بارت 2
ﺩﺧﻠﺖ ﻟﻠﻘﺎﻋﺔ ﺍﻧﻲ ﻭﺍﺳﻮ ﻧﺰﻋﺖ ﺍﻟﻌﺒﺎﻳﺔ ﻭﺭﺣﺖ ﻟﻐﺮﻓﺔ ﺗﺒﺪﻳﻞ ﺍﻟﻤﻼﺑﺲ ﺑﺎﻭﺕ ﻟﻔﺴﺘﺎﻧﻲ ﺑﺎﻟﻤﺮﺍﻳﻪ ﻗﺼﻴﺮ ﻳﻮﺻﻞ ﻟﻔﻮﮒ ﺭﻛﺒﻲ ﺑﺸﻮﻳﺔ ﻟﻮﻧﻪ ﻣﺎﺭﻭﻧﻲ ﻣﻦ ﻓﻮﮒ ﻋﺎﺭﻱ ﻭﺑﻲ ﺗﻌﻼﮔﺎﺕ ﺑﺎﻟﻤﺘﻦ ﻭﻫﻲ ﺿﻴﻘﺔ ﻭﻛﻠﻬﺔ ﺗﻠﻤﻊ ﻭﻛﺮﺳﺘﺎﻻﺕ ﻭﻣﻦ ﺟﻮﺓ ﺍﻟﺨﺼﺮ ﺷﻮﻳﺔ ﻣﻨﻔﻮﺷﺔ ﻛﻮﻟﺶ ﺣﻠﻮﺓ ﻋﻠﻴﺔ ﭼﻨﺖ ﻓﺎﺗﺤﺔ ﺷﻌﺮﻱ ﻭﻣﺴﺮﺣﺘﻪ ﻭﮔﺎﻟﺒﺘﻪ ﻟﻴﻮﺭﺓ ﻭﺧﺎﻟﺔ ﺷﻜﺎﻟﺔ ﻛﻮﻟﺶ ﺣﻠﻮﺓ ﻟﺸﻌﺮﻱ ﻭﺣﺎﻃﺔ ﻣﻜﻴﺎﺝ ﻧﺎﺭﻱ ﺑﺲ ﺧﻔﻴﻒ ﻳﻌﻨﻲ ﺍﻟﻮﺍﻧﻪ ﻧﺎﺭﻳﺔ ﺑﺲ ﻣﻮ ﻣﺒﺎﻟﻎ ﺑﻲ ﻭﻻﺑﺴﺔ ﻛﻌﺐ ﺍﺳﻮﺩ ﻛﻮﻟﺶ ﺣﻠﻮ ﻃﻠﻌﺖ ﻣﻦ ﻏﺮﻓﺔ ﺍﻟﺘﺒﺪﻳﻞ ﺑﻌﺪ ﻣﺎ ﺭﺗﺒﺖ ﻣﻜﻴﺎﺟﻲ ﻭﺭﺣﺖ ﻃﻠﻌﺖ ﻭﮔﻌﺪﺕ ﻋﻠﺔ ﺍﻟﻄﺎﻭﻟﺔ ﻭﺍﺳﻮ ﺗﺒﺎﻭﻋﻠﻲ ﺑﺎﻋﺠﺎﺏ ﻻﻥ ﭼﻨﺖ ﻃﺎﻟﻌﺔ ﺣﻠﻮﺓ ﺣﻴﻞ ﺿﻠﻴﻨﻪ ﻧﺒﺎﻭﻉ ﻋﻠﺔ ﺍﻟﻌﺮﻭﺳﺔ ﻭﺍﻟﻔﻌﺎﻟﻴﺎﺕ ﻗﺎﻃﻌﺖ ﺗﺄﻣﻠﻨﺔ ﻟﻠﻌﺮﺱ ﻣﺮﺓ ﮔﻌﺪﺕ ﻳﻤﻨﻪ ﻋﻠﺔ ﺍﻟﻄﺎﻭﻟﺔ : ﺍﻟﺴﻼﻡ ﻋﻠﻴﻜﻢ
ﺍﻧﻲ ﻭﺍﺳﻮ : ﻭﻋﻠﻴﻜﻢ ﺍﻟﺴﻼﻡ
ﺍﻟﻤﺮﺓ : ﺷﻠﻮﻧﭻ ﻋﻴﻨﻲ ﺍﺳﺮﺍﺀ
ﺍﺳﻮ ﺑﺪﻭﻥ ﻧﻔﺲ : ﺍﻟﺤﻤﺪﻟﻠﻪ ﻋﻠﺔ ﺍﻟﻠﻪ
ﺍﻟﻤﺮﺓ : ﻫﺎﻱ ﺍﻟﺤﻠﻮﺓ ﺷﺘﺼﻴﺮ ﻣﻨﭻ
ﺍﺳﻮ ﺑﺎﺑﺘﺴﺎﻣﻪ ﻣﺼﻄﻨﻌﻪ ﮔﻮﺓ ﺭﺳﻤﺘﻬﺔ : ﺑﻨﺘﻲ ﻭﺍﺧﺘﻲ ﺑﺤﺎﺭ
ﺍﻟﻤﺮﺓ ﻣﻌﺎﺟﺒﻬﺔ : ﻫﺎ ﻫﺎﻱ ﺑﺤﺎﺭ ﺍﻟﻠﻲ ﺭﺑﻴﺘﻮﻫﺔ ﺍﻧﺘﻲ ﻭﻣﺎﻫﺮ
ﺍﺳﻮ ﺑﻀﻴﻖ : ﺍﻱ ﺍﻡ ﺻﺎﺩﻕ
ﺍﻡ ﺻﺎﺩﻕ : ﺍﻟﻠﻬﻢ ﺻﻞ ﻋﻠﺔ ﻣﺤﻤﺪ ﻭﺍﻝ ﻣﺤﻤﺪ ﺻﻠﻮﺍﺕ ﻋﻴﻨﻲ ﺍﻟﺒﺎﺭﺩﺓ ﻋﻠﻴﻬﺔ ﺑﺲ ﻛﻮﻟﺶ ﺣﻠﻮﺓ
ﺍﺑﺘﺴﻤﺖ ﺍﻟﻬﺔ ﺑﺨﺠﻞ _ ﺷﻜﺮﺍ
ﺍﻡ ﺻﺎﺩﻕ : ﺷﮕﺪ ﻋﻤﺮﭺ
_ 22 ﺳﻨﻪ
ﺍﻡ ﺻﺎﺩﻕ : ﻫﺎ ﺣﻠﻮ ﺷﻨﻮ ﻣﻜﻤﻠﺔ ﺩﺭﺍﺳﺔ ﺑﺎﻟﻠﻪ
_ ﺧﺮﻳﺠﺔ ﺗﺮﺑﻴﺔ ﺭﻳﺎﺿﻴﺎﺕ ﻭﻣﻮﻇﻔﺔ ﺑﻘﺴﻢ ﺍﻟﺤﺎﺳﺒﺎﺕ
ﺍﻟﻤﺮﺓ : ﻫﺎ ﻣﺎﺷﺎﺀ ﺍﻟﻠﻪ ﺻﺪﻭﮒ ﺍﻧﺘﻲ ﻣﻮ ﻧﻔﺴﭻ ﺍﻟﻌﺮﻭﺱ ﺍﻟﻲ ﺗﺰﻭﺟﺖ ﮔﺒﻞ ﺳﻨﺘﻴﻦ
_ ﺍﻱ ﺧﺎﻟﺔ
ﺍﻡ ﺻﺎﺩﻕ : ﺷﻨﻮ ﻣﺼﺎﺭ ﻋﻨﺪﭺ ﻃﻔﻞ
ﺩﻧﮕﺖ ﺭﺍﺳﻲ ﻭﺍﺳﻮ ﺟﺎﻭﺑﺖ : ﻳﺎ ﺍﻡ ﺻﺎﺩﻕ ﻣﻨﻴﻦ ﻳﺼﻴﺮ ﺍﺫﺍ ﺯﻭﺟﻬﺔ ﻣﺎﺕ ﻭﻫﻲ ﻋﺮﻭﺳﺔ
ﺍﻡ ﺻﺎﺩﻕ ﺑﺘﻔﺎﺟﺊ : ﻳﺎﺍﺍ ﺷﻠﻮﻥ ﺍﻟﻠﻪ ﻳﺮﺣﻤﺔ
ﺩﻣﻌﺖ ﻋﻴﻮﻧﻲ ﻭﺣﭽﻴﺖ ﺑﺤﺰﻥ _ ﺍﻱ ﺧﺎﻟﺔ ﻭﺭﺓ ﺷﻬﺮﻳﻦ ﻣﻦ ﺯﻭﺍﺟﻨﻪ ﺻﺎﺭ ﺑﻲ ﺣﺎﺩﺙ ﻭﻣﺎﺕ
ﺍﻡ ﺻﺎﺩﻕ : ﻳﺎ ﻋﺬﺭﻳﻨﻲ ﻣﺎﺩﺭﻱ ﺍﻧﻲ ﺍﻟﻠﻪ ﻳﺮﺣﻤﺔ ﺧﻄﻴﺔ ﺑﻌﺪﺓ ﻋﺮﻳﺲ .... ﺯﻳﻦ ﻳﻤﺔ ﺍﻧﺘﻲ ﺗﺰﻭﺟﺘﻲ
_ ﻻ ﺧﺎﻟﺔ
ﺍﻡ ﺻﺎﺩﻕ : ﻫﺎ ﺷﻠﻮﻥ ﺣﺎﻇﺮﺓ ﻋﺮﺱ ﺍﺫﺍ ﺯﻭﺟﭻ ﻣﺎﺕ
ﺍﺳﻮ ﺑﻀﺤﻜﺔ : ﻫﻬﻪ ﺻﺎﺭﻟﺔ ﺳﻨﺘﻴﻦ ﻣﻦ ﻣﻴﺖ ﺍﻟﻠﻪ ﻳﺮﺣﻤﺔ ﺑﻌﺪ ﻗﺎﺑﻞ ﺗﻐﻠﻖ ﻋﻠﺔ ﻧﻔﺴﻬﺔ
ﺍﻡ ﺻﺎﺩﻕ : ﺍﻱ ﺍﻟﻤﻔﺮﻭﺽ ﺧﻤﺲ ﺳﻨﻴﻦ ﺗﻌﺰﻝ ﻧﻔﺴﻬﺔ ﻭﻣﺘﺤﭽﻲ ﻭﻳﺔ ﺭﺟﺎﻝ ﻭﺗﻠﺒﺲ ﺍﺳﻮﺩ
_ ﻟﻴﺶ ﻋﻮﺩ ﻫﻮ ﺣﺪﻱ ﻟﻠﻌﺪﺓ ﻟﻮ ﻟﻠﺴﻨﻪ
ﺍﻡ ﺻﺎﺩﻕ : ﻳﺎﺍﺍ ﻳﺎﺍﺍﺍ ﺷﻮﻑ ﻻ ﻋﻴﻨﻲ ﻻﺯﻡ ﺧﻤﺲ ﺳﻨﻴﻦ
ﮔﺎﻣﺖ ﺍﻟﻤﺮﺓ ﺗﻌﻮﺝ ﺑﺤﻠﮕﻬﺔ ﻭﻣﻌﺎﺟﺒﻬﺔ ﺻﻔﻨﺖ ﻋﻠﺔ ﺍﺳﻮ ﺍﻟﻤﺘﻔﺎﺟﺌﺔ ﻧﻔﺴﻲ
ﻋﺰﺓ ﻫﺎﻱ ﺷﺪﺗﺨﺮﻁ ﺧﻤﺲ ﺳﻨﻴﻦ ﻓﻮﮔﺎﻫﺔ ﺍﻭﻭﻱ ﻭﻳﻦ ﻋﺎﻳﺸﻴﻦ ﺍﺣﻨﻪ ﺷﻨﻮ ﺍﻻﺭﻣﻠﺔ ﺍﻟﺴﻮﺩﺍﺀ ﺻﺮﺕ
ﻣﺎﻫﺘﻤﻴﺖ ﻟﻜﻼﻣﻬﺔ ﻭﻫﻲ ﮔﻤﺖ ﻭﺗﻬﺰ ﺑﺎﻳﺪﻫﺔ ﻭﺗﺪﺭﺩﻡ ﺷﻔﺘﻬﺔ ﺭﺍﺣﺖ ﻳﻢ ﺍﻟﻨﺴﻮﺍﻥ ﻭﺗﺤﭽﻲ ﻭﺗﺎﺷﺮ ﻋﻠﻴﺔ
_ ﻣﻨﻮ ﻫﺎﻱ ﺍﺳﻮ
ﺍﺳﻮ : ﻫﺎﻱ ﺍﻡ ﺻﺎﺩﻕ ﺍﻗﺎﺭﺏ ﻣﺎﻫﺮ
ﺻﺮﺍﺣﺔ ﺍﺑﺪ ﻣﺎ ﺍﺭﺗﺎﺣﻴﺖ ﺍﻟﻬﺔ _ ﺍﻣﻤﻢ ، ﺍﺳﻮ ﺍﻧﻲ ﺣﻄﻠﻊ ﻫﻨﺎ ﻳﻢ ﺍﻟﻘﺎﻋﺔ ﺍﺷﻢ ﻫﻮﺓ ﻭﺍﺭﺟﻊ
ﺍﺳﻮ : ﻣﺎﺷﻲ ﺑﺲ ﻣﻮ ﺗﻄﻮﻟﻴﻦ
_ ﺍﻭﻛﻲ
ﻟﺒﺴﺖ ﻋﺒﺎﺗﻲ ﻭﺑﻮﺷﻴﺔ ﻻﻥ ﺑﺤﺴﺎﺏ ﺣﺎﻃﺔ ﻣﻜﻴﺎﺝ ﻃﻠﻌﺖ ﻭﺍﺧﺬﺕ ﻧﻔﺲ ﺍﻟﺼﺮﺍﺣﺔ ﻛﻮﻟﺸﻲ ﻣﺎ ﺍﺷﻮﻑ ﺍﺧﺮ ﺷﻲ ﺷﻠﺖ ﺍﻟﺒﻮﺷﻴﺔ ﻭﺧﻠﻴﺖ ﺑﺲ ﺍﻡ ﺍﻟﻌﻴﻮﻥ ﻭﺍﺑﺎﻭﻉ ﻟﻠﺴﻴﺎﺭﺍﺕ ﺍﻟﻠﻲ ﺩﻳﺘﺤﻀﺮﻥ ﻣﺎﻝ ﺍﻟﺰﻓﻪ ﻭﺍﻻﻏﺎﻧﻲ ﺻﺎﺧﺒﺔ ﻭﺍﻟﺮﮔﺺ ﺑﺎﻟﺸﺎﺭﻉ ﺩﺭﺕ ﻭﺟﻬﻲ ﻭﺍﺭﺗﻄﻤﺖ ﺑﻮﺍﺣﺪ
_ ﺍﻟﻌﻔﻮ
ﺷﺎﺏ : ﻫﺎﺍﺍ
ﺿﻞ ﺻﺎﻓﻦ ﻋﻠﺔ ﻋﻴﻮﻧﻲ ﻭﻣﺒﻬﻮﺕ ﺗﻀﺎﻳﻘﺖ ﻣﻦ ﻧﻈﺮﺍﺗﻪ
ﺭﺣﺖ ﻳﻤﻴﻦ ﻭﻫﻮ ﻫﻢ ﺭﺍﺡ ﻳﻤﻴﻦ ﺭﺣﺖ ﻳﺴﺎﺭ ﻭﻫﻢ ﻧﻔﺲ ﺍﻟﺤﺎﻟﺔ ﺗﻨﻬﺪﺕ ﺑﺘﻌﺐ
_ ﺍﺧﻲ ﺍﺭﻳﺪ ﺍﻋﺒﺮ ﺑﻼ ﺯﺣﻤﺔ ﻟﻴﺶ ﺗﻘﻄﻊ ﻋﻠﻴﺔ ﺍﻟﻄﺮﻳﻖ
ﺍﻡ ﺻﺎﺩﻕ ﻃﻠﻌﺖ ﻣﻦ ﺍﻟﻘﺎﻋﻪ ﻭ ﺷﻬﮕﺖ : ﻫـــﺊ ﻋﺰﺓ ﺑﻌﻴﻨﺞ ﻭﺍﻟﻠﻪ ﻋﺮﻓﺘﭻ ﻣﻮ ﺭﺍﺣﺔ ﺍﺭﻣﻠﺔ ﻭﺗﺘﺤﺎﺭﺷﻴﻦ ﺑﺎﻟﻮﻟﺪ
ﺑﺎﻭﻋﺘﻠﻬﺔ ﺑﺼﺪﻣﺔ ﻋﺰﺯﺯﺓ ﻫﺎﻱ ﺷﺪﺗﺤﭽﻲ ﻃﻠﻌﺖ ﻣﺮﺍﻗﺒﺘﻨﻲ _ ﺧﺎﻟﺔ ﺍﻧﺘﻲ ﺷﺪﺗﮕﻮﻟﻴﻦ
ﺍﻡ ﺻﺎﺩﻕ ﺑﺼﻴﺎﺡ : ﺍﻱ ﻣﻮﮔﻔﺔ ﺍﻟﻮﻟﺪ ﻭﺗﺤﭽﻴﻦ ﻭﻳﺎﺍﺍ
ﺍﻧﻲ ﺑﻌﺪ ﺍﺭﻳﺪ ﺍﺣﭽﻲ ﻟﺴﺎﻧﻲ ﺍﻧﺒﻠﻊ ﺑﺎﻭﻋﺖ ﻋﻠﺔ ﺍﻟﻮﻟﺪ ﺍﻟﻠﻲ ﻗﻄﻊ ﻋﻠﻴﺔ ﺍﻟﻄﺮﻳﻖ ﻭﻫﻮ ﻫﻢ ﻧﻔﺲ ﺣﺎﻟﺘﻲ ﺻﺎﻓﻦ ﻭﻣﺼﺪﻭﻡ ﺑﺲ ﻋﻠﻴﺔ
ﻭﺧﺮﺕ ﻣﻦ ﻳﻤﻬﻢ ﻭﺩﺧﻠﺖ ﻟﻠﻘﺎﻋﺔ ﻭﺭﺣﺖ ﻻﺳﻮ _ ﻋﻔﻴﺔ ﺍﺳﻮ ﺻﺎﺭﺕ ﻣﺸﻜﻠﺔ ... ﻭﺣﭽﻴﺘﻠﻬﺔ ﺍﻟﺼﺎﺭ
ﺍﺳﻮ : ﻋﺰﺯﺯﺓ ﻫﺴﺔ ﺷﻮﻥ ﺭﺍﺡ ﻧﺨﻠﺺ ﻭﻓﻮﮔﺎﻫﺔ ﻣﺎ ﻭﮔﻌﺘﻲ ﺍﻟﺔ ﺑﺎﻡ ﺻﺎﺩﻕ ﻫﺎﻱ ﻓﺪ ﻭﺣﺪﺓ ﺑﺲ ﺗﺴﻮﻱ ﻣﺸﺎﻛﻞ ﻋﻠﺔ ﺍﻗﻞ ﺷﻲ
ﺑﺎﻭﻋﺘﻠﻬﺔ ﺑﺘﺮﺟﻲ _ ﺍﺳﻮ ﻋﻔﻴﺔ ﺷﺴﻮﻱ
ﺍﺳﻮ : ﺍﻣﺸﻲ ﻧﺮﺟﻊ ﻟﻠﺒﻴﺖ ﺍﺣﺴﻦ ﺍﻟﻨﻪ
ﺍﻳﺪﺗﻬﺔ ﺑﺮﺃﻳﻬﺔ ﻭﺍﺷﻮﻑ ﺍﻡ ﺻﺎﺩﻕ ﺩﺧﻠﺖ ﻟﻠﻘﺎﻋﺔ ﻭﺗﺤﭽﻲ ﻭﻳﺔ ﺍﻟﻨﺴﻮﺍﻥ ﻭﻫﻨﺔ ﻳﺒﺎﻭﻋﻦ ﻋﻠﻴﺔ ﻭﻳﺬﺑﻦ ﺣﭽﻲ ﻋﻠﻴﺔ ﻋﻠﺒﻮ ﺍﻧﻲ ﺍﻡ ﺍﻟﻮﻟﺪ ﻋﻴﻮﻧﻲ ﺩﻣﻌﺖ ﺍﺧﺬﺕ ﻧﻔﺲ ﻗﻮﻱ ﺍﻛﺎﺑﺮ ﺣﺘﻪ ﻣﺎ ﺍﺑﭽﻲ ﻭﻃﻠﻌﻨﻪ ﻣﻦ ﺍﻟﻘﺎﻋﺔ ﻭﺭﺟﻌﻨﻪ ﻣﺎﻫﺮ ﻟﻠﺒﻴﺖ ﺩﺧﻠﻨﻪ ﻭﺍﺳﻮ ﻛﻮﻟﺶ ﻣﻌﺼﺒﺔ ﺍﺷﻮﻑ ﻣﺎﻫﺮ ﻳﺒﺎﻭﻋﻠﻬﺔ ﺑﻘﻠﻖ
ﻣﺎﻫﺮ : ﻟﻴﺶ ﺭﺟﻌﺘﻦ ﻣﻦ ﻭﻛﺖ ﺷﺒﻴﭽﻦ؟
ﺍﺳﻮ ﺑﻌﺼﺒﻴﺔ : ﺍﻧﻲ ﻣﺎ ﺍﺑﻘﺔ ﺑﻌﺮﺱ ﺍﻧﻬﺎﻥ ﺑﻲ
ﻣﺎﻫﺮ ﺑﻌﺪﻡ ﺍﺳﺘﻮﻋﺎﺏ ﻭﺑﻌﺪﻳﻦ ﺣﭽﺔ ﺑﺼﻮﺕ ﻋﺼﺒﻲ : ﺷﻨﻮ ﻟﻴﺶ ﺷﺼﺎﻳﺮ ﻭﻣﻨﻮ ﺍﻟﻬﺎﺍﺍﺍﺍﻧﭻ؟
ﺍﺳﻮ ﺑﻌﺼﺒﻴﺔ : ﺍﻡ ﺻﺎﺩﻕ ﻣﺘﻬﻤﺔ ﺑﺤﺎﺭ ﺑﺸﺮﻓﻬﺔ ﻣﺴﻮﻳﺘﻬﺔ ﻣﻮﮔﻔﺔ ﻭﻟﺪ ﻭﺗﺘﺤﺎﺭﺵ ﺑﻲ !
ﻣﺎﻫﺮ ﺑﺼﺪﻣﺔ : ﺷﻨﻮﻭﻭﻭ
ﺍﺳﻮ : ﻫﺴﺔ ﻛﻠﻬﺔ ﺗﺤﭽﻲ ﻋﻠﺔ ﺍﺧﺘﻲ ﻣﺎﻫﺮ ﺷﻮﻑ ﺣﻞ ﻣﺎﺧﻠﺖ ﻭﺍﺣﺪ ﻣﮕﺎﻟﺘﻠﺔ ﻭﻫﻲ ﻣﺘﻬﻤﺘﻬﺔ
ﻣﺎﻫﺮ ﺿﻞ ﺣﺎﻳﺮ ﻭﻣﻌﺼﺐ ﺑﺸﻜﻞ ﻓﻀﻴﻊ ﻃﻠﻊ ﺑﺮﺓ ﻭﻃﺒﮓ ﺍﻟﺒﺎﺏ ﻣﺎﻝ ﺍﻟﺒﻴﺖ ﺑﻌﺼﺒﻴﺔ
ﺩﻣﻮﻋﻲ ﻧﺰﻟﺖ ﻟﻴﺶ ﻫﻴﭻ ﻳﺤﭽﻮﻥ ﻋﻠﺔ ﺷﺮﻓﻲ ﻟﻴﺶ ﻫﻮ ﺷﻮﻳﺔ ﺍﻟﺸﺮﻑ ﺣﺘﻪ ﻳﺤﭽﻮﻥ ﺑﻲ ﺣﺴﺒﻴﻪ ﺍﻟﻠﻪ ﻭﻧﻌﻢ ﺍﻟﻮﻛﻴﻞ ﺑﻴﻬﻢ
ﺭﺣﺖ ﻟﻐﺮﻓﺘﻲ ﻭﺣﻀﻨﺖ ﻣﺨﺪﺗﻲ ﺍﺑﭽﻲ ﻋﻠﺔ ﺣﻈﻲ ﻳﻌﻨﻲ ﺍﻧﻲ ﺷﻨﻮ ﺫﻧﺒﻲ ﺍﺫﺍ ﺗﺮﻣﻠﺖ ﻭﺍﻧﻲ ﻋﺮﻭﺱ ﻗﺎﺑﻞ ﺑﻴﺪﻱ
ﻏﻔﻴﺖ ﺑﻤﻼﺑﺴﻲ ﻭﮔﻌﺪﺕ ﻭﺭﺍﺳﻲ ﻳﻮﺟﻌﻨﻲ ﺑﺪﻟﺖ ﻣﻼﺑﺴﻲ ﻟﺘﺮﺍﻙ ﺍﺳﻮﺩ ﻭﻭﺭﺩﻱ .. ﻏﺴﻠﺖ ﻭﺟﻬﻲ ﻣﻦ ﺍﻟﻤﻜﻴﺎﺝ ﻭﻋﻴﻮﻧﻲ ﻣﻮﺭﻣﺔ ﻣﻦ ﺍﻟﺒﭽﻲ ﻭﺑﻼﻋﻴﻤﻲ ﻣﺠﺮﺣﺔ
