فتحت عيوني ببطء، كنت شايفاه طشاش طشاش لمن اتضحت لي الرؤيه شفتو بصلي وبقرا بصوت عالي وتحديداً بقرا في الايه " الَّذِينَ آمَنُوا وَتَطْمَئِنُّ قُلُوبُهُمْ بِذِكْرِ اللَّهِ ۗ أَلَا بِذِكْرِ اللَّهِ تَطْمَئِنُّ الْقُلُوبُ "... ياداب انتبهت لنفسي اني نمت وانا ما لابسه توب قمت مخلوعه لقيت نفسي متغطيه.. بس انا ما كنت متغطيه لمن نمت.. قعدت وبقيت بعاين ليهو لحدي ما سلم من الصلاه.. همس بكم كلمه بعدها قام وطبق المصلايه جا قعد في الكرسي وقال لي حاسه بحاجه؟.. قلت ليهو حلقي واجع... سكت لمن لقيت صوتي رايح.. قال لي حلقك؟.. هزيت راسي بالايجاب.. قام وجا بعد دقيقتين شايل صينية فيها صحن مديده وشريط بتاع التلاته حبات وكباية مويه قال لي اكلي بعدين ابلعي الحبه.. قلت ليهو ما جعانه.. قال لي ما بنفع تبلعيها وبطنط فاضيه.. اكلت شويه و بلعت وحده وكنت قايمه قال لي ماشه وين.. قلت ليهو وانا بأشر بي يدي عشان يفهمني: عايزه اصلي، مش الصبح اذن؟.. قال لي لا..قلت ليهو وكنت بتصلي في شنو؟... قال لي قيام ليل، عايزه تصلي؟.... اتذكرت الايه السمعتو بقراها اول ما صحيت، هزيت راسي يعني ايوه قال لي اتوضي وتعالي نصلي سوا.. قعدت مكاني وانا بعاين ليهو قام طلع.. قمت لبست التوب وطلعت قال لي دقيقه.. دخل وجا وهو شايل دفايه فراها وختاها في كتفي قال لي الجو بارد شويه.. مشيت اتوضيت وجيت قلت ليهو طول في السجود.. صلينا ركعتين وفي كل سجده كنت ببكي وبدعي لفياض من قلبي، يمكن دي اول مره ادعي فيها وكلي يقين انو ربنا حـيستجيب لي بعد انتهينا قلت ليهو عايزه اقرا، مشا جاب مصحفين وجا اداني واحد وشال التاني قعد في مصلايتو وبقى بقرا بصوت واطي، اول ما فتحت المصحف عيني وقعت في الايتين "وَذَا النُّونِ إِذْ ذَهَبَ مُغَاضِبًا فَظَنَّ أَنْ لَنْ نَقْدِرَ عَلَيْهِ فَنَادَىٰ فِي الظُّلُمَاتِ أَنْ لَا إِلَٰهَ إِلَّا أَنْتَ سُبْحَانَكَ إِنِّي كُنْتُ مِنَ الظَّالِمِينَ (87) فَاسْتَجَبْنَا لَهُ وَنَجَّيْنَاهُ مِنَ الْغَمِّ ۚ وَكَذَٰلِكَ نُنْجِي الْمُؤْمِنِينَ (88)".. رجعت لورا كم صفحه ولقيتها سورة الانبياء قريتها وكنت بستشعر رحمة ربنا على الانبياء لمن قال للنار كوني بردا وسلاما على ابراهيم، ولمن قال في سيدنا لوط " وادخلناه في رحمتنا انه من الصالحين" ولمن قال في سليمان ودادوود " وَمِنَ الشَّيَاطِينِ مَنْ يَغُوصُونَ لَهُ وَيَعْمَلُونَ عَمَلًا دُونَ ذَٰلِكَ ۖ وَكُنَّا لَهُمْ حَافِظِينَ" ..ولايوب" فَاسْتَجَبْنَا لَهُ فَكَشَفْنَا مَا بِهِ مِنْ ضُرٍّ ۖ وَآتَيْنَاهُ أَهْلَهُ وَمِثْلَهُمْ مَعَهُمْ رَحْمَةً مِنْ عِنْدِنَا وَذِكْرَىٰ لِلْعَابِدِينَ " وإسماعيل وادريس وذا الكفل "وَأَدْخَلْنَاهُمْ فِي رَحْمَتِنَا ۖ إِنَّهُمْ مِنَ الصَّالِحِينَ" ويونس "فَاسْتَجَبْنَا لَهُ وَنَجَّيْنَاهُ مِنَ الْغَمِّ ۚ وَكَذَٰلِكَ نُنْجِي الْمُؤْمِنِينَ".. وزكريا "فَاسْتَجَبْنَا لَهُ وَوَهَبْنَا لَهُ يَحْيَىٰ وَأَصْلَحْنَا لَهُ زَوْجَهُ ۚ إِنَّهُمْ كَانُوا يُسَارِعُونَ فِي الْخَيْرَاتِ وَيَدْعُونَنَا رَغَبًا وَرَهَبًا ۖ وَكَانُوا لَنَا خَاشِعِينَ " .. وختاماً بمريم "وَالَّتِي أَحْصَنَتْ فَرْجَهَا فَنَفَخْنَا فِيهَا مِنْ رُوحِنَا وَجَعَلْنَاهَا وَابْنَهَا آيَةً لِلْعَالَمِينَ " .. كملت السورة ورفعت يدي وانا بدعي بيقين اكبر من المره الفاتت..قبلت عليهو وقلت ليهو شكراً.. كمل الايه الكان بقرا فيها وقفل المصفح قال لي حـاقولها ليك للمره التانيه، شكراً ليك انتي.. قلت ليهو لكن انا ما لجأت ليك المره دي، انت الوقفت جمبي حتى بدون ما اطلب منك.. قال لي عارفه شكرتك ليه؟.. قلت ليهو ليه.. قال لي لأنك خليتيني مبسوط.. قلت ليهو مبسوط؟.. قال لي ايوه، عشان قمتي الليل معاي.. سكت شويه بعدين قلت ليهو انت ليه بتعمل معاي دا كلو وانا ما بقدم ليك اي شي بالعكس حتى ابسط حقوقك كـزوج انا حارماك منها.. ابتسم وقال لي ابسط حقوقي دي انا ما عايزها بالاجبار ولا عايز اضغط عليك، لينه انا بريدك..وحـافضل احاول لحدي ما اصل قلبك، لو بعدتي خطوه حـاقرب الف، ما حـاخليك براك لأني عارفك ضعيفه وهشه.. انا داير اكون وراك.. اقويك واتقوى ليك.. داير اكون حيطتك البتستندني عليها لمن الزمن يقسى عليك.. زي لمن استندتي علي الليله تحت المطره.. وبوعدك يا لينه ما ايأس، طالما فيني نفس حـاعمل اي شي عشان اصل لحبك.... كنت عايزه اتكلم قاطعني قبل ابدا: ما داير منك اي شي في الوقت الحالي، وبالمناسبة بعتذر لأني حاولت اضغط عليك يوم نتيجتك طلعت، ما حتتكرر تاني... ما عرفت ارد بشنو انقذني اذان الصبح قلت ليهو امشي صلي.. ضحك ضحكه خفيفه وقال لي دا الاذان الاول ياداب.. قلت ليهو اي امشي المسجد هسي التاني بإذن.. ضحك تاني وقال لي طيب، صلي ونومي، انا بجي اسوي الشاي.. قلت ليهو انت ما نمت بالليل.. قال لي انا خلاص اتعودت على السهر ما بتفرق معاي، اخدي ليك نومه لأنو مفروض بعد تاخدي الحبوب ترقدي وما رقدتي...... بعد صليت الصبح مشيت رقدت، ما لحقت افكر في الحصل وطوالي نمت.. صحيت لقيت الساعه ماشه على ١٠.. قمت مخلوعه طلعت على اساس عبدالرحمن في الشغل لمن لقيتو قاعد معاهم في الصاله دخلت سرعه قبل ينتبه لي، لبست التوب وطلعت صبحت عليهم، كانو بحضروا في برنامج ديني قعدت جمب آيه و قلت ليها اصبحتي كيف.. قالت لي الحمدلله.. عبدالرحمن قال لي انتي اصبحتي كيف، ان شاء الله احسن؟.. قلت ليهو الحمدلله.. الحجه قالت لي اشربي حليب وختي فيهو جنزبيل.. قلت ليها طيب.... عملتو وجيت قعدت معاهم, اترددت قبل اسألو بعدين قلت ليهو مالك ما مشيت الشغل؟.. قال لي نسيتي؟؟.. اتذكرت انو ممسك المغلق لواحد صحبو عشان مرض آيه... قلت ليهو ااا نسيت.. قال لي حتمشي متين؟.. قلت ليهو ناس امي؟.. قال لي اي.. قلت ليهو عرفتني كيف ماشه؟.. قال لي اتكلمت مع امك امس... حجه ربيعه قالت لي خير ان شاء الله.. قلت ليها ولد خالي المرقدنو دا تعب امس ونبضو وقف لكن اسعفوهو وامي متأثره شديد عشان كدا ماشه.. قالت لي كر علي يا يمه ان شاء الله ربنا يعافيهو ويقومو سالم.. قلت ليها اميييين يارب اللهم امين.. قبلت على عبدالرحمن وقلت ليهو ماشه هسي.. قال لي نفطر ونطلع.... فعلاً بعد فطرنا لبست وشلت شنطتي لمن جيت طالعه آيه جات حضنتني وقالت لي حاشتاق ليك.. ضميتها علي وقلت ليها ما حـاديك فرصه تشتاقي لي حـاكرهك بالتلفونات.. ضحكت وقالت لي طيب سلمي علي لمى وتعالي يوم الخميس عشان تجيبيها معاك.. قلت ليها حاضر، وانتي خلي بالك من نفسك واخدي علاجاتك وارتاحي عشان تبقي كويسه سريع.. قالت لي حاضر... حجه ربيعه قالت لي سلمي عليهم عليك الله لحدي ما ندق ليك بعدين... قلت ليها يصل ان شاء الله... عبدالرحمن جا خاشي وكان لابس قال لي نطلع؟.. قلت ليهو انت ماشي معاي؟.. قال لي ايوه..قلت ليهو مافي داعي خليك مع ايه.. ايه قالت لي بابا قبيل وراني مواعيد الدواء باخدهم براي.... طلعنا ولمن نزلنا في موقف بنركب منو تاني جينا مارين بي بتاع درداقه خاتي اكسسورات عبد الرحمن وقف هناك وقال لي تعالي اختاري حاجه.. بقيت بشوف في الحاجات وما عرفت اختار شنو وبتاع الدرداقه يشيل ويعزل لي ويقول لي الاسوره دي بتجي مع يدك والخاتم دا بكون قدرك اصبعك.. عبدالرحمن قال ليهو شنو يا الحبيب ما تخليها تختار براها قام الولد سكت، قلت ليهو اختار لي انت طوالي شال خاتم فضي قال لي جيبي يدك لبسني ليهو في يدي اليمين عشان الشمال فيها الدبله، طلع قدري طق رفعت يدي عاينت ليهو وقلت حلو.. قال لي يدك المحلياه💙.. شال طقمين كدا فيهم سلسل وحلق وخاتم وحاسب الولد بعدين مشينا بقالة شال منها كم حاجه وكان معاهم كرتونة شوكولاته قال لي دي لي لمى ما ليك سامعه؟.. قلت ليهو اصلا ما بحبها.. قال لي لمى برضو؟.. قلت ليهو لالا بتحبها.. سأل من كت كات لكن كانت ماف ف شال واحده تانيه وقال لي برضو ما بتحبيها؟.. قلت ليهو انا ما عايزه.. قال لي سألتك لو بتحبيها ما لو عايزه.. قلت ليهو اي بحبها... دخلها مع باقي الحاجات بعدين مشينا لمن وصلنا شارع البيت شفنا واحد من اولاد عادل جاي من المدرسه سلم علينا وعبدالرحمن اداهو من الاكياس الشايلهم قال ليهو وديهم البيت انا بجي بعد شويه... اول ما خشينا بيتنا امي مسكتني وقعدت تبكي وتقول لي فياض ماشي ومخلينا يا لينه احيااا يا ولدي الداير يفوت ويخليني ولدي الربيتو ولدي الهادي الرزين ولدي العاقل الراجل سيد الرجال..... بعد فكتني سلمت على عبدالرحمن وقعدوا.. شلت الاكياس عشان ادخلها امي قالت ليهو دا شنو يا ولدي بالغت والله مش قبل كم يوم رسلت لينا المواد التموينيه مع تامر؟ تاني خامي دا كلو وجاي ليه؟.... جيت قعدت واتفاجأت لأنو ما كنت عارفه قعد يرسل ليهم قال ليها العفو يا خالتي، الحصل مع فياض شنو.. قالت لي اول امس اتكلمت مع بسمه كان كويس ياهو في حالو يعني امس قاااعده بسوي في الخبيز دقت تبكيي وتعزي قالت لي نبضو وقف فجأة.. عبدالرحمن قال لا حول ولا قوة الا بالله، لكن بتحصل يا خاله الناس البكونوا في غيبوبه ديل عادي نبضهم بقيف وبسعفوهم تاني بقوموا عادي.. قالت ليهو ان شاء الله يا ولدي ان شاء الله يقوم بالسلامه.. قال ليها اللهم آمين، ادعوا ليهو بس محتاج دعواتكم.. قالت ليهو ان شاء الله، صحي بدور اسألك لو دايره اعمل لي جواز الاوراق البحتاجها شنو.. قلت ليها جواز لشنو؟.. قالت لي عشان اسافر.. قلت ليها تسافري كيف يا امي لو سافرتي حتعملي ليهو شنو، فياض محتاج دعواتنا في الوقت دا بس.. قالت لي انا كان ما شفتو ما بقدر اصْلِي قاعده في نار من يوم سافروا... قلت ليها امي سفر هسي ما بنفع... عبدالرحمن قال ليها دايره تعمليهو متين انتي؟.. قالت ليهو لو لقيت هسي بمشي.. قلت ليها امييي.. قال ليها الليله الوقت اتأخر ما بنفع، بكرا الصباح بدري بجي اسوقك.. قلت ليهو عبدالرحمن.. امي قالت ليهو سمح ان شاء الله.... بقيت بعاين ليهم وهم بتكلموا كأنو ما سامعني، بعدها استأذن وقام امي قالت لي قومي قدمي راجلك....مشيت وراهو قلت ليهو دا شنو العملتو دا.. قال لي امك ما حـتهدا لو ما سافرت.. قلت ليهو سفر ما بنفع يا عبدالرحمن.. قال لي ليه؟.. قلت ليهو هو انتو قايلين السفر ساهل كدا؟.. قال لي بتتسهل ان شاء الله.. سكت ، بقى بعاين لي بنفس النظرة بتاعت المره الفاتت لمن جا ماشي.. قال لي لينه.. قلت ليهو نعم.. قال لي انتبهي على نفسك وما تقعدي في السخانه عشان وجع الحلق ما يذيد، الجو هسي كويس لكن لمن يسخن افتحي المكيف لكن ما تعليهو، وقبل تنومي اشربي ليمون دافي او حليب بجنزبيل وما تنسي الحبوب، جبتي الشريط معاك؟... قلت ليهو ااا نسيتو.. قال لي ما مشكله، بجيب ليك واحد هسي.. اظبطي المنبه على الساعه ٣ونص عشان تاخدي الحبه التانيه واكلي حاجه اول ان شاء الله نص عيشه، ولو حسيتي نفسك قادره قومي صلي ركعتين وادعي لـفياض، وادعي لي.. قلت ليهو ادعي ليك بشنو.. قال لي ربنا يوفقني واقدر اخليك تقعي في حبي.. ابتسم وانا سكت ونزلت راسي، قلت ليهو انت حتجي بكرا تاني؟.. قال لي ببيت مع ناس عادل.. قلت ليهو وايه؟.. قال لي بطمن عليها بالتلفون.. قلت ليهو بتك بعد دا حـتغير مني وبسببك حـتتوتر علاقتنا.. قال لي في زول بغير من زول بريدو؟ آيه بتريدك شديد ما بتغير منك.. قلت ليهو طيب حيعملوا شنو في الاكل؟.. قال لي ثريا مشت عليهم... تلقائيا ملامح وشي اتغيرت، قال لي آيه اتصلت ليها عشان تجيهم، بشوفها لو بتقدر تبيت معاهم ما اظن يكون عندها مشكله.. قلت ليهو ولو ما باتت؟.. قال لي بدبروا روحهم لحدي ما ارجع، آيه بتقدر تسخن الاكل وتعمل الشاي والحاجات الخفيفه دي.. قلت ليهو اي لاحظت ليها ما شاء الله ربنا يحفظها.. قال لي آمين ويحفظك انتي كمان.. هبش في جيبو وطلع واحد من الطقم الشالو قبيل قال لي دا حق لمى اديهو ليها وسلمي لي عليها لمن ترجع.. شلتو وقلت ليهو يصل ان شاء الله.......
