بعد قفلت ايه بقت تعاين لي قالت لي مالك؟.. قلت ليها خالاتك جايين.. ما ادت اي ردة فعل.. مشيت كلمت الحجه وبرضو ما كان عندها رد فعل غير قالت لي كويس.. الوقت دا الباب دقا لقيتو ولد صغير شايل اكياس كتيرة، لمن شلت الاكياس وفتحتها خفت قلت دا دايرني اجهز غدا مناسبه ولا شنو؟.. خشيت المطبخ جات ايه وراي، سويت ليهم الفطور اول بعدين بديت اشتغل انا اصلا يدي تقيله في شغل المطبخ قطعت البصل ركبتو ولحدي ما قطعت الباميه وقشرت البطاطس لقيتو حرق جيت انزل الحله حرقت يدي والحله وقعت... ايه جات قالت لي اساعدك بشنو قلت ليها ولا شي حبيبتي امشي حلي التمرين وبعدين غسلي لي العده... بقيت جاريه جوا المطبخ يمين وشمال لحدي الساعه ١ ما كنت عملت اي شي جا عبدالرحمن لقاني لايصه وقف وهو بعاين حولين المطبخ الكان مكركب بشكل ما طبيعي.. حكا شعرو وقال لي امشي البسي قربو يصلو.. قلت ليهو اطلع كيف انا ما عملت شي.. دخل وهو بكفكف اكمام القميص قال لي خليه علي... مشيت استحميت ولبست فستان عملت مكياج خفيف بعدين لبست التوب ومشيت ليهو لقيتو شغال يسوط الحله يقطع الاسود يخلط الفواكه يضرب الكريمه... ومع دا كلو كان المطبخ نظيف ومرتب خجلت شديد على الحرب العملتها قبيل بدون اي فايده، قلت ليهو اعمل شنو؟.. قال لي تمي سلطة الفواكه والكريمه.. عملتهم وهو بقى شغال باقي الحاجات، سمعنا صوت بي برا قال لي ديل هم اطلعي ليهم.. قلت ليهو بخلص دي واطلع.. قال لي خليها انا بتمها.. قال لي بحده: قلت ليك اطلعي ليهم يا لينه ليه بتخليني اعيد الكلام اكتر من مره.. عاينت ليهو وهو زاتو خلا الفي يدو وعاين لي حكا طرف جبهتو وقال لي معليش ما قاصد... طلعت وانا زعلانه شديد.. مشيت العريشه سلمت عليهم والحجه عرفتني عليهم كانو ٣ الكبيره اسمها سيده عمرها بكون قريب لي امي عندها بت اصغر مني بسنتين والتانيه سماهر متزوجه وشفعها صغار والاخيره ثريا ياداب اتخرجت من الجامعه وكانت منقبه.. الكبار شكلهم النوع الصعب داك لكن ثريا ظريفه... مشيت المطبخ لقيتو لسه شغال فتحت الدرج عشان انزل كبابي المويه ما قدرت الحق كانو ورا بقيت بتشابى جا وقف جمبي نزلهم وقال لي اسف مره تانيه.. ما رديت عليهو ختيتهم في الصينيه ومليت الجك وطلعت ليهم.. الحجه قالت ليهم ارحكم خشو جوا.. قالو ليها لالا هناك كويس.. حنسناهم مسافه حتى خشو وانا وثريا سندنا الحجه عشان تخش، قالت ليهم اييييك ما بتذكر شفت بيتي دا بي جوا متين اخر مره.. ثريا قالت ليها انتي اصلا ما بتقومي من عريشتك.. قالت ليها اي والله اتعودت عليها.. سماهر قالت عبدالرحمن في الشغل ولا شنو.. جا طالع من المطبخ شايل كباية مويه قال ليها قاعد.. سلم عليهم من بعيد لأنو ما بصافح بعدين استأذن وقال ليهم عن اذنكم جيت قبل شويه وما فاطر، لينه تعالي... مشيت معاهو المطبخ قلت ليهو بتكذب ليه؟.. قال لي ما كذبت.. قلت ليهو ما فطرت يعني؟.. قال لي لا... ختيت الصينيه عشان اجهزو ليهو قال لي ما ناديتك عشان تعمليه لي.. قلت ليهو في شنو طيب.. قال لي زعلانه؟.. قلت ليهو لا.. قال لي لكن تصرفاتك بتقول عكس كدا.. قلت ليهو الناس قاعدين برا وانا خليتهم ما ظريفه.. طلعت وقعدت مكاني، جا وراي قعد شويه بعدين طلع، بقو بتونسوا وانا قاعده ساي، ايه كانت بتتكلم مع بت سيده جات قعدت جمبي وقالت لي بصوت واطي: مالك ما بتتونسي معانا.. قلت ليها قعد اتونس.. سيده قالت لي عمرك كم يا بنيه.. قلت ليها قربت اقفل ال١٩.. قالت لي ايواا.... العصر لمن اذن صليت ودخلت اسوي الغدا جات ثريا ختتو معاي، ضاقت من سلطة الاسود وقالت لي دي عملها عبدالرحمن صح؟.. قلت ليها اي.. قالت لي عرفت.. بنفسي قلت هسي دا معناهو شنو؟.... قعدنا اتغدينا بعد داك سويت الشاي وديتو ليهم وخشيت اغسل العده، ايه وثريا جو خاشين ايه قالت لي مش قلتي لي انتي بتغسلي العده؟.. قلت ليها لالا كتيره ما بتقدري عليها امشي العبي مع توته... ثريا قالت لي عبدالرحمن اتغدى؟.. قلت ليها لالا طلع .. قالت لي طلع متين قبل شويه كنت بتوضى سمعت صوتو بتكلم بالتلفون في الصالون.. قلت ليها معناها جا.. قفلت الماسوره عشان اختو ليهو قالت لي واصلي واصلي انا بخت ليهو.. واصلت غسيل وكنت بعاين ليها لمن دايره تشيلها قلت ليها ختي ليهو سلطة اسود.. عاينت لي باستغراب وقالت لي عبدالرحمن ما بياكلها.. بعدين مشت حاكيتها وانا بقول " عبدالرحمن ما بياكلها" سغيله دي..بعد غسلتها جات ثريا مسحت المطبخ.. انتهت منو جات قالت ليهم اطلعو العريشه عشان عايزه امسح جوا.. قلت ليها ماف داعي ما تعذبي روحك.. قالت لي مافي عذاب ولا شي... طلعنا خليناها بتكنس... عبدالرحمن جا شايل الصينيه كان خاشي وقفتو وشلتها منو دخلت لقيتها مسحت جمب المطبخ ودخلت تمسح غرفة ايه، ختيتها في التربيزة جمب الباب وقلت استنى شويه لحدي ما تنشف.. سمعتهم بتكلموا بصوت هامس سيده قالت ليها ما قلنا شي ولا اتكلمنا في اخلاقها بنعرف ليها شنو نحن عشان نحكم عليها، لكن البت صغيره حـتربي آيه كيف.. سماهر قالت عبدالرحمن عرس عشان يجيب مرا تربي بتو ولا عشان يبقو ليهو اتنين دايرات تربيه.. حجه ربيعه قالت ليها والله يا سيده الكبر كبر العقل والبنيه عاقله ورزينه وماسكه البيت وماسكه ايه زي العجب، وانتو زاتكم ياداب عرفتو عندكم بت اخت؟؟ زمان كنتو خالنها لي ابوها وما جايبين خبرها ولمن رشحتو ليهو يعرس ثريا وابى جيتو تلوو ليهو يدو بيها لكن الحمدلله ولدي ما طيره وعرف ياخد بتو بالقانون والبت زاتاا بعمايلكم دي ابتكم، اها تاني مالكم جايين تنظروا فوق مرت ابوها كأنكم خايفين على ايه منها.... عملت كركبه وطلعت طوالي سكتو و غيرو الموضوع.. ثريا بعد انتهت جات قعدت معانا بقت تتونس معاي قالت لي انتي منقبه صح؟.. قلت ليها لالا.. اتفاجأت قالت لي جد؟؟ افتكرتك منقبه.. بعد شويه قالت لي حافظه كم جزء قلت ليها ما حافظه.. اتفاجأت اكتر وقالت لي ما جاده.. قلت ليها ليه؟.. قالت ما تقليل منك لكن كنت متوقعاك تكوني منقبة و حافظه اقل شي نص القران.. قلت ليها الخلاك تتوقعي كدا شنو؟.. قالت لي دي اقل وحده تناسب راجل زي عبدالرحمن.. قلت ليها انتي حافظه؟.. قالت لي اي.. قلت ليها ومنقبه صح.. قالت لي ايوه.. قلت ليها وخالة ايه، ليه ما عرسك؟ انتي اكتر وحده مناسبه ليهو.. سكتت قلت ليها لأنو بحبني ودايرني انا😊... قمت من جمبهم وخشيت جوا وانا بغلي, ديل شنو الرافعين نخرتهم في السماء ديل لا وكمان بكل وقاحه بتقول لي دي اقل وحده تناسبو.. كنت زعلانه شديد اتصلت لي هبه حكيت ليها ضحكت ضحك قالت لي لكن عرفتي ليها الاسمها ثريا دي ، هي شكلها ميته فيهو لكن ما مديها فرصه... قلت ليها تموت ساي.. قالت لي انتي مالك هسي غيرانه كدا، البسمع كلامك يقول بتحبيه بالجد.. قلت ليها انتي متخلفه ولا حاجه؟ اي واحده مكاني كانت حتزعل دي ما باقي ليها الا تقول لي انتي بت ما نافعه.. قالت لي سمح ما تهيجي فيني.. قلت ليها ايلاف اخبارها شنو طولت منها.. قالت لي كويسه والله قبيل الصباح كنت بتكلم معاها... الباب دقا قلت منو؟.. جاني صوت ايه بتقول لي ناس خالتو ماشين.. قلت لي هبه يلا ديل قالو ماشين.. قالت لي ما بايتين يعني؟.. قلت ليها بررررييي يبيتوا شنو... طلعت ودعناهم وعبدالرحمن مشا يقدمهم، ما صدقت انهم طلعو طوالي خشيت غرفتي، لقيت وقت المغرب قرب قلت اصلي وانوم.. فعلا صليت وجيت اول ما رقدت الباب دقا ايه قالت لي لينه ارح.. قمت وقلت ليها وين؟؟..قالت لي نقرا سورة البقره.. طلعت لقيتها ماسكه المصحف وواقفه قلت ليها بحيل مهدود: لكن انا تعبانه يا ايه.. سكتت شويه قالت لي خلاص كويس .. حسيت بيها زعلانه قلت ليها تعالي طيب.. قبلت علي وهي مبتسمه قالت لي حتقري؟.. قلت ليها اي خشي.. قالت لي لالا تعالي انتي برا بابا وحبوبه زاتهم منتظرنا.. قلت ليها ابوك حـيقرا معانا؟؟.. هزت راسها، لبست التوب وطلعت لقيتهم قاعدين ومنتظرني قعدت وفتحت المسجل سرعه وختيت التلفون وراي.. بدا عبدالرحمن قرا نجمتين بعدين قريت انا، كان بوقفني كتير بسبب اخطأ التجويد بعد قريت نجمتين قال لي حسْبُك، لمن ايه قرت خجلت من نفسي لأنو قرايتها كانت احسن مني وما وقفها كتير... الحجه كانت بتسمع بس، لمن جا دوري تاني قلت لي ايه اقري انتي قالت لي ليه؟.. قلت ليها انا ما بعرف التجويد قرايتي كلها غلط.. عبدالرحمن قال لي اقري برضو.. ايه قالت لي اقري اي صوتك حلو..... خضعت لكلامهم وقريت.. اذان العشا لمن اذن كان باقي لينا تلاته صفحات بس والدور عندي بعديي آيه كنت فاكراهو حيقوم للصلاه لكن قعد لحدي ما خلصنا واخر آيتين قريناهم سوا... الوقت دا كان الحجه نامت، ايه قالت حـنصلي جماعه مش؟.. عبدالرحمن عاين لي وهي عاينت لي قلت ليهم ما عندي مشكله... اتوضينا وفرشنا مصلاياتنا انا وايه جمب بعض وقدامنا عبدالرحمن، لاول مره اصلي بالخشوع دا، وانا بسمع صوتو وحاسه باطمئنان وبتمعن في كل ايه بقولها.. بعد خلصنا وصلينا الشفع والوتر -اللي لاول مره من فتره طويله اصليهم- آيه قالت لي ابوها احكي لينا من قصص الانبياء.. قال ليها يوم الليله كان متعب نقوم ننوم وبكرا بحكي ليكم.. قالت ليهو اي صح لينه قبيل قالت تعبانه، عاينت لي وقالت معليش قطعت عليك النومه.. قلت ليها بالعكس، لو كنتي فوتي علي التلاوه الحلوه دي وخليتيني انوم كنت حـازعل.. ابتسمت لي.. قبلت لقيت عبدالرحمن مبتسم صريت ليهو وقمت قامو وراي وقال ليها ايه رايك شنو تقري لينه.. ختيت المصلايه وعاينت ليهو باستغراب ايه قالت ليهو اقريها شنو؟.. قال ليها التجويد.. صفقت بحماس وقالت بالجد؟.. عبدالرحمن عاين لي وقال ليها لو هي سمحت ليك.. قبلت علي وبقت مستنيه اجابتي قلت ليها ممكن اي انا لاقيه؟.. ضحكت وقالت يا سلاام خلاص بعد انتي تقريني انا بقريك كل يوم درس.. قلت ليها طيب حاضر.. عبدالرحمن قال ليها لنا تصبحو على خير.. باسها في راسها ومشا..... دخلت الغرفه واترميت في السرير بتعب.. شلت تلفوني قصيت المقاطع الكان بقرا فيها وجمعتهم مع بعض في فيديو خلفيتو سودا، ركبت السماعه فتحتو وغمضت عيوني... صحيت مخلوعه لمن تلفوني ضرب، لقيتو عبدالرحمن وفي نفس الوقت الباب ضرب.. قلت ديل ما دايرني انوم الليله ولا شنو؟ قمت لبست التوب وفتحتو قال لي داير شاي... سكت وانا بعاين ليهو باستغراب قلت في نفسي مصحيني عشان اسوي ليهو شاي؟ في العاده لمن يكون داير بعملو براهو.. مشيت المطبخ واثناء ما انا بسوي فيهو قبلت لقيتو واقف جمب باب المطبخ.. من الخلعه شهقت وختيت يدي في صدري قلت بسم الله الرحمن الرحيم انت لمن تجي ما تقول حاجه.. خشا وكان مرجع يدينو لي ورا، خفت ورجعت ورا وقف على مسافه ومدا لي ورده حمراء بي يدو الشمال.. قلت ليهو دا شنو؟.. مدا يدو اليمين برضو وكان شايل فيها كت كات.. قال لي وهو بهز الورده ما بعرف في امور البنات لكن بقولوا انتو بتحبوا الورود.. هزا الشوكولاته وقال لي وعرفت انك بتفضلي النوع دا من الشوكولاتة.. قرب شويه ومسكهم بي يد واحده " اليمين" مداهم لي وقال لي آسف للمره التالته، ما كان قصدي ارفع صوتي عليك بس كنت ملخوم وقتها، اعفي لي... بقيت واقفه بعاين ليهو ساكت.. قال لي آسف للمره الرابعه... بعد شويه قال لي آسف للمره الخامسه... نزلت راسي وقعدت اضحك لمن رفعتو لقيتو هو زاتو بضحك وبحك راسو.. قلت ليهو لو سكت لحدي الصباح حـتقعد تتأسف لي كدا؟.. قال لي ايوه.. قلت ليهو انت ما جادي.. قال لي جادي، المهم ما تنومي زعلانه.. قلت ليهو لو وقفنا للصباح ما حانوم اصلا كان زعلانه ولا لا.. قال لي برضو احسن، ما بقدر اخلي زول ينوم وهو زعلان مني، فما بالك لمن يكون الزول دا انتي... سكت وانا منزله راسي وبلعب باصابع يدي قال لي يدي خدرت.. رفعت راسي لقيتو لسه ماديهم شلتهم وقلت ليهو شكراً.. قال لي العفو.... عملت ليهو الشاي وخشيت الغرفه بقيت بعاين للورده وتذكروا وهو بتأسف وبضحك منظرو كان زي الشافع.... تاني يوم صليت الصبح ورقدت لمن صحيت الحجه قالت لي انتي ماكي ياكي اول ايام كنتي بتقومي بدري مالك اليومين ديل.. بنفسي قلت ليها داك كام ايام الامتحانات.. قلت ليها عشان تعب امبارح بس.. عاينت لي كدا وقالت لي بتحسي نفسك تعبانه اليوم كلو؟.. قلت ليها اي.. قالت لي بجيك طمام؟.. قلت ليها لالا.. قالت لي اي ما بجي للحوامل كلهم، بعدين لمن عبدالرحمن يجي بقول ليهو يمشي يفحص ليك يمكن تكوني حامل.. قلت ليها لالالا حامل شنو يا حجه دا تعب الامتحانات بس عشان كنت بساهر وبقوم بدري.. قالت لي برضو امشو للضمان .. قلت ليها ما بحتاج والله يا حجه.. قالت لي يا بت ما تجادليني كتير.. قلت ليها خلاص بجيب الجهاز بتاع الحمل من الصيدليه.. قالت لي جهاز شنو كمان.. قلت ليها المرا بتعرف بيهو لو هي حامل ولا لا.. قالت لي دا كلام فاضي ساي اخير ليك الدكتور... سكت لأنو اتكلمت كلمه زيادة حـتقوم القيامه فيني.. بعد اتغدينا قعدت اقري آيه، جا عبدالرحمن قال لي لينه.. قلت ليهو نعم.. قال لي امي قالت كنتي تعبانه قبيل، ارح نفحص ليك.. قلت ليهو عشان نمت بعد الصبح قايلاني عيانه لكن انا اصلا متعوده انوم للساعه ٨.. قعد وقال لي متأكدة ما عندك شي تاني؟.. قلت ليهو لالا كويسه الحمدلله.. قال لي ارح خلاص عشان نتطمن.. قلت ليهو لو الدكتور سألني اعراضك شنو حـاقول ليهو بنوم للساعه ٨؟.. ضحكو هو وايه بعدين قال لي طيب.. قلت ليهو امك البقنعها منو.. قال لي مع انها مهمه صعبه لكن بقنعها انا........ الفتره البعديها ايه بقت تقريني التجويد، ما عارفه طريقتها هي الخلتني اشوفو ساهل ولا هو اصلا ساهل وانا براي الكنت مستصعباه.. بعد كل درس كانت بتخليني اقرا سورة واجود الدرس الاخدتو... يوم اثناء ما بتقريني ضحكت وقلت ليها اخر الزمن شافعه زيك تقريني.. قالت لي اثنان لا يتعلمان المستحي والمتكبر، ما فيها حاجه لو اخدنا معلومه من زول اصغر مننا مادام بتفيدنا.. قلت ليها صح لكن ما كل الناس بتقبل.. قالت لي المهم انتي قبلتي.. قلت ليها للاسف.. ضحكت وقالت لي لكن طلعتي اذكى مني وبتفهمي سريع.. قلت ليها اصلا انا اذكى منك انتي قايله شنو😌.. قعدنا نضحك وبعد داك واصلنا.... استمرينا اكتر من شهر على الحال دا يوم بعد رقدت وفتحت التسجيل بتاع عبدالرحمن زي ما بعمل كل يوم، جاني اتصال.. لقيتها ايلاف بعد سلمت وكدا قالت اي افتحي قروب الدفعه.. قلت ليها في شنو؟.. قالت لي النتيجه طلعت...
_________________
"كل ما في الامر ان التفاصيل الصغيرة، ليست صغيرة".
يتبع
