قبل ابدا البارت الجديد عايزه انبه لجزئية في البارت الفات دقست فيها، حتة انو اميره نتائجها يوم الخميس، واساساً كورسات الثانوي بدت ف مفترض تكون النتيجه طلعت... المهم اتجاوزوها واعتبروا النقطه دي ما اتذكرت ما بيناتنا حتة دقسايه 😁🤝
_____________________
قمت لبست شبشبي وشلت عبايه مفتوحه من الشماعه وطلعت ليهم لقيت فياض وامي بشربو شاي شكلو حق الغدا فياض قال لي البزنس وومن.. سلمت عليهو وقلت ليهو اهلين كيفك.. قال لي الحمدلله تمام اها الامور شنو.. قعدت جمب امي وقلت ليهم كلوو تمام.. امي قالت لي ما شاء الله شايفه الصينيه فاضيه.. اتثآبت وقلت ليها اي والله الحاجات كلها انتهت لكن بعد فقدنا الامل وافتكرنا ما حنبيع ولا شي ... فياض استعدل وقال لي كيف الكلام دا.. قمت قلت ليهم اصلي واجي احكي ليكم... كنت حاسه بطعنات أسفل بطني وفتور عجيب مع اني نمت اكتر من ساعتين لكن حسيت نفسي تعبت اكتر، الحاله دي بقت تجيني كل ما ازعل شديد زي لمن زعلت من خالتو تماضر.. صليت العصر بالجلاله وجيت حكيت ليهم امي قالت لي والله دي قصه عجيبه لكن البركه في هبه واستاذكم .. قلت ليها اي والله ما قصرو.. فياض قال لي والاستاذ بعرفكم يعني؟.. اتلبشت وقلت ليهو اا اي يعني بعرفنا.. قال لي استأذن ليكم ليوم الليله بس ولا حتمشوا كل يوم عادي؟؟.. قلت ليهو لا استأذن ليوم الليله بس لكن قال لو المدير وافق بتصل بكلمنا.. قال لي يتصل؟؟... قلت ليهو ااا اي يتصل لي هبه شال رقمها لأنو الوحيده الكان معاها تلفون عشان يورينا يعني لو المدير حيوافق ولا لا...قال لي لو ما وافق كمان ما تزعلوا، انتو عملتو العليكم وبراكم شفتو الاقبال الكان عليكم بعد كدا دي حاجه ما في يدكم.. قلت ليهو اي ما في يدنا.. كنت عايزه اسأل من المفاجأة لكن حافضح لمى ف سكت وبقيت بعاين ليهم، فياض كأنو قرا افكاري، مدا يدو وراهو وطلع كيس احمر صغير فيهو شعار لمحل تلفونات ومداهو لي.. قلت ليهو دا شنو.. قال لي تلفون.. ضحكت بعدم استيعاب وعاينت ليهم امي كانت مبتسمه قلت ليها دا حقي؟.. قالت لي اي .. طلعت الكرتونه لقيتو realme اخر اصدار عيوني رغرغروا قلت لي فياض ريلمي كمان؟؟ شكراً ياخ.. قال لي تستاهلي الاحسن، في شريحة سوداني جوا لكن حتشتغل بعد ٢٤ ساعه يعني لحدي بكرا الساعه ٣ كدا .. فتحت الكيس لقيتها فعلاً قاعده قلت ليهو اركبها هسي؟؟.. قال لي اشحني التلفون اول... قمت بسرعه اوصلو في الشاحن لمى جات وراي قالت لي جابو ليك تلفون؟.. قلت ليها ااي.. قالت وانا حيجيبوا لي متين؟.. قلت ليها لمن تبقي قدري.. عاينت لي كداا وقالت لي يعني لسه بعيد.. قلت ليها ايوه بعييييد هسي العبي بتلفون امي لحدي ما تكبري.. قالت لي بزعله كدا: انتي اليوم كلو شايلاهو ما قعد تديني ليهو.. ضحكت وقلت ليها هدا حقي جا تاني البخليني اشيل تلفون امي شنو؟؟... قالت لي يييي... جرت على برا وانا وصلت التلفون ومشيت برا، فياض طلع مع اذان المغرب قال بصلي وبمشي طوالي.. امي قالت لي فياض دا لو دعيت ليهو من الليله لي بكر شويه، البعملو لينا دا الاولاد ما بعملوهو لي اهلهم.. قلت ليها فعلاً والله يا امي الله يديه الصحه والعافيه... قالت لي امييين امين يارب... قالتها بحزن كدا وكانت سرحانه قلت ليها مالك يا امي؟.. قالت لي ها مافي شي نادي لمى خليها تحيب اللبن قبل الواطه تضلم.....
