~ اخر الليل ، فـ بيت ابو جراح ، بعد رجوع الماس للبيت و تحديدا في جناحهم الخاص ..
دخلوا للبـيت و كانوا مواصلين الصمت بينهم ، دخلوا لـ غرفتهم ، قعد جراح على السرير بهدوء يناظر الماس الي كان واضح عليها باقي شايله فـ خاطرها منه ، ناظرها يفتح حضنه لها وقال : تعالي !
فزت وهي تحط الشنط على جمب ناظرت له ، ولفت عليه وهي فعلا محتاجه منه حضن ، محتاجه تطلع من الضيقه الي مرت فيها ، قربت منه تتمدد بـ حضنه وهي تتذكر قبل يومين كانوا منسدحين على هالسرير و السعاده الي كانت محاوطتهم هل اختفت تماماََ ؟ ، ارتعش قلبه من حطت راسها بوسط صدره ، تضمه بعد هاليومين ! فتره متعبه خذت روحهم من مكانها ! ، تستنشق ريحة عطره ، عطره العود الي تعلق فـ وسط ملابسه ، دفنت وجهها بحضنه ، ابتسمت تحاول تخفي ضيقتها من بدأ يلعب بشعرها بهدوء ، و نطق : متضايقه مني بعدس ؟
اخذت نفس تمسك دموعها وقالت : قاعده احاول انسى والله ! كل م قفلت عيوني اتذكر كلشي تعبت والله
ناظرها وقال : والله ي الماس ان لعبوا ب مخي لعب من أفكار زوجة عمي قسم بالله ، انا اسف اسف على كلشي ! والله ان فرقاتس عذاب ي الماس عذاااب م ذقت النوم انا ! صار كل تفكيري فيتس ، صرت اروح للشغل حتى لو كنت فاضي ابي اشغل نفسي بس ! و حقتس علي والله ! بس ابتعادنا عن بعض هذا يضرنا حنا والا هم بالعكس مستانسين على بعدنا
الماس بنبرة مليانه عِتاب : جراح انا م يهمني كلام الناس ! بس ثقتك لي وين راحت كيف تصدقهم وماتصدقني ونت تدري انهم خبيثين !
ناظرها وقال : رغم انه تكلمنا عن الموضوع يوم كنا عندكم بس اردد اقول اسف والله اسف ! تكفين خلينا نقفل على الموضوع ، انا حتى امي و خواتي ما سمعت لهم الا بعدين والله اني مب قادر انسى شلون عباس كان قريب منتس ي الماس !
اخذت نفس وقالت : بـ..س
غمضت عيونها من قاطعها يطبع شفايفه على شفايفها ، يقفل على هالموضوع من هاللحظه تماماََ ، مشاعر متلخبطه حُزن ؟ فرح ؟ م ندري وش هي ! ، ابعد وهو ماوده البعد ، زفر وقال : قفلنا الموضوع ؟
اخذت نفس و ابتسمت ابتسامه خفيفه وقالت : قفلناه
عم الصمت بينهم لـ ثواني و نطق يقول : ايه ؟ و قالوا لي انه رعد بالطريق ولا غلطان ؟
ضحكت تقول : ان شاء الله مب غلطان
ابتسم وهو يحب يشوفها تضحك ، و نطق يقول : ان شاء الله
نطقت تقول : واذا بنت ؟
جراح : اللي يجيبه الله حياه الله
ناظرت له تقول : يلا ان شاء الله كل خير ، نم يلا
جراح : بدري ، بس عشانتس مانقول لا
ابتسمت و دخلوا فـ نومه اثنينهم بعد يوم مُتعب جدا ..
-
و فـ ارجاء قصر آل حمد ، بـ جناح سطّام ، دخل عليه قاعَد الي قال : سطااامووه
فز سطّام الي كان مركز بـ الجوال وقال : هااه ؟
قاعَد : البنات قاعدين تحت يتابعون مسلسل رعب ، شرايك نخوفهم ؟
ضحك وقال : على حالتك ذي اهجد بس
قاعَد : يليل قم ولا بروح عند تروك
سطّام : يلا زين مشينا ، و بالمره نجيب تروك مو مشكله
طلعوا سطّام و قاعَد بعد م نادوا تركي و نزلوا ثلاثتهم و وقفوا بالدرج بهدوء ، همس تركي لهم وقال : وش نسوي الحين والله انتم خبول
ضحك سطّام بخفوت يقول : اصبر اصبر
نزل سطّام بخطوات هادئه و اتجه للـ مطبخ ، قرب يبعثر بـ الصحون و الاكواب لأجل يصدر أصوات ، و وقف خلف الباب بعد ماحس بـ خطوات احد يتجه صوب المطبخ ، دخلوا رهف و هياء الي كانوا يناظرون بكل الجهات وهم بكامل الخوف ، نطقت رهف : هيون مافيه احد !
هياء : يمه اجل شهالازعاج كله ؟
رهف بتوتر : مدري مدري مشينا عند البنات
طلعوا رهف و هياء للـ صاله و نطقت هياء : بنات ! مافيه احد رحنا نشوف المطبخ فاضي
نهى : منجدكم ؟
زفرت عهد وقالت : قاعدين تسوون مقلب الحين ولا وشو ؟ اقعدوا خل نكمل بس
رهف : نكمل وش انتي الثانيه تبين كف !
فزوا كلهم من قاطعهم صوت الباب الي تقفل بقوه ، شهقت نهى برعب تقول : لا شكله صدق الموضوع
وقفت عهد الي كانت اقوى وحده فيهم وقالت : بروح اشوف انا ، تعالوا وراي
نطقت رهف : امشي امشي بسرعه
مشت عهد بهدوء و البنات كلهم خلفها ، فتحت الباب بقوه و تلفتت يمين و يسار ، وقالت : بنات والله صادقين مافيه احد ! واذا كان صدق مقلب مستحيل لان كلنا موجودين هنا
نطقت نهى : يمه عهد وش يعني كل هذا !
عم الصمت بينهم لـ ثواني ، و صارخوا كلهم من طلع وراهم تركي و قاعَد الي دخلوا و خوفوهم ، شهق قاعَد من ضربته عهد بقوه وقال بـ ألم : يقلع عدوتس بتطلعين روحي انتي ! ناسيه ان توني مسوي عمليه !
ضحك تركي وقال : من لحين اقولكم تراهي فكرة قاعَد و سطّام مالي شغل !
قربت رهف تضربه بقوه وتقول : مالك شغل اجل ! ليه تشارك معاهم يوم مالك شغل الله ياخذ عدوكم
سطّام : خفتوا ولا ؟
نطقت نهى : لا ابد من قال خفنا
لفوا كلهم على هياء الي كانت ساكته ، و ضحكت عهد تقول : يحياتي هيون باقي مصدومه
نطقت هياء بكل عصبيه : ترا والله مايضحك ! وش هالحركات بغى قلبي يطيح بزران قسم بالله
ضحك سطّام و قرب منها يقول : بسم الله على قلبتس يابعد هالدنياا
ناظرته له وقالت : انت اص لا تكلمني ! يابعد الدنيا اجل
قاطعهم دخول عقاب الي نطق بحده : وش هالازعاج ؟ مو شايفين الساعه كم ! و متجمعين بالمطبخ بعد خلصوا الأماكن ..
نطقت عهد : استأذنكم يلا
نطق عقاب يقول : اذلفوا كل واحد بـ غرفته بسرعه ، ان سمعت حسكم ما بيصير خير
طلع قاعَد وقال : تروك تكفى تعال اسندني عليك ، والله هالعهد اوجعتني
هياء : قاعَد منجدك ؟
قاعَد : اي والله
قربت هياء تضرب عهد ع كتفها وقالت : صاحيه انتي !!!
نطقت رهف تقول : يوجعك مره ولا شوي ؟
قاعَد : م عليكم خلاص ، ان صار شي علمتكم الحين اذلفوا غرفكم ع قولة عقاب
عهد : ايه ترا عندنا دكاتره هنا
ضحك سطّام وقال : ابد انا و زوجتي بالخدمه
ضحكت هياء بصدمه وقالت : زوجتي هاه
ضحكوا كلهم و اتجه كل واحد لـ جناحه الخاص ..
-
فـ بيت ابو طارق ، بـ غرفة الجود و طارق من كانوا نايمين ..
دخلت عليهم لين وهي تنادي امها لأجل تصحيها : مااميي مامااا
فزت الجود و نطقت بـ عصبيه : هااه م تشوفيني نايمه !
فتح طارق عيونه بصدمه و نطق : جودي ي امي شفيتس معصبه من الصبح ! شويش ع البنيه
عبست لين بـ ملامحها و تقدمت لعند طارق تقول : ي بابا جده قالت لي اصحيكم عسان الفطور !
ابتسم وقال : زين جايين
اخذت الجود نفس و زفرت تقول : ليني ياحبيبي انتي تدرين اني ماحب هالحركه صح ؟
نطقت لين : اوكيه ماما اسفه
ابتسمت وقالت : حبيبي انتي ، الحين روحي تحت و قولي لهم اننا جايين
صدت و نزلت لـ تحت عندهم .. و قامت الجود تاخذ لها شور سريع ، طلعت و اخذت لها جلابيه خفيفه لونها وردي فاتح ، و رشت عطرها المفضل لها و اخذت لها شوي اكسسوارات ، لمت شعرها و حطت ميكب خفيف و نزلت لـ تحت ، نطقت وهي نازله : سلاام بنوووتااتيي
ابتسموا كلهم يردون : يااهللاا
نطقت ام طارق : يالله حيها بنيتي ، تعالي اقعدي
ابتسمت وقالت : الله يحييتس يـ أمي
نطقت حور : شهالزيين اووييلي ي جوودي !
عُلا : انشهد والله
ابتسمت وقالت : يابعد روحي انتم والله الزين كله فيكم
ابتسمت ام طارق ونطقت : الله لا يحرمني منكم ي بناتي ! ولا من عيالي
ابتسموا يرددون سوا : امين يارب
تخصرت لين وقالت : وانا ي جده ؟
ضحكوا كلهم و نطقت ام طارق : وانتي بنتي و حفيدتي و حبيبتيي بعد وش تبين
ابتسمت و قاطعهم نزول طارق الي نزل يسلم و ردوا كلهم السلام بصوت واحد ، ابتسم يقعد معاهم ع الطاوله و رفع عيونه للـ جود و نطق : ليه توني اشوف هالزين كله ؟
شرقت حور و ضحكت تقول : م الومك ياخوي
ضحكت الجود بخجل وقالت : شدعوه عاد !
لين : سفت ي باباا ماما طالعه حلوووه
ضحك طارق وقال : اي والله سفت ( المقصد شفت )
الجود : يوه خجلتوني خلاص خلاص
و كملوا السوالف بينهم .. و اتجه كل واحد لـ دوامه
-
و فـ بيت ابو جراح ، فزوا كلهم على صراخ الدانه ، ركض نايف يشوفها و دخل للصاله و شافها واقفه ع الكرسي ، نطق نايف : وش بلاتس ي المخبوله ! الناس نايمين
الدانه وهي تأشر : نااايييف صرصورر
انفجر نايف يضحك من شكلها و نطق : يكبرها عند الله ! هذا الصراخ كله عشان هالشي التافه !! مستحيل ي دنو مستحيل
الدانه : تكفى ي نايف تكفى !
ضحك و قرب يقتله ، زفرت براحه و نطقت : اهه يربي
نايف : وش المقابل ؟
تخصرت وقالت : مقابل عشانك قتلت هالصرصور !
نايف : توس تصيحين وش بلاتس
نطقت الدانه ب غضب : اص لاسمع حسك
ضحك وقال : خير ان شاء الله
.
و في غرفة الماس و جراح ، فزت الماس من الازعاج ، فتحت عيونها بهدوء تبسمت من شافت انها بوسط أحضان جراح ، اخذت نفس و قامت تتجه تاخذ لها شور سريع ، و تقدمت تفرفر وسط ملابسها ، اخذت لها بلوفر لونه وردي فاتح بحكم انه لونها المفضل ، مع بنطلون اسود ، نثرت شعرها العسلي الي كان نقطة ضعف جراح ، و حطت لها ميكب خفيف و قربت تقعد ع الكرسي تفرفر بـ جوالها .. زفرت بملل و تقدمت تصحي جراح وقالت بهمس : جرااح
فز يفتح عينه ونطق : لبيه ؟
الماس : الوقت قم
سكت بهدوء وقام يدخل للحمام ( يُكرم القارئ ) اخذ له شور سريع و طلع لبس له ملابس الدوام ، و قرب لعند الماس الي كانت امام المرايا تعدل شعرها ، ناظرها وهي متزينه ، قطب حاجبه وقال : شعندتس كاشخه فيه احد جاي عندنا اليوم ؟
ضحكت وقالت : م يصير اكشخ لك ؟
ابتسم يحاوط يدينه على خصرها و قرب يقبلها من نحرها ، و نطق : ياجعل مايكشخ لي غيرس يابعد جراح !
تبسمت بخجل و لف عليه تقول : رايح ؟
نطق يقول : اي والله بنزل اشوف امي و بروح
رفعت جوالها تشوف الساعه ، و نطقت : باقي فيه وقت اقعد شوي ثم رح
جراح : بلحق عليهم عاد هالايام صرت اتاخر مره
ابتسمت وقالت : يلا زين اجل انتبه لنفسك
ابتسم وقال : ابشري ..
-
يُتبع
-
( اعذروني على القصور و الأخطاء الإملائية ، و اعتذر لان البارت قصير ، اتمنى ان البارت عجبكم اضغطوا على النجمه لأجل نكمل سوا ) 🤍🤍🤍.
أنت تقرأ
مالوّم قلبيِ يوم تولع في ههواكِ ، مَحّلاه وصّفِك يحرِك خافقي كُله
Romanceرِواية : مالوّم قلبيِ يوم تولع في ههواكِ مَحّلاه وصّفِك يحرِك خافقي كُله - ثالِث رواية لي قريبا بإذن الله تعالى 🤩!! كَاتِبتكُم الجميلة : رهف القحطاني ✍🏻.
