تاني يوم كان اتنين، صحتني آيه قالت لي بابا قال ليك قومي صلي الصبح.. قمت صليت معاها وخشيت الغرفه خليتها ماسكه المصحف وقاعده في مصلايتها.. حسيت نفسي نعسانه ما بقدر اقرا، اول ما رقدت جات ايه بعباية الصلاه قالت لي حبوبة ربيعه بتناديك.. مشيت ليها قالت لي انتي امس ما كنتي خاته جنزبيل في الشاي ما تنسيهو الليله نحن ما بنقدر نشرب الشاي بدونو، بتلقيهو في الدرج حق البرطمانيات.. قلت ليها طيب... كنت ماشه وقفتني قالت لي انتي يا بت متخمخمه بالتوب كدا مالك من امبارح، ماف راجل في البيت دا غير راجلك اقلعيهو.. قلت ليها كويس بقلعو... دخلت وانا بجرجر رجليني بالنعاس، ركبت اللبن وختيت الجنزبيل اتكلت في المسطبه ووقفت وانا مربعه يديني وعيوني براها بتغمض.. رفعت راسي بخلعه لمن سمعت زول بناديني.. لينه؟.. لقيت عبدالرحمن واقف جمبي وبعاين لي زحيتو وقلت اللبن!!! لقيت البوتجاز مطفي واللبن فار واتدفق..بالاحراج ما عرفت اخش وين.. ولعتو تاني وختيت الحب شاي.. لاحظت لنظراتو لي واتوترت اكتر فتحت الدرج طلعت السيرمس شالو مني وقال لي انا بسويه.. قلت ليهو لالا خلاص.. قال لي اسمعيني، لحدي ما تخلصي امتحانات ما تخشي المطبخ، اي دقيقه في يومك انتي محتاجه ليها.. قلت ليهو والحـيطبخ منو؟ يعني امك ماا بتقدر.. قال لي انا.. ياداب رفعت راسي عاينت ليهو قلت ليهو انت؟.. قال لي اي.. ضحكت وسكت سريع لمن لقيتو مسهي فيني، قلت ليهو ااا معليش ما قصدي.. قال لي ضحكتي ليه؟.. قلت ليهو ساي.. قال لي ساي؟.. قلت ليهو ما قايلاك بتعرف تطبخ.. قال لي قبل نمشي بيت ناس عادل اخوي الكان بطبخ لينا منو.. قلت ليهو ما عارفه ما فكرت... الشاي فار تاني سبقني وطفاهو قال لي وهو بكبو في السيرمس: نومي شويه، بصحيك قبل اطلع الشغل.. قلت ليهو اصلا النعاس طار، بشرب الشاي وبقرا... ختيت الخبيز في الصحن عبدالرحمن شال بيضتين من الطبق الفوق التلاجه وقال لي شيليهو انا جاي.. شلتو وطلعت، ايه كانت بتكتب قلت ليها ارح اشربي الشاي، قالت لي جايه قربت اخلص... مشيت العريشه، الواطه كانت ياداب بدت تفتح، لقيت الحجه نامت صحيتها قامت قالت لي ديل وينهم.. قلت ليها جايين.. لحدي ما كبيتو كانو جو بقو بتونسوا وكل شويه حجه ربيعه تكورك فيهم وهم يعاينو لبعض ويضحكوا، لاحظت لعبدالرحمن ما شرب الشاي قلت ليهو شايك برد.. ايه قالت لي بابا صايم.. حجه ربيعه قالت هيي نسيت الليله الاتنين، يا بت ها انتي ما عارفه راجلك بصوم كل اتنين وخميس؟..... اتذكرت الاتنين والخميس الفاتو لمن اكون دايره اسوي الشاي بقول لي ما تعملي لي وكان برجع البيت بعد المغرب قلت ليها ااا عارفه لكن نسيت زيك... بعد شربنا ايه قالت الا تغسل العده قلت خلاص انظف.. فعلاً نظفت جوا ومسحت، الحوش والعريشه كانو بلاط وانا بكنس فيهم حجه ربيعه قالت لي الفحم بتلقيهو في الزقاق فوق الكانون.. مشيت شلتو وولعت البخور جوا بعدين وديتو ليها في العريشه، قالت لي والله ما شاء الله عليك يا بتي، انا اهم شي عندي صحيان بدري دا والنظافه، تعالي اوريك حتسوي شنو للفطور.. قعدت معاها قالت لي سوي سلطة اسود وشعيريه والفول شايفه فضل جزء منو من امس، لو في عجين طعميه ارميها لينا برضو.. قلت ليها كويس.. قالت لي عارفه راجلك بجي من الشغل متين؟.. بنفسي قلت هو انا عارفاهو شغال شنو؟ قلت ليها لالا.. قالت لي شغلو هنا قريب اصلا بجي للفطور وبجي قريب للمغرب وقت الغدا لكن الليله صايم ما بجي الا مع المغرب.. قلت ليها كويس.... خشيت لقيت ايه بتلبس جزمتها، سمعت كركربه في المطبخ دخلت لقيت عبدالرحمن شغال قلت ليهو انت مش صايم؟ خلي المطبخ الليله علي.. قال لي انتي مالك ما بتسمعي الكلام، امشي اقري... قلت ليهو ااا امك قالت نعمل شعيريه وسلطة اسود.. قال لي اي عارف هدا بسوي فيهم.... كان بشتغل بسرعه واحترافيه خجلت من نفسي لمن اتذكرت اني ما بعرف شي في المطبخ غير اسوي الشاي واحمر البطاطس وكمان بقول ليهو انا بطبخ...ايه جات خاشه وقالت ليهو بابا ليه ما ختيت لي الكاتشب؟.. قال ليها اخخ نسيت، لينه قزازة الكاتشب في الدرج دا.. مدت لي كيس السندوتش ختيت ليها بعدين دخلتو الشنطه ومشت.. عبدالرحمن دخل يدو في جيبو طلع جزلان شال منو قروش واداني ليها قال لي دي المصاريف.... شلتها ومشيت قعدت في القرايه وانا مندمجه كدا اتذكرت قبيل لمن نمت في المطبخ.. ضربت راسي وقلت ياادي الإحراج جا شافني وانا واقفه ونايمه..... باب الغرفه دقا فتحتو لقيتو هو قال لي داير اشيل ملابسي.. زحيت ليهو خشا شال كم غيار وطلع...
