عيونك شوكة في القلب توجعني وأعبرها//للكاتبة : أديم الراشد

106,107,108

.... 106 .....

انتظرت الرد منه بس فاجأها بأتصاله الغير متوقع جمدت يدها مو عارفه ترد انقطع الاتصال وتحسفت انها ماردت ورجع اتصل بالقوه امتدت يدها وردت وهي ترجف وساكته
تكلم فيصل اللي كان قلبه يضرب بشكل اول مره يحسه : لا تقولين شي انا بس ابي اقولك اختصار عمري انتي اختصرتي كل شي في خمس كلمات " لقيت روحي بعد ما انا لقيتك "
سكر فيصل بعد ما قال هالكلمتين اللي ازالت اشياء كثيره من قلبه ونقلتها لقلب اديم
اديم للحظه حست انها بين السماء والارض ما عرفت وش ترد عليه ما طلع معها الا انها تسكر الجوال وتوقف وتتجه لسجادتها وصلت ركعتين من بين دموعها وهي تدعي ان ربي يجمعها بفيصل مهما كانت الظروف
اما فيصل اللي رمى عنه كل شي وتلحف بلحافه وهو يرسم لمستقبل حلو مع حنين اللي تأكد انه ماعاد يتنفس بدونها بس قبل بينتهي من سهام واديم وغمض وهو ما يدري اي الصدف اللي بتكسر ظهره
٠٠
٠
من بكره الصبح على نفس الاحلام الحلوه صحى فيصل بنشاط الدنيا وهو كل شي حوله كفيل انه يخليه سعيد رتب شكله وهو يدندن "ابيك بجنبي الليله ،وانت طيب "
نزل وهو يغني بكل صوته اللي رجع يرتفع زي قبل ويملى البيت حيويه نزل وهو يشوفهم متجمعين على الطاوله بوجود منى نزل وهو يردد ( غيابك علّم الدنيا تغيب وتذبل وتحتار
وعلمني عليك أبكي وألوم النفس وأقهرها
أبي ترجع تسولف لي تعلمني وش الأخبار
أنا أحب اختصر عمري في ليلة جنبك أسهرها)
ابتدا عادل يدق ع الطاوله عشان يراضي فيصل ونواف ابتداء يغني مع فيصل والبقيه يضحكون
ابو عادل :الله الله الله من زمان عن هالصوت وهالروقان
ضحك فيصل وهو يبوس راسه :انا اوعدك من اليوم تصبح وتمسي على هالمود
منى:وحنا لنا الله
فيصل راح لها وهو يحضنها وهو متجاهل وجود سهام :لا لا عاد انتي عين السيح انتي الملح والقبله انتي اول الحاضرين افا بس انا اصلا انا مزاجي ومودي مفاتيحه عندك
منى:ههههههه ايه عاد هذا شغلك تاكل بعقلي حلاوه
عادل:يوه هنا محد يجاريه
فيصل ما رد على عادل عشان يجبره انه ماعاد يفتح الموضوع معه
منى:اجلس افطر
فيصل: بالعافيه انا مواعد رائد وعساف
ابو عادل: ارجع بدري طيب
فيصل وهو عند الباب :من عيوني ي عيوني
طلع وسكر الباب ابو عادل :الله يسعده ويديم عليه الفرحه
عادل ضاق من زعل فيصل :امين يلا انا رايح نواف قوم
نواف:بروح مع ابوي
عادل :بكيفك
منى:شفيك عليه خليه يفطر
عادل:شقلت انا الحين
ابو عادل:خير وش فيك قلبت
عادل:ولا شي سلام
طلع عادل وهو معصب
منى:بسم لله وش صار
ابو عادل تنهد : الله الهادي المهم نواف خلص على ما ألبس
نواف يقلد فيصل:من عيوني ي عيوني
ابو عادل :ههههه عاد انت نسخه مصغره
منى: هههههه طبق الاصل
سهام اللي كانت معصبه ولا لها خلق قامت بعصبيه وراحت لغرفتها
اما منى اللي طلعت لغرفة فيصل وهي تبتدي مهمتها اليوميه في ترتيب غرفة فيصل
٠٠
٠
عند اديم اللي كانت بنفس مود فيصل واحلى شوي ترتبت بشكل جميل ورايق يمثل شخصيتها الحلوه ونزلت وهي تغني بعد وكانت تردد(لقيت روحي بعد ما انا لقيتك ‎بعد اللقا ارجوك لا لا تغيب ‎صعبٍ علي ابقى وانا مانسيتك ‎احساسي كني بين ربعي غريب)
ابو مشاري :خييير خييير وش صاير اديم تغني من الصباح
اديم بوزت:ليش يبه انا دايم اغني
ابو مشاري :تغنين بس هالايام مدري ليش صايره بهالمزاج السيء
اديم ابتسمت:ارفع ايدينك يبه كذا وادعي اني اجلس كل بهالروقان
ابو مشاري رفع يدينه:ي رب
مروى وامها: ي رب بعد
اديم ضحكت : شكلكم يأستوا
ابو مشاري :ابي اعرف وش صاير معك
اديم:قلت لك صداع ويروح
ابو مشاري :ضروري هالصداع نشوف له حل
اديم ضحكت وهي تبوس يده: خلاص لقيت حله لا تخاف
ابو مشاري :وش الحل
اديم :النوم بدري والقهوهً
مروى:صايره عجوزه
اديم تنهدت :الله يبعد عنك هالصداع اللي يهد الحيل( وكانت تقصد الحب)
مروى:امين
ام مشاري:اذا رجع لك روحي للمستشفى
اديم :زين ابشري
طلعت وهي تحدث السناب شافت فيصل منزل كعادته ( ‏إلى جميلة قلبي ومدللة الصباح .. صباحكِ وردٌ وسكّر . . !)
للحظه حست انها ملكت الدنيا وردت بسرعه وهي تحس ببرودة الجو الحلوه ( ‏ يا روح الصبح والحكي الجميل ‏يا سعادة خاطري يسعد صباحك💕🎶)
ركبت السياره وهي خلاص ماتبي تطلع من هالمود ٠٠