#زمهريـراً
:: 38 ::
جميلة تنهدت: خليهم ياعلي .. ع كيفهم تو نتصرفو مانقدرش نرد حد هذا عطيناه موعد وهذا حدد موعد ماتجيش نرد حد
علي ابتسم: ربي يتمم ع خير
..........................
مروحين في الطريق وقت سألت آية: زعما روحو صحاب خالي ؟
نسرين باللامبالاة: اي اكيد .. لكن في واحد ديما يعطل عنده اكيدة قاعد لتوا
آية: شن اسمه ؟
نسرين: والله مانعرف .. عمري ماسألته الحق
آية: كيف هكي ؟ كان انا راني فددته لين خبرني
نسرين: مش بالضرورة طالما نعرف الهدف وانا واثقة فيه
آية شبحتلها باستغراب: شن الهدف ؟
نسرين ارتبكت: هلبا تسألي اليوم يابنت .. شن صايرلك ؟ المهم توا قوليلي عجبك الكتّاب ولاه !
آية ابتسمت: اي الحق .. امتى نقدر نختم القرآن ؟
ضحكت نسرين: وحدة وحدة عليك .. ولو تصرّي وتستمري ح تختميه اكيد
آية تنهدت بقلق: يارب
.......................
اسيل قعمزت ع سريرها وشدت تليفونها .. وخشت لقائمة الحظر .. اليوم آن الآوان لفك كل اوجاعي مع فك الحظر .. حوّلت حليمة وسراج وابتسمت انتصاراً ..
ضِرار يسواهم كلهم ..
حنين تشبحلها باستغراب: شن سر الفرحة معقولة ع خاطر ضِرار ؟
اسيل ابتسمت بحب: لا .. فرحانة بروحي وبانجازي
حنين: للمشروع ؟
اسيل وقفت ع الروشن وابتسمت: لا .. حوّلت سراج من الحظر بعد قعد فيه قريب سنة
حنين تنهدت: نيالك ع الانتصار .. اشبح هي حليمة جابت او لا ؟
اسيل رفعت كتافها: تقريبا جابت وسيبت حتى قرايتها
حنين تألمت: ياروحي ع البنية طاحت فيه هالكلب الكلاب وبطلها بعد كانت شاطرة
اسيل شبحتلها: ربي جازاها ع خيانتها ليا .. ربي ياخد فيهم الحق الزوز
حنين: آمين .. توا فوتيهم وقوليلي شن بتلبسي ؟
اسيل رجعت قعمزت: بنلبس شي بسيط مانبيش نكثر ولا نقعد نخمم زي مادرت في سراج قبل .. نبي كل شي جديد
حنين: بتشري لبسة ؟
اسيل ضحكت: لا نبي نجدد عقليتي وتفكيري وحياتي كلها .. نبي نمسح الماضي ونبدا من الاول مع ضِرار ( رفعت عيونها وتنهدت بحب ) وقت قلتيلي تو يجي يوم تضحكي ع روحك لما بكيتي ع سراج قلت مستحيل .. سراج قطعة من روحي وكل شي بالنسبة ليا .. آذاني بشكل لا يوصف وقصد الآذية بآية وبعدين بحليمة الخفيفة يللي صدقاته الهبلة وتزوجاته
حنين طبطب ع ركبة اختها: ربي يهنيك ويعوضك ضِرار ع كل يوم اسود عشتيه .. وبعدين ماتندريش مرات حليمة وسراج تأقلمو مع بعض وعايشين
اسيل بعدم اهتمام: خللي والله يعيشو انا مالي ؟ .. ربي يسعدهم ويبعدهم
حنين ابتسمت وسكتت ..
اسيل شبحتلها ونخصتها ع جنبها: وعاد ماننسوش صلوحة قداش تحمل باش وافقتي عليه يامتغطرسة ( شبحتلها باستغراب ) حق قوليلي علاش كنتي شايفة روحك وعلاش توا تغيرتي ؟
حنين ضحكت بهزوة: كنت غبية وتوا خديت خلطات ذكاء ونشط دماغي شويا وبديت نفكر صح
ضحكت اسيل: والخلطات طبعا هادي من سناء اكيد !
حنين اندفعت: ع سيرة سناء .. تصدقي اختها طلعت واخدة خال آية
اسيل: باه !
حنين: اي آية توا قاعدة مع خالها ياغبو خيرك ؟
اسيل وقفت بفرحة: بجديات ؟ يعني توا نقدرو نمشولها وهكي ولاه ؟ ( بتوسل ) بالله عليك خللي سناء ادلنا ع الحوش ونمشو
حنين تنهدت: قالت بناخدلك موعد معاهم واشبح شن يصير ؟
اسيل: في العادة ماتكذبش سناء ولاه ؟
حنين: اي طبعا حشاها .. ف اكيد هاليومين وترد عليا
اسيل: صعب الموضوع لدرجة يومين ؟
حنين رفعت كتافها: ع آية !
..........................
محمد حط فنجان القهوة بسرعة: ااه قهيوة ماشا الله
نسرين بابتسامة: صحتين
محمد وقف: تبو حاجة ؟
نسرين شافت لآية : حميدا عادي كان جبتلنا بضاعة عصبان خطراته عليا آية وقالتلي فالحة فيه
محمد ضحك: مادامه هكي نجيب علاش لا ؟ لكن بشرط آية اديره وانتي عليك الحوسة كلها اضميها شن قلتو ؟
آية ضحكت ..
نسرين شهقت: هآ بالك هلبا عليا ؟
محمد شاف لآية وضحك: عدل هكي ولاه !
آية: لا عادي انت بس جيب البضاعة وانا وياها نتفاهمو
ابتسم محمد: ربي يدوم الود عليكم ياحنة .. انا شن دخلي فيكم ؟
ضحكت نسرين: ريتيه ولاه !
آية ابتسمت وأسرت في نفسها دعوة
( يارب ارزقني راجل زي خالي ونكون انا زي نسرين يارب )
.........................
التجهيزات ع قدم وساق .. والكل كان متوتر ومرتبك عيلتين اليوم في ضيافتهم .. والعيلتين كانو خطاب
وواحد من الخطاب اليوم عند النظرة الشرعية .. النظرة يللي بيدق قلبه وقلبها وقت مُلقاهم ..
حنين: يعني نلبس العباية هادي احسن ؟
اسيل كانت تحط في رتوشها: اي ياوخيتي خلاص اسكتي عليا خليني نلهى بروحي
حنين تنهدت: ياريتني كلمت سناء تحضر مش خير ؟
اسيل تلفتت: حنين تربحي وخيتي نوضي حوسي ع روحك وصبي العصير بعتلي ضِرار انهم ع وصول
حنين لوت فمها: باهي مبردك ومبرده
.....................
آية تقرض في المعدنوس: اي انا نحب نحطله بطاطا وانتي وراحتك !
نسرين ضحكت: تو بنديرو موضوع ع العصبان من يحطله بطاطا ومن لا ! خالك قال اديره آية يعني انا نعاون بس
آية ابتسمت: تمام .. عندك شحم ؟
نسرين: اي جاب خالك
وبدت التجيهزات والاحاديث تطول .. وفي زحام افكارها كانت تحاول تتناسى موضوع الضيف .. تحاول وتحاول .. والمحاولة خير من الوقوف في نفس المكان دون جدوى ..
.......................
حنين شادة الصفرة وترعش مع بعضها .. رهبة اللقاء .. خوف من ردات الفعل .. والشوق زاد دقات القلب .. وصلو لصلاح فابتسم ..
خشت بالصفرة ابتسم بوها وحطها ع الطاولة واستاذن ..
قعمزت وشبكت ايديها في بعض بتوتر ملحوظ ورجفة خجل ..
صلاح كان كل يوم يزيد اعجابه بيها فـ حب يفتح موضوع
صلاح: شن شروطك يادكتورة
ابتسمت وارتبكت وتلعثم اللسان: مافيش شروط
ابتسم: والله ! غريبة ؟ مش تبيني نطلعك تكملي برا ؟؟ شن تغير ؟
حنين كانت ترجف وزاد صوته الجهوري اربكها .. فـ التزمت الصمت
صلاح: شن نفهم ؟؟
حنين رفعت عيونها بخجل : شرطي تكون معاي راجل
ابتسم بحب .. واخلاصاً لهاللحظة: وانا قدها
وقفت حنين وطلعت وشوفة بوها واقف ع الباب بروحها رهبة .. ماقدرتش ترفع عيونها فيه طلعت تجري لدارها .. يللي لحقتها عليها اسيل
حوّلت وشاحها وبدت تاخد في نفس بصعوبة .. حست اكسجين الدنيا كله في اللحظة هادي لاذا بالفرار ..
اسيل: شن صار ؟
حنين ساكتة
نخصتها: تي تكلمي شن صار !
حنين شافتلها وعيونها دمعت: مش مصدقة عيوني انا
حضنتها اسيل بحب وابتسمت: ربي يتمملك ع خير ياغاليتي
..........................
آية: شن رايك ياخالي ؟
محمد ضحك: الله يبارك اول مرة ناكل عصبان يعجبني !
نسرين شهقت بالخفيف: ياناري عليا طاحو ايديا وانا نديرلك وتقوللي لا ماديريش فيه بطاطا فكيني وتوا بالبطاطا كليته وتشكر ؟
محمد استفز اكتر: انتي حتى بالبطاطا مش ح يجيك هكي ؟
نسرين شافت لآية: ريتي خالك يللي تشكريلي فيه وفي معاملته ليا ؟ طلع ياما داس
محمد يضحك: انبصر ياودي .. انتي ماشا الله في كل شي الا هدا
نسرين: مصّر انت اني مانعرفش نبدع فيه يعني ؟
آية تضحك خفية: شكلني خديتكم بعين وبتربخ بينكم .. ( ضحكت ) خالي تبي الحق نوسة وين ماتحط ايديها ماشا الله ونعتبر في العصبان انا أشرفت بس والباقي لمساتها الله يبارك عليها
نسرين: لالا ماتغطيش عليا لا لمسات ولا هم يحزنون .. كله من تحت يدياتي وبعدين مادوريشي خالي تو بعدين يجيبلي طرف شكلاطة ويقولي اسف
شرق محمد بالاكل: زي الحق
ضحكت نسرين وآية كانت تشوفلهم باعجاب ..
.......................
طلعو الضيوف وروحو وهما بكامل رضا وسعادة بالبنتين والعيلة بالاجمع ..
ركبت اسيل ومعاها شوية حلويات لشقة احمد ..
فتحلها احمد: اسيل ! خشي
اسيل خشت وحطت الصونية ع الطاولة: جبتلك حلويات
احمد رجع قعمز في مكانه: روحو ؟
اسيل بحزن: اي وبابا مضايق لانك ماحضرتش معاه
احمد بالامبالاة: مش مهم حضوري
اسيل: ربي يهديك انت اهم واحد وكان لازم تحضر .. يلا فيها خيرة
احمد: سكري وراك الباب
طلعت اسيل وسكرت الباب وتنهدت بضيق: ربي يفرجها عليك ياوخيي وترجع ضحكتك زي زمان واحسن
....................
نسرين: تعرفي نبي ندوّش نحس في روحي بنفشل خلاص
آية ابتسمت: بري دوشي وارتاحي خلاص كملنا احني .. تو نرد الاماعيين بروحي
نسرين ابتسمت: صحيتي آيو
طلعت نسرين .. وخالها يشرب في قهوته ومقعمز مقابل التلفزيون ع الاخبار ..
قامت الطنجرة بتمسحها خطر في بالها من جديد .. كيف خطر وهو ماغاب عليه اصلا .. تمسح وتخمم ..
مترددة تسأل خالها او تحتفظ بالسر .. وبعدين حركت راسها يمين يسار وطيرت كل الافكار .. هالمرة ماتبيش تتوتر وادس في خاطرها .. خصوصاً خالها انسان سلس في التعامل ومتفاهم ..
حطت طنجرتها وسرعت خطواتها لخالها ..
آية بربكة واضحة: خالي !
رفع عيونه وحط فنجانه: اه خالي .. تعالي قعمزي جنبي !
بخجل واضح قعمزت وشابكة ايديها بتوتر: بنسألك ع حاجة ومترددة !
محمد ابتسم: اسألي شن تبي ماعندكش مشكلة معاش تترددي ؟
آية رفعت عيونها بثقة بعد اكتسابها من كلماته: ع صاحبك يللي شفناه امس معاك
عقد حواجبه: صاحبي ؟ من هوا ؟
آية تلعثم لسانها: لو طارتلك خلاص مش لازم
محمد: قولي عادي نسمعلك !
آية: امس شفته معاك وقت ماشيين للكتّاب .. وحاس روحي نعرفه بس مش متاكدة .. شن اسمه ؟
محمد شبحلها باستغراب
آية وقفت: خلاص خلاص مش لازم
محمد: اسمه معتصم بالله .. منين بتعرفيه اصلا ؟؟
آية جمدت مع بعضها .. وتشنجت اعضائها وابتسمت بخجل: عرفته
محمد باستغراب: كيف بتعرفيه ؟
آية رجعت قعمزت: ضابط ولاه ؟
محمد: اي ؟
آية: لا شي
محمد زاد استغرابه: شايفتيه عند بوك ؟
آية: لالا .. صارت مرة وتلمحته بس وقتها كان لابس عسكري هذا علاش سألتك
محمد رجع عيونه للتلفزيون: اه
آية ابتسمت وناضت للمطبخ كملت حوستها ..
محمد حط الريموت وشاف باستغراب: شن صارلها زعما ؟؟ وكيف عرفاته ؟؟ ومنين ؟ تحسابني صدقتها .. ( تنهد ) الله يهدي بالك يابنتي
........................
آية عاصرة ع قلبها ومبتسمة: ياربي سبحان الله عرفته من اول ماشفته ماقدرتش ننسى نظرته ليا بخوف وقت لوحت تليفوني قدامه .. ربي يهنيه ويوفقه
....................
حنين: مستحيل ياماما نكلمه .. يقرا الفاتحة وبعدين ساهل
جميلة لوت فمها مش عاجبها: كيفك ياشيخة .. الرقم اهوا تبي تكلميه باهي ماتبيش ملحي شوفي الفالحة اسيل !
حنين: مادخليش في حد
جميلة: تي هوا خطيبك خلاص حسبة راجلك !
حنين: شن راجلي ؟ لا مش محرملي وحرام وفكيني وريحيني ومادخلي في حد
حذفتها بالمخدة: ملحي وسكري فمك تقول رصاص
ضحكت حنين: ادعيلي اميمتي ربي يهنيني ويفرحني
جميلة: اي غير راجي
ضحكت حنين وبعتت مسج لسناء
( نجحت الخطة )
..........................
سناء وصلها المسج ضحكت وأسرت في نفسها
( ربي يهنيك وخيتي ويسعدك يارب )
نورية: اضحك فيك ملايكتك ؟
ضحكت سناء: لا ياغالية .. حنينة ادعيلي ديما ديما ادعيلي
ضحكت نورية: ديما يابنيتي من غير ماتوصي
جت سناء قربت ورقدت ع ركبتها: ربي يباركلي فيك يااميمتي
نوريك ابتسمت: ربي يفتحها عليك يابنيتي ويرزقك الله بالزوج الصالح اللي يسر قلبك وخاطرك ونشوفك ديما فرحانة يابنيتي ويعطيك الله ع قيس نيتك الطيبة
سناء غمضت عيونها: ربي يحفظك لينا ويديمك تاج ع راسنا
#Dudu
أنت تقرأ
زمهريراً
Actionالاعتياد...! أصبح واقع أعيش تفاصيله.. و رداءًا ارتديه في جميع المواسم.. لكن الشعور لا يمكن له أن يكون عاديًّا.. اضطراب،خوف،ورعب... هذه أنـا .. وهذا ما أعيشه.. #زمهريـراً
