مالوّم قلبيِ يوم تولع في ههواكِ ، مَحّلاه وصّفِك يحرِك خافقي كُله

~ 26 ~

نزلت وهج للـ صاله تقعد مع أهلها بـ الطاوله ، و بدأوا يفطرون ، نطقت ام جراح : جايين يطلبون يدس الناس
بلعت ريقها تقول : طيب مين يمه ؟؟ منهو ولده
جراح : اما عاد م تدرين
وهج : وترتوني اخلصوا
ضحكت الدانه تقول : الي بالي بالتس ، ماغيره ولد آل حمد جاء بنفسه يطلب يدس
شرقت تقول : هاااهه
انفجروا يضحكون كلهم و نطق نايف : هذا مدير الشركه ماغيره ؟
الدانه : ايييه تخيل مدري وش لقى فيها
نطقت وهج : ي الخايسه !
ضحكت تقول : امزح يبوي
جراح : طيب موافقه ولا وشو عشان امي تقولهم
وهج : يمه اصبروا وش اقول وش اسوي
ام جراح : ها بسرعه عشان لا يجون ع الفاضي
وهج : شرايتس انتي يمه
ام جراح : خلاص انا بقول لهم موافقين
ضحكت الدانه وقالت : وهج كيف بسرعه ؟
وهج : عطوني فرصه ع الاقل افكر !
نايف : ذا كله و فرصه ترا مب اول مره تشوفينه اكيد تعرفينه وتعرفين شخصيته خلاص
وهج : خلاص يمه قولي لهم موافقين و نشوف كيف
ام جراح : اخلصي يلا نبي نطلع ناخذ لتس شي تلبسينه
وهج بتوتر : ان شاء الله
الماس : يلا عساه خير ان شاء الله
رددوا كلهم : ان شاء الله ..
ام جراح : الماس يابنتي بتجين معانا ؟
لفت تناظر جراح و نطقت : جراح شرايك ؟
جراح : الي ودتس يابعده
تبسمت و نطقت : بشوف إذا قدرت بجي
ام جراح : تمام
نايف : انا الي باخذكم طيب ؟
ام جراح : زين
قامت الماس تتجه للـ مطبخ و قام جراح وراءها مسرع ، دخل و قرب منها ينطق : وشرايتس تسحبين عليهم و نسيّر على الاسطبل ؟
الماس : صدددقق ؟؟؟
جراح : اي والله عاد صار لي فتره ماشفت وهاج
الماس : يلا تم منها اشوف نجم بعد وحشني
جراح : وحشني اجل
انفجرت تضحك وقالت : جراح شدعوه خيل ترا
تبسم وقال : طيب اطلعي اجهزي انتي وانا شوي و جاي
الماس : تم تم
-
و في قصر آل حمد ، متجمعين كلهم بـ الصاله ، نطقت نهى : وناااسه عااد وهج بتصير معانا هناا
ام عقاب : مستانسين على وشو انتوا
هياء : يمه شفيتس كذا خليتس مستانسه تبين عقاب يزعل عليتس ؟ لا تخربون فرحته
رهف : عاد ان شاء الله تكتمل الفرحه و توافق البنيه
نهى : ان شاء الله يااارب
نطق سطّام وهو داخل عليهم : يبوي عرسنا انا و هيون بيطلع افخم عرس
ضحكت هياء وقالت : طبعا ياحبيبي حنا غغيير
سطّام : اننششهد
ام عقاب : علم ولد عمك ، بيأخذ له وحده موظفه عنده
سطّام : طيب واذا موظفه عنده هذا هو القدر و جمعهم اهم شي هم راضيين انتم الاهل لا تقعدون تخربون بين اثنين يبون بعض مايصير والله
ضحكت هياء تنطق : وايي واي الي ينصح بس
ضربتها رهف على كتفها بقوه وقالت : ي الخايسه اثقلي
تبسم ونطق : جعني افداتس انتي بس
تبسمت تقول : فداا
نهى : ويع ويع تكفون اذلفوا شهالرومنسيه الزايده
هياء : بعدين بتحسين بشعوري يوم تحبين لس واحد من كل قلبتس
سطّام : الله الله
ام عقاب : اذلف ي سطّام لا اطلع حرتي فيك
انفجر يضحك و قاطعهم دخول عقاب الي قال : ها متى بنمشي ؟
ام عقاب وهي تناظر الساعه : مستعجل ليه !! لاحقين والله انتظر شوي
عقاب : طيب
-
فـ الاسطبل تحديداََ ، نزلوا الماس و جراح يتجهون للاسطبل ، مشت الماس جمب جراح يتقدمون لـ عند وهاج ، تبسم جراح وهو يطبطب عليه و نطق : بطلعه للميدان شوي ، تعالي انتظريني هناك
الماس : مابي مابي بشوف نجم
جراح : طيب ي ابوي امشي معاي الحين اذا خلصت نروح له
الماس : مابي ! ابي الحين انت رح مع وهاج وانا بروح عند نجم ماعلي شي ترا
جراح بـ عصبيه نطق : الماس ! قدامي بسرعه
الماس : جراح لا ترفع صوتك قلت لك م علي شي افهم
جراح : امشي معاي الله يصلحتس ي حرمه امشي
الماس : تمام
اخذ جراح يطلع وهاج بـ وسط الميدان ، و أشر على الكرسي يقول : اقعدي هنا يويلتس تقومين
صدت بعدم رد تناظر بـ اظافرها ، ركب فوق وهاج و بدأ يمشي به بهدوء ، تبسم وهو يشوف المكان هادئ و تقريبا ما كان فيه احد ، بدأ وهاج يركض بـ جراح و عند جراح الي كـ العاده كان متلثم بـ شماغه و يتستمع بـ الأجواء الهادئه ، بعد مرور 15 دقيقه رجع لـ عند الماس و نطق : يلا مشينا
وقفت بعدم رد و مشت تتجه لـ عند نجم ، ناظرها و فهم من حركاتها انها زعلت منه ، نطق بهدوء : بودي وهاج و بجيتس انتي تقدمي لعند نجم
تقدمت بهدوء و دخلت لـ عند نجم تتقدم نحوه ، تبسمت بهدوء تناظره و نطقت : نجميي ! واي واي وحشتني مره
وقف جراح يناظرها من بعيد و تبسم وهو يشوف حنيتها معاه و شوقها له ، طلعت و اتجهت للسياره بدون لا تنطق كلمه معاه ، ركب و نطق : زعلتي مني الحين عشاني م خليتس تروحين لحالتس !
الماس : لا
جراح : اجل ؟
ناظرت له تقول : من متى صوتك ترفعه علي ؟
تنهد وقال : والله ي الماس انتي تدرين انه مب قصدي ! وش ذنبي اخاف عليتس يابعدي افهميني تكفين ، لو صار لتس شي ؟ وانتي حامل ! ماتبين اخاف ؟؟
الماس : و يوم تخاف ترفع صوتك ؟ حلو والله
قاطعهم صوت رنين جوال جراح الي كان بـ السياره و كانت المُتصله هيام ، ناظرت الماس للجوال و نطقت : ايوا يلا رد عليها .. و نزلني للبيت سدت نفسي
قفل الخط و صف السياره على جمب ، لف عليها و مسك يدينها بهدوء ينطق : انا كم مره بقعد اقولتس هيام الي بيني وبينها شغل !! وانا النقيب وهي بـ فريقي يعني معاي ! لا تقعدين تغارين منها وانا عيني ماتشوف غيرتس
الماس : طيب
جراح : الماس !
الماس : وشو قلت لك طيب
جراح : بس انا افهم من طيب يعني بعدس ؟
زفرت و نطق جراح : طيب اسف صوتي ومعاد برفعه شتبين بعد ؟
الماس : ابي ارجع البيت
جراح : ي الماااس لا تعصبيني الحين و تزعلين إذا رفعت صوتي ! خلي عنس حركات المبزره ذي
ناظرته و قطبت حواجبها تقول : مبزره اجل ! يعني انت طالع منها يالبزر انت و حركاتك ذي
فتح عيونه بصدمه وهو يشوفها معصبه و نطق يقول : ايوا وش بعد ؟ طلعي الي بخاطرس شايله كثير شكلس
الماس : صدق جراح والله صاير تقهرني بـ تصرفاتك ذي ، الاسطبل فاضي ومافيه احد وش بيصير لو رحت لحالي !
جراح : طيب انا م ابيتس تروحين لحالتس خلاص افهمي ي امي افهمي !
الماس : جراح انت حمار ولا وشو ماتفهم ؟ الله يصبرني
و عم الصمت بينهم لـ دقايق ، الين ما نطقت الماس : جراح
جراح : يابعد جراح
تبسمت و نطقت بهدوء : احس اني اشتهيت فراوله الحين !
ناظرها من ضحك بخفوت و نطق : هذي بدايتها ؟
الماس : بتقول لا ؟ بذبحك
جراح : حاضرين من عيوني الي تبينه يجيس
وقف عند أقرب بقاله و نزل ، زفرت الماس تنطق : والله اني انا الحماره قلت له كلام و سبيته وهو للحين يقولي يابعد جراح و من عيوني ! يحياتي عليه بس
دقايق و دخل عليها السياره ، قرب يمد الكيسه لها ونطق : وهذي الفراوله وش بعد امريني ؟
الماس : ياخي جراحيي
ابتسم و نطق : ياااابعد جرااحتس و دنياه
ابتسمت وقالت : احبك والله احبك !
نطق : لا كذا كثير والله
ابتسمت وقالت : والله يوم قلت لك حمار مب قصدي ! انت عصبت وانا عصبت وكلنا عصبنا شسوي بعد
جراح : إذا منس مب مشكله قولي الي تبينه بس اسمعي الكلام ولا تصيرين عنيده ! عشان م ارفع صوتي عليس و تزعلين بعدين ها هذاني علمتس
الماس : خييير ان شاء الله
ضحك و كملوا سوالفهم الين ماوصلوا البيت ..
-
و عند ام جراح و بناتها بـ السوق ، زفرت وهج تقول : يمه مافيه شي حلو وش ذا
تقدمت الدانه وهي ماسكه فستان خفيف لونه سُكري ، عليه خرز فضي خفيف من اعلى الصدر ، نطقت وهج : واووو ! لا صدق طلعتي تعرفين تختارين دنوو
ام جراح : يعني ناخذه ؟
وهج : طبعا خلاص هذا هوو
ام جراح : يلا اجل مشينا نحاسب و نطلع ناخذ لها اكسسوارات خفيفه
الدانه : تم ، يمه انتي انتظري ب السياره جايين حنا
ام جراح : يلا تمام
اتجهت ام جراح للسياره و ركبت ، نطق نايف : وينهم ذول ؟
ام جراح : يحاسبون ياولدي اصبر
م اخذ من وقتهم كثير الا و تقدموا يركبون ، نطقت ام جراح : الحين مشينا عند محل اكسسوارات يلا
نايف : يلا تم
نطقت وهج : يمه توترت
ضحكت الدانه : يحياتي ليه ليه
وهج : مدري احس قلبي بيطلع من مكانه باقي م استوعبت شي شلون كذا
نايف : الله ي الدنيا جراحوه تزوج و ولده ب الطريق و الحين وهج بتروح بعد باقي انا و دنو !
الدانه : تأثرت الصراحه ، لازم اكشخ لعل وعسى ياخذني واحد من آل حمد ما شاء الله خيرهم كثير نبي واحد كذا مب مطفر ومع نفسه
وهج : ي الوصخه لو اني موافقه على عقاب بوافق لانه رجال معروف بـ طيبته و أخلاقه ، و معروف انه كريم ما شاء الله عليه و ماقصر معانا ، تكلف ب علاج امي و سوا كل شي يقدر عليه ومحد وقف معانا غيره ! هذا وحنا م بيننا قرابه ابدا حتى الاقارب ما سوو الي سواه !
نايف : بديت اقتنع الصدق
ام جراح : اي والله ماقصر اشهد انه رجال ولد رجال ، ان كان خير لتس الله يوفقكم و يكتب لس الخير والسعادة
وقف نايف السياره و نطق وهذا أقرب محل انزلوا شوفوا شلون إذا ماعجبكم نغيره ، نزلوا كلهم و دخلوا للمحل ، و اخذوا لها اكسسوارات فضه طقم كامل خفيف و هادئ ، نطقت ام جراح : كفايه ؟
وهج : ايوا يمه يكفي والله
ام جراح : يلا تمام ، الوقت الوقت خل نرجع الحين
وهج : مشينا يلا
حاسبوا و طلعوا كلهم من المحل و ركبوا للسياره و طاروا طيران للـ بيت ، نزلوا للبيت ، و انقسموا كل أحد بـ مهمه ، بدأت ام جراح ترتب البيت و تجهز المجلس و تبخره ، و استلمت الدانه المطبخ و قامت تجهز القهوه و من هالاشياء ، و الماس الي كانت تساعد وهج بـ المكياج و تعدل لها شعرها وغيرها الكثير ، جهزوا كل شي و نزلت وهج للـ صاله و نطقت : يمه كيف ؟
تبسمت تنطق : بسم الله تبارك الرحمن ! الله يحميتس من عيون الناس وش هالجمال
جراح : انشههددد جماال ياحظ عقاب ان وافقتي عليه
ضحكت تقول : ماعرفتك جراحووه من متى تمدح
جراح : والله م تستاهلين
الدانه : واي واي حتى لموس تهبل اخاف ياخذونس انتي بدال وهج ما شاء الله جمال جمال !
نطق جراح بحده : وش الي ياخذونس بدال وهج ؟ تراني اسمعس هاه
انفجرت تضحك وقالت : غيور غيوررر ، بيخطبونها الناس وهي متزوجه تخيل
جراح : يمه شوفي بعدني ساكت ماقمت اسطر بنتس
الماس : يليل دنو و جراح خلاص مب وقتكم
الدانه : ابيه يغار خليه ، تسمع ولا ماتسمع ؟ انتبه ل حرمتك لا ياخذونها منك عاد
لف جراح ياخذ أقرب وساده جمبه و رماها عليها و نطق : انتي شفيتس ؟ تبين اذبحتس ولا وشو
ضحكت وهج و نطقت بـ استفزاز : عاد لموس انتي بعد انتبهي على جراح بـ فريقه بنت و غير ذا م صدقنا نخلص من صفاء الي مهووسه فيه
ناظرت لها و نطقت : محد بياخذه وانا موجوده
ضحك يقول : ياخي وهج تعجبيني
الدانه : يع يع تعجبيني قال
جراح : انا اشوف الحين انتي الي غرتي ولا ؟
قاطعهم صوت طق الباب و قام جراح يفتح الباب ، و تبسم بهدوء من شاف خاله الي كان امام الباب و نطق : يالله حي الشيخ بو نواف
تبسم خالهم ( مساعد ) يرد : الله يحييك ياابووو
ضحك وقال : رعد
ضحك مساعد يقول : يحييك و يبقيك يابو رعد ، عاد جيت اكون معاكم لازم اعرف منهو ولده ذا م راح نعطي بنت اختي اي احد !
جراح : تفضل طال عمرك
مشى يدخل معاهم للـ صاله ، و فزوا وهج و الدانه يسلمون عليه و نطقت الدانه : واي واي اشتقتت لكممم
تبسم يقول : مستحيل وش ذا كبرتوا انتم
ضحكت وهج تقول : اييه الناس تزوجوا خلاص
غمز لها وضحك يقول : وناس بينخطبون الليله
تبسمت بـ احراج وقالت : ان شاء الله
قعد من دخل نواف ولده و قعدوا و نطق مساعد : ايوا علموني من ذا و شلون عرف وهج ومن ذا الكلام
جراح : الله يسلمك ي خالي ، وهج تشتغل بـ شركة آل حمد وانت تدري
مساعد : ايوا ؟
جراح : ذا الله يسلمك ولد مؤسس الشركه ، الي هو المدير عقاب آل حمد
مساعد : اما عاد عقاب ولد سهم !
جراح : هالله عليك
مساعد : لا ماعليكم اعرف ابوه ، ما شاء الله عليهم رياجيل معروفين ب اخلاقهم الرفيعه
وهج : ماقلت لكم
مساعد : بعدين ان ماخاب ظني هو نفسه الي عالجتس ياخيتي ؟
ام جراح : اي والله هو جعل الله يحفظه و يسعده ويوفقه وين ما كان
مساعد : اجل انا اقولتس من الحين ما راح يقصر معاتس إذا وافقتي
وهج : ان شاء الله بس
جراح : ابد انتي شوفي الي ارتحتي له و علمينا
رفع يده مساعد يناظر الساعه و نطق : للحين م جو ؟
عم الصمت بينهم لـ ثواني و فزوا كلهم بـ توتر من طق الجرس ، وهج بربكه : يمه يمه وش اسوي
ضحكت الماس تسحبها على جمب و نطقت : انتي موافقه عليه ولا ؟ خلاص اذا موافقه قولي لهم موافقه
حكت شعرها و نطقت : الماس مدري عاد حليله عقاب بس مدري توترت
الماس : والله ي وهج ككففف يطير مخسس مافي شي اسمه مدري ! خلاص وافقتي
وهج : خلاص طيب م قلت شي بس متوتره بعدني
الماس : الله يعدي هاليوم على خير
وهج : ان شاء الله يارب
طلع الخال مساعد و جراح يستقبلونهم ، و دخلوا كلهم للـ مجلس ، قعد ابو عقاب و نطق : والله حنا جايين نبي بنتكم لـ ولدنا ، الولد شاريها و يبيها تكون زوجته و ام لعياله
نطق مساعد : والله يا سهم انا اعرفك و اعرف ولدك ، رجال ونعم فيه و الناس يعرفوه بـ طيبه و كرمه و مانسينا الي سواه مع اختي جعل عمره طويل
تبسم عقاب يقول : ابد ماسويت شي
نطق مساعد : طيب بنقول للبنت ندخل و تشوفونها
ام عقاب : يلا تمام
طلع جراح و دخل للصاله يقول : وهج يلا
وهج بهدوء : طيب جايه
مشت خلف جراح و نطق جراح : حنا الحين بنطلع وانتم اقعدوا سوا شوفوا كيف اوضاعكم
دخلت وهج من طلعوا كلهم لـ برا و بقى هي و عقاب فقط ، بلع ريقه من شافها أمامه بكامل كشختها ، جلست وهي ترجف من التوتر وتحاول تستوعب انه الي قدامها عقاب بنفسه ! عقاب بـ لحمه و دمه ! نطقت تقول : عقاب متأكد انك تبيني ؟
عقاب : طالعة لي بكل هالزين و تاخذين عقلي ثم تسألين ابيتس ولا لا ؟ ليه اجي إذا م ابيتس
ابتسمت بخفه و نطقت : طيب بس ماتحس اهلك ما بيعجبهم وانت ماخذ لك وحده برا القبيله ؟ لا تستعجل بـ قراراتك
عقاب : إذا على كذا قد تفاهمنا ع ذا الموضوع ، اهلي مالهم شغل إذا باخذ من القبيله ولا من برا ! وانا ابيتس انتي ان كنتي ماتبيني قوليها م عندي مشكله
وهج بتوتر : عقاب م ادري والله م ادري كل شي صار بسرعه ! حتى ماخذيت وقت افكر
عقاب : يعني تبين وقت تفكرين بعد ؟
وهج : مادري ي عقاب م ادري اهخ
مسح على وجه و ناظرها ونطق يقول : اروح يعني ؟ ليه ماتقولينها كذا يوم دقينا عليكم
بلعت ريقها و ناظرت له وهي تشوف خاب ظنه فيها ، و كمل يقول : فيه احد فـ بالتس ؟ تبين احد ثاني ؟
وهج : لا
عقاب : طيب و الرد الحين وشو ؟
سكتت بعدم رد لـ ثواني و اخذت نفس عميق تقول : موافقه
رفع عيونه و تبسم ينطق : في ذمتس
ابتسمت بخفوت تقول : في ذمتي
ابتسم و وقف يقول : ياااسلاام عليتس ياوهج
ضحكت وهي تشوف ردة فعله الغير متوقعه و نطقت : ايوا و نقدر نقول الله يتمم لنا على خير
عقاب : اجل الشيخ جاي بـ الطريق لأجل نتمم الكتاب
وهج : تمام ..
-
يُتبع
-
( ياهلا بـ احباب قلبي ، اسفه جدا جدا ادري اني سحبت و اختفيت عليكم بس اعتذر والله انشغلت مع الدراسه و نسيت الروايه ، اعذروني ع القصور و الأخطاء الإملائية و اعتذر إذا كان فيه اخطاء بـ البارت او غيره ، اضغظوا ع النجمه لاجل نكمل سوا ، لنا لقاء آخر 🤍🤍🤍 - )