التكملة للبارت الماضي ، في مكتب وهج ..
تنهدت تقول : ان شاء الله كل خير
وهج : ان شاء الله ، تعالي مشينا نطلع برا نشم هواء
الماس : لا تكفين خلينا هنا نسولف والله تعب شركه هالكبر وانتي بالدور الثاني
ضحكت تقول : خلاص زين خلنا هنا
الماس : ايوا كيف الشغل معاتس
وهج : ابد والله زين الحمد لله و الأمور تمام
الماس : الحمد لله
وهج : طب اسمعي بدق اعلم امي الحيين ، والله اني مستانسه اكثر منتس
ضحكت تقول : يلا طيب
-
و بـ المستشفى تحديدا ، طلعت عُلا من مكتبها تتجه
لـ مكتب هياء ، طقت الباب بهدوء و دخلت تقول : هيووون متى جيتي ؟
هياء : توني والله ، و متأخره بعد
ضحكت تقول : يلا عوافي ، شصار معاتس بشري
اخذت نفس وقالت : اخخ والله أشياء كثيره صارت ، سطّام و قاعَد و الاهل و الشغل م عاد فيني طاقه
عُلا : يابعد رووحي الله يقويتس ، سطّام و قاعَد شصار عليهم بخيرهم ؟
هياء : ابد الحمد لله بصحه وعافيه ، و م كأنهم طلعوا من مستشفى
انفجرت عُلا تضحك و كملت هياء تقول : تخيلي سطّام يبي يداوم ! و ذاك الثاني مسوي عمليه و توه طالع و يبي يروح الشركه اخخ جلطوني
عُلا : ما شاء الله عليهم ! صاملين باقي لو اني مكانهم انسى شي مستشفى
هياء : ياحبيبتي قاعَد اخوي ذا يروح و يجي بالشركه ع كيفه بس سبحان الله فجأه صار يبي يداوم
ضحكت تقول : مو طبيعي
هياء : تعالي بس ناخذ لنا قهوه نروق شوي
عُلا : يلا قدام ..
-
و فـ بيت ابو جراح تحديداََ ، اخذت ام جراح جوالها من فزت على رنينه ، و كانت وهج الي متصله ، نطقت ترد السلام عليها و نطقت وهج : يمهه عندي لس خبررر
ام جراح بـ تعجب : وشهو ؟ عسى خير
وهج : خيير يمه والله انه خير
ام جراح : طيب وشهو خلصي
وهج : جراح عندس ؟
ام جراح : ايه قدامي هو و نايف
وهج : ححلو ، يلا يمه مستعده ؟
ام جراح : ايه يلا قولي
وهج : بيصيررر عندس حفيييدد/ه ، لموس حاامملل
وقفت بصدمه تشهق وقالت : في ذمتس
وهج : اييووااا
ابتسمت بفرح تقول : الله يبشرتس بالجنه ي بنيتي ، وش هالاخبار الزيينهه
ضحكت تقول : اهخ يمه لو تدرين شكثر اني فرحانه
ام جراح : خليني اعلم اخوتس بس
وهج : يلا طيب ، أدق عليتس بعدين
قفلت ام جراح الخط و نطق نايف : يمه شسالفه ؟
الدانه وهي تنزل من الدرج ضحكت تقول : ترا نزلت من شهقت امي
ام جراح : عندي لكم الخبررر الي بيفرحكممم
الدانه : وشو ؟
ام جراح : جراح ياولدي م تبي تعرف ؟
تنهد يقول : اسلمي يمه وشهو كلنا نسمع
ابتسمت تقول : بتصير اب !
فتح عيونه بصدمه ينطق : هااه !! يمه صدق الي تقولينه
ام جراح : اي والله ، تو وهج داقه علي تعلمني و اختك طايره من الفرحه
ارتعش قلبه يبتسم و سرعان م قال : وليه تونا ندري ؟
قربت الدانه تقعد جمبه وقالت : جراح ي حبيب اختك ، خلك من المشاكل الي بتفرق بينكم تو امي جايه تعطيك خبر حلو م تبي تفرح ؟ بيصير عندك ولد او بنت خلك مستانس بتصير اب ي جراح ، رح راض زوجتك حرام هالفرحه وانت بـمكان وهي بـ مكان م تبي تفرحون سوا و يكبر طفلكم بينكم ؟
ناظرها يمسك يدينها وقال : انا ادري يادنو والله ادري ! عطوني مهله ياخي والله اني بروح لها و بكلمها ! فكرت فـ كلشي صار انا لا تحسبوني راضي عن الي صاير
ام جراح : ايوا هذا هو ولدي ، لا تخلي زوجتك زعلانه منك فـ بيتها بسبب شي م كان بيدها يصير وكلنا ندري عن طبع ام عباس و عيالها و عن نيتهم الخايسه ، و انها تبيك لـ بنتها و سوت كل هذا عشان تفرقكم
جراح : صح كلامتس يمه ، بس انتي خليني لحالي وانا اعرف شلون اراضيها خلاص ..
ام جراح : تمام .
-
و فـ ارجاء قصر آل حمد ، متجمعين بـ الصاله كلهم و نطق قاعَد يقول : اقول سيارتي وينها م اشوفها ؟
ضحكت ام تركي تقول : رموها على جمب لأجل م تسوق و تتعب نفسك
ضحك وقال : لا عاد انتم كذا مصختوها
تركي : موجوده سيارتك لا تخاف
نطق بملل : تروك تكفى مشينا نطلع انا وانت
ام عقاب بحده : مافيه
قاعَد : يايمه والله كتمتوني بالبيت مب بزر انا
ام عقاب : الا بزر
انفجرت رهف تضحك و جمبها تركي الي ضحك معاها ، ناظر لهم قاعَد الي نطق بـ عصبيه : م يضحك !
تركي : السموحه ي البزر
اخذ نفس يزفر و نطق وهو طالع للـ حوش : لحد يجي وراي مابي اشوف وجيهكم
ام عقاب : خير ان شاء الله
و جلسوا يسولفون و طلعت رهف تتبعه بـ هدوء ، تكت على الجدار تناظره من بعيد وهو قاعد ع الكرسي يشم هواء ، و قربت تتجه عنده و نطقت : قاعَد
نطق بدون لا يناظرها : نعم
قطبت حاجبها من رده وقالت : ترفسك ان شاء الله وش الي نعم رد زي الناس
نطق وقال : لبيه عيونه أمري ، كذا زين ؟
ابتسمت تقول : زين الزين
ضحك وقال : ايوا شتبين ؟
رهف : ابد م ابغى شي انت تبي شي ؟ اجيبلك شاي
قاعَد : من يدينتس ؟ ماقول لا
ضحكت تقول : ابشر
ابتسم وقال : تبشرين بالجنه
دخلت متجهه للـ مطبخ و اتجهت تاخذ له كوب شاي و اخذت لها كوب بعد ، و طلعت لعنده ، مدت يدها تعطيه و نطق يقول : مسرع ؟
رهف : جاهز قد سويته قبل شوي و نسيت اعطيهم
قاعَد : اها ، تمام تسلمين
و بـ الصاله تحديداََ ، دخلت رهف تقعد معاهم من كانوا يخططون لـ عرس هياء و سطّام ، نطقت ام تركي : متى تبونه ؟
ام عقاب : والله ما ادري عاد هالفتره مانقدر تبونه الشهر الجاي ؟
رهف بصدمه : لا لا مافيه وقت !
ضحكت ام تركي تقول : والله ي رهف هم يبون بسرعه شنسوي فيهم مستعجلين ع بعض
رهف : طيب خذوا رأيهم الافضل
ام عقاب : وينه سطّام ناديه بـ المجلس
رهف : طيب
طلعت رهف تناديه و تقدم يطلع من المجلس يقول : أمري ؟
رهف : تعال يبونك
سكت بعدم رد و دخل معاها لـ داخل و نطق يقول : شعندكم تبوني
ام عقاب : تعال ، متى تبون عرسكم ؟
حك شعره يقول : اسألوا هيون
ام تركي : هياء ب المستشفى مداومه قل انت
سطّام : نبي بـ اسرع وقت و مانبي ناس م نعرفهم
ام عقاب : ها شوفي قلت لس يبون ب اسرع وقت ، تبون الشهر الجاي ؟
سطّام : يمه انا م عندي مشكله انتوا شوفي هيون متى تبي لا تاخذون رأيي
ام تركي : رح رح م منك فايده
ضحك يقول : رايح خلاص ، لا تنسون اسألوا هياء طيب
رهف : خلاص رح لا يفصلون عليك
ضحك و طلع من عندهم ..
-
بعد المغرب تحديدا فـ بيت ابو جراح ، دخل جراح للـ صاله عند امه الي كانت قاعده مع الدانه و وهج ، تنهد يقعد بينهم و نطق يقول : اسمعوا
ام جراح : ها ي ولدي شفيك ؟
نطق يقول : يمه انا ابي ارجع الماس لـ هنا ، بس كيف ؟ اكيد انها زعلانه مني بعد اللي صار
وهج : جت اليوم عندي للـ شركه ، اكيد بتكون متضايقه يعني شدعوه مو واثق فيها !
جراح : وهج الله يهديتس قلت ابي ارجعها ترجعين تفتحين السالفه ليه ، والله اني ندمان !
الدانه : وش بتسوي يعني رح و قل لها انك تبي ترجعها و معترف انك غلطان ، و شي مو بيدك العصبيه الي سوت فيك كذا و الشي الي شفته
ام جراح : صادقه اختك
جراح : بس متى ؟
ام جراح وهي تشوف الساعه نطقت تقول : باقي وقت رح الحين مو مشكله !
جراح : اخر كلام
ضحكت الدانه تقول : رح الله يصلحك بس
طلع من عندهم يركب سيارته و رفع جواله يدق على نياف و ما أخذ منه وقت و رد ، نطق جراح : السلام
رد نياف يقول : عليكم السلام
جراح : علومك اخبارك
نياف : الحمد لله بصحه وعافيه ، أمرني ؟
جراح : اسمع ، انا جاي لكم وابي ارجع زوجتي لـ بيتها ! و ادري اني غلطان باللي صار و ابي اعتذر منها
نياف : والله يكون خير منك ..
جراح : اجيكم ولا مشغولين الحين ؟
نياف : ابد ننتظرك
جراح : يلا هذاني صوب البيت ، عطوها خبر اني جاي
نياف : م عليك ابشر
ابتسم و قفل الخط من وصل ، صف سيارته و اخذ نفس يزفر بهدوء وقال في نفسه : يلا ي جراح توكل على الله و الأمور بتعدي على خير ان شاء الله
كان نياف ينتظره برا و مده يده يصافحه وقال : الله حيه
ابتسم يقول : يحييك و يبقيك
نياف : اقلط المجلس ، وهي بتجيك
جراح : طيب
دخل جراح للمجلس ، و نياف طلع ينادي الماس ..
قعد جراح بـ الكرسي ، ماكله التوتر وكأنه لأول مره رح يشوفها ! ، خمس دقايق بالكثير و دخلت عليه الماس ، تجمدت في مكانها تناظره و هو كذلك يناظرها ، بلع ريقه ينطق : تعالي ! وش فيتس
اتجهت تقعد بـ جانبه و نطقت بربكه : ايوا اسلم ؟
جراح : اسمعي ، انا جاي ابي ارجعتس في بيتي و عندي ! و ادري اني غلطان يوم عصبت عليتس و قلت لس ارجعي ومن هذا الكلام بس حطي نفستس مكاني
قاطعته تقول : انت مو واثق فيني ؟
قرب يمسك يدينها بهدوء وقال : واثق فيتس والله ، بس الي شفته مو شوي !
سكتت تحس بـ غصه في داخلها و نطق يقول : ي الماس والله اني اسف ! والله هاليومين كأنها عامين ، انا جيت ارجعتس لاني ماقويت بعادس عني
طاحت دموعها بحرقه تقول : المره الثانيه تكون واقف معاي مو تسوي كذا !! انت خليتني ارجع لبيت اهلي كأنك شاك فيني والله العظيم انك صدمتني م توقعتها منك ابدا ي جراح
تنهد وهو يشوف دموعها الي تنزل ، قرب ياخذها بـ حضنه وقال : الماس لا اشوف دموعتس والله م تهون علي ، ولو كنت شاك فيتس والله م كان جيت لهنا ، والله اني اسف ! بس الي شفته مو شوي والله بس انا جيت وانا معترف بـ غلطتي و ابي ارجعتس
ابعدت تمسح على وجهها وقالت : طيب
بلع ريقه وقال : وش طيب ؟
الماس : واذا قلت لك مابي ارجع ؟ واذا قلت بعد ابيها توصل لل طلاق
فتح عيونه بصدمه و نطق : الماس وش هالكلام ! والله ماخليتس لغيري طلاق مافيه ! م يحتاج هذا كله
تبسمت وقالت : امزح معاك ابي اشوف وش بتقول
حط يده على راسه وقال : والله مب مزحه ذي
ضحكت بخفه تقول : طيب بقوم اجيب شنطتي انتظر
قرب يبوسها بخدها و ابتسم يقول : يلا زين
ضربته على كتفه وقالت : استح على وجهك لو احد من خواني دخل !
جراح : خل يدخلون طيب
صدت وقالت : رح السياره بجيك انا
جراح : طيب
-
و فـ المستشفى تحديدا ، طلعت هياء تجمع أغراضها و طلعت تقول : عُلا
فزت تناظرها وقالت : هلا
هياء : انا خلصت برجع تبين شي ؟
عُلا : لا ابد سلامتس
هياء : الله يسلمتس ..
طلعت هياء و ركبت السياره مع عقاب ، و نطقت تقول : مر الشركه بعد ناخذ نهى و عهد
رفع يده يناظر الساعه و قال : باقي م خلصوا بدري
هياء : أدري انا ابي اطلعهم
عقاب : وعلى كيفتس هو
ضحكت تقول : ياخي عقاب تكفى
ابتسم وقال : يلا زين هالمره بس
هياء : سم
-
و في المركز تحديداََ ، نطق سعيد : هيام وينس انتي
ناظرت له وقالت : اما عاد وينس ؟ صرت تسولف زي جراح انت
ضحك وقال : طيب ع طاريه وينه اليوم م شفته
هيام : ولا انا والله
سعيد : غريبه المدير م سأل ؟
هيام : الا سأل والله
سعيد : اووف ومن علمه !!!
قاطعهم دخول مشعل الي قال : انا علمته
سعيد ناظر لـ مشعل و نطق بقرف : وانت تحسب نفسك قوي وكذا إذا علمت ؟
مشعل : ايه
هيام : وعووهه
سعيد : والله ي انك تصدع اذلف من وجهي
ضحك يطلع وقال سعيد بصوت عالي : قفل الباب وراك
انفجرت هيام تضحك : سعيد ! والله يجيب لك المدير الحين اسكت
ضحك سعيد وقال : خل يجيبه مع نفسهم والله
و قعدوا يسولفون و غيره عن الشغل ..
-
يُتبع
-
( ياهلا بـ احبابي ، اعذروني على القصور و الاخطاء الإملائية ، اتمنى البارت عجبكم حاولت اطوله بقدر المستطاع وهذا الي قدرت عليه و حرفيا اعذروني لاني تأخرت صدق مشغوله مره و مسافره و ماعندي وقت اكتب لكم ، اضغطوا على النجمه لأجل نكمل سوا 💙💙.)
أنت تقرأ
مالوّم قلبيِ يوم تولع في ههواكِ ، مَحّلاه وصّفِك يحرِك خافقي كُله
Romanceرِواية : مالوّم قلبيِ يوم تولع في ههواكِ مَحّلاه وصّفِك يحرِك خافقي كُله - ثالِث رواية لي قريبا بإذن الله تعالى 🤩!! كَاتِبتكُم الجميلة : رهف القحطاني ✍🏻.
