"ايلاف"
هبه قالت لي لينه دي كأنها اتأخرت.. قلت ليها كدي اضرب ليها.. شلت التلفون كدا جات خاشه ووشها ما كان طبيعي قلت ليها مالك؟... لينه مدت لي البندول وقالت لي هاك.. شلتو وطلعت لقيت في كوز مويه في تربيزه كدا جمب باب الغرفه وانا بفتح فيهو سمعتها بتقول خلي زولك دا يحتفظ بمواعظو لنفسو.. هبه قالت ليها زولي؟.. لينه قالت ليها يوسف.. هبه قالت ليها مالو يوسف.. قالت ليها بس قولي ليها لينه قالت ليك انصح اول نفسك بعدين انصح الناس وهو براهو بفهم... خشيت قلت ليهم مالكم يا بنات؟.. لينه قالت لي مافي شي انا نعسانه دايره انوم... رقدت في سريرها عاينت لي هبه قلت ليها في شنو قالت لي ما عارفاها جات من برا زهجانه انفصمت فيني.. قعدت جمبها وقلت ليها لينه مالك؟.. قالت لي وهي مقبله بالجهه التانيه: ما فيني شي يا جماعه دايره انوم بس..... قلقت من وضعها وسألت هبه تاني قالت لي ما تشتغلي بيها كتير نفسيات بتقوم عليها مره مره..
اليوم دا ما قدرت انوم حسان اتصل لي زي الساعه ١٠ كدا قلت لو رديت حـاتوتر ذياده، خليه يستنى لحدي بكرا ما حـارد عليهو... ما عارفه نفسي نمت متين، صحيت بحركة في الغرفه كانت لينه قلت ليها الساعه كم الصبح اذن؟.. قالت لي اذن اي قبل شويه.. قمت صليت وناس البيت كانو كلهم صاحيين لقيتهم بقطعو اللحمه وبدو يشدوا الحلل، هبه قالت لي امشو بيت ناس يمنى بعد دا.. قلت لي لينه ارح قالت ما ماشه.. هبه قالت ليها ما ماشه كيف مش امس اتفقنا تمشي انتي معاها وانا اخدم مع الناس؟.. لينه قالت ليها امشي انتي انا بقعد.. هبه قعدت تحتج معاها قلت ليها خلاص خليها على راحتها ارح انتي معاي.. هبه حمرت ليها وطلعنا سوا
اول ما سعمنا صوت الذغاريد والطِلق هبه حضنتني وباركت لي وقعدنا نبكي مساافه بعدها يمنى جات شايله صينية الفطور ذغردت وباركت لي قالت لينا رسلت ليكم صينية قبيل لكن الولد قال مسكتو مرت الجيران قالت ليهو وديها بيتنا ما عرفتها دي منو غايتو هسي جازفت ليكم وجهزتو.. هبه قالت ليها جعنا وشبعنا زمااان.. كانت معانا خبيرة التحميل الاتصلت ليها هبه فطرنا وبدت بي بعدها مكيجت هبه ويمنى.. قلت لي يمنى لينه مالا ما جات معاك.. يمنى قالت لي كلمتها قلت ليها ارح ابت ما عارفاها مالا... هبه قالت البت دي اتعلمت ليها قلة ادب جديده خليها تصبر لي لمن نرجع هسي ما فاضيه ليها...
لبست الفستان وبقيت قاعده مستنياه.. فقدت امي اللحظه دي وفقدت ابوي اكتر قعدت ابكي لمن ناس هبه اتخلعوا، بعد مسافه حتى هديت وعادو لي المكياج تاني.. الباب دقا وسمعنا صوت استاذ يوسف بسلم المعاي طلعو وانا اتوترت قلت لي هبه ما تمشي خليك معاي قالت لي انتي طيره ولا طيره؟؟... مشت خلتني وانا بقيت بدعك يديني وحاسه نفسي حـاسيح بالخوف باب الغرفه لمن فتح ما قدرت ارفع راسي كنت بعاين لي يدي البدت ترجف اتنحنح وقال السلام عليكم قلت بصوت حتى انا ما سمعتو كويس: وعليكم السلام.... شفت رجولو وهي بتجي علي قمت على حيلي وانا لسه منزله راسي حاوط وشي بي يدو ورفع راسي باسني بيت عيوني مساااافه، حسيت بدمعتو النزلت واختلطت بدموعي نزل يدو وضما بيهم يديني الاتنين ختاهم على صدرو وقال لي اخيراً.. مبروك علينا يا حبيبتي ونور عيوني.. قلت ليهو الله يبارك فيك.. ضماني وقال لي نشوف تاني بتجري مني وين.. ضحكت، بعد مسافه فكاني وباسني في راسي همس لي بكلمات في اضاني عمري ما حـانساها وطلع بقيت واقفه بتبسم بس جاتني هبه وقالت لي احااا قال ليك شنو خلاك تتبسمي كدا الله يوعدنا.. قلت ليها آمين يارب الله يوعدك انتي ويوسف.. قعدت تتخجل ضحكت فيها هي زاتا ضحكت وقالت عارفه ما جاي معاي.. لينه جات خاشه قالت لي مدام حسان ابتسمت ليها حضنتني وقالت لي الف الف مبروك ياخ ربنا يسعدكم ويهنيكم.. قلت ليها الله يبارك فيك يا لينه.. بعدها جو اميره واحمد وبعد مسافه كدا جا ايهم ضماني وبارك لي وقال لي حسان قال ينادوك عشان تمشو التصوير.. قلت ليهو تصوير شنو؟ انا قلت لي حسان مافي داعي.. قال لي من هسي بديتي تكسري كلام راجلك؟ قال ليك ارح يعني ارح.. قلت ليهو طيب بجي... بعد طلع قلت ليهم حتمشو معاي مش؟؟.. لينه قالت انا ما بقدر.. هبه قالت لي خلاص بمشي انا.. قلت لي اميره خلاص ارح انتي برضو ..... مشينا اتصورنا وجينا البيت دقو الدلوكه والناس باركت بعدها بدو يخفو شويه شويه خالتو هنادي باركت لي وقالت ماشه قلت ليها بيتي معانا عليك الله قالت ما عندي طريقه لكن لينه بتبيت معاك.... بعد المغرب كان فضلو ناس البيت بس حتى ورده وخالتي رجعو بعد البيت اتنظف واترتب... كنت بتكلم مع حسان قال لي اها روقتو؟.. قلت ليهو اي الحمدلله.. هسي لو كان خليتيني اسوقك كنا هسي حنكون سوا.. قلت ليهو حتفضل تتكلم في الموضوع دا كتير يا حسان؟.. قال لي آسف خلاص سكت.. قلت ليهو العمال خلصو صح؟.. قال لي اي بكرا حـاجيب حاجات الطليه عشان يشتغلوها الاحد..... حسان كان قاسم جزء من بيتهم وبنى غرفة تانيه يعني حنسكن معاهم في نفس البيت.. قال لي بكرا حتمشي الجامعه؟. قلت ليهو اي ماشين عندنا تلاته محاضرات ماف طريقه دك.... اتكلمنا مسافه بعد قفلت لاحظت ماف زول جا عشان يرقد معاي جوا مرات بترقد هبه مرات لينه طلعت لقيت هبه راقده في الصاله معاها اميره واحمد قلت لينه مشت وين؟؟... طلعت وشفتها قاعده مع ايهم في سرير في الحوش وكانو بتكلموا استغربت شديد!! بتكلموا في شنوو زي الوقت دا، معقوله ايهم عمل الفي راسو وبدا يلف حولين لينه... في وقفتي دي ختا يدو في كتفها وهي مسكت ذراعو ونزلت يدو، اللحظه دي ناديتها، لينه؟!.. ايهم قبل علي ولينه قامت جات ماره بي وخشت جوا بدون ما تقول حاجه.. عاينت لي ايهم بحده وربعت يدي رفع كتفو يعني في شنو؟.. مشيت قلت ليهو برضو عملت الفي راسك صح؟.. قام وقال لي ايلاف اختيني.. قلت ليهو بختاك لمن تختى صحبتي.. قال لي صحبتك زاتا دايراني يعني انا ما جاري وراها.. قلت ليهو وعارفه انو حركاتك دي بتعملها لاي بت تلاقيك؟؟.. سكت وطلع برا، خشيت الغرفه ولينه كانت صاحيه اول ما شافتني عملت نايمه اتنهدت ورقدت في سريري..
