للتذكير البارت الي قبل ..
مشوا متجهين بتجولون عند الخيول ، تطمنوا على خيل الماس و تقدموا صوب خيل جراح ، ابتسمت الدانه بحماس وقالت : تكفى نيووف
ضحك وقال : طيب اصبري نطلعه
طلعوه و اتجهوا إلى ساحه فارغه مابها احد لأجل ياخذون راحتهم ، ركبت الدانه فوق وهاج و بدأ يمشي فيها بهدوء ، ابتسمت وقالت : الله ي الشعور
ابتسم وهو يشوف ابتسامتها ، يحب يشوف فرحة خواته بعيونه ، نطق : انتبهي انتبهي بس
ضحكت وقالت : تبي تجرب
نايف : لا وين كملي انتي
الدانه بـ ابتسامة : والله شعور حلو ياخي يحظ جراحوه كل م طفش يجي هنا
ضحك وقال : وراه شغل مب كل م طفش يجي
الدانه : بعد صح ، تعال جرب
نايف : ي امي انتي إذا خلصتي خلينا نمشي ، والله مابي اجرب مجرب م عليتس من قبل
الدانه نزلت بهدوء وقالت : طيب خل نرجعه مكانه
نايف : مشينا
-
فـ بيت ابو طارق اخر الليل .. دخلوا البنات و معاهم تميم ، نطقت ام طارق وقالت : اووه رجعتوا م بغينا
ضحكت حور وقالت : فره و جينا
ام طارق : ها لنو استانستي ؟
لين : اييواا عمو استرى لي لعبه
ابتسم تميم وقال : انتي لو تبين عيوني فدا
ضربته عُلا على كتفه وقالت : تحبها أكثر عننا
ضحك وقال : لييني غيير ! وانتم احبكم بعد
حور : لين حبيبي اطلعي شوفي ماما موجوده ولا ! و بدلي ملابستس و تعالي اقعدي معنا
لين : اوكيه
طلعت لين مسرعه للـ طابق الثاني تحديدا بـ غرفتهم ، دخلت و نطت للـ سرير عند الجود الي كانت متسدحه ، لين : ماامي شوفي عمو وس جاب ليي
ابتسمت وقالت : ها استانستي
لين : اييواا ، ماما ابغى ابدل و بنزل عندهم
الجود : ي ماما خلاص خلي عماتس من اليوم وانتي عندهم
عبست بـ ملامح وجهها وقالت : يماما هم يبوني والله هنا ملل وس اسوي
الجود : تعالي اقعدي عندي و جيبي ايبادس
لين : مابغى بنزل تحت
الجود : تبيني ازعل منس يعني
لين بـ ملل : افف
ناظرتها الجود وقالت : اف ! والله انتي لسانس صار هالطول ، انزلي عندهم خلاص
نطت بحماس و مشت تبدل ملابسها ، وقفت عند الباب تبي تنزل و تقدمت للغرفه عند امها وقالت : ماما
ناظرتها الجود بعدم رد ، و نطقت لين : خلاص خلاص م بروح بقعد عندس
ضحكت الجود بخفه و فتحت حضنها لـ لين ، ابتسمت لين و قربت تتمدد بـ وسط أحضان امها ، وقالت : مامي بابا وين ؟
فزت وقالت : اي والله صادقه غريبه للحين م جاء ، قومي جيبي جوالي
قامت لين و مشت تاخذ الجوال من الطاوله ، تقدمت تقعد بـ السرير و عطتها الجوال ، اخذت الجود جوالها و دقت عليه ، دقايق و رد عليها ، نطقت : طارق
رد يقول : لبيه يالدنيا
ابتسمت وقالت : لباك ، وينك م جيت ؟
طارق : والله بـ الطريق الحين صوب البيت ، ليه تبين شي ؟
الجود : لا ابد بس قلت اسال ليه طولت
طارق : ايه زين يلا هذاني قدام البيت
طفت الجوال و قالت لين : ها ماما وينه
الجود : امم وين تتوقعين ؟
لين : بـ الدوام
الجود : لا
لين : وين طيب
قاطعهم دخوله عليهم و ابتسمت الجود تقول : هذا هو بابا جاء
ابتسم يفتح حضنه لـ لين الي تقدمت لعنده وقال : لنو بعدس م نمتي ليه ي بابا
لين بـ براءه : بابا كنت بنزل تحت عند عمه حور
طارق : ايه و ليه م نزلتي
لين : عسان ماما م تزعل مني
ضحكت الجود وقالت : ي ابوها بنتك من الظهر وهي معاهم خل يرتاحون شوي
طارق : صح كلام ماما ؟
لين : ايوا صح بس هنا ملل وس اسوي انا ابي انزل
طارق : خلاص انزلي طيب مو مشكله
الجود : طروق !
ابتسم وقال : عيونه
الجود : وش انزلي ماهيب نازله تروح نام او تقعد على ايبادها شوي
طارق : خلاص تعالي انا بتابع معاس وش تبين بعد
ضحكت لين تقول : صدق تتابع معاي
ابتسم بـ حنيه وقال : ايه
لين : مسينا نقعد مع ماما نتابع كلنا
طارق : يلا مشينا
لين بحماس : اوكيه بجيب ايبادي
تقدم طارق و انسدح جمب الجود ، ضربته على كتفه وقالت : طارق لا تستهبل بنتك جايه وخر مناك
ضحك وقال : طيب خلها تجي !
الجود : يوه طارقق
قاطعهم دخول لين الي معاها ايبادها و تقدمت تنسدح وسطهم و قعدوا لين م ناموا كلهم ..
-
عند جراح و الماس ، دخلوا للفندق بعد طلعه متعبه ، نطق جراح : انا بروح اخذ لي شور سريع و بجي نطلب لنا عشاء
الماس : يلا طيب
دخل جراح للـ حمام ( يُكرم القارىء ) و الماس دخله الغرفه تبدل ملابسها ، اخذت لها لبس نوم خفيف تيشيرت سماوي و كذلك شورت سماوي ، قعدت قدام المرايه تمسح الميكب ، و فردت شعرها الي كان نقطة ضعف لـ جراح ، مشت للصاله تفرفر بـ جوالها ، دقايق و طلع جراح وهو يبلل شعره من الماء ، مشى متجهه للصاله وقال : طلبـ..
فزت تناظره وقالت : وش
ارتخى يناظرها بهدوء وقال : والله طيرتي كل الكلام من مخي !
الماس بـ ابتسامه : يوه جراح مب لهدرجة عاد
قرب منها وقال : الا والله لهدرجه وش سويتي فيني انتي ، اشهد اني محظوظ فيتس ! ملاك نازل علي
ابتسمت بخجل وقالت : ي حبيبي والله
ضحك يقول : اهخ منس بس
ضحكت بخفه وقالت : اطلب اطلب بس
ابتسم وقال : حاضرين طال عمرس
-
بـ المستشفى اخر الليل ..
طلعت هياء من مكتبها بتعب و صادفت الدكتور وائل الي اول م لمحها نطق : هياء عسى م شر ؟
هياء : ها ابد بس تعب الشغل وكذا
وائل : اي زين ارجعي إذا مخلصه
هياء : ايه ادري م عليك
صدت تنزل للـ كافتيريا تبي تنزل عند عُلا ، و لمحت سطّام الي كان قاعد مع اللابتوب الخاص فيه ، وكان يشتغل بتدقيق اخذت لها كوب قهوه و تقدمت تقعد قدامه وقالت : سطّاموه
ابتسم من سمع صوتها وقال : حي هالصوت
ضحكت وقالت : الله يحييك ، شقاعد تسوي ؟
تنهد وقال : ابد والله اخلص لي كم شغله هنا ، وانتي ليه بعدس هنا م بترجعين ؟
هياء : الا برجع
سطّام : مع مين عقاب ولا قاعَد ولا عمي
هياء : ولا واحد
رفع عيونه يناظرها وقال : اجل ؟
هياء : معاك
فتح عيونه بصدمه و ضحك يقول : تمزحين ولا صادقه
هياء : الا والله ، ابوي و عقاب سحبوا علي و قاعَد أدق عليه م يرد
سطّام : ابد معاي خلاص
ضحكت وقالت : ايه زين إذا خلصت علمني بروح عند عُلا
سطّام : وين وين هذاني خلاص
هياء : متأكد ؟
سطّام : ايه ايه
هياء : طيب بطلع اجيب شنطتي واجيك
سطّام : يلا انتظرس
طلعت الدور الثالث ، دخلت مكتبها و اخذت شنطتها و جوالها و رجعت تنزل لعنده ..
-
و بـ الشركه تحديدا ..
تقدمت وهج لـ مكتب عقاب وقالت : استاذ عقاب
ناظرها وقال : تفضلي ؟
وهج : هذي الملفات الي تبيها ، وانا خلصت الشغل الي علي ، بطلع الحين
عقاب : ايوا خلاص زين تقدرين تروحين
طلعت و نزلت تحت ، قعدت على الكرسي اخذت ترفع جوالها تدق على نايف وكان مافيه اي رد منه ، زفرت وقالت : اففف يربي ذا وينه الحين
تقدمت السكرتيره وعد وقالت : في شي ؟
وهج : اييه وعد تكفين تقدرين تطلبين لي تاكسي
وعد : لحظه انا توني شفت وحده من بنات ال حمد دخلت م ادري نهى او عهد
وهج : صدق !؟!
وعد : ايوا شوفيها هناك
ركضت مسرعه لين وصلت عند عهد وقالت : عهههدد
فزت عهد بصدمه وقالت : بسم الله شفيتس
وقفت تلقط انفاسها وقالت : عهد تكفين بترجعين مع مين ؟
عهد : عقاب اخوي ليه
وهج : هاه لا خلاص ولاشي
عهد : تعالي تعالي ي الكذوب وش فيتس بسرعه
وهج : يوه ، اخوي جواله مقفل و مدري ارجع مع من المهم خلاص بطلب لي سياره
عهد : تبين كفف الحين ؟ سياره هالوقت بتجين معاي مو مشكله عادي انا بكلم عقاب
وهج : صدق ؟
عهد : ايه والله
وهج : خلاص طيب
طلعت عهد تدخل مكتب عقاب وقالت : عقااب
عقاب : ها مشينا ؟
عهد : مشينا بس فيه احد بيروح معنا
عقاب : ومنهو
عهد : وهج
قطب حاجبه وقال : ليه !
عهد : اخوها جواله مقفل والبنت طبعا م بتركب لحالها مع أوبر !
عقاب : طيب طيب
نزلوا مع بعض لـ تحت و نطقت عهد : وهج تعالي
تقدمت وهج وقالت : يوه عهد تكفين والله احس ماله داعي انا بدبر لي أحد ياخذني
وهج بحده : اقول قدامي بس !
قاطعهم صوت عقاب الي قال : اركبوا للسياره انتم وانا جايكم
عهد : طيب
مشوا طالعين يتجهون للسياره ، و ركبوا عهد و وهج ، نطقت وهج : عاد انا وشلون بدله على بيتنا !
ضحكت عهد وقالت : وهج شفيتس خايفه من عقاب عادي والله م راح ياكلتس
وهج بربكه ضحكت بخفه وقالت : ها لا مو خايفه متوتره بس
عهد : م عليتس إذا عندتس اللوكيشن ارسلي لي ياه وانا برسل له و ندل بيتس
وهج : اي زين
-
و تحديدا فـ ارجاء قصر آل حمد ، بـ الصاله تحديدا عند البنات الي دخلوا بتعب ، نهى : اههخ رهوف والله اشكرتس
ضحكت وقالت : العفوو العفو
قاطعهم دخول هياء و سطّام الي رجعوا من المستشفى وقالوا : السلام عليكم ياهل البيت
ردوا بصوت واحد : و عليكم السلام
سطّام : سلمنا و يالله بهج لغرفتي انا
ضحكت نهى وقالت : رح رح هذي شغلتك من الشغل للغرفه
ضحك و صد يطلع ، سحبتها نهى وقالت : تعالي تعالي جيتي معاه انتييي ؟
هياء : ايه ليه
ضحكت رهف تقول : اووهه من الحين يعني بدينا
ضحكت هياء وقالت : وش بدينا استحي على وجهتس قاعَد الوسخ نساني و دام سطّام موجود اروح معاه سهله
نهى : شاطره شاطره ، الا عهد وين !
رهف : مو هي نزلت للشركه و قالت برجع مع عقاب
نهى : اييه صح
هياء : خلصتوا اجل يلا انا بطلع انام
نهى : لييه نبي نسهر تكفين
هياء : وراي شغل ي بنت
رهف : هيياء شوي بس و اطلعي باقي وقت
هياء : افف منكم طيب خلاص
-
يُتبع
-
( اهلا اهلا ، السموحه على التأخير و اعذروني على القصور ، و اسمحوا لي ان كان فيه اخطاء املائية ، اضغظوا ع النجمه إذا أعجبكم البارت وشدوا دعمكم لنا لقاء آخر بأذن الله 🌷.
أنت تقرأ
مالوّم قلبيِ يوم تولع في ههواكِ ، مَحّلاه وصّفِك يحرِك خافقي كُله
Romanceرِواية : مالوّم قلبيِ يوم تولع في ههواكِ مَحّلاه وصّفِك يحرِك خافقي كُله - ثالِث رواية لي قريبا بإذن الله تعالى 🤩!! كَاتِبتكُم الجميلة : رهف القحطاني ✍🏻.
