زمهريراً

Part 36

#زمهريـراً

:: 36 ::

نسرين: هما حسو بروحهم غلطو فيك وجو يتأسفو علاش رفضتي اسفهم وعندتي ؟
آية: لاني ماقدرتش ننسى هداك اليوم
نسرين طبطبت ع ظهرها بلطف: ماتقدريش تنسي من غلط فيك وظلمك وحاسبك ع غلط انتي ماليكش ذنب فيه بس لازم تسامحي وتفوتي وتكملي حياتك بتسامح وماعندكش اي غل ع حد
آية: انتي قدرتي تسامحي ؟ لو كنتي مكاني ح تسامحي ؟
سكتت نسرين..
آية اندفعت: هآ ريتي .. ياسرك مثالية يانسرين راهو اللي مريت بيه مش ساهل .. ابدا مش ساهل
نسرين ابتسمت بألم: كل واحد بيقول همي مافيش زيه .. بس انا ياوخيتي مانحبش نتكلم هلبا ع الماضي .. راني توجعت وانظلمت هلبا بس معاش نحب نتفكره بكل لاني تجاوزته والحمد لله
شبحتلها بألم: شن عندك من هم قدام همي ؟
نسرين غمضت عيونها وفتحتهم بصعوبة: انا اجهضت بسبب عمي
آية: عمك ؟
نسرين: اي جدك يعني .. كنا عايشين فوق منه بداية زواجنا وكان متعبنا ع كل شي يدقق ويتعصب ويغلط فيا وفي اماليا ومرة جوني اماليا لزهم وهلبا قصص صارت .. ولما حملت وفرحت بحملي لزّنا ومن الرعشة رميت والحمد لله .. وحصلنا هالحوش من الاول ايجار وبعدين ملكناه والحمد لله ومرّت السنين والايام وشاء ربي يمرض عمي يللي هوا جدك طبعا .. عفانا الله واياكم بالكانسر ومالقاش من يوقف معاه وباع كل شي في سبيل انه يرجع ويصحّ لكن مافيش فايدة وهذا كله ومعاه خالك خطوة بخطوة رغم الأذى اللي لحقنا من وراه والظروف الشينة بس في النهاية هذا بوه وفرض عليه يرضيه .. وطبعا مافيش حد قبل يقعد عنده ابديها من امك رفضت تسامحه وعاقباته بتصرفه زمان لما حرمها من بنتها وزوجها بوك غصباً عنها وبعدين زوجها علاء وكله ع غير رضاها
آية مسحت دموعها: لكن ربي خدي حقها علاش ماخداتاش عندها هذا بوها !
نسرين ابتسمت: وهادي امك ياآية .. وماسامحتيهمش لما طلبو سماحك ؟
آية تنهدت: في فرق .. هي ربي خدي حقها وانا...
نسرين قاطعتها: خدي حقك برضو .. بنته ضاعت وهربت منهم وقعد نهار وليل دايخ ومش عارف يتصرف وذاق ماذوّق امك وماذوّقك انتي من مرار .. وامك نفس الشي ذاقت المرّ باعتبارها سما اقربلها منك
آية مسحت ع قلبها بتوتر ملحوظ: ربي ياخد فيهم الحق
نسرين ابتسمت: سامحي يابنتي سامحيهم
آية: وانتي سامحتي جدي ع اللي داره فيك ؟
نسرين: اي توا بينه وبين ربي .. وجدك لما عاش معانا ماقامش عينه فيا وكل مايشوفني يقعد يبكي ويتأسف ونادم هلبا ع اللي داره فيا
آية تنهدت: تو يعني علاء وبوي نادمين ع اللي داروه فيا ؟
نسرين: اي اكيد .. غير طبع الرجالة غير .. مش زينا .. يكابرو ويوضحو انهم عايشين وعادي وجو انا غالط لكن انا الصح ومش نادم .. لكن بينه وبين نفسه يتمنى يموت ولا يكمل حياته ندم ع اللي داره
آية: كل مرة تخوفيني من الجنس النمرود اكتر واكتر
نسرين ضحكت: صدقتي فيها جنس نمرود .. تو يجينا خالك ينمرد حياتي وحياتك ع العشي يللي مادرناشي
ضحكت آية: بري تو نلحقك هي غير نصلي بس
باست راسها: سلم وخيتي الباهية
آية شبحتلها بحب: شكرا نوسة
ابتسمت وغمزتلها: نراجي فيك ره ماتعطليش
.......................
رويدا كل يوم حالتها تسوء اكثر روحت بمولودها للحوش وجت عزوزتها وحمواتها بس رفضت تطلع وتقابلهم وكانت متمسكة بولدها اكثر ورفضت حتى يشوفوه ..
طلعت الام من الدار وسكرت وراها الباب: سامحوني بالله عليكم
اسيل شافت لحنين وتعصبت: قصدي مش معقولة يللي قاعدة ادير فيه ياخويلة تفاهمي معاها .. مش حالة هادي ؟
جميلة فنصت في بنتها: عيب اسيل اسكتي
ربعت ايديها وشافت يسارها وزفرت بضيق ..
حنين ابتسمت: ان شا الله ماعندها سو ( مدا كيسة للام ) وهادي هديتي للبيبي ويارب تعجبها
الام كانت متحشمة من تصرفات بنتها وعيونها في الارض: صحيتي سلم بنيتي
جميلة تنهدت ومدت كيسة صغيرونة: وهادي شوية فليسات تصرف ع وليدها وع روحها ويجيكم غيرهم باذن الله
الام شدت الكيسة بخجل اكتر: والله ماتجي عيب .. عادي قادرين نصرفو عليها وع وليدها
جميلة ابتسمت بخجل: عيب علينا لو ماصرفنا ع وليدنا وبنيتنا
تنهدت الام وحست قلبها وجعها وخجلت من تصرفات بنتها الصبيانية بغير عقل ..
.....................
احمد: اهم شي عجباتك ياروحي !
: هلبا والله .. ماتوقعتكش ذوق هكي
احمد: مادامني اخترتك معناها ذوق وهلبا زيادة
ابتسمت وصدقت المسكينة: ربي مايحرمني منك
..................
آية بين ايديها المصحف ومقعمزة في الجنان .. وقت طق الباب وجت بتفتح طلع خالها يجري من الحوش
محمد ينزل في كمامه كان يتوضى للعصر: راجي راجي آيو .. ماتفتحيش
آية بخجل: اسفة
شدها من خدودها: ماادوري شي
آية خشت للحوش .. وطلع خالها فتح الباب ..
نسرين: جو صحابه ؟
آية متلفتة ومستغربة: من هما هادم كل يوم عندنا ؟
نسرين: صحابه
آية باستغراب اكتر: معقولة كل يوم مايملوش ؟
ضحكت نسرين: يمل الفاضي بس لكن هادم عندهم هدف وغاية 
آية: شن هي ؟
نسرين تنهدت: هذا سر خالك مانقدرش نبوح بيه
آية بخوف ملحوظ: مش شي غلط يعني ؟ 
نسرين تنهدت بحب وحضنتها بايدها اليمين: ياوخيتي علاش تشغلي في بالك ؟ مش غلط اطمني بس
آية فرحت واطمنت: ان شا الله
....................
رويدا في داخلها قاعدة تتخبط بافكارها المشينة بين الصح والغلط مش عارفة تاخد قرار .. وبين الابيض والاسود مش قادرة ترسى ع لون .. حاسة روحها تايهة وطريقها مضببة .. مسؤولية طفل و فراق احمد حبيبها الاول .. وبين وقاحة احمد وجهله بللي صاير معاها ..
في اول الطلاق كانت راغبة الفراق والانفصال وكانت تشوف في الحياة بامبي .. والسعادة ح تحاوطها وتشوف الدنيا عيد بعيدة عليه ..
واليوم !؟
قاعدة تشوف لولدها وتاكل في اصابعها ندم ع اللي داراته في عيلة احمد خصوصاً بعد وقفتهم معاها وصبرهم ع انفعالاتها واضطراباتها النفسية ..
بكل توتر كانت تمرر ع جبهتها .. وتخمم .. وتفكر .. وتسرح ..
كانت لياليها حب وسعادة مع احمد .. يحاول يرضيها بكل الطرق .. والليلة وين احمد !؟
اللي فيقها من سرحانها ولدها جعان ويبكي ومش عارفة كيف تتعامل معاه .. أم لاول مرة وصعب عليها تتعامل مع كائن صغير .. عظمه رقيق .. وبشرته حساسة لاي تصرف مش مدروس
كانت أمها هي اللي تعاني وتراعي فيه ..
الام: يابنتي عيب اللي اديري فيه في وليدك وفي الناس !
رويدا دمعتها محصورة: ماما بالله عليك خوديه اعطيه شيشته وخليني بروحي مع روحي
رفعاته في حضنها وباست جبهته: ربي يحفظك وليدي وتواتيك الايام الطيبة
شافت لبنتها بنظرة عتاب وتنهدت وطلعت ..
رويدا حطت راسها ع المخدة وبدت تبكي وتشكي لربها ..
فمن غيره يسمع عبده حين يناجيه في ضعفه ؟!
...................

آية بعد شطبت الكوجينا دارت شاهي اليانسون ليها ولنسرين ومشتلها في دارها بتعطيها الطاسة وبترقد .. بس سمعت أنين وحست انه نسرين تبكي .. قربت وذنها من الباب وسمعت

( يارب ارزقني بعيّل منه يارب .. نبي نولي أم خاطري حد يقوللي ماما .. يارب انت عالم بحالي .. انت عارف ياربي راني نحب محمد وهوا مقدرّني مانبيش نحرمه من الصغار يارب ارزقني يارب .. يارب فرح قليبي وقليبه وطيّب خاطرنا .. )

سكتت شويا وبعدين استرسلت بدعاء مرتب

( اللهم إني أحببتُ عبداً من عبادك فلا تحرمني منه وارزقنا يالله الذرية الصالحة تعينونا على طاعتك )

تنهدت وكملت

( يارب فرّح آية وعوضها خير وارزقنا يارب الزوج الصالح اللي يجبر كسرها وينسيها همها يارب )

ابتسمت آية لطيبة قلب هالمخلوقة .. آية تمنت لو سمعت هالدعاء من امها .. بس اكيد ربي كاتبلها الخيرة في كل ماصار ..
ونعمَ بالله
وسيجبر كسرنا ويعوضنا باذن الله ..
طقت الباب بالخفيف واستاذنت بالدخول
نسرين رفعت سجادتها اطبق فيها: سبقتيني اليوم ودرتيهولي ؟
آية ابتسمت: ربي يتقبل منك
نسرين انصدمت: سمعتيني ؟
آية: من غير قصد والله
حوّلت بدلة الصلاة وقعمزت ع حافة السرير وواطت عيونها بخجل ..
آية حطت الطاسة وقربت منها: اسفة والله ماقصدي نحرجك
نسرين ابتسمت: تمنيت دعواتي بيني وبين ربي مانبيكش تسمعيني باش تقولي رياء هذا وتمثيل
ضحكت آية: والله يابنت ماعمري ريت اطيب من قلبك .. تعرفي نقولك سر ؟
نسرين رفعت عيونها باستغراب: شنو ؟
آية: نحس في روحي احقر مافي الارض لما نشوفك
نسرين اضايقت: علاش الكلام السلبي اهوا ؟
آية: لاني درت هلبا وماكنتش راضية بس درت ارضاءً لنفسي وخليتها تتغلب عليا النية السودة والقلب القاسي
ابتسمت وتنهدت: انتي طيبة وكويسة مالقيتيش من يقدرك بس
آية: عمتي دارت هلبا باش ترضيني وربتني وحبتني وعاملتني زي بناتها .. بس كنت نمرودة حتى انا وتكلمت عليها وع بناتها بسوء لصحباتي ولكل من يشوفني .. حتى مرة خطبو بنتها ناس شوّهتله سمعتها بانها بايرة وماتحبش ادير شي
نسرين رفعت عيونها بصدمة اكبر: لا حول ولا قوة الا بالله .. ( تلفتت لآية بجسمها وشدت ايديها ) آية اتفقنا ننسو كل شي اسود في حياتنا صح ؟
آية مسحت دمعتها وتمسكت في نسرين اكثر: اي وباذن الله انا قدها ( وقفت وشدت الطاسة ) خودي طاستك وارتاحي .. تصبحي ع خير
طلعت وخلت نسرين قلبها معلق عليها بخوف وعيونها تتبعها ..
......................
رويدا رفعت التليفون وكانت الساعة 2:00 ليلاً
وع رقمه ع طول ..
طوووط .. طوووط
احمد: ايوا !
رويدا: احمد ؟
احمد عدّل تقعميزته: رويدا ؟
رويدا: مسحت رقمي والا نسيته والا شني ؟
احمد زفر بضيق: قاعدة نقرازة ؟

#Dudu