وقفت قرابة الدقيقتين وانا بحاول استوعب كلام فطومه.. قلبي بقى بضرب شديد وحيلي مات قعدت في السرير وختيت يديني في راسي.. شادي وصلت معاهو للدرجه دي؟؟ انا كنت بخاف لمن لمى تمشي بيت ناس ليلى وبحاول بقدر الامكان ما اخليها تبيت هناك عشان خايفه عليها منو، ما اتوقعت ابدا تصل معاهو لدرجة يتحر.ش ببت اخوهو.. شعري جلدي كلو قام وانا بفكر في الحاجه دي.. طلعت برا لقيت ليلى بتتكلم مع فياض بتقول ليهو بري منك يا ود خالي نسيت عديييل عندك بت عمة اسمها ليلى يا كافي البلاء يوم كدا ما بتقول كدي اظهر عليها مالك بقيت كعب كدا.. قال ليها والله يا ليلى تقولي شنو جري بس، انتي بتك دي مالا الليله عيانه ولا حاجه؟.. قالت ليهو بري نصيحه مالا؟.. امي قالت ليها بري من شافت فياض تبكي الا هسي لينه شالتها خشت بيها جوا.. قامت مخلوعه وقالت لي وينها؟.. قلت ليها نامت.. رجعت قعدت وقالت ليها فتره كل ما تشوف راجل غريب تبكي.. امي قالت ليها هي! فياض غريب كمان؟.. ليلى قالت ليها بكون عشان طول ما شافتو..... كنت واقفه وما عارفه اقول شنو، بتك عمها بتحر،ش بيها؟؟؟ طيب حتصدقني؟ وحتى لو صدقت حتتصرف كيف هل حتمشي تقول لي راجلها اخوك بتحر..ش بي بتك؟؟.. امي قالت لي يا بت.. ياداب وعيت لنفسي لقيت كلهم بعاينو لي قالت لي مالك واقفه كدا؟.. قلت ليها اا مافي شي.. قالت لي امشي جيبي الفطور جاهز والقراصه في الساخن بارد كنا مستنين ليلى بس... دخلت لحدي ما اخت القراصه في الصحن بطني طمت اكتر مما هي طامه ختيتو ليهم وكنت خاشه فياض قال لي انتي ما دايره؟ قلت ليهو ما باكل ملوحه.. قال لي كان تعملي ليك حاجه تانيه قلت ليهو ما جعانه باكل بعدين......
اليومين القعدو فيها دي الموضوع ما طلع من بالي نهائي قاعده راقده نايمه صاحيه بفكر فيهو كل ما اكون دايره اكلمهم في حاجه بتوقفني.. لمن ليلى قالت ماشه قلت ليها خلي فطومه معانا... قالت لي ما بتقعد.. امي قالت ليها بتقعد زي العجب انتي الما بتقدري تقعدي بدونها.. ليلى قالت ليها ولا انا ولا ابوها.. قلت ليها خليها ياخ امي بتتصل لي شاكر تكلموا.... قالت خلاص لو بتقعد.. فطومه اصلا بتحب تقعد معانا لمن امها مشت ما بكت ولا اتشبكت فيها، قلت بحاول اشوف لي حل في الفتره دي يا كلمتهم يا اتكلمت مع شادي وهددتوا...
عدو شهرين وكان رمضان خلاص قرب ودا كلو فطومه معانا كل ما امها تتصل تقول جيبوها نابى ليها... يوم بتكلم مع ايلاف مكالمه كانت مع ناس عمها.. قالت لي ما مصدقه خلصنا الكورس والله يا لينه حسي انقرش عديل في الشهرين ديل واي ذرة صبر عندي كملت.. قلت ليها يا حليلك تعبتي.. قالت لي اي والله غايتو الحمدلله بس خلصو على خير.. قلت ليها واي يا ايلاف.. قالت لي مالك يا بت في شنو.. قلت ليها كنت واعده استاذه الاء باسطه ونسيت.. قالت لي عليك الله عان دي، يعني شنو لمن ينزلو السنه الجديده ودي ليها الموضوع ما خطير ... قلت ليها والله طلع من بالي كلو كلو، اي الا السنه الجديده.. قالت اي اصلا حينزلوا بعد العيد طوالي.. قلت ليها اها النتيجه ماف منها خبر؟.. قالت لي سامعه طراطيش كلام بقولو دور الخميس الجاي.. قلت ليها كضابه والله... قالت لي ما عارفه لو جد ولا كضب.. قلت ليها الترابه في خشمنا لو جد.. قالت لي والله اخير تطلع كدا كدا حنحش في حالة التوتر والخوف دي.. قلت ليها صح والله، يعني لو جد حتكون تاني ولا تالت يوم في رمضان.. قالت لي ااي غالباً تالت يوم، اها بديتو تجهيزات رمضان؟.. قلت ليها شايفه امي بتقول بعد دا نقبل على المطبخ شكلها بتفتح لي اضاني.. قالت لي انا زاتي ورده ضربت لي قالت لي تعالي عشان ما بقدر براي، رمضان دا بدل الناس تجهز نفسها للعباده تنشغل بالنضافه وغيرو.. قلت ليها اي والله الله يهدينا.....
