صباح اليوم الثاني
تحديدا بـ شركة ~ A.H.C ~ ، دخلت وهج للـ شركه بـعد م استجمعت طاقتها ، صادفت السكرتيره وجدان الي نطقت : أستاذه وهج الحمد لله على السلامه !
ابتسمت وهج وقالت : الله يسلمتس بس على وشو ؟
وجدان : لا بس مختفيه من الشركه مالِك حس
وهج : والله الظروف ي وجدان
وجدان : الله يقويكِ
وهج : اميين
انسحبت تدخل لـ مكتبها ، تحط أغراضها و تعدل نفسها ، طلعت بهدوء تتجه لـ مكتب عقاب ، لأجل تشكره على كل م سواه .. طقت الباب و ما كان فيه اي استجابة رد ، فتحت الباب ولاحظت ان المكتب فاضي مابه احد ،
زفرت تطلع تمشي بـ ارجاء الشركه ، تقدمت تتجه لـ مكتب نهى و عهد وقالت : بنووتاات
نهى : هلا والله وهجج
ابتسمت وقالت : كيف الشغل معكم
عهد : بديت امل والله
ضحكت نهى وقالت : مع نفسها الحمد لله زين
وهج : طيب شسمه بسالكم عقاب وينه ؟ مكتبه فاضي
عهد : امم عقاب
ضحكت وهج بربكه وقالت : يوه استاذ عقاب
ضحكت عهد وقالت : ايوا كذا لا يسمعتس بس ، بعدين ليه تبينه ها شعندكم ها
وهج : عهد ! لا يطير تكفيرتس بعيد ، ابغى اكلمه
عهد : طيب لحظه بدق اشوفه
وهج : ولا تقولين وهج !
عهد : ادري ادري
اخذت ترفع جوالها تدق عليه ، و دقايق يرد عليها ، و نطقت تقول : عقابوه
رد يقول : هاه
عهد : وينك م جيت الشركه
عقاب : مانيب مداوم اليوم
عهد : اما عاد وليه
عقاب : والله مصدع راسي بينفجر سهرت مع ذولا الي م ينسهر معهم
ضحكت وقالت : اي زين خلاص
قفلت وقالت : م بيجي اليوم
نهى : وي ليه عقاب الي شوي و يعيش هنا قال م بجي !
ضحكت تقول : يقول مصدع راسه بينفجر
وهج : اووه سلامته سلامته خلاص المره الجايه اكلمه
انسحبت وهج وقالت عهد : ذولا وراهم شي ، وهج م غير تكون ب مكتب عقاب اشوفهم انا
انفجرت نهى تضحك بصوت عالي وقالت : عهد تكفين لا ! عقاب كل همه الشغل وش يبي فالبنت
عهد : ايه صح بعد ، المهم م علينا منهم كملي شغلتس
-
و فـ بيت ابو جراح ، فزت الماس على صوت المنبه ، فتحت عيونها بهدوء تناظر جمبها ، قطبت حاجبها من لاحظت عدم وجود جراح ، زفرت بملل و قامت تدخل للحمام ( يُكرم القارئ ) .. اخذ لها شور سريع و طلعت تفرفر وسط ملابسها ، اخذت لها بلوفر لونه وردي فاتح اللون الافضل لها مع بنطلون ابيض ، تقدمت تحط لها ميكب خفيف و تفرد شعرها الحرييرر ، اخذت جوالها و طلعت من الغرفه تنزل للـ الصاله ، لاحظت كمية الهدوء فالبيت ، رفعت جوالها تدق على جراح و م اخذ منها وقت يرد ، نطقت : جرااح
جراح : يابعده
ابتسمت بخفه و نطقت : وينك انت !
جراح : بالدوام وين بعد ليه صار شي ؟
الماس بتوتر : جراح مافيه احد بالبيت لا خالتي ولا البنات ولا انت ولا نايف !
جراح : ايه طيب ادري
الماس بعصبيه : جرااح تستهبل وش الي ادري بقعد لحالي انا ؟ تعال الحين بسرعه
جراح : وش تعال اقولتس مداوم
الماس : جراح !
ضحك وقال : زين جاي جاي
ابتسمت تسمع تضاحيكه وقالت : طيب انتظرك
-
و عند جراح بـ الدوام ، تقدم وقال : هيام اسمعي قولي للمدير ان وراي شغله اخلصها و جاي مانيب مطول
قاطعهم صوت سعيد الي قال : جراح ترا المدير م بيعجبه ذا الوضع انت تدري عاد يومك خذيت اجازه قعد يسوي سالفه و مدري وشو
هيام : وهو صادق
جراح : اقولكم مانيب مطول ! ١٠ دقايق بالكثير
سعيد : زين عجل دام المدير هالحين منشغل
جراح : ابد تم
انسحب يطلع و ناظرت هيام لـ سعيد و نطقت تقول : سعيد شبلاك ؟
قعد بملل وقال : جوعاان بالله اطلبي لنا شي ناكله
انفجرت هيام تضحك وقالت : ابشر ابشر
سعيد : وش يضحك الحين
هيام : شكلك عاد
سعيد : انا قررت اتزوج و اخذ لي اجازه زي جراح افتك من وجيهكم شوي
هيام وهي تخفي ضحكتها : عشان تنطرد انت و هو و يبقى انا لحالي
سعيد : لا م عليتس معاتس مشعل
شهقت وقالت : ذا بذات اموت ولا اقعد معاه ! شايف نفسه مدري على وش و تلقاه حاقد علينا حنا الثلاث
ضحك يقول : اي بالله م عنده سالفه غير النقيب جراح و حنا م غير يروح يشوش راس المدير علينا
هيام : الله يشغله بنفسه
-
فـ ارجاء قصر آل حمد .. نزلت رهف متجهه لـ المطبخ بعد تفكييير بـ حامد ، م تدري وش تقول ، وش تحس فيه هل توافق او لا ؟ انحنت تاخذ لها كوب ماء و تلم شعرها الي كان متناثر على وجهها ، زفرت بملل تطلع من المطبخ تمشي طالعه للحوش تاخذ لها نفس ، فزت على صوت قاعَد الي كان يناديها و لفت تناظره و نطقت بـ استغراب : سم ؟
قاعَد بهدوء : شسمه ابي اكلمس بـ شي اذا تسمحين ؟
رهف بربكه : ايه اسلم وشو
قاعَد : مب هنا ! ي رهف مب اي موضوع ذا
رهف : وين تبي طيب ؟؟؟
قاعَد : اطلعي اجهزي وانا برسل لتس موقع تجينه
رهف بحده : قاعَد ! ماني جايه لأي مكان عندك شي قل هنا بسرعه غيره مافيه
قاعَد : هنا م اقدر والله م اقدر !
اخذت نفس و زفرت تقول : طيب
قاعَد : اجل نتقابل هناك
رهف : طيب
طلعت رهف تتجه لـ غرفتها ، دخلت بهدوء و قالت ف نفسها : لايكون صار شي فـ احد ! اهخ يربي
اخذت تفرفر وسط ملابسها و لبست لها بلوفر لونه ازرق مع بنطلون وسيع لونه ابيض ، تقدمت تحط لها ميكب خفيييف بحكم انها م تدري لوين هي رايحه ! خلصت و طلعت من غرفتها تتجه لـ جناح امها وقالت : يمه وينس
ام تركي : ها وشو
رهف : يمه انا طالعه
ام تركي : وين وين
حكت شعرها تفكر وقالت : بخلص لي كم شغله و بجي ماني مطوله
ام تركي : طيب انتبهي
ابتسمت و طلعت تنزل لـ سيارتها بعد م وصلتها الرساله من قاعَد ..
-
فـ بيت ابو طارق ، نزلت حور وقالت : افف
ناظرتها عُلا وقالت : وراس تأفأفين
حور : مليت من البيت قسم !
تميم : والشركه شصار عليها ؟!
حور : للحين م شفت اي رد منهم
تميم : طيب اسمعي قدمي لي معاتس
ضحكت حور وقالت : متأكد ؟
تميم : ايه ايه
حور : تم اجل
عُلا : رايحين و بتخلوني ؟
تميم : انتي تقعدين مع امي
حور : صح عليك
عُلا : انا اوريييكم
ضحك تميم وقال : يلا زين نشوف وش عندس
-
فـ بيت ابو جراح ، فزت الماس على صوت طق الجرس وقامت مسرعه تفتح الباب ، فتحته و شافت جراح نطقت تقول : ادخل ادخل
دخل وقال : ها ابوي وراتس
الماس : جراحح والله م اقعد لحالي بـ بيت ذا الكبر !
جراح : خايفه من وشو م بيصير لتس شي كلشي مقفل
الماس : واذا ! مابي اقولك ي تقعد معاي ي ودني عند اهلي لين تخلص
جراح : طيب اسمعيني بقولتس شي
الماس : قل
قرب منها يقعد جمبها وقال : اسمعي ، انتي بتسالين ليه محد فالبيت وانا اكيد بقولتس م راح اخبي عليتس شي ، تدرين ان امي مريضه ومن ذا الكلام فـ زاد على امي التعب و حولناها للـ مستشفى هاليومين و بتقعد هناك لين يخلصون علاجها ، وهج بالشركه و الدانه و نايف عند امي .. وانا زي م تدرين بالشغل
ناظرته وهو يشرح لها بنبرة واضح عليه انه شايل هم ، ابتسمت تحط يدها على يده وقالت : م عليها شي خالتي ان شاء الله لا تحط فـبالك اشياء مب زينه انا ادري ان خالتي قويه و بتصير بخير و بترجع لنا بصحه وعافيه ، وانا معاك ي جراح !
ابتسم ياخذها بوسط حضنه وقال : يابعد جراح ، جعني م انحرم منتس ي ابوي
ابتسمت وقالت : ولا مننك
-
و تحديدا عند رهف بـ سيارتها ، نطقت تقول بينها و بين نفسها : الحين وش جايبنا للـ بحر حنا !
وقفت تصف سيارتها و نزلت تتجه لصوب قاعَد بعد م لمحته من بعيد ، مشت تتجه له الين م قربت ، نطقت تقول : ايوا سم ؟ والله وترتني تراك صاير شي ؟
قاعَد : لا مب صاير شي ، انتي اسمعيني الحين انا ابي اقولتس شي ! وانتي كوني صريحه معاي
رهف بربكه : طيب اسلم
قاعَد : رهف انتي موافقه على حامد ؟ تبينه ؟
اخذت لها نفس وقالت : باقي قاعده افكر بس ليه ؟ فيه
شي
قاعَد : انا ابيتس لي !
بلعت ريقها بصدمه و سكتت بعدم رد ، ناظرها وقال : انا ادري انس مصدومه و شلون صار كل ذا و ادري انس م تبادليني نفس الشعور بس صدق والله اني ابيتس ي رهف والله اني حبيتس والله يشهد علي ! م كنت ابي اجي اقولتس ياها كذا ف وجهتس بس مو قادر انام ذا الليل كله وانا افكر هل ب توافقين على حامد و تروحين مني ! والله اني مو جاي الف و ادور ان كنتي تبين حامد انا م راح اجبرتس على اي شي ، وان كنتي م تبينه انا جاي رسمي اتقدم لتس من عمي
حطت عينها بعينه وقالت : قاعَد ..
بلع ريقه بتوتر وقال : لبيه ؟
رهف : انا ابـ...
قاطعها يقول : تبينه ! تبين حامد ؟
رهف : خلني اكمل !!
تقدم يمشي بهدوء يتأمل موج البحر وقال : ي رهف انا ادري انس م تبيني والله اني ادري
نطقت وهي واقفه وراه : واذا قلت لك العكس ؟
فز يلف عليها وقال : هاه !
رهف : زي م سمعت
تقدم و بدون م يحس مسك يدينها وقال : في ذمتس مو ملخبطه تكفين لا توجعين قلبي و تغيرين رايتس !
ناظرته وقالت : قاعَد شفيك ؟ انا م كنت ادري ابد انك تحس بذا الشعور اتجاهي ! كان فـ بالي انك تحب احد ثاني و فبالك شخص ثاني
قاعَد : يعني موافقه علي !
ابتسمت بخفه وقالت : موافقه
قاعَد بصدمه : ي رهف !
ضحكت وقالت : شفيك ؟ تبيني اكنسل يعني
ابتسم يتأمل تفاصيل وجهها و ناظرته تقول : بس اسمع ، بنقعد زي نظام هيون وسطّام حبوا بعض و محد داري عنهم الين م خطبها ذا انا مابيه
قاعَد : ي امي انتي علمي عمي انس مب موافقه على حامد و الباقي خليه علي
رهف : اكيد ؟
قاعَد : ايه اكيد
رهف : طيب خلاص بس مب الحين علطول ! ماني مستعده ابد الحين للزواج
قاعَد : ابد م عليتس
ابتسمت وقالت : زين
انسحبت تركب سيارتها وهو كذلك ، هل هو ف حلم ولا علم ! مو مصدق الي صار ابدا كان متوقع عكس كل شي صار .. ركب السياره و كان بكامل روقانه متجه طيران للـ بيت .
-
ََو فبيت ابو طارق ، دخلت الجود للصاله وقالت : بنووتاات وين خالتي ؟
حور : شوفيها هذي هي نازله
ام طارق : هذاني عسى م شر يابنيتي
الجود : ابد الخير جااي
عُلا : اووه وش عندس جوودي
ابتسمت تقول : اعلمكم بس لا تعلمون طارق !
حور : اخلصي عااد
شهقت عُلا وقالت : لايكون الي فبالي
الجود : امم يممككن
عُلا : حاامل !
الجود : اييوواا
تقدمت ام طارق تضمها بفرح : مبرووك ي بنتي مبروك
ابتسمت تقول : الله يبارك فيتس ي امي
ضحكت عُلا وقالت : وليه م تعلمين طارق ؟
الجود : خليه ابي اصدمه
ام طارق : زين ي بنتي لا تتعبين نفستس ان بغيتي شي هذا البنات هنا
حور : ابد عيوني لس
الجود : يروحيي حوريييتي
ام طارق : اجل ننتظر حور و تميم ينقبلون بالشركه و تصير الفرحه فرحتيين
حور : صحح صح
الجود ضحكت وقالت : إذا م فكرت اني أعلمه ابشروا
حور : خلاص تم
ضحكت عُلا تقول : عاد لنو بتستانس مرره
الجود : اي والله
ام طارق : زين ي بنتي اقعدي انتي ارتاحي الحين
الجود : يوه ي خاله تكفون لا تسوون فيني زي م كنت حامل ب لنو
ضحكت ام طارق تقول : اجل وش يعني نخليتس تتعبين نفستس بالشغل ؟
حور : صادقه امي بتقعدين و ترتاحين فهمتي !
ضحكت الجود تقول : سمي سمي
-
بـ المركز تحديداََ ، نطق سعيد بتوتر : هيام والله جراح بيروح فيها !!
هيام وهي تدق عليه : ي سعيد والله ذا بيجلطنا المدير بيجي الحين واذا م لقاه بنروح كلنا فيها
سعيد : دقي دقي عليه وانا بروح اشغل المدير قبل لا يدخل عندنا
هيام : يلا طيب عليك فيه
فتح سعيد الباب و تجمد من شاف المدير عند الباب ، نطق المدير ( شهاب ) : سعيد ؟ على وين رايح
حك شعره يقول : ها لا ابد مب رايح مكان
نطق المدير شهاب : طيب اقعدوا
دخلوا و كل واحد قعد فـ مكانه ، ناظر لهم شهاب يقول : النقيب جراح وينه ! و مشعل وينه !! م تدرون انه فيه اجتماع ذا الوقت ؟
نطقت هيام : والله النقيب طرت له شغله مهو مطول جاي بالطريق الحين ، و مشعل الجواب عندك مب عندنا
كتم سعيد ضحكته من رد هيام عليه وقال المدير شهاب : كيف الجواب عندي ؟ سألت سؤال واضح
نطق سعيد : عفوا سيدي ، بس حنا من فريق النقيب جراح و اساسا مشعل ذا طول وقته معاك شلون بندري وينه ؟
هيام : بضبط
قاطعهم دخول جراح الي قال : السلام عليكم ، عسى م تأخرت ان شاء الله ؟
سعيد : ابد ادخل باقي م بدينا ننتظر الشيخ
انفجرت هيام تضحك و همست لـ سعيد تقول : سعيد !
جراح : شسالفه من باقي و منهو الشيخ
المدير شهاب بحده : انا مو جاي اضحك هنا ! ننتظر مشعل يجي و ثم نبدأ
جراح : و مشعل وينه ؟
سعيد : إذا جاء بنعرف وين كان
جراح : طيب
-
يُتبع
-
( اهلا اهلا احبابي ، اعذروني على القصور و الأخطاء الإملائية ، اضغطوا على النجمه لأجل نكمل سوا ، قراءه ممتعه ❤️❤️. )
أنت تقرأ
مالوّم قلبيِ يوم تولع في ههواكِ ، مَحّلاه وصّفِك يحرِك خافقي كُله
Romanceرِواية : مالوّم قلبيِ يوم تولع في ههواكِ مَحّلاه وصّفِك يحرِك خافقي كُله - ثالِث رواية لي قريبا بإذن الله تعالى 🤩!! كَاتِبتكُم الجميلة : رهف القحطاني ✍🏻.
