان.. ولمن يحس بالزعل بفتش على حاجه تسعدوا اقلاها بحاول يتذكر مواقف كان مبسوط فيها، عشان كدا لازم تعرفي انتي بتحسي بالسعاده وين ومتين ومع منو... قلت ليها راحتي بقت في القران.. ابتسمت وقالت حـتفرحي قريب، خليك واثقه من الحاجه دي وقبل كل شي خليك واثقه في نفسك.. قلت ليها انا حـاسعد نفسي بنفسي ولا شنو.. ضحكت وقالت لي بقيتي تهزري كمان؟ لا دا تطور كبير... قالت لي وهي بتكتب في الروشته: بتمنى الجلسه الجايه تجي تحكي لي الموقف الحسيتي فيهو بالسعاده دي..... طلعنا سوا، لقيتو قاعد مستني لمن شافنا قام على حيلو اداني المفتاح وقال لي جاي وراك.. طلعت ركبت واتكلت براسي في الشباك بعد مسافه جا طالع.... وقف جمب صيدليه نزل جاب منها ادويه وجا راجع قال لي الدكتورة قالت قربتو تخلصوا الجلسات.. قلت ليهو بدون ما اقبل عليهو: ايوه.. قال لي الحمدلله.. بقيت سرحانه في الشارع وشريط اخر ٦ شهور بمر على ذاكرتي.. من يوم حاولت انتحر وفياض لحقني في اخر لحظه بعد ما عبدالرحمن اتصل ليهو وطلع اصلا قريب من البيت واستعجل اكتر عشان يصل، ولمن فتحت عيوني ولقيتهم ببكوا كأني مت..... بعدها بي يومين ودوني لدكتورة ميرفت واتشخصت باكتئاب حاد ولي ٦ شهور بتعالج عندها كان عندي ٤ جلسات في الاسبوع وتاني بدت تقل لحظي ما بقت جلسه واحده... عبدالرحمن رجعني تاني يوم من اتطلقنا ، ياهو نفس اليوم الحاولت انتحر فيهو.. كان داير يسوقني البيت لكن امي ابت ف جاب حجه ربيعه وايه عند ناس عادل وبقى هو قاعد معانا ومره مره بمشي ليهم.. فياض كان بجينا كل يوم تقريباً ومرات بمشي معانا الجلسه... وصلنا البيت لقيناهو قاعد قال جيت لقيتكم طلعتو، مالكم الليله بدري؟.. عبدالرحمن قال ليهو الدكتوره اتصلت امس قدمت لينا الموعد... خشيت الغرفه النظامها اتغير في ال٦ شهور دي.. بقى فيها سرير إضافي حق امي، كنا بننوم انا وهي ولمى سوا لأنو الدكتورة قالت ليهم ما يخلوني براي، وكانت خاليه من اي ادوات حاده او حاجه تخليني افكر في الانتحار... امي جات وراي قالت لي اجيب ليك فطورك ولا بتاكلي معانا؟.. عبدالرحمن جا شايل صينيه قال ليها بتاكل هنا.. امي قالت ليهو كان تخليها تاكل معانا الدكتورة قالت كدا كويس معاها.. قلت ليها انا عايزه اكل براي يا امي.. قالت لي طيب ما مشكله انت بتاكل معاها؟.. قال ليها لالا جاي.. امي طلعت وهو ختا لي الاكل وقال لي نعسانه؟.. قلت ليهو لالا قال لي نقرا بعد الظهر؟.. قلت ليهو طيب.... طلع وانا بديت اكل، كنت كل يوم بقرا سورة البقره بعد نصلي الصبح في مويه وبشربها باقي اليوم دا، وهو بقعد بسمعني ولو غلطا بصلحني، اخر فتره بقيت بقراها كويس ونادر جدا يوقفني.. بتذكر بديتها في نفس اليوم الحاولت انتحر فيهو مع اني كنت بايته في المستشفى.. ومنو الخلاني اقراها والتزم بيها؟ مافي غيرو.. جاني مع اذان الصبح، امي وليلى وهبه كانو بايتين معاي في الغرفه وهو فياض بي برا.. لمن دق الباب و خشا هم صحو وطلعوا يصلوا جا قال لي صليتي؟. قلت ليهو لا.. اتصل لي ليلى لمن جات قال ليها خليها تتوضى وتجي.. مشيت اتوضيت وجيت لقيتو فارش مصلايتين صلينا سوا وكان في جك مويه جابو قدامي واداني المصحف قال لي اقري سورة البقرة..... ومن اليوم داك التزمت بيها كل يوم بعد الصبح على مدار ال٦ شهور حتى في الايام الما بصلي فيها كنت بقراها بالتلفون.. اول ايام كنت بتعب شديد وبكون عايزه اوقفها لكن عبدالرحمن بصر علي اتمها.. كان بقول لي لو ضعفتي هسي تاني ما حتقدري تقريها.. وفعلا بعد اسبوع كدا بقيت بقراها عادي...... الليله كنت نعسانه ونمت تاني بعد صليت الصبح..... بعد فطرت مشيت قعدت معاهم برا كنت ساكته وكل شويه بحاولوا يدخلوني في الونسه.. فياض طلع بعد الظهر.. صليت وقبل اقوم من المصلايه عبدالرحمن جا قال لي المصاحف وين؟.. قلت ليهو في الدولاب ماف؟.. قال لي ما لقيتهم تكون امك ودتهم مكان تاني.. قلت ليهو ما سألتها؟.. قال لي طلعت، نستناها لمن تجي.. قلت ليهو خلاص بقرا لحدي ما اوقف اصلا انا البدايات حافظاها.. فرش مصلايه تانيه جمبي وقعدنا بديت اقرا وكنت ماشه كويس، خلصت الجزء الاول وانا ما مصدقه اني بقرا بدون ولا غلطه.. وصلت نص التاني وكنت حاسه بشي غريب، خوف من اني اغلط بعد قريت دا كلو وفرح لأني ما اتوقعت اكون حافظه لي هنا أساساً..... لمن وصلت آخر ايتين شفت لمعه في عيون عبدالرحمن كان بهز راسو بالإيجاب.. قلبي بقى بضرب سريع وكنت بتمتم فيهم مع انهم اكتر آيتين حافظاهم.. " آمَنَ الرَّسُولُ بِمَا أُنْزِلَ إِلَيْهِ مِنْ رَبِّهِ وَالْمُؤْمِنُونَ ۚ كُلٌّ آمَنَ بِاللَّهِ وَمَلَائِكَتِهِ وَكُتُبِهِ وَرُسُلِهِ لَا نُفَرِّقُ بَيْنَ أَحَدٍ مِنْ رُسُلِهِ ۚ وَقَالُوا سَمِعْنَا وَأَطَعْنَا ۖ غُفْرَانَكَ رَبَّنَا وَإِلَيْكَ الْمَصِيرُ (285) لَا يُكَلِّفُ اللَّهُ نَفْسًا إِلَّا وُسْعَهَا ۚ لَهَا مَا كَسَبَتْ وَعَلَيْهَا مَا اكْتَسَبَتْ ۗ رَبَّنَا لَا تُؤَاخِذْنَا إِنْ نَسِينَا أَوْ أَخْطَأْنَا ۚ رَبَّنَا وَلَا تَحْمِلْ عَلَيْنَا إِصْرًا كَمَا حَمَلْتَهُ عَلَى الَّذِينَ مِنْ قَبْلِنَا ۚ رَبَّنَا وَلَا تُحَمِّلْنَا مَا لَا طَاقَةَ لَنَا بِهِ ۖ وَاعْفُ عَنَّا وَاغْفِرْ لَنَا وَارْحَمْنَا ۚ أَنْتَ مَوْلَانَا فَانْصُرْنَا عَلَى الْقَوْمِ الْكَافِرِينَ (286)" صدق الله العظيم... غمضت عيوني وفتحتها خليت دموعي تنزل، دي اول ابكي فيها من زمن طويل نزلت راسي وغطيت وشي وانا ببكي بعد مسافه رفعت راسي ومسحت دموعي، عبدالرحمن قال لي قال رسول الله صلى الله عليه وسلم " تعلموا سورة البقرة؛ فإن اخذها بركة، وتركها حسرة ولا يستطيعها البطلة" هنيئاً لك حفظك البقرة وادعو الله ان يرزقك ويمن عليك بنعمة حفظ كتابه وسرده كما رزقك حفظ البقرة... قلت ليهو آمين يارب... كان مبتسم ولسه نفس اللمعه ف عيونو.... بعد قمنا اتصلت لدكتورة ميرفت قلت ليها صدقتي لمن قلتي لي حـتفرحي قريب اول مره احس بالفرحه دي في حياتي.. قالت لي انبسطت ليك شديد، ان شاء الله حياتك كلها فرح... رقدت نمت وصحيت بصوت آيه وهي بتصحي فيني قمت ضمتني شديد وقالت لي بابا قال لي حفظتي سورة البقره.. قلت ليها ايوه الحمدلله.. فكتني وقالت لي وهي رافعه اصبابعها السبابه والوسطى: وانا باقي لي جزئين واختم.. قلت ليها يا سلااام عقبال لي.. قالت لي امييين يارب، حبوبه قاعده برا.. قلت ليها صحي؟ ارح اسلم عليها... مشيت لقيتها تتونس مع امي سلمت عليها وقلت ليها طولتي ما جيتينا.. قالت لي اي والله بقيت كسلااانه سميه كل يوم تقول لي ارح اتمشي جوا البيت شويه عادل زاتو بشاكلني لكن وحات الله جسمي دا مكسر اليوم كلو.. قلت ليها من القعاد الكتير.. قعدت معانا لحدي المغرب بعدين قالت ماشه امي قالت ليها تمشي وين ماف مشي الليله تبيتي معانا .. قالت ليها لالا ياخ ما بنفع.. قلت ليها ليه ما بنفع عليك الله اقعدي.. قالت مره تانيه... انا امي قعدنا نحنس فيها وهي تقول لالا ودوني لحدي ما عبدالرحمن جا امي قالت ليهو شوف امك دي بالله ابت تقعد كلو كلو.. حجه ربيعه قالت ليها البنات ديل جنن دايرات يخلني ابيت هنا.. قلت ليها مالو لو بتي يا حجه والله كان مشيتي ازعل منك.. عبدالرحمن قال ليها خلاص خليك الليله يا امي.. بقت تعاين ليهو امي قالت ليها اها تاني ماف ليك طريقه اقعدي ساي.... عملنا العشا انا كنت شبعانه وعبدالرحمن طلع تاني، اثناء ما انا برتب في المطبخ هبه جاتني قالت لي الجلسه كانت كيف.. قلت ليها تماام باقي لينا اسبوعين ونخلص.. قالت لي كويس والله والادويه حتواصلي فيها؟.. قلت ليها اي حتى الجلسات ما حتقيف نهائي يعني كل شهرين تلاته بمشي.. قالت لي ايواا.. قلت ليها انتي اخبارك شنو.. قالت لي الحمدلله كلو تمام، والعربيه خلاص بح... ختيت الصحن الكنت بغسل فيهو وقلت ليها بعتوها؟.. مطت شفايفها هزت راسها ورفعت حواجبها قالت لي امي زعلت اكتر مني قومت الدنيا وما قعدتها... قلت ليها ربنا يعوضكم بالاحسن ان شاء الله...قالت لي امين يارب، حقتو زاتو شكلو حيبيعها غايتو لو باعها امي بتنجلط عديل اصلا من جا وقال رجع نهائي امي بقت تجن في اقل شي.. قلت ليها هو مش نزل شغل؟.. قالت لي نزل وشغل كويس ما بطال لكن انتي عارفه امي، هي عايني انا بكرا ماشه لي ايلاف بتمشي؟.. قلت ليها بمشي اي اصلا كنت ماشه ليها في اليومين ديل.. قالت لي خلاص بكرا نطلع بعد الفطور.....
