"هبه"
جدعت الكتاب بزهج واتكلت في الكرسي بقيت بلف بيهو يمين وشمال.. كنت بحل في مسأله وكل شويتين اسرح قدر ما حاولت اركز فيها ما قدرت حكيت شعري بزهج وشلت الكتاب في يدي تاني رجعت رقدت في الكرسي وحاولت فيها مره تانيه، لمن لقيت نفسي غيرت طريقة الحل اندمجت فيها لحدي ما الصفحه اتملت شلت الدفتر وواصلتها لمن وصلت للحل قعدت انطط وازغرد محمد جا قال لي اداني ضربه في راسي وقال لي جنيتي؟؟؟ دايره تسمعي الحله كلها كواريكك؟؟.. قلت ليهو حليتها يا محمد حليتها.. قال لي دا كلو عشان حليتي مسألة؟ اها لو قفلتي الامتحان حتعملي شنو.. قلت ليهو اقفل الامتحان دي الا في احلام امي ولا احلامي انا زاتو.. قعد يضحك، كان شايل تلفونو مداهو لي شلتو وشوفت ابوي كانت مكالمه فيديو.. حمرت لي محمد وشلت التلفون ابوي قال لي هبويه كيفك.. قلت ليهو وانا بشخبط في الدفتر وبتجنب اعاين ليهو: الحمدلله انت كيف.. قال لي انا كويس الحمدلله، قعد تذاكري ولا شنو؟.. قلت ليهو ايوه.. قال لي امك قالت لي شغاله امتحانات، ما خلصتو؟.. قلت ليهو بكرا بنخلص قال لي شدي حيلك دايرين نسبه كبيره عشان تبقي اكبر دكتوره في البلد دي.. قلت ليهو ان شاء الله.. قال لي وداد دايره تسلم عليك .. قلت ليهو حاقفل بعد دا عشان اقرا.. قال لي طيب بالتوفيق... قفلت ومديت لي محمد التلفون قال لي مالك بتتكلمي زي الجابرنك.. قلت ليهو كأنك ما عارف اني فعلاً مجبوره.. قال لي مهما عمل دا ابوك والعرس دا ربنا في القران حللو انتي منو عشان تابي ليهو.. عاينت ليهو من فوق لي تحت وقلت ليهو حتقيف تديني مواعظ هسي؟ امشي من خلقتي خليني اقرا....
بعد مكالمتي مع ابوي اتضايقت شديد وعلى عدم التركيز الكان ملازمني القرايه غلبتني عديل، ذاكرتي رجعتني للحصل السنه الفاتت لمن ابوي اتصل لينا وقال انا عرست.. الخبر نزل علينا زي الصاقعه امي مرضت ورفضت تتكلم معاهو لـست شهور وطلبت الطلاق عماتي اتكلمو معاها كتير وابوي ما خلا حاجه عشان يراضيها اشترى ليها شقه وسجلها باسمها وكم طقم دهب رسلهم مع عماتي.. المهم امي في النهايه اقتنعت ورضت ومحمد اتفاجأ في البدايه بس تاني اتعامل مع الموضوع عادي.. اما انا للان ما قادرة اتجاوز عملتو دي، زمان اول ما سافر كنت متأثره شديد وامي كانت بتقول لي ابوكم لو ما اغترب ما كنتو عشتو العيشه دي ولا لقيتو كل سبل الراحه متوفره ليكم هسي اجتهدوا في قرايتكم عشان تعوضوا تعبو حق السنين الفاتت كلها.. كنت كل ما اتذكر كلامها بجتهد في قرايتي وبحاول بقدر الامكان اجيب درجات عاليه عشان افرحهم، وفعلاً لحدي نهاية تانيه مستواي كان كويس شديد بس من عرس ابوي التاني ووقتها كنت ماشه تالت بقيت ما شغاله بالقرايه كتير، اصلا رغبتي كانت ادبي لأني بحب الحفظ ومخي تقيل ما بفهم سريع، لكن امي وابوي اصرو علي ادخل علمي واشيل احياء عشان ادخل طب، مرات كتيره بتعمد ما اشتغل كويس في الامتحان عشان احسسهم انهم ضاغطين علي ويخلوني احول ادبي لكن ما كان في فايده غير انو امي بتشاكلني وتقارني بي غيري وابوي _ اذا اصلا رضيت اتكلم معاهو _ كان بنصحني .. لحدي ما نهاية السنه لقيت اني ضيعت نفسي بسبب الحاجه دي انا ما حاولت من البدايه ادي نفسي فرصه واجرب افهم مواد علمي واترسخت فيني فكرة اني مجبوره عليهم وهسي لمن حاولت اشيل الفكره دي من راسي واجتهد لقيت اني قادره اتعامل مع المواد زي ما كنت بقرا مواد ادبي وبفهم عادي لكن الوقت كان اتأخر وما كنت قادره الحق اقرا الفات كلو ف كنت بجتهد في العندي فيهم فكره اصلا وقلت الباقي بقراهو في الفتره بين التجريبي والشهاده....
