وقفت وانا بعاين ليها لحدي ما مشت بعدها قعدت وانا بفكر في الكلام القلتو.. رجعت لنقطة الصفر تاني والمره دي لما قبل الصفر.. ما نسيت فياض لكن دخل واحد جديد حياتي، اشمائزيت من نفسي شديد رقدت وضميت رجولي علي ودموعي جات جاريه حسيت اني وحده كعبه وتستاهل البحصل فيها دا، حسيت اني اسوء بت في الكون دا وبراي بدخل نفسي في متاهات ما بقدر اطلع منها بالهين، انا اكتر وحده صعبه في التجاوز ، او ما بتجاوز ابداً ولو ايهم طلع بلعب بي ما عارفه حيحصل فيني شنو ، انا وقفت ضد الناس دي كلها واتشاكلت مع اقرب وحده لي عشانو، خايفه يجي يوم واندم زي ما قالت هبه ما عارفه وقتها حـاقبل على وين، ما حيكون عندي عين الجأ ليها ولا لي ايلاف بعد السمعتو ليهم.... لمى جات قالت لي امي بتناديك.. اتنهدت ولبست الطرحه كويس حتى طلعت قالت لي امشي اكلي ليك حاجه.. قلت ليها شبعانه.. قالت لي اتغديتي؟؟.. قلت ليها اي ..... عاينت لي كدا وقالت لي ما تزعلي مني انا جطت فيك عشان خفت عليك.. قلت ليها معليش عشان ما كلمتك اني حاتأخر... ضمتني وربتت على راسي وقتها حسيت اني ما براي وامي الوحيده البقدر الجأ ليها في كل حالاتي وحتحتويني.....
اليوم البعدو صحيت بدري شديد لبست ومشيت بالمواصلات، هبه اتصلت لي قالت لي اطلعي، قلت ليها طلعت قبيل، ماشه بالمواصلات.. قفلت بدون ما ترد علي وصلت لقيت الزمن بدري قعدت وزهجت ما عرفت اعمل شنو مشيت شلت بارد واثناء ما راجعه مكاني قابلوني مناسك وغفران سلمو علي وقالو لي تمشي معانا الكافتريا؟؟.. قلت ليهم ما بحب جو الكافتريا دا جوطة الاغاني والونسه والكلام دا.. مناسك قالت لي لو قعدتي واندمجتي معانا في الونسه ما بتحسي ارح ياخ.. غفران قالت لي مناسك شكلها ماشه تحفر خليها قلت ليها احفر شنو من الصباح.... مناسك قالت لي طيب ارح.. لقيت انو اصلا ما عندي موضوع قلت ليهم ارح خلاص بمشي معاكم مشينا وقفت معاهم لحدي ما شالو سندوتشات بعدها مشو على تربيزة فيها تلاته اولاد سلمو عليهم وقعدوا، بقو يعاينو لي كلهم كنت لسه واقفه وما سلمت على واحد فيهم.. مناسك قالت لي مالك واقفه؟.. قلت السلام عليكم وقعدت واحد من الاولاد قال لي انتي مش لينه؟.. غفران قالت ليهو ايوه بروف الدفعه.. ولد تاني قال ليها ما تبالغي كان ما كان سؤال.... كانو بتونسوا وانا ساكته وما عاجباني القعده واحد من الاولاد قال ما عرفتوها علينا يا مناسك.. مناسك قالت لي دا علي ودا محمد ودا داني... هزيت راسي بس.. تلفوني ضرب لقيتو ايهم رديت وقفلت اضاني التانيه عشان اسمعو قال لي دي شنو الجوطه دي.. قلت ليهو انا في الكافتيريا.. قال لي لسه محاضرتكم؟.. قلت ليهو باقي ليها ربع ساعه.. قال لي دا شنو الصوت دا قاعده مع اولاد انتي؟؟.. قلت ليهو اي اولاد دفعتنا... قال لي قومي من جمبهم حالا يا لينه.. شلت شنطتي وقلت ليهم عن اذنكم طلعت من الكافتريا وقلت ليهو اها.. قال لي اها ف عينك، المقعدك مع الاولاد شنو.. قلت ليهو ابرد مالك هجت كدا قلت ليك ديل زملائنا وبعدين ما كنت براي كان في بنات تاني معانا.. قال لي ما تقولي لي زملائي ولا زفتين تاني ما تقعدي مع اي ولد فاهمه؟.. قلت ليهو بحده: ما تتكلم معاي بالطريقه دي يا ايهم.. قال لي بتكلم، مش انتي حقتي واي زول بعمل الدايرو في حقو.. قلت ليهو لا انا ما حقتك ولا حقت اي زول ولو سمحت ما تتكلم معاي تاني بالاسلوب دا.. قال لي لينه انا بغير عليك ولا ما لي حق اغير؟.. قلت ليهو تغير علي من شنو؟. عملت شي غلط انا؟.. قال لي اي عملتي ليه ما راضيه تعترفي بغلطك.. قلت ليها انا ما غلطت انت الظنك سئ.. قال لي انتي ما بتعرفي الاولاد بفكروا كيف يمكن تشوفيهم بتعاملوا معاك كويس لكن نواياهم عكس كدا.. قلت ليهو انا ما بقدر اعرف نية زول ولا انت بتقدر تعرف، علي بالشايفاهو منهم بس...قال لي بحده: لينه انا كلامي واضح ما اشوفك تاني قاعده مع ولد نقطه انتهى الموضوع... سكت قال لي عشان انتي حقتي براي وحقتي جوا عيونك المكسراني دي... قلت ليهو المحاضرة حتبدا بعد دا.. قال لي طيب ما تتأخري علي.... قفلت كدا ايلاف اتصلت لي ما رديت، مشيت على القاعه رفعت لي يدها من بعيد وفي نفس الوقت غفران ومناسك رفعو يدينهم قلت بسم الله ديل جو هنا متين.. مشيت عليهم قالو لي اختفيتي وين انتي قلت ليهم كنت بتكلم بالتلفون.. مناسك قالت لي امممم.. غفران قالت لي قمتي من جمبنا وبتتكلمي دا كلو معناها دا زول مهم... الدكتور جا خاشي قلت ليهم خلاص اسكتو...
