عيونك شوكة في القلب توجعني وأعبرها//للكاتبة : أديم الراشد

2

.... 2 .....

ريمان بعدت يده وهي مو مهتمه لكلامه ابدا ولا فكرت ابتعد رائد وهو يستغفر ولف لها لما ما قدر يتحمل تصرفاتها الصبيانيه مع نسرين وصرخ : ريمان
لفت ريمان: خير وش فيك تصرخ انجنيت
كان رائد متجه لها وهو ناوي يصفقها بس وقفه صرخة ابوه اللي كانت اقوى رعب في حياتهم
ابو محمد : رائد
غمض رائد ولف له بضيق : سم يبه
ابو محمد بغضب : وسم ان شاء الله كم مره اقولك مافيه صوت يرتفع في هالبيت غير صوتي ولا تربيه الا تربيتي
رائد : اسف يبه لكن بنتك هاذي ماعاد عرفت للاحترام طريق ولسانها صاير اطول منها ماباقي الا تضربني
لف ابو محمد بهيبته الطاغيه المخيفه وصرخ بريمان : اكيد انه انتي اكيد ومن غيرك عله بهالبيت
اتجه لها وهو يسحبها من يدها : كم مره اربي فيك انتي كم مره
ريمان بقوة وهي مو مهتمه : شسوي يعني له هو الملقوف وغير كذا شدخله بالبنات مو معقول يعني كل شي يشوفه يتدخل فيه
ابو محمد صرخ وهو يهزها : وتردين علي الكلام ي قليلة الادب لا واضح اني فعلا ما عرفت اربي
ضربها كف وهي ولا تحركت وعينها بعينه كان ورائد ونسرين واقفين بصدمه عمر ما احد تجرأ وحط عينه بعين ابوه مثلها
لما حس ابو محمد انها قوية عين لف وهو يقول : رائد
رائد : سم يبه
ابو محمد : جب لي الخيزران
نسرين حطت يدها على فمها برعب وهي تناظر ريمان اللي ما أهتزت ولا خافت
رجع رائد وبيده الخيزران اعطاها ابوه اللي صرخ بعدها وقال : اطلعوا برا
سحب رائد نسرين وطلعها برا وطلع معها ماكان وده ان ابوه يضرب ريمان بس ريمان تستاهل خصوصا انها ماحطت لاي احد احترام بالبيت
نزلو تحت واجهتهم امهم : وين ابوكم
رائد نزل راسه : عند ريمان
ام محمد : وش يبي فيها
نزل رائد وهو يقول : كالعاده
طلعت ام محمد تركض وجلس رائد وهو يستناهم ينزلون ويعرف ابوه لو نزل وماحصلهم كلهم ع الفطور راح يسوي مصيبه
٠٠
.
في بيت ابو مشاري نزلت أديم وهي تركض من الدرج وقفت وهي ترفع يدها : صباحكم انا ي احلى فاملي
التفت ابو مشاري وهو يضحك : ي احلى صباح تعالي تعالي ي ضحكة هالبيت
أديم قربت وهي تبوس راسه بضحك وراحت لامها وهي تضمها وجلست نزلت مروى وهي مبتسمه : شعليك يحق لك تضحكين وانتي تسمعين كلام ابو مشاري اللي لناس وناس
ابو مشاري حط يده على راسه بضحك: دخلنا فالغيره الحين
مروى قربت وهي تبتسم بهدوء وهي تبوس راسه :ههههه لا تخاف خذ راحتك متعودين
ام مشاري : لا لا هنا ما معكم حق اذا جينا للحق مروى عقل البيت
ابو مشاري : صدقتي اي والله صدقتي الله يخليهم لي ولا يوريني فيكم مكروه
أديم ضمته وهي تقول : ولا يحرمنا اياك ي شيخ الشباب
٠٠
.
في بيت ابو عادل لبس فيصل وجهز وجلس وهو يتعطر ويقرأ رسايل معجباته وحبيباته اللي اشكال الوان من البنات
ابتسم وهو يرمي الجوال : يالله شكثر احب البنات
دخل نواف بسرعه وهو يركض : فيصل فيصل
فيصل فز وهو مفجوع :اشبك اش صار
نواف : مصيبه
فيصل بطرب : هاي اللي احبها تهواني فدوة قلبها
نواف ضربه بشنطته : مو وقتك
فيصل : وشو
نواف : ابوي بيتزوج
لف فيصل بصرخه وهو يمسك بنواف : وشو وشو وشو عيد عيد
نواف :ابوي بيتزوج
فيصل : من قال كيف عرفت
نواف : من شوي وانا نازل سمعت عمتي تقول لابوي انها كبرت وابوي بعد كبر واحنا كبرنا وبكره بنتزوج ونتركه وضروري يتزوج وحده تشيل بيته
تركه فيصل وهو يحك بشعره: وش رد عليها
نواف : سكت وهو يقول على خير
فيصل : ماعطاها جواب
نواف هز راسه ب لا
فيصل جلس وهو يفكر وش ممكن يسوي نواف جلس : وش بنسوي
فيصل : مابنسوي شي بننتظر لما نعرف قراره اذا وافق اعلنت الحرب واذا رفض كفى الله المسلمين القتال
نواف : والله خايف ي فيصل تجي وحده وتفرقنا
فيصل حاس شعر نواف بيده : لا تخاف طول ما انا هنا
ابتسم نواف واخذه فيصل ونزلوا تحت ابو عادل : بدري بدري بدري كان تأخرتوا زياده مره جايين بدري تراكم
فيصل قرب وهو يبوس يد ابوه وكتفه خشمه وراسه وخده : روق ي باشا روق محد يستاهل اهم شي صحتك
ابو عادل : ايه بس هذا اللي انت فالح فيه
فيصل ابتسم له وهو يقول : عدول كيفك اليوم
عادل : احسن
منى : يلا يلا استعجلوا افطروا عشان ما تتأخرون
ابو عادل ناظر لفيصل : فيصل حط في بالك انك السنه هاذي بتتخرج من الجامعه والا
فيصل سبقه وهو يبوس يده : ابشر ابشر ي سيد القوم وبعدين ترا حفظت ذا الكلام

يتـــــــــــــــــبــع.....