عيونك شوكة في القلب توجعني وأعبرها//للكاتبة : أديم الراشد

55

.... 55 .....

فيصل : ولا شي بس خالتي دقت علي تبي غدا واحاول استعجل بروح
عساف : مو مسافره
فيصل : رجعوا
رائد:وليش ضايق
فيصل :لا عادي بس مالي خلق امسك زحمه
عساف : خلاص انا امسك من هنا
فيصل: انثبر بس شوي واقوم
ابتدوا يتغدون ويطقطقون ويضحكون وبعدين قام فيصل واخذ الغدا وراح لخالته
٠٠
٠
عند سهام اللي كانت جالسه مع منى وهي مو راضيه ابدا تدخل الغرفه :مابي ي منى فيها فيران
منى انجنت كيف الفيران تدخل البيت : ي سهام ي سهااام انا انا بنفسي انظف كل شي ماعمري مر علي فار
سهام: ما اردي كيف جات بس اشكالها مره تفجع بس اثنين اللي قتلهم طلال والبقيه مو موجودين
منى : انا بروح اشوف
سهام :لا لا ما تروحين اجلسي
منى : اتركيني بشوف بعيني
راحت منى ودخلت الغرفه وماكان فيها شي لكن لما جات تطلع طلع لها اكبر واحد وطقتها صرخه وصلت لسهام وطلع وطلعت الفيران من الغرفه وانتشرت بالبيت دخل ابو عادل على صراخ منى وسهام :وش فيكم
عادل اللي كان مايحب الفيران نهائيا ومستحيل يتقبلها بالبيت نط هو بدوره على الكرسي ونواف مثله ولا كان موجود بالساحه الا ابو عادل اللي كان مجبور انه يقتلها
وكان ينادي لعادل يساعده بس عادل مستحيل يجي وابتدت حرب ابو عادل والفيران وعادل كان يحاول يوثق لفيصل كل اللي جالس يصير وبعد عنا قدر ابو عمر انه يقتلها ورمى اللي بيده وجلس بتعب: عاااادل ي قليل التربيه اناديك وما تجي تساعدني ليه مرتز مثل الحريم على الكنبه
عادل :يبه الله يسعدك تدري بي ما اتعامل مع فيران ابدا ابدا
ابو عادل : لا ي شيخ انت رجال والا وشو بكره شلون تتعامل في بيتك
عادل ابتسم وجلس:يحلها حلال
جلس ابو عادل وهو يمسح يدينه بعد ما غسلها : المهم باركوا لعدول بيصير عريس قريب
منى بفرحه: يمه ي حبيبي مبروك
عادل وقف وهو يسلم عليها: يبارك فيك حبيبتي
منى : والله والله ادور لك احسن عروس تليق فيك
عادل ضحك وهو يبوس يدها: مايحتاج العروس صارت جاهزه والملكه الخميس
منى شهقت بصدمه: تمزح اكيد
ابو عادل :لا صادق تونا من شوي خطبنا ريمان والله تمم وان شاء الله الخميس ملكتهم
منى جلست وهي زعلانه: ليه ماقلتوا لي ليه ما توقعت اني ما اعني لكم شي
ابو عادل : لا ي بنت الحلال موب ذا المقصد بس عادل استعجل ولخمني مكلمني الصبح والعصر مشاني
منى:وانت ي عادل معاد انا عندك شي
عادل : لا ي عميمه بس ادري بترفضين
منى: اكيد برفض اكيد ريمان ي عادل ما تصلح لك
عادل :ليش
منى: مجنونه مجنونه لو قلت فيصل قلت يمكن اما انت لااااا لااا
عادل : يوه ي عمه انا ابيها بزينها بشينها ابيها بعقلها بجنونها ابيها الله يخليك لا تتدخلين بحياتي
منى: تسكتني ي عادل
عادل : ما اسكتك بس مابي مابي احد يدخل بحياتي
منى: براحتك براحتك انا الغلطانه اصلا اللي اعدكم مثل عيالي ورايكم يهمني
عادل :عميمه ي عيوني انتي غاليه علي وتدرين اني ما اسوي شي بدونك لكن لي حياتي الخاصه
منى : زين براحتك
ابو عادل : لا تزعلين ي منى الدنيا كذا
منى: انا اترخص بروح لبيتي
طلعت منى وتركتهم
سهام: عادل مبروك لكنك زعلت عمتك
عادل ناظر بطرف عين : انا قلت الصراحه والله يبارك فيك
نواف : عادل تعال معي نلعب برا
عادل : شوي شوي نلعب الحين تعال جيب شنطتك نشوف دروسك
نواف :يوه بدري
عادل : لا يلا
سهام: تعال انا ادرسك
عادل: لا انا ادرسه
اخذه عادل وطلع فوق ولفت سهام بضيق : مو متقبليني كلهم
ابو عادل : مسألة وقت ي سهام انت ارتاحي وايام وبتشوفين كيف يحبونك عادل ونواف تراهم حبيبين
سهام: ان شاء الله
٠٠
٠
عند فيصل وصل ودق الجرس وما طول وانفتح الباب وكالعاده وسن :هلا فيصل
فيصل : هلا وسن وينها خالتي
ام رامي جات من وراها : هلا هلا هلا بالقاطع هلا
فيصل ضحك وهو يبوس راسها: ي بعد قلبي والله انا ادري اني قطعت بس صار معي شغلات تحط العقل بالكف
ام رامي :خير ي حبيبي وش فيك
فيصل :تعالي تعالي تغدي وبعدها اقولك
ام رامي : وسن روحي نزلي الغدا
وسن: يوه يمه ابي اسمع بعد
ام رامي: اقول امشي قلة ادب روحي نزلي الغدا لا اجيب الشحاطه
وسن :اووووف
اخذت الغداء من يد فيصل وهي تمسك يده بقوه ارتبك فيصل وسحب يده وهو يقول : تعالي تعالي ي خاله بقولك
اخذها وجلس بالصالون وهو يحكي لها زواج ابوه وخطبة عادل وطلعته من البيت .

يرجى التصويت للبارت💙
يتـــــــــــــــــبــع..