"ايلاف"
صحيت اليوم دا بحماس لقيت ورده صحت وعملت الشاي قالت لي استاذه ايلاف صحيتي؟.. ضحكنا قلت ليها صحيت اي قالت لي خلاص صحي اميره عشان الزمن ما يفوتكم ... مشيت صحيتها صلينا ولبسنا وشربنا الشاي مع خالي حامد وورده وعلى غير العاده ورده مزاجها كان رايق تتونس وتضحك ساي اثناء ما هي بتحكي في حاجه خالي غمز لي واشر عليها باستفهام.. رفعت حواجبي وزميت شفايفي وانا بحاول اكتم ضحكتي قالت لي اتخيلي يا ايلاف بعد دا كلو طلعتني مصلحجيه، بعد ما خدمتها تلاااته شهور اول ما بتها جات قالت لي انتي كنتي بتقعدي معاي عشان اديكم اللبن مجان لمن مشيت كلمت امي قالت لي تستاهلي عشان تاني تخدمي ليك زول ساااي.. قلت ليها برضو كسبتي الاجر مرا عيانه براها كنتي بتنضفي وتطبخي ليها دي ما حاجه هينه.. قالت لي ااااي انا زاتي في الاول زعلت تاني قلت عشان الله بس... خالي دنقر وقال بصوت واطي والله انتي حاجه ما عندك فيها مصلحه ما بتدخلي نفسك فيها... كان قاعد جمبي انا براي السمعتو مسكت ضحكتي بالعافيه ورده قالت ليهو قلت شنو؟.. قال ليها قلت انتي من يومك زولة اصيله وبتخدمي الناس.. قالت ليهو اي والله دا زمان هسي معاك انت ومع الشفع ما لاقيه فرقه احك شعري خلي اخدم لي زول... خالي ختا الكبايه وقال ليها دا زاتو فيهو اجر... قمت وراهو وقلت لي اميره اشربي سريع الوقت اتأخر.. ورده قالت لينا ربنا يعينكم ويوفقكم ويسدد خطاكم.. قلنا ليها امييين...
طلعنا سوا خالي ركب المواصلات ونحن مشينا المدرسه قلت لي اميره احساسك شنو والليله اول يوم ليك في الثانوي؟.. قالت لي عادي ما حاسه بي شي يمكن عشان كورس بس ما سنه دراسيه.. قلت ليها يا حليل الثانوي والله كانت احلى ايام... دخلنا المدرسه لقينا الجرس لسه ما ضرب قلت ليها هداك مكتب المدير.. قالت لي اي عارفاهو امس سجلنا فيهو.. قلت ليها ارح.. قالت لي انا؟ البوديني شنو.. قلت ليها ما ماشه معاي؟.. قالت لي ضروري؟؟.. مسكتها من يدها وقلت ليها ضروري اي ارح... مشينا لقينا استاذ نادر "المدير" ومعاهو استاذ الرياضيات والفيزياء وقفت جمب الباب وقلت السلام عليكم.. ردو لي السلام المدير قال لي ايلاف اتفضلي.. اميره وقفت وانا قعدت في المقعد الجمب تربيزة المدير قال لي اها جاهزه؟.. قلت ليهو ان شاء الله.. قال لي طبعاً حنمسكك اولى الفصلين.. قلت ليهو تمام.. قال لي بعدها بنشوف لو لقيناك ماشه كويس بنمسكك تانيه وتالته.. قلت ليهو طيب ما مشكله... عاين لي اميره وقال لي دي اختك مش؟؟ امس جات مع خالك.. قلت ليهو اي اميره اختي.. استاذ الفيزياء قال ليها اها شاطره زي اختك؟؟ ما دايرين مستوى اقل من مستوى ايلاف.. قلت ليهو اميره اشطر مني .. اميره ابتسمت ليهو بس.. المدير قال لي هاديه زيك لكن المستوى دا بنعرفوا بعدين .. عاين لساعة يدو وقال ليها يلا حيضربوا الجرس بعد دقيقه انتي امشي على فصلك وايلاف بتلحقك بعد شويه حصتها التانيه معاكم.....قعدت مع المدير واتفقنا على كم حاجه بعدها قال لي الحصه الاولى ادخلي درسيها عادي بعد تنتهي امشي لي الاء بتديك الدفتر بتاع الحصص وتوريك مفروض تشتغلي كيف.. قلت ليهو طيب.. لمن جرس بداية الحصه التانيه ضرب شلت كتاب الإنجليزي والطباشير وطلعت من المكتب المدير قال لي بلحقك بعد شويه، الحوش كان فاضي الا من بنات علمي "ب" كان نص الفصل واقفين بالصف جمب الفصل واستاذ يوسف واقف جمب الباب ماسك الكتاب بي يد مربعها ورا ظهرو وبي يدو التانيه بضرب اي واحده صوتين بعدها بتدخل وكعادتو من اول يوم دخلنا المدرسه صاري وشو.. بنفسي قلت سبحان الله استاذ ويوسف وهبه عكس بعض تماماً هبه زوله هزليه وما جاده نهائي واي موقف جادي بتقلبو ضحك وهزار اما استاذ يوسف ما حصل شفتو يوم بضحك الا كم مره مع الاساتذه، ومع هبه يومتها! ومع ذلك جايين شديد مع بعض، اي نعم لحدي اللحظه مافي حاجه بيناتهم لكن انا متأكده حيجي يوم يعترف ليها او هبه الشليقه مشاعرها تفضحها.. قدرت اشوف فيهم انو ميت فيها لمن كانو شايلين الكراسي ومبحلق فيها وهي بتحكي ليهو في حاجه وبتضحك، ضحكنا لمن انا ولينه لاحظنا لشكلو وهو بعاين ليها، الزول لو بعرف نفسو منظرو بكون بيش لمن يسرح في البحبو ما كان فكر يحب خاصة زول زي استاذ يوسف... اتعترت بالحجر وقربت اقع وانا لسه سرحانه ضحكت براي وقلت دي نهاية الشلاقه.. لمن رجعت عاينت لقيتو بدق في وحده والبت مسكت يدها بألم ودخلت قلت سجمها هبه لو يوم يوسف رفع يدو عليها.... خشيت الفصل والبنات كانو جايطين وقفت مسافه ماف وحده سكتت كأني طالبه معاهم.. دقيت درج الكنبه الاولى بي يدي بي قوة كلهم سكتو.... قلت اجرب التكنيكات البعملها لينا استاذ يوسف عسى ولعل تنجح لأنو استحاله يعاملوني كأستاذه وانا اكبر منهم بسنتين تلاته بالكتير، حتى في منهم حجمهم اكبر مني ما شاء الله... رجعت يديني لي ورا وانا شايله الكتاب وقلت ليهم بصوت عالي وبحده: اي وحده ترجع مكانها... قابلت نظرات الاستغراب الفيهم بنظره حاده في اتجاه واحد.. قلت ليهم ما سامعني؟ على فكره انا ما بحب اعيد كلامي مرتين المره الاولى ما اتنفذ المره التانيه بتنفذ بالسوط.... هنا اي وحده رجعت مكانها وعم الصمت المدير جا خاشي شايل كرسي قعد قدام الكنبه الاولى وقبل الباب بالجمبه يعني حسيت بشوية توتر قلت ايلاف دي فرصتك تثبتي فيها انك قدرها.... قلت ليهم انا ايلاف، حامسكم انجليزي فترة الكورس ومن هسي حاوريكم قوانيني عشان ما تتعبو معاي.. رفعت يدي وفردت اصبعي الخنصر وكنت مربعه يدي التانيه ورا ظهري قلت ليهم كلام في الحصه ما دايره وممكن بسببو اطرد من الحصه.. فردت البنصر وقلت اتنين التصحيح ثم التصحيح، ماف وحده ترجع بيتهم كان ما صححت درس الليله وواجب امس.. تلاته النظام، الكراس يكون منظم السؤال بقلم الحبر والاجابه بالرصاص غلطتي بالحبر تعملي شخته بس ما دايره الكراس يكون مليان شخابيط بعودك الدرس من الاول... رابعاً المشاركه، اي واحده عارفه الجواب ترفع يدها حتى لو شاكه فيهو اهم شي تشارك وما تخجل من الغلط لأنو اثنان لا يتعلمان المستحي والمتكبر خجلتي تجاوبي ما حتعرفي تتعلمي من غلطك... خامساً واخيراً الاستيعاب، اي واحده ما فهمت حاجه أثناء الحصه تستنى لحدي ما انتهي من الشرح حتى ترفع يدها تسألني.... في واحده عندها اعتراض على اي نقطة من ديل.... عاينت بالسايدين لقيت واحده رافعه يدها قلت ليها اتفضلي قالت لي معليش يا استاذه لكن في اخر نقطة دي انا لو ما فهمت حاجه في النص يمكن باقي الشرح كلو ما افهمو احسن اوقفك في لحظتها عشان ما تعيدي لي من البدايه... قلت ليها انا اصلا حاعيد الشرح مرتين بعد اخلص اول مره بشوف لو في واحده عندها سؤال بعدها بشرح مره تانيه.. قالت لي طيب وقعدت.. في بت تانيه رفعت يدها وقامت قالت لي مش انتي الجيتي اول يوم معاك بتين بعتو لينا السندوتشات؟؟؟.. قلت ليها ايوه.. قالت لي طيب انتي اصلا استاذه؟... قلت ليها عايزه تصلي لشنو؟.. قالت لي لالا ما قصدي حاجه بس كنت عايزه اسألك ما حتجوا تاني لأنو اكلكم عجبني.. قلت ليها للاسف ما حنجي.. قعدت قلت ليهم ها تاني في ولا نبدا؟؟؟... قالو لي ابدي.. شلت الطبشيرة كتبت فوق english تحتها present simple وبديت شرح.. بعد خلصتو حتى اشتغلت معاهم اول قطعه...
