كانت بتتكلم بصوت مبحوح اقرب للبكى قالت كيف يعني مافي شي ساي كدا هفت ليك تتصل وتقول لي البينا انتهى؟؟؟.. الوو سامي انا بتكلم معاك الوو... ختت التلفون وغطت وشها بي يدينها وبدت تبكي مشينا عليها قلت ليها في شنو يا هبه.. ايلاف كانت بتمسح على ظهرها بقيت بحاول انزل يدينها وهي بتهز راسها وتبكي بحرقة، الباب كان مقفول امنتو وجيت قلت ليها سامي مال... ايلاف اشرت لي باصبعها عشان اسكت.. قعدنا جمبها لحدي ما تمت بكيتها بعدها مسحت دموعها وختت يدها في راسها وهي متكله على رجولها ومدنقره.. مشيت جبت ليها مويه شربت شويه وختت الكبايه ايلاف قالت ليها حصل شنو؟.. هبه قالت وهي منزله راسها قال لي تاني ما تتصلي لي والبينا انتهى.. انا وايلاف عاينا لي بعض قلت ليها قال كدا بس ما قال حاجه تاني؟.. قالت ما قال شي قفل في وشي وانا بسأل فيهو... غطت وشها تاني ايلاف قالت ليها اهدي طيب واتصلي ليهو تاني بعدين افهمي منو الخلاهو ياخد قرار زي دا فجأة شنو.. قلت ليها انا زاتي بتصل ليهو بعدين...... هبه حالتها كانت صعبه ما وقفت بكى ولا ثانيه وكل شويتين تقول انا نفسي اعرف عملت ليهو شنو والله ما زعلتو في حاجه.. خالتو ماجده جات تنادينا للغدا قلنا ليها ما بنقدر..قالت لينا انا قلت ليكم ما تكترو الحاجات مع القهوه عشان ما تصدمكم، قومو عليكم الله هسي انا اكل براي يعني.. هبه قالت لينا ارحكم...
بعد اتغدينا غسلنا العده وايلاف قالت حتمشي عشان تصل قبل المغرب.. سألت هبه بقيتي احسن؟.. هبه هزت راسها وابتسمت.. ايلاف بصوت واطي قالت لي ما تخليها براها الليله.. قلت ليها اي ما حاخليها.. قالت لي ارح معاي هسي نسلم على ناس بيتكم.. هبه قالت بمشي معاكم.. طلعنا كلنا سوا مشينا البيت امي سلمت على ايلاف سلام حار، من يوم جات قرت معانا امي رادتها وكانت طوالي بتسألني منها ولمن وريتها انو امها متوفيه رادتها اكتر.. قالت ليها مالك ما قعد تجي للبنات ديل... ايلاف قالت ليها والله يا خالتو تقولي شنو كل مره اقول اجي اقرا معاهم لكن ما بتتسهل لي.. امي قالت ليها تعالي اقعدي مع لينه الفتره دي تشجعو بعض على القرايه.. قلت ليها صحي يا ايلاف اصلا بيتنا فاضي ورايق اخير من بيت خالك.. قالت والله ياريت لكن مافي طريقه.. قلت ليها ليه عليك الله تعالي اخوك ما بخليك؟.. قالت لي ما كدا.. امي قالت ليها اها مالك.. قالت لي خلاص بشوف لو قدرت بجي ان شاء الله.... قعدت شويه ومشينا قدمناها للظلط بعد ركبت حتى رجعنا، مشيت مع هبه قالت لي انا كويسه لو عندك حاجه في البيت وعايزه ترجعي ارجعي.. قلت ليها انتي هبله يا بت؟ حاعتبر نفسي ما سمعت حاجه... بقيت احاول اونسها لكن ما كانت بتتجاوب معاي، بعد صلينا العشاء نامت والتلفون في يدها، من لحظة رجعنا ما فكتو على امل انو يتصل ليها.... بعد نامت طلعت من الغرفه عشان امشي البيت خالتو ماجده قالت لي ما بايته معانا؟.. قلت ليها لالا بجي الصباح .. قالت لي هبه وينها مالها ما جات تقدمك.. قلت ليها تقدمني ليه انا ضيفه؟ نامت وانا بتونس معاها... مشيت البيت اول شي عملتو اتصلت لي سامي رد قال الووو.. قلت ليهو سامي كيفك.. سكت شويه بعدين قال لي كويس انتو كيف.. قلت ليهو الحمدلله، مالك انت مع هبه.. قال لي مالي.. قلت ليهو انت عارف ما تستهبل.. قال لي انفصلنا زي اي اتنين كانو مرتبطين وانفصلو.. قلت ليهو اي اتنين لمن ينفصلو بنفصلو لاسباب وبتناقشو فيها قبل ما ينفصلو... سكت ما رد قلت ليهو تمام عملت الدايرو وقصيت زمنك وهسي انفصلت صح؟ لكن تاني اياك تتصل ليها ولا تفكر ساي ترجع ليها يا سامي، اصلا كلكم زي بعض تعشمو الواحده فيكم ولمن تلقوها اتعلقت خلاص تخلوها وتمشو.... قفلت وانا زعلانه شديد هبه كانت بتحب سامي شديد وطايره بيهو السماء ما اتوقعت ابدا يجي يوم وينفصلوا.... تاني يوم من الصباح شلت كتبي ومشيت ليها خالتو ماجده قالت لي البت دي من امس ما اكلت حاجه راقده في السرير وسرحانه كدا بس.. دخلت الغرفه لقيتها فعلا راقده وسرحانه قلت ليها هبه قومي.. قالت لي لينه خليني عليك الله... قلت ليها ما بخليك، اول امس الكان بقول لي ما توقفي حياتك عشان زول وما تشتغلي بي زول ما دايرك وووو دا منو؟؟... قالت لي انا بس نفسي اعرف مالو فجأة قال لي كدا ما هو ما ممكن قبل كم يوم يتكلم معاي عادي ويجي الليله يقول لي انفصلنا.. قلت ليها انتي عملتي حاجه تزعلو؟.. قالت لي لا والله الا لمن قلت ليهو حاقفل التلفون ومن الزمن داك بدا يتغير لكن ما اتوقعتو يزعل للدرجه دي... قلت ليها واصلا مافي حاجه تزعلو في الموضوع دا بالعكس مفروض يدعمك لأنو دا لمصلحتك ولو بحبك فعلاً مصلحتك حتهمو حتى لو كان على حساب الأوقات البتقضوها سوا.. سكتت قلت ليها رايك شنو نبدا صفحه جديده؟ لا فيها فياض لا سامي لا غيرهم نعيش حياتنا سناجل مرتااااحين مالنا ومال وجع القلب.. ابتسمت بانكسار وقالت لي قصدك سناجل مسفوهين.. ضحكت وقلت ليها احسن من مرتبطين مكسورين ولا معلقين....
