قلت ليهو يعني انت اصلا ما عندك مشكله في طلعتي مشكلتك شنو طيب... قال لي مشكلتي ايهم.... الوقت دا زي الضربتني كهرباء بقيت بعاين ليهو وساكته نظراتو كانت غريبه بلعت ريقي وقلت ليهو ايهم؟.. قال لي اي، عندك رائي تاني؟.. سكت ونزلت راسي مشا وخلاني واقفه... نسيت ايهم عديل، نسيت انو كان صحبو، طيب عبدالرحمن عرف كيف؟ معقوله ايهم يكون عرف بعرسنا ومشا كلمو؟؟.. طق اتذكرت يوم عبدالرحمن جا مضروب وقبليها لمن كنت بتكلم مع ايلاف وسألت احمد لو ايهم جا وقالت انو اتأخر...... اخخخخخ من ايهم ومن عمايلو، ما عارفه انا كيف سمحت لنفسي ارتبط بواحد زيو.. خفت اطلع والاقيه، حـاقابلو بأي وش بعد عرف؟.. قويت قلبي وقلت لازم اطلع واتكلم معاهو يمكن الحيوان داك قال حاجات ما حصلت، زي ما عمل مع عمي طلعت لقيتو ماف.. مشيت الصالون برضو كان ماف قلت ياربي طلع؟ قلت اسأل حجه ربيعه تاني قلت حتعمل لي موضوع لو عرفت اني ما عارفه مكان مشا..لقيت ما عندي خيار غير ايه مشيت غرفتها وقفت بالجمبه ودقيت الباب زي ما بعمل ابوها لمن يكون ماشي ليها قالت اتفضل.. دخلت لقيتها بتكوي قلت ليها دا شنو؟ ليه بتكوي براك انا اصلا عايزه اغسل واكوي بكرا.. قالت لي دي ملابس المدرسه، بابا شكلو نسى يكويهم وطلع.. قلت ليها كان تناديني بكويهم انا.. قالت لي ما مشكله خلصت.. قلت ليها ابوك مشى وين؟.. رفعت كتفها ومطت شفايفها قلت ليها بتعرفي تكوي يعني؟.. قالت لي اي بعرف.. قلت ليها ما شاء الله ربنا يحفظك.... اتونست معاها شويه وتاني مشيت الصالون لقيتو لسه ما جا.. لقيت الحجه صاحيه قعدت اتونس معاها وكالعاده تحكي لي عن اهلهم ومشاكلهم بنتكلم كدا الباب فتح تاوقت عشان اشوفو حجه ربيعه نادتو عبدالرحمن دا انت؟؟؟.. قال ليها اي يا امي.. قالت ليهو تعال هنا دا كنت وين انت يا ود انت لسه عريس البحومك زي الزمن دا شنو.. جا خاشي وشكلو اتفاجأ لمن شافني، قالت لي وانتي يا بت بتخجلي مني ولا شنو؟ .. قلت ليها انا؟ .. قالت لي اي انتي، التوب دا مش قلت ليك ما تلبسيهو جوا البيت؟ قومي اقلعيه ... عبدالرحمن مشا وانا قلت ليها بقلعو جوا... كان ماشي على الصالون ناديتو قلت ليهو ممكن نتكلم شويه؟... قال لي ممكن.. مشينا الصاله وقعدنا في كراسي الجلوس قال لي سامعك بقيت بدعك يديني قلت ليهو ايهم قال ليك عني شنو؟.. سكت قلت ليهو عاين مهما قال ليك ما تصدقوا نحن فعلاً كنا مرتبطين لكن... سكت لمن اتنهد وغمض عيونو.. قال لي انا ما طلبت منك تبرير، لينه ما لي حق احاسبك على ماضيك لأنو كلنا مرينا بالمرحله دي ولو جينا نحاسب بعض يمكن انا اتحاسب اكتر منك، لكن انتي عارفه الزول دا طينتو شنو ومع ذلك كنتي ماشه تقعدي معاهو في بيت واحد بالايام، وريني انتي ضامنه انو ما يأذيك؟.. سكت قال لي صحبتك على عيني وراسي ولو ما ايهم بخليك تقعدي معاها شهر، لكن طول ما الود داك معاها في نفس البيت دا ما حيحصل، حتمشي وتجي زي الضيفه وانا بوديك وبجيبك.. دايره تمشي بيتكم بكرا؟... قلت ليهو لالا قلت كدا ساي، بمشي بعد العرس.. قال لي تمام، اهلنا الفترة الفاتت كانو بتصلو يعزمونا وانا بعتذر عشان امتحاناتك وقالو لي اديهم خبر لمن تخلصي، بتقدري تمشي بعد دا؟.. قلت ليهو اي.....
