"ايلاف"
بعد ورده قامت ايهم قال لي اميره جيبي الورقه.. طلعت ورقه من شنطتها وهي بتضحك ادتنا ليهو وأيهم فتحها واداني ليها شلتها فتحتها ونطتت عيوني قلت ليهو دا شنو؟؟.. قال لي عقد ايجار.. قلت ليهو ايجار؟.. بيتنا نحن؟؟.. قال لي ايوه....
حاولت امسك دموعي ما قدرت قلت ليهو ايهم انت جادي ولا بتهظر؟؟.. قال لي لي فتره بفتش لي في بيت ايجار بسعر كويس هسي اخر رمضان لقيتو قلت اعملها ليكم مفاجأة.... اميره قالت خلاص ايلاف تاني للصباح دموعها ما حتقيف.. خالي حامد قال ليهو انا ماسك خشمي بالعافيه كل يوم اكون داير اكلمها تاني اسكت.. قلت ليهو انت كنت عارف؟؟.. قال لي اي مشينا شفنا البيت سوا.. قلت لي ايهم حنرحل متين؟.. قال لي لسه في شوية حاجات كدا ناقصه دايرين نتمها يعني اسبوع كدا وبتخلص.....
يمكن اكتر من سنتين انا ما فرحت زي فرحتي باليوم دا.. اتمنيت في اللحظه دي نرحل فيهو.. ما سألت من شكل البيت كيف م جا في بالي السؤال دا الا بعد مشا ومع ذلكىد جوابو ما بهمني لو كان راكوبه كفايه المهم نتلم انا واخواني من جديد..... الاسبوع عدا والتقديم بدا سادس يوم في العيد نفس اليوم النزلو فيهو ناس المدارس، لمن اتكلمت مع ناس هبه قالو ما حيمشو يقدمو الليله عشان زحمة المواصلات اقرب محل يقدمو فيهو في اللفه وما بتمشي بالرجلين قلت ليهم انا حاقدم لأنو تاني حانشغل بموضوع الرحول فعلاً مشيت قدمت رغباتي كلها كانت صيدله والباقي تميتو تمريض لمن رجعت لقيت ايهم قاعد قال لي بكرا حنرحل... طبعا عفشنا بتاع البيت القديم في بيت ناس عمي عندهم مخزن كدا مقفول فيهو، ورده قالت لي يا حليلك يعني خلاص ماشه حافقدك والله.. قلت ليها انا زاتي حافقدكم شديد.. وليد قال ليها امي انا ماشي اقعد مع ناس احمد.. قالت ليهو قول بسم الله كدي خليهم هم يقعدوا اول.. ضحكت وقلت ليهو طواالي تمشي معانا.. امو قالت ليهو بعد دا المدارس فتحت ما عندك طريقة الا في الاجازات.. قال ليها بقعد معاهم يوم الجمعه والسبت.. قلت ليهو من يوم الخميس بجي بسوقك.. قال لي قولي والله.. قلت ليهو ان شاء الله...... كنت عايزه اتكلم مع حسان لكن ما عارفه كيف افتكرت نفسي حالاقيهو في الشارع لمن امشي التقديم لكن في المشيه والرجعه ما صادفتو قلت بكون شغال.. طق جاتني فكره قلت لي ورده بعد المغرب بمشي اودع الجيران ما ظريفه امشي كدا طوالي بدون اودعهم.. قالت لي خلاص نمشي بعد الغدا.. فعلا اتغدينا وطلعنا عليهم لمن جينا بيت ناس خالتو نفيسه اللي هو بيت حسان هو الفتح لينا الباب، قدرت اشوف علامات الاستغراب في وشو لأني بيتهم دا يمكن خشيتو مرتين بس في السنتين ديل بسبب كلام ناس الحله.. المهم دخلنا وكنت ماشه ورا ورده بشويه كدا وهو ورانا قبلت عليهو وقلت ليهو بصوت واطي دايراك.. كشر حواجبو باستغراب خليت ورده تتقدم شويه وقلت ليهو دايره اتكلم معاك ما تطلع.. قال لي معقوله اطلع وانتي قاعده.. ابتسمت وخشينا لقينا نفيسه وبتها حفصه بحضرو مسلسل هندي سلمنا وقعدنا بقو بتونسوا وانا بالي ما معاهم خالص، قلت ليهم عن اذنكم ماشه الحمام... نفيسه قالت لي حفصه امشي معاها .. قلت ليها لالا بمشي براي خليك..... طلعت لقيتو قاعد في الحوش ماسك تلفونو قلت ليهو هي بِسس.. قال لي عيون البسس.. قلت ليهو تعال بهناك دقيقه.... مشينا طرف الزقاق بقى بعاين لي قلت ليهو حسان نحن راحلين.. قال لي شنو؟؟ راحلين وين؟.. قلت ليهو ايهم لقى لينا بيت.. قال لي كيف الكلام دا يا ايلاف.. قلت ليهو انت ما فرحان يعني؟.. قال لي افرح كيف وانا بصبر نفسي بشوفتك وقربك لي حتى لو ما بنتكلم.. سكت وانا منزله راسي قال لي ايلاف انا ما راضي بالرحول دا خلي اخوانك يرحلوا وانتي اقعدي هنا.. رفعت راسي بخلعه وقلت ليهو انت سامع نفسك بتقول في شنو؟؟ حسان انت ما عارف الانا قاعده اعيشو في البيت دا وبعيد من اخواني كيف يعني هم يرحلو وانا اقعد هنا... قال لي طيب انا اسوي شنو يا ايلاف وريني اسوي شنو ما ممكن انتي تقفليها في وشي كدا انا قلت ليك لو دايره الليله قبل بكرا بتكلم مع ايهم وانتي بس تقولي لي استنى، استنى دي لمتين ما عارف.. مسك يديني وقال لي ايلاف رجاءا وافقي.. جريت يدي ومديت سبابتي قلت ليهو اياك تعيدها تاني.. رفع يدو وقال لي طيب آسف اها قل... قاطعتو وقلت ليهو موافقه... بقى يعاين لي بذهول قال لي قلتي شنو؟.. قلت ليهو وانا بتبسم: موافقه خلاص اتكلم مع ايهم... قرب مني وحسيتو حيحضني اتخلعت وجريت سمعت ضحكتو جا وراي وقال لي اصبري لي انا ناوي ليك نيه بس خلينا نعرس نشوف تاني بتجري وين....... خشيت وانا ميته من الإحراج لقيتهم خاتين الشاي شربناهو وطلعنا.....
