" ရဲဇင် အန်တီမွန် စကားလေးပြောချင်လို့ပါ.... "
"ရတယ် အရေးကြီးလား... အရေးကြီးရင် စာကြည့်ခန်းကစောင့်ပေးမလား... ကျွန်တော် ရေချိုးလိုက်ဦးမယ်... "
" အရေးကြီးစကားပါ ရဲဇင် "
" အိုကေ အန်တီမွန် စောင့်နေလိုက်ပါ"
သူအလျင်အမြန်ပင်ရေချိုးခန်းဝင်လိုက်ရပါသည် ။ တစ်နေ့လုံးခေါင်းစားသမျှ ပင်ပန်းသမျှကို ရေနွေးနွေးနှင့်ဖျော်ချလိုက်ရသည်။ ခုနက တွေ့ခဲ့ရသော လင်းယုန်နှင့်အတူ ယှဥ်တွဲ၍တွေ့ရသော ဟိုကောင်မလေး ကို ဘာရယ်မဟုတ် မျက်လုံးထဲ မြင်ယောင်လာသည်။
ထိုခြံအတွက် စာချုပ်ချုပ်သည့်နေ့က နှုတ်ခမ်းပါးပါးလေးနှင့် ရန်တွေ့တတ်သော ကောင်မလေး၏ ဆံပင်တိုဝဲဝဲလေးတွေက ခုသူ အိမ်ဆောက်နေသည့်အချိန်မှာကို ရှည်လာခဲ့ပြီ ။ ဆံပင်လေးများကို နောက်ဘက်မှာ သူတို့အပ်ချုပ်ဆိုင်က တွေ့သည့်ပိတ်စအပိုလေးတွေနှင့် စု၍ဆွဲစည်းထားရာ ဟိုတစ်စလွတ် ဒီတစ်စလွတ် ကပိုကရိုလေးဖြစ်သည်။ အိမ်နေရင်း ဝရံတာမှာ စာကျက်လိုက် အိမ်အလုပ်လုပ်လိုက် အချုပ်အလုပ်တွေလုပ်လိုက်နှင့် နားချိန်သိပ်မထားဘဲ သူ့ဟာလေးနဲ့သူ ကြိုးစားနေရှာသူလေးပင် ။ ကောင်မလေး၏ အိမ်နေရင်း အခြယ်အသလွတ်သော ရုပ်လေးက ဝင်းမွတ်နေကာ အပြင်သွားလျှင်ကျတော့လည်း တမျိုး ကျော့ကျော့ရှင်းရှင်း ရှိလှသည်။
သူ့ပုံစံနှင့်သူဆို မဆိုးလှသော ကလေးမလေးဟု သူကောက်ချက်ချမိသော်လည်း လင်းယုန်နှင့်တော့ လုံးဝကိုမလိုက်ဖက်ဟုသူမြင်မိသည်။
ဆောက်လုပ်ရေးဆိုက်သို့ ခဏခဏ သွားကာ checking လိုက်ရသော သူ့ဘဝမှာလဲ မလွယ်ပါ ။ လင်းယုန်အကြောင်းစဥ်းစားရုံနှင့် သူ တော်တော်ကြီး စိတ်ပင်ပန်းရသည်။
"ဘာကိစ္စလဲ အန်တီမွန်"
အန်တီမွန်သည် မျက်နှာမသာမယာနှင့် စိတ်ညစ်နေသောရုပ်ဖြစ်နေသည်။ ဘာဖြစ်ပြန်ပြီလဲ သူစိတ်ထဲ ထင့်ကနဲ ဖြစ်သွားသည် ။
"လင်းယုန် အကြောင်းပဲ ရဲဇင်"
"ပြောပါဦး... "
ဘလက်ကော်ဖီခွက်ထဲ သံပုရာသီးကိုညှစ်ချနေရင်းက အန်တီမွန်ကို မျက်လုံးပင့်၍ ကြင်နာစွာမေးလိုက်သည်။ နာလန်ထအဖိုး နှင့် စာမေးပွဲဖြေခါနီး သား၏ကြားမှာ ယက်ကလည်ရိုက်နေသည်ဟု သူခန့်မှန်းလိုက်သည်။
YOU ARE READING
You Are My Angel: တောင်ပံရိုက်ခတ်ပျံသန်းလာသောအချစ်
Romanceငါက မရဘူး ငါချစ်တဲ့မိသားစု ငါ့ညီ ငါချစ်တဲ့သူငယ်ချင်းတွေဆို စိတ်ထဲအမြဲထည့်ထားမိတာ... အကောင်းဆုံးဖြစ်စေချင်တာ... အဆင်ပြေစေချင်တာ.. အချစ်ဆိုတာကိုမေ့နေခဲ့တဲ့အထိပဲ... (ရဲဇင်ယော်မြင့်) အချစ်ဆိုတာ ဘာကြီးလဲလို့မသိခင်ကို ကံဇာတ်ဆရာက ဒီဇာတ်လမ်းထဲ ဘယ်လို ထည့်ပ...
