مالوّم قلبيِ يوم تولع في ههواكِ ، مَحّلاه وصّفِك يحرِك خافقي كُله

~ 20 ~

اليوم الثاني ، صباح جديد بعد يوم طويل و متعب ، و تحديدا فـ قصر آل حمد ، بـ جناح قاعَد ، واقفه ام عقاب تطق الباب لأجل تصحيه ولا استجاب لها ابداََ  ، نزلت للصاله و قعدت بهدوء ع الكرسي ، نطقت هياء : يمه بعده ؟
ام عقاب بـ عصبيه : اي والله بعده مايبي يقوم هالولد
ام تركي : اتركيه ينام المسيكين م نام زين ب المستشفى
تنهدت ام عقاب تقول : ابيه يقوم يفطر و ياكل علاجه مهمل نفسه واجد والله
قاطعهم نزول رهف و عهد الي نطقوا : السلام عليكم
رددوا بصوت واحد : عليكم السلام
عهد : ايوا مين المهمل ؟
ام عقاب : قاعَد من غيره
رهف : شفيه ؟
ام عقاب : مقفل الباب و اطق عليه و مايسمع مكمل نوم
رهف : افا هذا الي مزعلتس انا اقومه الحين
ضحكت ام عقاب تقول : اشووف وريني يلا
طلعت رهف تتجه لـ جناح قاعَد و تقدمت تطق الباب بهدوء ، و نطقت تقول بصوت عالي : قاااعَد !
فز قاعَد من علو صوتها ، مايدري من صاحب هالصوت و تقدم يفتح الباب و قال من خلف الباب بـ عصبيه : هاااه ي قاعَد ! شفيكم تنادوني ترا م راح اطير م تعرفون تخلون الإنسان ينام شوي ؟
ضحكت رهف بخفوت و طقت الباب للمره الثالثه و فتح قاعَد الباب و قال بنبره حاده : بكسر هاليديـ..
رفعت رهف حاجبها تقول : اكسرها يلا اشوف ؟
بلع ريقه وهو يشوف رهف بكامل زينتها و كشختها واقفه قدامه وقال : معليش
ابتسمت تقول : الأمور طيبه ، قم انزل افطر عشان تاخذ علاجك
قاعَد : حاضر وش بعد أمري ؟
ضحكت تقول : م يأمر عليك عدو ولا ظالم ، يلا شطور قدامي
ابتسم وهو يشوف ضحكتها الي بينت غمازتها و نطق يقول : يصير اروح ابدل ملابسي و اصحصح ثم اجيكم ؟
رهف : يصير يصير
قاعَد : يلا اجل اشوفكم تحت
نطقت بهدوء وهي تاشر على مكان العمليه وقالت : طيب وانتبه لنفسك ها بشويش
قاعَد : حاضر
ابتسمت و نزلت للاسفل عندهم ..
-
و فـ بيت ابو نياف ، بـ غرفة الماس تحديداََ ، بوسط الظلام منسدحه ع السرير تضم بطانيتها الي امتلت بـ الدموع ، وقفت تبطل الانوار و تقدمت تمسح على وجهها بتعب ، اخذت شهيق و زفرت تدخل للحمام تاخذ لها شور ( يُكرم القارئ ) و بعد ما خلصت طلعت اخذت لها بلوفر لونه اسود مع بنطلون اسود كذلك ، و لمت شعرها بـ تسريحة ذيل حصان ، نزلت لـ تحت و شافت الكل متجمع ع الفطور نطق علي : ياهلا ياهلا بالزيين كله
ابتسمت بعدم رد و قعدت بوسطهم و همس لها نياف بهدوء وقال : نمتي زين ؟
هزت راسها بـ معنى ( ايه ) ، ابتسم وقال : جعله عافيه يابعدي
معاذ : تبون نطلع نشم هواء اليوم؟
سكتوا كلهم ولف معاذ على الماس وقال : ها لموس شرايتس ؟
هزت راسها بـ النفي بـ معنى ( لا ) و نطقت تقول : ابي اروح الاسطبل
نياف : الماس تعالي شوي بكلمتس
وقفت الماس و مشت معاه للـ مطبخ و نطق نياف : وش الي الاسطبل ! انتي تدرين ان جراح اليوم بعد بيروح هناك وش له تتقابلون و تزيدون الطين بله
الماس بـ غصه : بروح عشان اشوف نجم مو جراح !
تقدم يضمها من شاف الحزن الي امتلاها و نطق يقول : من عيوني الحين مشينا الاسطبل
ابتسمت تمسح دموعها وقالت : مشينا ..
طلعت معاه متجهين للـ سياره و ركبوا مع السوالف و الفضفضه الين ما وصلوا ، ناظرها وقال : اي شي صار دقي علي علطول
الماس : سم
نزلت الماس متجهه صوب خيلها نجم و تطلعه للميدان ، ركبت عليه  بهدوء و بدت تمشي فيه سرحانه بـ تفكيرها و الي حولها ، و شدت عليه و بدأ نجم يركض فيها ، تتذكر الأحداث الي دارت بالأمس و تحاول تكتم دموعها الي امتلت بـمحجر عيونها ، تبعثرت من نجم من طاحت ع الارض ، و طاحت دموعها الي ماقدرت تحبسهم
..
و في ارجاء شركة ~ A.H.C ~ ، بـ مكتب عقاب ، زفر من دخلت السكرتيره الجديده الي دخلت على عقاب و نطقت : استاذ عقاب ؟
ناظرها عقاب وقال : تفضلي ؟
دخلت و قفلت وراءها الباب و تقدمت تجلس بالكرسي قدامه و نطقت : انا المساعده حقتك ، وجدان انطردت وانا جيت مكانها
قطب حاجبه يقول : تعرفين وجدان ؟ و وش اسمتس ؟
نطقت تقول : لا م اعرفها بس علموني انه انا جيت مكانها ، و اسمي ميار ..
حط يده على راسه يقول : طيب ي ميار انا الحين مب فاضي ، روحي خليهم يعلموتس عن نظام الشركه و قوانينها ..
ميار : علموني خلاص
عقاب : وليه جايه ؟ تبين شي
ميار : لا ، جيت اعلمك بس اذا تبي شي تقدر تدق
عقاب : طيب ، تقدرين تتفضلين
زفرت بملل تطلع و صادفت حور و وهج و نطقت تقول : سلام بنات
قطبوا حاجبهم يقولون : عليكم السلام ، مين انتي ؟
ميار : معاكم ميار
وهج : موظفه جديده ؟
ميار : مساعدة المدير عقاب
حور : اووه حلو حلو
ميار : كان فيه قبلي وحده بس انطردت تعرفون السبب ؟
ضحكت وهج تتذكر وقالت : بالمختصر انها قليلة ادب ، و هذا الي تستاهله
نطقت ميار تقول : اهاا ، حكوني عن المدير عقاب كيف تحسونه ؟
حور : انتي وش نظرتس له اول م شفتيه
ضحكت تقول : الصراحه بعيداََ عن كل شي ، والله انه وسييم بس حسيته عصبي و نفسيه
شهقت وهج تقول : وش وسيم لا اله الا الله تخيلي احد يسمع الحين
حور بخفه : عاد صادقه والله بس اذا عصبي او لا مدري لان حسيته عادي
وهج : ياحبيبتي انتي باقي ما عرفتيه ، المهم غيروا سالفه مشينا بس
نطقوا بصوت واحد : تم
-
فـ الاسطبل تحديداََ ، عند جراح الي كان يركض بـ وهاج في وسط الميدان ، يطلع كل طاقته السلبيه و الكتمه الي بـ صدره  ، وقف بهدوء ياخذ له نفس و زفر من لمح الماس الي كانت كذلك مع خيلها نجم واقفه على جمب ، و كان واقف أمامها واحد من الرياجيل ، عض شفايفه بحرقه وهو يحس بـ غيره في داخله و قرب هو و خيله وهاج لـ عندهم بهدوء و كان جراح ملثم وجهه مو باين غير عيونه ، توقف جراح عند الرجال الي كان مع الماس و نطق يقول : عفوا اخوي ، من انت و ليه واقف معها ؟
فز يلف له وقال : انا بندر ، ولد عمها بس انت من وليه تسأل ؟
زفر و نطق بحده : ماعرفتني ؟ جراح بن سالم
حك شعره يقول : لا والله
جراح : زوجها
بندر بصدمه : اما عاد
جراح : اي نعم زي ماسمعت
بندر : تارك زوجتك هنا ليه ؟ وينك عنها
جراح : وش الي وينك عنها ماهيب بزر هي ! وانا موجود مب لحالها هي
بندر : حصل خير
صد جراح يكمل طريقه لعند وهاج ، و عند بندر و الماس ، نطق بندر يقول : الماس تبين اخذتس للمستشفى ؟
الماس : لاا لا بس رجعني البيت إذا م عليك امر
بندر : مشينا ..
ركبت معاه للسياره و بدأ يسولف معاها من نطق يقول : الماس زوجس اسمه جراح ؟
فز قلبها تناظر له وتقول : ايوا ليـ..ه  ؟
بندر : لا ابد جاني هو و عرفته
الماس بـ تعجب : شقال لك !
ضحك يقول : غيور الرجال شكله .. شافني معاتس و سأل من انا و سألته من هو
ابتسمت و تنهدت تقول : اها
بندر : بس غريبه دامه موجود ورا م رحتي معاه ؟
الماس بهدوء : شي بيننا م يحتاج اقول
وقف بندر سيارته من وصلوا امام البيت وقال : تمام
دخلت الماس للـ بيت و اتجهت علطول لـ غرفتها وهي تحس بـ الم غريب ، قاطعها دخول امها الي قالت : متى جيتي ومع مين ؟
الماس : توني يمه ، صادفت بندر ولد عمي و جابني هو
شهقت ام نياف وهي تقول : الماس ! صاحيه انتي وش الي بندر جابتس انتي باقي في ذمة جراح لو يدري انتس رحتي معاه والله بينفجر الرجال !
الماس بهدوء : يمه م راح يدري لا تخافين عادي
ام نياف : خير ان شاء الله ، انتي شفيتس تعبانه شي ؟
الماس : مرره ، مادري القاها من الصداع ولا بطني الي يعورني اهخ
ناظرتها ام نياف وقالت : لايكون حامل ؟
الماس بصدمه : لا وين ماتوقع يمه
ام نياف وقفت تطلع جهاز الفحص و قربته عندها تقول : روحي شوفي ماتدرين يمكن ..
الماس بربكه : تهقين ؟
ام نياف : اييه امشي عسى الله يفرحناا فيتس و نشوف رعد حوولناا
وقفت الماس تأخذه و اتجهت لـ الحمام ( يُكرم القارئ )
-
وفي ارجاء قصر آل حمد ، نطق قاعَد وهو ينزل من الدرج : السلام عليكم يا أهل البيت
ردوا بصوت واحد : عليكم السلام
ام عقاب : زين والله قمت محد قدر عليك إلا رهف
ضحكت رهف تقول : ابد فالخدمه
ابتسم يقول : فيه فطور ؟
ام عقاب : فيه فيه بـ الطاوله رح كل و خذ علاجك
قاعَد : طيب ، يمه بفطر و بطلع للشركه
نطقت ام عقاب بحده : منت رايح ! توك امس طالع من المستشفى لازم ترتاح
رهف وهي تردد ورا ام عقاب : صادقه اسمع الكلام
زفر بملل يقول : ناشبين ف حلقي الي يشوفني بيقول بعده بزر ! خلاص عاد
ضحكت ام تركي تقول : يوم صاروا خايفين عليك صرت بزر ؟ الله يهديكم
قاطعهم صوت تركي الي يقول : وش بلاكم على الرجال
قاعَد : تكفى تعال فهمهم
ام تركي : و جاء الثاني يفزع له ، اسكت بس
ضحك يقول : افاا ، ان م فزعت له افزع لمين
قاعَد : حي عينك ياولد العم
تركي : ابد احتزم بس
ابتسم يقول : يابعدي والله
-
و في شركة آل حمد ~ A.H.C ~
بـ مكتب وهج تحديداََ ، زفرت وهي تناظر اللاب توب حقها و تشتغل ، و نطقت بينها و بين نفسها : اهخ يربي انا شايله هم الماس و جراح اكثر من شغلي ! ، خل أدق على لموس
رفعت جوالها تدق على الماس و ما أخذ منها وقت ، ردت تقول وهج : سلاامم
الماس : عليكم السلام ياهلا
وهج : يالوسخه اشتقت اسولف معاتس
ابتسمت الماس تقول : ياحبيبتي
وهج : امم شرايتس تمرين الشركه ؟ نسولف و نعطي
الماس : الحين مستحييل توني راجعه من الاسطبل
وهج : شوووي بس عاد دامني فاضيه
الماس : عشانس بس !
وهج : يااعييوني
ضحكت تقول : فديتهم ، يلا انتظري
ابتسمت تقفل الاتصال و اخذت نفس تكمل شغلها ، و قاطعها دخول المساعده ميار الي تقدمت و دخلت تقعد امام وهج وقالت : ياخي طفش والله
ضحكت وهج تقول : لا يشوفتس الاستاذ عقاب يويلتس
ميار : مشغول خله ، بعدين وش حاجته لمساعده معتمد على نفسه واجد ما يناديني الا قليييل
وهج : بعد صح
ميار : ابي اشوف اخته و اخوه وينهممم
نطقت وهج تقول : موجوده اخته و بنت عمه ، بس اخوه مدري ماشفته اليوم ابد لو موجود بشوفه ما شاء الله عليه حركي يتمشى بالشركه واجد
ضحكت تقول : ياحبيبتي عندهم شركه هالكبر من حقه
ابتسمت تقول : ما شاء الله الله يزيدهم
رددت تقول : اميين
دخلت عليهم حور الي تخصرت تقول : متجمعين ؟ و بدوووني خيير ان شاء الله
انفجروا يضحكون و نطقت ميار تقول : تفضلي
حور : بعد وش ، مشكورين مابي بروح
وهج : لا لا مايصير ادخلي ادخلي
حور ضحكت تقول : ادري ماتقدروون بدوني
ميار وهي تضحك : ايه طبعاا
حور : بروح اخذ لي قهوه تبون ؟
ميار : مشينا بروح معاكِ ، وهج حبيبتي تبين ؟
ابتسمت تقول : اسبقوني شوي و اجيكم
ردوا بصوت واحد : تمم
انشغلت وهج بالكمبيوتر و قاطعها دخول الماس الي دخلت و قعدت تقول : جاني هبوط وانا ادور بالشركه اخخ ضيعت
ضحكت وهج : يحياتي اجل من جابتس
الماس : مدري وحده سألتها و دلتني ، المهم علومتس اخبارتس و شلون خالتي
ابتسمت تقول : ابد الحمد لله كلنا طيبين ، و امي تسلم عليتس بعد
الماس : الحمد لله
عم الصمت لثواني و نطقت الماس بهدوء : وشلون جراح ؟
تقدمت وهج تقعد أمامها وقالت : على نفسه حاله الي امس انتي الي شلونتس ! تكلمتوا مع بعض شي ؟
الماس : لا والله ، بس تكفين علميني خالتي تكلمت معاه ! فهمته ولا وش
وهج : ايه يعيوني ارتاحي تكلمت معاه يبي يرتاح يبي ينسى الموضوع ، و قال ان الطلاق مستحيل يعني اقولتس الرجال يحبتس ! قد قال انتي له ومنتي لغيره
ابتسمت بهدوء و ناظرتها تقول : وهج
ناظرتها وهج تقول : شعندتس ؟
الماس : اناا ...
قاطعتها وهج الي نطقت : انتيي ؟
ضحكت تقول : مستعده تصيرين عمه ؟
شهقت وهج بحماس وقالت : امانه امانه !!!
الماس : اييه والله
قربت وهج تضمها بفرح وقالت : يالله ششهالخبرر الي يرد الروووح ، جراحوه يدري !
الماس : اا لا باقي ، محد يدري الا امي و الحين انتي بس ، و باقي بعلم خالتي
وهج : انا بعلم ماما وهي بتعلم جراح تمام ؟
الماس : خلاص اذا كذا تمام
وهج : ونااسسسه
ضحكت الماس تقول : ياحبيبتيي
وهج : وانتي عبالتس جراح لو درا بيخليتس لا والله يرجعتس و غصب عنه
تنهدت تقول : ان شاء الله كل خير
وهج : ان شاء الله ، تعالي مشينا نطلع برا نشم هواء
الماس : لا تكفين خلينا هنا نسولف والله تعب شركه هالكبر وانتي بالدور الثاني
ضحكت تقول : خلاص زين خلنا هنا
-
يُتبع
-
( ياهلا بـ احباب قلبيي ، اعذروني ع القصور و الأخطاء الإملائية ، دعمكم هالفتره عاجبني بس شدوا اكثر و اضغطوا ع النجمه لأجل نكمل سوا ، حاولت أطول البارت بقدر الإمكان بس والله مشغوله مره وهذا الي قدرت عليه لنا لقاء قريب بإذن الله 🌷-)