صد و طلع لـ غرفته ، بدل ملابسه و اخذ له شاور ، انسدح على السرير يفكر بينه و بين نفسه ( انا زعلتها ف وش ؟ ليه كذا اسلوبها معاي ! هل انا سويت شي بدون م احس بنفسي ولا وش !!! ) ، لبس بلوفر دافي لونه سُكري
و مع بنطلون سُكري كذلك مع حذاء ( الله يكرمكم ) لونه ابيض رش عطره العود و نزل للصاله بهدوء ، اخذ له كوب قهوه و طلع يقعد بـ الحوش لـحاله ، بين الهدوء و الهواء البارد ، ابتسم يتأمل النجوم و غيره يتخيل بيوم هياء تصير ملكه ، تصير حلاله ، زفر بهدوء وقال : اه يالهياء اهه لو تدرين شكثر احبتس و اهيم فيتس !
اما عند هياء الي كانت بـ غرفتها تراقبه من الدريشه الي كانت تطل على الحوش ، زفرت وقالت : هذا وش مطلعه بهالبرد ، فتحت الدريشه لأجل تسمع وهي فعلا كانت تسمعه وهو يسولف مع نفسه ، قطبت حواجبها من شافته حاط جواله على اذنه وقالت : من يدق هالوقت المتأخر ، صدت بعدم اهتمام و فز قلبها من سمعته يقول ( هلا والله دكتوره الاء .. عسى ماشر ) فتحت عيونها بصدمه وقفلت الدريشه بغضب ، جلست على السرير وقالت : وش تبي منه هذي مناشبته !! اهه يربي بيجلطوني كلهم اهخ منك ي سطّام
-
اليوم الثاني صـباح جديد ، تحديدا فـ بيت ابو طارق
طارق بتعجب : يمه ؟ ليه البيت كذا مابه احد
ام طارق : سهروا الليل كله يلعبون هنا و شكلهم تعبانين
طارق : طيب و لين بنتي وين ؟
ضحكت وقالت : و بنتك عنيده ! حلفت م تطلع عندكم راحت تنام فـ غرفة البنات زعلانه منك من امس وهي تشكي ل تميموه
طارق : والله يايمه هاوشتها لأنها تقعد ع الايباد كثير
ام طارق : وانت بشويش ع بنتك ما عندها احد هي بعد وش تسوي من حقها تمل
طارق : عندها عماتها يمه و تميم كل شوي جايب لها لعبه مو مقصرين
ضربته على كتفه وقالت : افهم انت عاد
ضحك وقال : عسى خير ان شاء الله
-
فـ الفندق تحديداََ ، فز جراح على ضوء الشمس الي دخل عيونه ، قام يمسح على وجهه و لف يناظر لـ الماس ، ابتسم وهو يتأمل ملامح وجهها البريئه ، الهادئه ، نطق يقول : الماس
فزت على صوته وقالت : همم
جراح : الوقت ورانا مشوار
قامت بتعب و اتجهت للحمام ( يُكرم القارئ ) ، طلعت و دخلت الغرفه تفرفر وسط ملابسها ، سحبت لها فستان طويل لونه عنابي ، عليه خرز فضي من أعلى الصدر ، ماسك عليها يبرز تفاصيل جسمها ، مع كعب عنابي كذلك و ميكب خفيف و تركت شعرها مفتوح و لفته ب ويفي خفيف من تحت ، طلعت للصاله تقعد وهي تشوف جراح الي لابس ثوب اسود بكامل هيبته و وسامته ، ابتسم وهو يلمحها من طرف المرايه بكامل زينها ، لف عليها وقال : شهالزين ! بشويش علينا
ابتسمت وهي كلها خجل وقالت : من بعدك
كمل يعدل عقاله وقال : جيبي البخور هنا
وقفت تجيب البخور و قامت تتقدم صوبه و البخور بيدها ، قربت منه بتوتر م كان بينهم الا خطوه فقط ، اختلطت انفاسهم مع بعضها ، وصلته ريحة عطرها الناعم ، توترت الماس من قربها الكثير له ، اخذت البخور تبي توخر منه م حست الا فيه وهو يمسك خصرها و يسحبه له وقال : خذيتي قلبي بحلاتس و جمالتس !! انا جراح الي محد يجيب راسه جبتي راسه و خذيتيه كله انتي ارفقي بقلبي !
نزلت راسها بـ احراج وقالت : ياحبيبي والله ..
-
فـ ارجاء قصر آل حمد
متجمعين كلهم يفطرون مع بعض ، نزلت هياء بـ عجله وقالت : يمه انا بفطر هناك
ام عقاب : زين ي بنتي انتبهي
وقف سطّام وقال : هياء انا رايح الحين تجين معاي ؟
صدت بعدم رد و ركبت بسيارة رهف و اتجهت للمستشفى ، وصلت و دقايق و وصل هو كذلك ، دخل بـ تعجب من اسلوبها و حركاتها ، مشى لـ مكتبها لكن انصدم من شافه فاضي و شافها عند الدكتور وائل تضحك و تسولف ، مر من جمبهم و قلبه معاها ، نزل للـ كافتيريا و قعد بهدوء وهو يحس بهموم الدنيا كلها فوقه ، تقدمت الدكتوره الاء و هي معاها قهوه ، ناظرته وقالت : قهوه ؟
هز راسه بالنفي ، وقال : دكتوره الاء لو تسمحين بس ابي اقعد لحالي شوي
ابتسمت وقالت : ابد لو تبي شي انا هناك
حط يدينه على راسه يفكر بهدوء ، وقال : الحين هي زعلانه مني ! تبي تقهرني وهي تسولف مع الدكتور وائل وش ذا الزعل يارب عفوك و رضاك
وقف و طلع لـ فوق و شافها وهي مكمله مع الدكتور وائل ، قرب وقال : هياء تعالي شوي
هياء : ليه ؟ ضروري
سطّام : اقولتس تعالي !
هياء : مابي
الدكتور وائل : تسمع ؟ ابعد منها تقولك م تبي
صد و مسكها من يدها بقوه و أخذها لـ مكتبه وقال : هياء ! وش حركات الجهال ذي ؟ تسولفين و تضحكين مع وائل خير ان شاء الله
هياء : يدي طيب قاعد توجعني
فك وقال بحده : تكلمي ! وش فيتس علي ليه كذا تسوين فيني ليه !!!
مسكت غصتها وقالت : تسأل بعد ! سطّام انت م تبيني اسولف مع وائل لا تقعد تسولف و تضحك مع الاء واجد اشوفها تتقرب منك سوالف و ضحك و قهوه و مدري وش حتنا قلبي يحترق مب انت بس !
انصدم سطّام وقال : الحين اسبوع ومدري كم زعلانه علي عشان الاء !! ليه م قلتي طيب والله معاد اقعد معاها إذا تزعلين مني كذا
حطت يدينها على وجهها تخفي دموعها ، أخذها سطّام بـ حضنه ، دفنت وجهها بوسط صدره يحس بدموعها الي تنزل ، اخذت نفس وقالت بصوت متذبذب وهي بوسط صدره : والله العظيم ان كل م اشوفك معاها يجيني شعور غريب والله اني الليل كله افكر فذا الشي
سطّام : افا افا ، كلشي و لا زعلتس !
هياء : طب خلاص ننسى السالفه ؟ ورانا شغل
سطّام : مو تروحين لـ وائل ! ترا قسم بالله أوجعتي قلبي وانا اشوفس تضحكين معاه
هياء : بسم الله على قلبك ، م بروح له ولا تشوفك عيني مع الاء بذات فاهم !
سطّام : م طلبتي شي ابشري !
ابتسمت وقالت : بشرك ربي بالجنه
قاطعهم دخول وائل ، بدون لا يطق الباب ولا غيره
قال سطّام : م تعرف تطق الباب !
فتح وائل عيونه ب صدمه من شاف هياء الي كانت بحضن سطّام ، كانت صغيره جداا فـ حضنه مقارنة بحجم سطّام و غيره ، ابعدت هياء بـ احراج و قال سطّام : شتبي ؟ تبي هياء !
الدكتور وائل : اي لو تكرمت
طلع سطّام و اخذ وائل معاه و قفل الباب يترك هياء بـ مكتبه ، نطق بحده : دكتور وائل ، الاحترام بيننا م زال موجود ، قسم بالله ان شفتك صوب هياء و تدور حولها م تشوف خير و هذاني حلفت ! تراك ابلشتني ابعد عنها جعلك ال مانيب قايل
صد وائل بعدم رد ، زفر سطّام و دخل لعند هياء ، تقدمت هياء بهدوء وقالت : اسمع بتركك تكمل شغلك
ابتسم يكسر الغضب الي داخله وقال : ابد تم
ابتسمت وقالت : يلا لنا لقاء بعد شوي
-
فـ بيت ابو جراح تحديداََ ، وصلوا جراح و الماس للبيت دخلوا الصاله ابتسمت ام جراح وقالت : يهلا يهلا ب الماستنااا يهلاا بالزيين
الدانه : اي والله يهلا بالزين
ابتسمت الماس وقالت : يقلبي انتوا الزين والله
جلس جراح و جلست الماس جمبه ، و بدأوا يسولفون عن العرس و الأشياء الي صارت و يضحكون و غيره
ام جراح : ها متى بتسافرون ؟
جراح : بكره الصبح ان شاء الله
ردوا بصوت واحد : ان شاء الله
دخلت وهج وقالت بحنيه : ووهه وه لموس شهالزيين
ضحكت الماس بخجل وقالت : عييوني وهجج
وهج : اشهد انك محظوظ ي جراححووه
ابتسم وقال : اي والله محظوظ
الدانه تخصرت وقالت : نعم خير حتى اخوي يجنن تبارك الرحمن محظظووظه الماس فيه ، كم وحده تتمناه
ضحكت وقالت : ايه والله محظوظه م عليتس
و كملوا سوالف و غيره ، نطق جراح : اسمعي بتقعدين مع خواتي انتي ولا ؟ لاني بطلع اخلص لي كم شغله
الماس : بتطول ؟
جراح : م ادري انتي إذا تبين ترجعين دقي علي بس
الماس : وحنا متى بنجي هنا م بنجيب أغراضنا من الفندق ولا كيف
جراح : مو حنا بكره مسافرين م يحتاج يعني بنقعد هالليله بعد هناك بعد السفر ننزل هنا
الماس : خلاص تمام
طلع جراح يركب سيارته يخلص له كم شغله و جلسوا البنات يسولفون مع بعض ، ضربتها وهج على كتفها وقالت : وش ذا الزين ها
الماس : يوه وهج تكفين
الدانه : في ذمتس على هالكشخه جراحوه م قال شي ؟
ابتسمت بخجل تتذكر كلامه لها وقالت : الا والله قـ..ال
قاطعهم دخول ام جراح و معها صفاء ، دخلت صفاء وقالت : سلااموو بنووتاات
زفروا كلهم وقالت الدانه : لا سلام ولا كلام فاضي وش جابتس انتي !
صفاء بدلع : وش الي شجابتس ترا بيت عمي !
وهج : اشغلتينا ترا ..
صدت الماس و قامت تروح للـمطبخ و دخلت معاها صفاء ، ناظرت لها وقالت : ناظريني ناظريني
لفت عليها الماس وقالت : وش ؟
صفاء : تدرين ! عيشي حياتس مع جراح شوي بس لان م راح تطولين معاه
الماس بـ صدمه من كلامها : ههييه انتي ! شقاعده تهبدين وش تبين مني !!!!!
ضحكت صفاء بـ استفزاز : بتعرفين بعدين باقي م عرفتينا انتي
قربت منها الماس وقالت : قسم بالله ان م توخرين من صوبي انا و جراح بتندمين ! حركاتس هذي مب علي تفهمين ؟ لا تحاولين لا انتي ولا اهلتس
مسكتها صفاء من يدها بقوه وقالت : بنشوف من بيندم ! يـ الماس ...
خرجت الماس للصاله وهي تحس قلبها بيطلع من مكانه ، وهج : الصراحه ودي اقعد معكم بس وراي دوام ب الشركه هالايام كلها م داومت يويلي
الماس : اجل انا شويات و برجع
وهج : تمام
-
فـ شركة آل حمد تحديداََ فـ مكتب عقاب ، قعد قاعَد بهدوء وقال : ياخي عقاب والله صار كل وقتي افكر فيها وش اسوي !
ضحك عقاب وقال : و السؤال هو هل هي تفكر فيك ؟
قاعَد : السؤال الي ندور اجابته ، بعد الحادث م ادري وش صار فيني والله م يكمل يومي إذا م شفتها ياخوك
عقاب : تحبها انت !
قاعَد : م ادرررري شعورر غرييب والله كنت اشوفها اختي لا أكثر ولا أقل !
عقاب : الصراحه م ادري وش اقولك اذلف كمل شغلك
قاعَد : وانت مو ناوي تتزوج ؟
حك شعره وقال : للحين لا مالقينا الي نبيها
قاعَد : تلقاها ان شاء الله
عقاب : يلا اذلف مكتبك ولا عند ابوي
ضحك وقال : حاضر
طلع قاعَد و دخلت السكرتيره تقول : ممكن توقع هنا ؟
مسك عقاب الأوراق وقال : اقولتس ياوعد ، مافيه شي جديد عن الشركه ؟
وعد بـ غنج : لا والله غير الاجتماع ذاك بس
ناظرها وقال : طيب ، نادي لي الموظفه وهج رجاءََ
وعد : ابشر
طلعت وعد و اتجهت مكتب وهج وقالت : السلام عليكم
ردت وهج وقالت : عليكم السلام هلا ؟
وعد : المدير عقاب يبيك ف مكتبه
وهج : ياللييل توني جايه ياخي
وعد : بتجين !
وهج : جايه
طلعت وعد و اتجهت وهج وهي تأفأف ، دخلت مكتب عقاب وقالت : أمرني
عقاب : م يأمر عليس عدو ولا ظالم ، مو مداومه هالايام ؟ ترا يخصم من الراتب إذا م نأدي شغلنا زين
وهج بـ توتر : اا ، والله معليش قبل كنت تعبانه و امس عرس اخوي م اقدر اداوم ، السموحه والله
عقاب : اي زين بـ نمشيها هالمره بس لعاد تتكرر
وهج : ان شاء الله
ضحك بخفه وقال : طيب ليه متوتره ؟ م راح اكلتس
وهج : اسلوبك يوتر شسوي
عقاب : معذوره معذوره ان شاء الله معاد تتكرر خلاص
وهج : ان شاء الله
ابتسم وقال : تقدرين تروحين
طلعت و اتجهت لـ مكتبها بعد م جاها توتر و ربكه منه
-
يُتبع
-
( ان شاء الله يعجبكم البارت ❤️❤️. اضغطوا على النجمه عشان نكمل )
أنت تقرأ
مالوّم قلبيِ يوم تولع في ههواكِ ، مَحّلاه وصّفِك يحرِك خافقي كُله
Romanceرِواية : مالوّم قلبيِ يوم تولع في ههواكِ مَحّلاه وصّفِك يحرِك خافقي كُله - ثالِث رواية لي قريبا بإذن الله تعالى 🤩!! كَاتِبتكُم الجميلة : رهف القحطاني ✍🏻.
