قعدت مع هبه شويه وبعد اتأكدت انها هدت رجعت البيت، بقيت بفكر هل نحن القلوبنا رهيفه وبنتعلق سريع؟ ولا هم القلبهم قاسي وما بدو قيمة للعلاقات، كيف الواحد قادر يعيش مع واحده علاقة لمدة سنتين كاملات يسمعها كلام حلو والفي الغالب هي بتكون محتاجه تسمعو، يعشمها بمستقبل يجمعهم سوا ويخليها تبني احلامها على الاساس دا وبعدها يجي بكل بساطه يقول ليها ما ينفع نكمل.. وفي لمح البصر يختفي ويشيل معاهو كل احلامها البنتها معاهو ويخلي ليها الذكريات بس، ذكريات كل ما تجي في بالها تتمنى لو انها ما اسرفت مشاعرها في واحد اتخلى عنها بكل بساطه وفي اول مشكله واجهتهم، ذكريات تخليها تلعن نفسها على كل لحظه عاشتها معاهو واتغشت بي كلامو المعسول ليها... سألت نفسي تاني ليه نحن بنسلمهم قلوبنا مقابل كم حلوه سمعناها منهم او كم وعد كاذب اتقال لينا ونحن صدقناه، ليه بننجرف ورا مشاعرنا بطريقة مبالغ فيها ومستعدين نقدم ليهم اي شي ونضحي باعز ما عندنا في سبيل العلاقه دي تدوم.. العلاقه البنسبه ليهم ما بتسوى ولا ربع الاحساس البنقدمو ليهم......
اخدت نفس طويل وانا مغمضه عيوني حتى قمت على حيلي مشيت برا لقيت امي قاعده في العريشه ولابسه نظارتها وبتقرا في المصحف قعدت جمبها لمن خلصت الايه قلعت النظاره وبقت تعاين لي قالت لي مالك يا بتي.. قلت ليها متضايقه يا امي.. قالت لي تعالي ارقدي في رجولي.... عملت زي ما قالت لي وغمضت عيوني، نادت على لمى عشان تجيب ليها زيت الشعر بعد جابتو فكت لي شعري وبقت تمسح فيهو قلت ليها كدا بتوسخي ملابسك.. قالت لي اليتوسخوا ساي بكرا بتغسلوا... ابتسمت ومسكت يدينها قوي.. نمت وانا في الوضع دا لمن صحيت لقيت نفسي راقده في السرير، رقبتي كانت واجعاني لأني كنت راقده مع حافة السرير مكان الحديده والمرتبه خفيفه.. قمت صليت المغرب امي قالت لي هسي كنت جايه اصحيك قلت ليها ما قايله نفسي بنوم دا كلو قالت لي نوم العوافي..... اليوم دا ما قدرت انوم كويس بالليل ما عارفه عشان نمت قبيل ولا عشان تفكيري الكتير في هبه مشيت شلت تلفون امي ورسلت ليها " بتنا" استلمتها لكن ما ردت، جاني بفوق فياض متصل الان اترددت ارسل ليهو ولا تاني كسرت الحنك لأول مره احس اني عندي فرصه اتكلم معاهو لكن ما عايزه، اصلا الوقت دا اكتر وقت كارهاهم فيهو، قلبت في التلفون شويه حتى نمت....
تاني يوم الصباح ايلاف اتصلت لي لكن برقم غريب كلمتني بموضوع الشغل وقالت لي اخوها وافق كانت متحمسه ودايرانا نبدا طوالي قلت ليها الموضوع دا محتاج قعده فيس تو فيس ما ينفع بالتلفون.. قالت لي طيب ما مشكله تعالي لي.. قلت ليها متين.. قالت لي بتقدري الليله؟.. قلت ليها لالا الليله صعبه.. قالت لي تعالي بكرا خلاص.. قلت ليها تمام يا زوله نتلاقى بكرا... قالت لي انا ما في بيت خالي لكن.. قلت ليها وين؟.. قالت لي بيت ناس عمي لكن ما بعيد من ناس خالي.. قلت ليها انا بيت خالك زاتو ما عارفاهو وين.. قالت لي وكنتي حتقفلي طوالي مش؟🤣.. قلت ليها اي والله.. قالت لي اركبي مواصلات المدرسه زاتا حقت الحله بعد تنزلو ما بعيد.. بعد وصفت لي قلت ليها خلاص بكرا قبل اطلع بتصل ليك عشان ما انسى.. قالت لي كلمي هبه خليها تجي معاك.. قلت ليها طيب... بعد قفلت وريت امي قالت لي كلمي فياض اتصلت ليهو وقلت ليهو لقيت شغل كويس قال لي بجيكم بعدين نتفاهم ما ينفع بالتلفون... اتذكرت اني قلت نفس الجمله دي لي ايلاف قبيل قمت ضحكت قال لي مالك قلت ليهو مافي شي ما تتأخر.. قال لي دايرين حاجه؟.. قلت ليهو لالا.. قال لي اسألي عمتي ولمى.. قلت ليهو لمى مافيشه، سألت امي قالت ليهو بصوت عالي سلااامتك بس يا ولدي.. قال ليها الله يسلمك يا عمتي.... مشيت لي هبه لقيتها عاديه ما زي امس، سبحان الله مع انها بتتأثر شديد بالمواقف لكن بتتجاوز سريع برضو...
