"ايلاف"
يعني انا ما عارفه اعمل شنو في البيت دا، قدر ما احاول ادبر مافي فايده.. الواحد يحاول يتلقها بي جاي تتقد ليهو بي جاي، عاين يا حامد حاول شوف ليك شغل اضافي لشغل الحكومه الما جايب حقو دا لأنو لو واصلنا بالطريقه دي بعد شويه حنشحد في الشوارع..
كنت بغسل العده في ضل الحوش وسامعه كلام مرت خالي مسحت دموعي بذراعي وواصلت غسيل..
خالي قال ليها هسس وطي صوتك الشفع ديل بسمعو كلامك، خلاص انا بفتش لي شغله تانيه لكن اوعك تحسسيهم بحاجه، اولاد اختي ديل حساسين شديد بالزات اميره دي.. ورده قالت ليهو الله!!! هسي انا مالي؟ سألت واحد فيهم ولا قلت ليهم انتو الكملتو القروش، غايتو انا لو خيطت خشمي دا خيط برضو حتقول لي مضايقاهم.. خالي قال ليها ورده عليك الله اسكتي وارحمينا من نقتك الكتيره دي ياخ الواحد بقى يكره يخش البيت عشان عمايلك دي...
هههههه عليك الله اليكره البيت دا منو انا ولا انت؟؟ انا من الواطه تصبح بقيف على رجل واحده شغاله اخدم في اولاد اختك وانت تجي تقول لي بكره اجي البيت عشان عمايلك؟ انت مفروض تحمد ربنا ليل نهار لقيت ليك مرا زي والله وحده غيري كان زمان طلبت الطلاق وخلتك انت واولاد اختك براكم في البيت دا..وتعال دقيقه اسعد مالو ما رسل قروش الشهر دا؟ اخوانو ديل حياكلو ويشربو شنو؟ ولا ما صدق اتخارج من البلد دي ومن مسؤوليتهم داير يرميهم لينا بي جاي ويعيش حياتو.... خالي قال ليها بنفاذ صبر: اسعد ما شغااااال قلنا ليك خلا الشغل وبفتش لي واحد تاني يجيب ليك القروش من وين.... ورده قالت ليهو وخلاهو ليه قبل ما يلقى شغل تاني؟ يا الله تصبرني بس، وأيهم برضو خلا الشغل ولا كيف؟... خالي قال ليها ما خلاهو..
ايواا لكن ما بكفي مش؟؟ نكفيهم نحن ما مشكله الله يجعلو في ميزان حسناتنا،امشي خلاص جيب لينا عيش للغدا رابطين بطنا دي من العصر عشان ناكل مع المغرب ونوفر العشا....
جاتني بي برا قالت لي المويه دي ما تخليها اكشحيها بعد تنتهي، وما تكشحيها جمب الباب امشي كدا على ناس مياسه.. قلت ليها انا ما بكبها جمب باب زول.. قالت لي خلاص تعالي كبيها لي فوق راسي ما احسن؟ ايلاف انا ما دايره معاك قلة ادب وطولة لسان البقولو ليك اعمليهو بدون نقاش كتير لأنو قسما بالله انا لو قمت كعبه، بدل ما تحمدوا الله لقيتو ليكم زول يمسكم في الزمن الصعب دا وتقعدوا بادبكم جايين تتلادحوا معانا؟ اصلا الزمن دا الواحد يعمل الخير ويلقى الشر، المويه دي والله القاها جمب الباب اخليك تردميها باقي الليل دا هدا كلمتك.....
امي اتوفت قبل سنتين ومن وقتها وانا واخواني اتشتتنا، عندي ٤ اخوان الكبير اسعد عمرو ٢٧ سنه بعد امي اتوفت سافر السعوديه يشتغل هناك، بعديهو ايهم ٢٤ ودي اخر سنه ليهو في الجامعه، بعدو انا عمري ١٧ سنه ممتحنه تالته، بعديي اميره واحمد في اميره في تامن واحمد في سادس... احمد وايهم قاعدين مع عمي، واميره قاعده مع خالتي وانا ساقني خالي حامد، مره مر ايهم بجيبهم لي ومرات بجي يسوقني ليهم بناخد يومين مع بعض تاني بنرجع... الاسبوع الفات جاب اميره واحمد ومشى وامس اتصل قال حيجي يسوقهم الليله، اول مره يقعدو معاي اسبوع كامل ويمكن دا اكتر اسبوع كنت مبسوطه فيهو بعد وفاة امي، بالرغم من تعليقات ورده الكتيره في موضوع قعادهم دا وكلامها الحار لكن كنت بنسى كل ما اشوفهم معاي...
