"ايلاف"
كنت بنضف ورابطه راسي لمن تلفوني دقا شلتو رديت وقلت ليها هبويه.. قالت لي ايلاف كيفك.. قلت ليها الحمدلله كويسه انتي كيف.. قالت لي الحمدلله.. قلت ليها لينه كيف كويسه؟.. قالت لي والله ما كويسه.. ختيت المكنسه وقلت ليها خير ان شاء الله؟.. قالت لي فياض، سفروه امس برا.. قلت ليها خلاص قنعوا من دكاترة هنا.. قالت لي اي والله، لينه حالتها صعبه شديد.. قلت ليها خلاص انا بجي عليكم بعد شويه انتي قاعده الليله مش؟.. قالت لي اي قاعده...
بعد خلصت نظافه اتصلت لايهم كلمتو اني ماشه.. يا حليلو بقينا ما بنشوفوا الا الصباح وقت يكون طالع، بعد اشتغل في المصنع مع شغل الورشة بقى اليوم كلو بكون برا يجي زول نوم بس، صحبو الله يديه العافيه شغلو هناك.. لبست وطلعت مشيت لي جارتنا كلمتها تراقب بابنا وقت احمد بجي وتخلي يقعد معاهم.. لمن وصلت مشيت لي هبه لقيتها بتفطر قالت لي الا تفطري معاي قلت ليها فطور شنو زي الوقت دا الساعه ٩ ما جات.. قالت لي قمت جعانه والله.... بعد فطرت مشينا بيت ناس لينه سلمنا على خالتو هنادي وسألتني من اخواني بعدها قالت لينا لينه جوا خشو ليها.. دخلنا لقيناها راقده ولابسه قميص اولاد شكلو حق فياض قلت ليها لينه؟.. عاينت لي ورجعت عاينت مكان كانت سرحانه، انا وهبه اتبادلنا نظرات حزن ، قعدت جمبها وقلت ليها دي احسن حاجه ممكن تعمليها الوقت دا، عيشي حزنك ووجعك عشان لو فات الاوان حـتتعبي, حـتحسي نفسك عايزه تبكي لكن م قادره, كلهم حيكونوا اتجاوزوا الا انتي لا قادره تنسي الفات لا قادره تكملي عايشه في النص، ودي مشكلة الصدمه.. مسحت على ظهرها وقلت ليها ونحن معاك دائماً ما حـنخليك براك لحدي ما تتجاوزي او تتأقلمي على الاقل... قامت حضنتني وختت راسها في كتفي جاتني ريحة عطر قويه لمن كحيت هبه طلعت و لينه زحت ومسحت دموعها قالت لي معليش نسيت الحساسيه حقتك.. قلت ليها ما مشكله.. هبه جات شايله كباية مويه ادتني ليها شربت وقلت لي لينه ما ناويه ترجعي الجامعه، الامتحانات باقي ليها اسبوعين لو دايره تنزلي بشرح ليك الفات كلو.. قالت لي حـاجمد السنه، ما بقدر انزل في الفتره دي ولا حاسه نفسي حـاقدر اقرا و امتحن.. قلت ليها لو من ناحية القرايه ما تشيلي هم.. قالت لي ما بقدر والله يا ايلاف.. ابتسمت وقالت لي اجتهدي انتي وابقي اولة الدفعه.. ابتسمت ليها، عاينت لي هبه قالت ليها انتي مالك واقفه؟.. هبه قالت ليها ااا ساي، ماشه اسوي الفطور مع خالتو هنادي... بعد طلعت قلت لي لينه هبه لسه متأثرة بالمشكله الحصلت بيناتنا.. قالت لي يمكن عشان اول مره نتشاكل ونزعل من بعض فترة طويلة.. قلت ليها هي متأثرة بالكلام القالتو اكتر.. قالت لي انا عارفه هبه، وقت تزعل بتتكلم برا راسها.. ضحكنا قلت ليها انتي نسيتي لكن هي ما حتنسى بالهين، لمن نزعل من زول بنحبو ونتكلم معاهو بالطريقه الاتكلمت بيها هبه معاك بعد نوعى لروحنا بنزعل اكتر منو، دي مشكلة الناس الحمقاء زي حسان كدا.. قالت لي صحي حسان كيف.. قلت ليها كويس، امس كان معانا.. قالت لي ما حددتو العرس؟.. قالت لي احتمال كبير بعد نخلص امتحانات.. قلت ليها ربنا يسهل ليكم ان شاء الله.. سكتنا شويه بعدين قالت لي ايلاف؟.. قلت ليها اها.. قالت لي احساسك شنو وانتي اخيرا حتبقي مع الزول البتحبيه.. صلحت قعدتي وقلت ليها اممم اوصفك ليك كيف زي لمن تكوني ضايعه جوا متاهه وتطلعي منها، حسان بالنسبه لي نهاية المتاهه دي او لو ما نهايتها هو الحـيمسك يدي عشان اصل لنهايتها، اما المتاهه دي حياتي، الاتمرمطت فيها واتعذبت وعشت فيها حاجات اكبر من عمري بكتير، تصدقي يا لينه من عقدنا وانا حاسه حياتي اتغيرت يعني الحياه الكنت عايشاها قبل هو يكون جزء منها والحياه البقى داخل في كل تفاصيلها مختلفه تماماً، انا ما اتغيرت ياني نفس ايلاف الحياتها كلها مطبات وحفر وبتحاول تعافر فيها عشان تقدر تواصل، لكن عارفه لمن يكون عندك ركن كدا بتلجئ ليهو نهاية اليوم او نص اليوم وسط كل مشاغلك وهمومك، ركن كدا بتحسي فيهو بالأمان وانك ما براك وفي اي لحظه ممكن تلجئ ليهو، هنا بكمن الفرق زمان كنت بقوي نفسي بنفسي ودي حاجه كويسه شديد على فكره كوني قادره اقيف بعد كل كف تديني ليهو الدنيا اقوم انفض الغبار وارجع اواصل بنفس القوه دي حاجه انا شخصياً مبسوطه من نفسي اني بمتكلها وبحمد ربنا انو اداني ليها، لكن حسيت بـفرق كبييير لمن حسان جا، فرق كبير شديد لمن يتكلم معاي ويهون علي مشاكلي كلها ويحاول بكل الطرق يحلها معاي ، ببسط الحاجه كأنها ولا شي لحدي ما انا نفسي اشوفها بسيطه والقى حلها بسيط جداً بس انا المعقداها، انتي عارفه لمن اكلمو اني عندي تست بكرا او قراية كتيره راجياني مستعد الليل كلو ما ينوم لحدي ما اخلص، بتصل لي هو يقول لي اشرحي لي لأنو عارفني لمن اشرح لي زول المعلومه بتتحفظ لي سريع وبتثبت في راسي اتخيلي بقعد تلاته ساعات يسمع شرحي الهو ما فاهم منو اي حاجه ويتجاوب معاي كأنو ولا دكتور الماده... ضحكنا الاتنين، اتنهدت وقلت ليها بـاختصار حاسه اني اخيراً حـاسكن في الركن دا، يعني حياتي كلها حتبقى حب وامان💙... مسكتني من يديني الاتنين وقالت لي انبسطت ليك شديد، انتي بتستاهلي كل الخير يا إيلاف، انا ما لاقتني وحده بقوتك ويقينك دا ما شاء الله تبارك الله ربنا عوضك بـحسان عشان صبرتي كتير، ربنا يسعدكم ويهنيكم ببعض💙.. قلت ليها آمين يا رب، وربنا يعوضك بالزوج الصالح انتي كمان.. فكت يدي واتكلت في راس السرير قالت لي امين، لكن ما اظن انا بستاهلو... لكزتها وقلت ليها بت دا كلام شنو، انتي تستاهلي احسن راجل في الدنيا اوعك تقولي كدا تاني.....
