تاجر السعادة

الجزء الثامن

 وقفنا الجزء اللى فات على الحفله بعد ما دياب مشى بسبب مكالمة ليندا ومن بعده احمد صقر وبعد كده فى حد بيحاول يخترق السيستم الامنى للحفله .... كل ده حصل وانا قاعد فى الحفله ومش عارف ايه تانى ممكن يحصل .... فجأه دخل عليا ابراهيم

ابراهيم : مالك يا سليم شكلك متوتر
انا : فى مشكله يا ابراهيم
ابراهيم : مشكلة ايه
انا : انا هقولك علشان لازم نلحق نتصرف قبل فوات الاوان
ابراهيم : خير انت قلقتنى
انا : فى حد بيحاول يخترق السيستم الامنى للحفله
ابراهيم : متخافش يا سليم السيستم اللى انتو شغالين بيه انا اللى مصممه ومفيش مخلوق يقدر يخترقه
انا : للأسف تم الاختراق ولو لاحظت ان الشبكه رجعت على تليفون احمد صقر معنى كده ان فعلا تم اختراق السيستم
ابراهيم : وانا قولتلك متخافش ..... انا هروح غرفة المراقبه وانت حاول تغطينى وانا هتصرف
انا : طب روح بسرعه

• ابراهيم سابنى وراح غرفة المراقبه وكان كريم والمهندس المسئول عن التأمين موجودين

ابراهيم : ايه اللى بيحصل بالظبط
المهندس : يافندم فى حد بيحاول يخترق السيستم وبالفعل السيستم وقع لمدة عشر دقايق وانا قدرت اسيطر عليه من تانى وشغلت السيستم الاحتياطى
ابراهيم : ازاى ده يحصل من غير ما تبلغنى
المهندس : مكانش ينفع اسيب مكانى لحظه واحده لان كده خطر وانا بعت حد يبلغ الاستاذ سليم
ابراهيم : طب قوم من مكانك وانا هتصرف وحسابى معاك بعدين
المهندس : اوامرك يا فندم
ابراهيم : قدرت تحدد مكان اللى بيحاول يخترق السيستم
المهندس : للأسف مقدرتش انا كان كل همى ارجع السيستم فى اسرع وقت ممكن
كريم : طب دلوقتى هنعمل ايه يا ابراهيم
ابراهيم : متقلقش يا كريم دى لعبتى وانا هعرف اوقعهم فى المصيده كويس
كريم : تفتكر ممكن يكون فى قنبله هنا فى القاعه
ابراهيم : ده شئ اكيد علشان كده بيحاولوا يخترقوا السيستم
كريم : بس مستحيل يكون فى قنبله فى القاعه
ابراهيم : مش شرط يكون فى القاعه ..... وارد يكون فى المطبخ او الحمام
كريم : انا هبعت الرجاله يفتشوا المطبخ والحمام
ابراهيم : ابعت الرجاله وانا هراجع الكاميرات واشوف ممكن الاقى القنبله فين

• قعد ابراهيم يقلب فى الكاميرات على امل يلاقى حاجه

المهندس : استنى يا فندم
ابراهيم : فى ايه
المهندس : بص كويس فى كاميرا الجراج
ابراهيم : مالها
المهندس : فى ضيفه دخلت ومعاها 3 عربيات بس لما خرجت كان معاها عربيتين بس ..... والعربيه الموجوده ده واحده منهم وانا متاكد
كريم : ورينى كده ..... دى عربيه من عربيات استر
ابراهيم : ابعت بسرعه حد من رجالتك يشوف العربيه دى ويكون معاه حد متخصص فى القنابل
كريم : انا هتحرك بنفسى وانت تابع السيستم كويس
ابراهيم : متخافش انا مركز معاهم كويس

• اخد كريم رجالته واتحرك ناحية الجراج .... قرب كريم من العربيه بحذر وفتح شنطتها بمنتهى الحذر وفعلا اتفاجئ بوجود قنبله حديثه

كريم : طلع فعلا فى قنبله تانيه غير بتاعة الصبح .... استر مش بتهزر
واحد من الجاردات : انا كلمت المتخصص ودقايق وهيكون موجود
كريم : مفيش وقت
الجارد : هتعمل ايه يا فندم
كريم : انا هبطلها بنفسى .... ابعد انت والرجاله
الجارد : بس كده خطر على حضرتك
كريم : نفذ الاوامر وابعد
الجارد : حاضر يا فندم

• من ناحيه تانيه عند ليندا وصلت المستشفى ودياب حصلها على هناك وكانت فى الاوضه مع الدكتور ومعاها مارى ..... اضطر دياب ينتظر لحد ما الدكتور خرج بعد ربع ساعه

دياب : خير يا دكتور طمنى
الدكتور : خير يا فندم اتطمن
دياب : ايه اللى حصل
الدكتور : تقريبا كان فى حد عاوز يخلص من البيبى
دياب : ازاى يعنى
الدكتور : واضح ان المدام شربت عصير وكان فى حاجه كده ..... بس من حسن الحظ انها شربت حته صغيره جدا والاحسن من كده انها رجعت قبل ما المفعول يشتغل بصوره اقوى
دياب : يعنى ليندا كويسه دلوقتى
الدكتور : متخافش هى كويسه والبيبى كمان كويس
دياب : الحمد لله
الدكتور : بس انا هضطر ابلغ الشرطه
دياب : اياك تفكر تعمل حاجه زى دى ساعتها انا ممكن ادفنك صاحى
الدكتور : بس يا فندم اللى عمل كده ممكن يكررها تانى
دياب : متخافش مش هيلحق يكررها تانى
الدكتور : اوامرك يا فندم
دياب : امشى انت دلوقتى وانا هدخلها
الدكتور : حاضر

• دخل دياب عند ليندا

دياب : حمد **** على سلامتك يا حبيبتى
ليندا : **** يسلمك يا حبيبى
دياب : ايه اللى حصل بالظبط
ليندا : بعد ما انت مشيت للحفله انا كنت جعانه وطلبت من سميره الشغاله تحضر العشاء وتطلعه الاوضه عندى .... يادوب اكلت ولسه هشرب العصير حسيت طعمه متغير قولت يمكن اكون بتوحم وسيبته بعدها بنص ساعه حسيت معدتى تعبانى وعاوزه ارجع دخلت الحمام وقعدت ارجع بس الوجع شغال ومش راضى يسكت ناديت على ماما واتصلت بالاسعاف بعد كده من كتر الوجع حسيت انى ممكن اموت واتصلت بيك بس كده ده كل اللى حصل
دياب : انا هعرف شغلى كويس مع اللى عمل كده
ليندا : هتعمل ايه
دياب : ارتاحى انتى بس ومتشغليش بالك
ليندا : انا هخرج امتى من المستشفى
دياب : شويه كده وهاخدك ونرجع
مارى : مين اللى عمل كده فى بنتى يا دياب
دياب : انا هعرف مين اللى عمل كده وساعتها هخليه يتمنى الموت من اللى هعمله فيه
ليندا : ابوس ايدك مش عاوزه اسمع الكلام ده منك
دياب : طب ارتاحى انتى بس

• من ناحيه تانيه عند استر والبيرت قاعدين فى العربيه ومعاهم المهندس بتاع الكمبيوتر اللى بيعطل السيستم

استر : ممكن تفهمنى ايه اللى حصل بالظبط
المهندس : انا قدرت اعطل السيستم بس للاسف هما كان عندهم سيستم احتياطى شغلوه بسرعه ودلوقتى بحاول اعطل فيه
استر : اخلص بسرعه
المهندس : انا بحاول يا فندم
البيرت : دياب طلع مش ساهل يا استر
استر : الفكره مش فى دياب ..... الفكره فى اللى بيشغلهم معاه ..... دياب بيشغل معاه ناس بتفهم لكن انا للأسف بشغل معايا بهايم
البيرت : انا قربت ايأس من اللى بيحصل فينا ده
استر : انا عمر ما اليأس عرف طريق لعقلى .... يا انا يا انت يا دياب وانا وراك والزمن طويل
المهندس : انا قدرت اخترق السيستم
استر : برافو ..... فجر القنبله بسرعه
المهندس : حاضر يا فندم
استر : ليه القنبله مافرقعتش
المهندس : مش عارف يا فندم
استر : جرب القنبله التانيه
المهندس : للأسف الاتنين مش شغالين
البيرت : الظاهر كده اتكشفنا لما اخترقنا السيستم فى المره الاولى
استر : طب اتحرك بسرعه قبل ما حد يحس بينا
البيرت : حاضر

• من ناحيه تانيه عند كريم والجاردات اللى معاه

كريم : كده تمام ..... تمت المهمه بنجاح
الجارد : الحمد لله بس كده كان ممكن تضحى بحياتك يافندم
كريم : متخافش عليا انا واخد فرقة مفرقعات
الجارد : حضرتك هنعمل ايه دلوقتى
كريم : خلاص الحفله تقريبا قربت تخلص ..... عاوزك تنتشر انت والرجاله فى المكان كويس
الجارد : حاضر يا فندم
كريم : انا رايح غرفة المراقبه

• طلع كريم غرفة المراقبه وكنت موجود انا وابراهيم

انا : ايه الاخبار يا كريم
كريم : متخافش يا فندم كل حاجه تحت السيطره
انا : العربيه دى بتاعة استر فعلا
كريم : للأسف ايوا
انا : يعنى قنبلتين فى نفس اليوم
كريم : هما الصهاينه كده لازم يبقى دايما عندهم اكتر من خطه وسيناريو
انا : الواحد خلاص قرف منهم
كريم : هنعمل ايه دلوقتى
انا : اتحرك زى الاتفاق بالظبط
كريم : بس احنا بنكشف الورق بتاعنا كده
انا : لازم يا كريم لكل فعل رد فعل .... وده انسب رد فعل للى حصل النهارده
كريم : حاضر يا سليم انا هسمع كلامك
انا : اتحرك انت دلوقتى وانا لازم ارجع الحفله علشان الوقت اتاخر والناس هتبدأ تمشى وانا لازم اكون موجود ..... وانت يا ابراهيم خليك هنا متتحركش ولو محمد صقر سأل عليك هقوله ان جالك تليفون واضطريت تستأذن
ابراهيم : طب تمام ... روح يا سليم
• كريم اتحرك وانا رجعت للحفله وقعدت تقريبا ساعه لحد ما كل الضيوف مشيوا والحفله خلصت وبعدها رجعت الفيلا

• من ناحيه تانيه عند استر قاعده فى الاستراحه وهتشيط من الغضب

استر : يعنى ايه كل ما نحفر حفره لدياب يخرج منها اقوى من الاول ولا كأن فى حاجه
البيرت : المعنى الوحيد للكلام ده ان دياب زارع جاسوس عندنا وبينقل كل تحركاتنا
استر : هو فعلا لمح لحاجه زى دى .... بس مين الجاسوس ده
البيرت : اكيد حد من الموجودين فى الاستراحه القديمه
استر : علشان كده قررت نتنقل للإستراحه دى
البيرت : يعنى مفيش حد يعرف مكان الاستراحه دى
استر : لا متقلقش مفيش اى حد يعرف المكان ده

• فجأه الباب خبط ودخل جارد من الجاردات

استر : خير فى ايه
الجارد : فى واحد بره عاوز يقابل حضرتك وبيقول ان فى معاد مع حضرتك
استر '' بخضه " : مين ده
الجارد : اسمه كريم ويبقى الحارس الشخصى بتاع مستر دياب
استر : انت متاكد
الجارد : ايوا يا فندم
استر : خليه يدخل بس من غير سلاح
الجارد : هو فعلا جاى من غير سلاح بس معاه هديه بيقول انها من مستر دياب
استر : خليه يدخل

• بعد ما خرج الجارد

البيرت : عرف الاستراحه دى ازاى
استر : وارد يكونوا مراقبينا ولا حاطين جهاز تجسس فى العربيه بتاعتى
البيرت : تفتكرى كريم جاى ليه وايه الهديه اللى معاه
استر : دلوقتى هنعرف

• دخل كريم

استر : خير يا كريم
كريم : اتفضلى يا فندم دى هديه باعتها مستر سليم ومستر دياب
استر : ايه الهديه دى
كريم : افتحيها يا فندم متخافيش مفيهاش حاجه خطر
استر : استر يعقوب مش بتخاف يا كريم
كريم : افتحى الهديه

• فتحت الهديه وكان فيها المتفجر بتاع القنبلتين

استر : ايه ده يا كريم
كريم : ده المتفجر بتاع القنبلتين اللى كانوا موجودين فى الحفله
استر : هى الحفله كان فيها قنابل
كريم : ايوا يا فندم وفى قنبله منهم كانت فى عربيتك .... دياب وسليم باعتين معايا رساله مهمه ليكى
استر : رسالة ايه
كريم : بيقولولك لما تلعبى ياريت تلعبى بشرف لان لو على الموت والقنابل هما يقدروا يقتلوكى فى لحظه
استر : افهم من كده انهم باعتين معاك تهديد
كريم : لا يا فندم التهديد وصل قبلى ..... انا واحد دخلت عندك من غير سلاح لان سلاحنا عندك
استر : يعنى ايه مش فاهمه
كريم : يعنى الكرسى اللى حضرتك قاعده عليه هتلاقى تحته قنبله

• قامت استر مفزوعه من على الكرسى

كريم : متخافيش دى قنبله ملهاش لازمه مش شغاله بس مستر دياب وسليم بيبلغوكى المره اللى جايه هتكون قنبله حقيقيه وساعتها ماتلوميش غير نفسك
استر : .......
كريم : عن اذنك امشى انا علشان مستر دياب منتظرنى
استر : امشى يا كريم
كريم : معلش نسيت حاجه
استر : نسيت ايه
كريم : مستر دياب بيقولك ياريت ماتغيريش مكانك كل شويه لانه برضه هيعرف المكان الجديد وهتلاقى الهديه مستياكى فيه قبل ما توصلى ..... هو بس خايف على تعبك
استر : امشى يا كريم بدل ما اقتلك
كريم : ههههههههههههه انا مقدر غضبك .... عن اذنك

• خرج كريم واستر اشتغلت تكسير فى كل حاجه تيجى قصادها

البيرت : اهدى يا استر
استر : ماتقوليش الكلمه ده علشان بتعصبنى
البيرت : حاضر بس لازم نفكر فى حاجات كتير اهم من التكسير والعصبيه بتاعتك
استر : سيبنى لوحدى يا البيرت دلوقتى
البيرت : حاضر هسيبك دلوقتى

• من ناحيه تانيه دياب وليندا خرجوا من المستشفى وراحوا الفيلا وبعدها كريم وصل الفيلا ..... وكانت ريهام وامل صقر موجودين

ريهام : حمد **** على سلامتك يا ليندا
ليندا : **** يسلمك يا ريهام
امل : خير يا دياب ايه اللى حصل
دياب : مفيش حاجه حصلت ده دلع حمل مش اكتر
امل : لو على الدلع مفيش مشكله
دياب : سميره فين
ريهام : عاوزها فى ايه
دياب : يا سميره ..... انتى يا زفت
ريهام : فهمنى بس ايه فى
دياب : قولتلك مفيش حاجه
ليندا : اهدى يا ادم
سميره : ايوا يا فندم
دياب : تعالى عاوزك .... يا كريم

• دخل كريم الفيلا

كريم : اوامرك يا فندم
دياب : خد البنت دى تحت فى البدروم لحد ما اجيلك
كريم : حاضر يا فندم
سميره : ليه يا باشا انا عملت ايه
دياب : هتعرفى دلوقتى ..... اخلص يا كريم اسبقنى وانا هحصلك
كريم : حاضر يا فندم

• كريم اخد سميره ونزل بيها البدروم

ريهام : فى ايه يا دياب هى عملت ايه
دياب : انا مش بحب اكرر كلامى ..... قولتلك مفيش حاجه
ريهام : انت ازاى بتكلمنى كده
مارى : معلش يا ريهام بس دياب كان قلقان على ليندا بعد اللى حصل النهارده
دياب : تعالى يا ليندا اطلعك اوضتك ترتاحى

• دياب اخد ليندا وطلع بيها الاوضه

ريهام : ايه اللى حصل بالظبط يا مارى
مارى : فى حد حاول يسقط ليندا
ريهام : مين ده وليه يعمل كده
مارى : لسه مش عارفين بس البنت سميره دى هى اللى ساعدت فى الموضوع ده علشان كده دياب عاوز يعرف منها مين اللى حرضها
ريهام : بس ده مايخلهوش يكلمنى بالطريقه دى
مارى : معلش يا بنتى اعذريه هو برضه خايف على ليندا
امل : طب استأذن انا علشان سايبه عمر لوحده فى البيت
مارى : اتفضلى يا مدام امل

• من ناحيه تانيه عند دياب وليندا

ليندا : هتعمل ايه يا دياب
دياب : انا مش دياب ..... انا ادم اللى بيعرف كويس ازاى يحاسب اللى بيغلط
ليندا : ارجوك سامحها
دياب : ادم مش بيعرف السماح ..... ولازم اعرف مين وراها
ليندا : دى بنت هبله وغلبانه .... علشان خاطرى اعرف مين وراها وسامحها .... ورحمة ابوك وامك سامحها
دياب : اعرف مين وراها الاول وبعد كده اقرر
ليندا : ارجوك يا حبيبى سامحها
دياب : ارتاحى انتى دلوقتى ..... ومن بكره فى حد جديد هيكون مسئول عن اكلك وشربك .... حد اقدر اثق فيه

• نزل دياب للبدروم وكانت سميره واقفه وحواليها كريم واتنين جاردات

سميره : ابوس رجلك يا باشا سامحنى
دياب : حلو ..... انتى كده قصرتى المسافه عليا ..... انا مستعد اسامحك واسيبك تمشى بس بشرط واحد
سميره : انا تحت امرك فى اى حاجه
دياب : مين اللى وراكى
سميره : .......

• طلع دياب المسدس وضرب طلقه فوق دماغ سميره

دياب : انا مش بحب اكرر السؤال مرتين .... الطلقه اللى فاتت كانت فوق دماغك لكن المره اللى جايه هتكون فى نص دماغك
سميره : ارجوك يا باشا مقدرش
دياب : افهم من كده انك مستعده تضحى بعمرك علشان تحمى اللى حرضك
سميره : ابوس رجلك يا باشا
دياب : ولا تبوسى ايدى ولا رجلى .... انا عرضت عرض محدد حياتك قصاد انك تقولى مين اللى حرضك
سميره : لو قولتلك مين اللى حرضنى هتقوم حرب
دياب : انا مش بحب الرغى الكتير ..... يا كريم
كريم : ايوه يا فندم
دياب : بعد عشر ثوانى البنت دى لو ما اعترفتش اقتلها
كريم : حاضر يا فندم
سميره : خلاص يا باشا انا هعترف على كل حاجه
دياب : مين اللى حرضك
سميره : امل هانم هى حرضتنى اعمل كده وادتنى 20 الف جنيه
دياب : امل صقر
سميره : ايوا يا باشا
دياب : انا كنت شاكك من الاول ان هى اللى وراكى .... خدها يا كريم دلوقتى احبسها فى مكان لحد ما اقولك تعمل ايه
كريم : حاضر يا فندم
سميره : ابوس رجلك يا باشا انا قولتلك كل حاجه
دياب : خدها يا كريم دلوقتى

• اخدها كريم ومشى

• طلع دياب من البدروم ودخل اوضة المكتب وقعد قصاد طرابيزة الشطرنج وبيبص عليها وبيلاعب نفسه وبيفكر ...... فجأه الباب خبط ودخلت ريهام

دياب : عاوزه ايه يا ريهام
ريهام : انت قاعد هنا ليه
دياب : بفكر فى حاجه
ريهام : انت عملت ايه مع سميره
دياب : قولتلك دى حاجه ماتخصكيش
ريهام : انت ليه بتعاملنى كده يا دياب
دياب : كده ازاى مش فاهم
ريهام : انت اتجوزتنى ليه يا دياب
دياب : اتجوزتك علشان حبيتك
ريهام : ولما انت بتحبنى ليه بتعمل فيا كده ..... انا ذنبى ايه فى اللى بينك وبين العيله
دياب : من يوم ما اتجوزتك وانا فاصل بين علاقتى بيكى وبين علاقتى بالعيله وعلى ما اظن انى ماضغطتش عليكى فى حاجه
ريهام : بس انا حاسه انك بتدبر لحاجه كبيره انا مش عارفه ايه هى بالظبط بس متاكده انها مصيبه بكل المقاييس
دياب : ياريت تقفلى كلام فى الموضوع ده
ريهام : ارجوك يا دياب اسمعنى
دياب : ارجوكى انتى اقفلى كلام فى الموضوع ده
ريهام : حاضر يا دياب هقفل كلام فى الموضوع ده دلوقتى علشان انت متضايق بس هنتكلم تانى بعدين

• فجأه دخلت ليندا

دياب : ايه اللى خلاكى تنزلى وانتى تعبانه
ليندا : انا هفضل تعبانه طول ما انت عامل فى نفسك كده
ريهام : تعالى يا ليندا شوفيه وهو بيموت نفسه بالبطئ
دياب : انا مش هموت نفسى ..... انا هموت كل اللى هيوقف فى طريقى .... ويلا انتوا الاتنين سيبونى واطلعوا على اوضكم عاوز اقعد لوحدى
ليندا : حاضر .... تعالى يا ريهام

• بعد ما طلعت ريهام وليندا .... طلع دياب تليفونه واتصل بطارق صقر اخو ريهام

طارق : الوووووو
دياب : معلش يا طارق صحيتك من النوم
طارق : خير يا دياب فى حاجه
دياب : عاوزك تركب اول طياره وتكون عندى بكره الصبح بالكتير
طارق : خير يا دياب فى ايه
دياب : مش هينفع الكلام فى التليفون
طارق : حاضر يا دياب انا هنزل القاهره فى اول طياره
دياب : اول ما توصل روح على فيلا اخوك وانا هجيلك هناك
طارق : شكلها كده فى مصيبه حصلت
دياب : بكره هتعرف كل حاجه ..... سلام دلوقتى
طارق : سلام يا دياب

• بعد ما قفل دياب مع طارق دخل عليه كريم

دياب : تعالى يا كريم انا كنت هطلبك دلوقتى
كريم : خير يا فندم
دياب : انسى الرسميات دى وكلمنى عادى زى اى اتنين اصحاب
كريم : مالك يا دياب فى ايه
دياب : انا مخنوق وحاسس انى عاوز اولع فى الكل
كريم : وبعدين معاك يا صاحبى
دياب : صدقنى يا كريم اللى انا فيه ده اكبر من قدراتى
كريم : عارف يا صاحبى
دياب : هى ليه امل صفر عاوزه تدمر كل الحلو اللى فى حياتى .... طب هى وابويا سابوا بعض وكل واحد شاف حياته ليه بقى مصره تدمر حياتى
كريم : يكفيك شر الست لما تكره او تتجرح ممكن تدمر اى شئ حتى لو كان اغلى حاجه عندها
دياب : هههههههه خبير انت فى الستات يا كريم
كريم : عيب عليك ده انت اكتر واحد عارف تاريخى
دياب : عندك حق فى دى ..... انت هتقولى على خبراتك فى الستات
كريم : انا حافظهم كويس وحافظ الاعيبهم وياما شوفت منهم
دياب : صحيح بالمناسبه انت ليه رافض فكرة الجواز
كريم : اللى زيى يا دياب لا ينفع يحب ولا يتجوز
دياب : ليه بتقول كده
كريم : اتجوز ليه واجيب لنفسى نقطة ضعف ممكن اى حد يمسكها عليا ..... اللى بيشتغل شغلنا ده لا يحب ولا يتجوز
دياب : ليه يا عم انت .... طب ما انا متجوز
كريم : واى حد عاوز ينتقم منك اول حاجه بيعملها بيدوس على مراتك ..... والدليل على كده اللى حصل النهارده مع ليندا واللى حصل قبل كده مع ريهام لما اتخطفت
دياب : عندك حق .... بس برضه مسيرك هتلاقى اللى توقعك وتحبها
كريم : لا من الناحيه دى ماتخافش انا حاطط قلبى فى فريزر
دياب : ماشى يا سيدى بكره نشوف ..... قولى عملت ايه عند استر
كريم : عملت كل اللى اتفقنا عليه
دياب : وايه كان رد فعلها
كريم : هبعتلك فيديو باللى حصل واحكم بنفسك
دياب : انت صورت المقابله
كريم : اكيد طبعا ..... اى حاجه بعملها لازم تتصور وتتوثق
دياب : ماشى يا سيدى
كريم : سيبك من الكلام ده وخلينا فى المهم
دياب : خير يا كريم
كريم : هتعمل ايه مع عيلة صقر
دياب : سيب الظروف بكره هى اللى تحكم
كريم : ياريت ماتورطش نفسك فى عداوه جديده
دياب : سيبها للظروف
كريم : ماشى يا دياب
دياب : سيبنى دلوقتى عاز اكمل جيم الشطرنج وافكر فى الحركه اللى جايه
كريم : جيم ايه .... دى طرابيزة شطرنج عليها جيش واحد بس
دياب : وفيها ايه دى
كريم : فين الجيش التانى اللى انت بتلاعبه
دياب : هى دى الصعوبه فى اللعبه بتاعتنا
كريم : صعوبة ايه مش فاهم
دياب : فى اى لعبة شطرنج عاديه بتتكون من جيشين بيلاعبوا بعض وكل واحد شايف التانى بيعمل ايه وبيتحرك ازاى
كريم : ده الطبيعى
دياب : فى لعبتنا بقى كل حاجه مختلفه ..... انت بتلعب بالجيش بتاعك لكن انت مش شايف اللى قصادك بيلعب ازاى ..... انت بتتفاجئ باللعبه بتاعته علشان كده اللعبه بتبقى اصعب
كريم : من امتى الفلسفه دى
دياب : من زمان اووووى بس انت اللى مش واخد بالك
كريم : ماشى يا دياب
دياب : طب يلا سيبنى دلوقتى افكر فى النقله الجديده
كريم : ماشى يا دياب ..... انا هخرج اتمم على الرجاله واشوف فى ايه

• بعد ما كريم خرج .... دياب طلع اوضته ونام

• من ناحيه تانيه فى فيلا احمد صقر ..... عمر صقر نايم وصحى على تليفون من طارق ابنه وامل كمان صحيت من النوم

عمر : خير يا طارق فى ايه
طارق : ايه اللى بيحصل عندكم
عمر : مفيش حاجه حصلت ..... ليه بتقول كده
طارق : امال دياب عاوزنى اسافر القاهره على اول طياره ليه
عمر : صدقنى يا بنى مفيش حاجه حصلت خالص
طارق : يعنى انتوا كويسين
عمر : اقسملك كلنا كويسين
طارق : على العموم انا هركب طيارة 6 الصبح واكون عندكم لما اشوف اخرتها مع دياب
عمر : تعالى يابنى بس زى ما قولتلك مفيش حاجه
طارق : طب سلام يا حاج
عمر : سلام يابنى

• بعد ما طارق قفل الخط

امل : فى ايه يا عمر
عمر : مش عارف فى ايه بالظبط ..... دياب اتصل بطارق وعاوزه يجى القاهره بكره الصبح
امل : ايه علاقة دياب بطارق اصلا ..... هو دياب هيستولى على عيالى ولا ايه
عمر : لأخر مره هسألك انتى عملتى حاجه لدياب
امل : هعمل ايه يعنى لدياب
عمر : اتمنى يكون كلامك صح وماتكونيش بتكدبى
امل : نام يا عمر احنا معانا سفر الصبح
عمر : لا انسى موضوع السفر ده ..... انا مش هسافر قبل ما اعرف ايه اللى بيحصل بالظبط
امل : براحتك
عم : يلا نامى

• تانى يوم الصبح طارق وصل القاهره .... اول ما دخل الفيلا كان الكل موجودين محمد صقر واحمد صقر وعمر وامل وفاتن وامانى وسليم

طارق : ممكن حد يفهمنى ايه اللى بيحصل
عمر : يابنى قولتلك مفيش حاجه حصلت انت ليه مش عاوز تصدقنى
طارق : يعنى دياب يكلمنى فى نص الليل وعاوزنى اجى القاهره كده على الفاضى

• فجأه دخل دياب ومعاه ريهام

دياب : لا مش على الفاضى يا طارق
عمر : فى ايه يا دياب
دياب : انا هفهمك كل حاجه يا عمى بس فى الاول عاوز اسألك كام سؤال
عمر : اتفضل اسأل
دياب : عمرك شوفت منى حاجه وحشه
عمر : لا يابنى
دياب : ابويا اللى كان فى يوم من الايام صاحبك عمره عمل معاك حاجه وحشه
عمر : ابوك كان بالنسبالى اخ مش مجرد ابن عمى
دياب : طب ليه مراتك مصممه تأذينى
عمر : عملتى ايه يا امل تانى
امل : انا معملتش حاجه
دياب : كدابه
طارق : امى عملت ايه يا دياب
دياب : امك مكفهاش انها حرمتنى من امى زمان لا دى جايه النهارده علشان تحرمنى من ابنى
طارق : ايه اللى انت بتقوله ده يا دياب
دياب : امك المحترمه حرضت الشغاله عندى انها تحط تركيبة اجهاض فى العصير لمراتى علشان تسقطها
طارق : انتى فعلا عملتى كده يا امى
امل : ده كداب
دياب : لا مش كداب وهثبتلك

• خرج دياب ورجع تانى معاه كريم وسميره اللى اول ما امل شافتها اتخضت

دياب : دى بقى الشغاله اللى قبضت من امك يا طارق علشان تحرمنى من ابنى
طارق : تعالى هنا يا بت انتى
سميره : ارجوك يا باشا سامحنى
طارق : فعلا امى حرضتك على المصيبه دى
سميره : ايوا يا باشا وادتنى 20 الف جنيه علشان اعمل كده
احمد : ليه كده يا امى
امل : دى بنت كدابه وعامله تمثيليه مع دياب
دياب : انتى لسه مصممه على الكدب .... يا كريم ارمى البنت دى فى الشارع مش عاوز اشوفها وتعالى تانى
كريم : حاضر يا فندم

• طرد كريم البنت ورجع تانى

دياب : انا جبتك يا طارق علشان تبقى شاهد على اللى هيحصل
طارق : هتعمل ايه يا دياب
دياب : من ناحية هعمل فهعمل كتير جدا
عمر : علشان خاطرى يابنى سامح المره دى وانا هاخد امل احبسها فى البيت ومش هتتعرضلك تانى
دياب : كان على عينى يا عمى بس انا عملتلك بدل الخاطر عشره وراعيت اللى بينك وبين ابويا لكن دلوقتى مش هينفع خلاص
احمد : هتعمل ايه يا دياب
دياب : امك استعجلت الحرب وانا موافق ..... من النهارده يا امل انا بهددك بشكل علنى وواضح انى هحول حياتك لجحيم ..... عاوزك من النهارده تدعى **** بحاجه واحده بس انه يقصر فى عمرك علشان تترحمى من العذاب اللى هتشوفيه على ايدى ...... انتى زمان حرمتينى من امى وامبارح كنتى عاوزه تحرمينى من ابنى ..... انا النهارده هدوقك من نفس كاس الحرمان
احمد : هتعمل ايه يا دياب
دياب : انت بالذات ملكش دعوه باللى هعمله علشان غضبى ما يطولكش .... من النهارده يا امل صقر انتى محرومه من بنتك مش هتشوفيها ولا تسمعى صوتها .... ده بقى بدايتى معاكى
ريهام : انت عاوز تحرمنى من اهلى يا دياب
دياب : لا طبعا ..... ابوكى واخواتك بس اللى مسمحولهم بزيارتك لكن امك تعتبريها ميته من النهارده
ريهام : لا طبعا انت اتجننت ..... دى امى
دياب : ده كلام نهائى ومن النهارده محدش ليه اى رأى فى اللى هعمله
ريهام : يبقى تطلقنى يا دياب
دياب : مش قبل ما اخد ابنى اللى فى بطنك بعدها اوعدك انى هطلقك لو عاوزه ..... مش هسيب ابنى يتربى وسطكم مهما حصل
ريهام : انت ازاى بالبشاعه دى
دياب : انتوا لسه ماشوفتوش حاجه
احمد : انت كده ذودتها يا دياب وانا اللى هوقفلك
دياب : وانا عاوزك توقفلى علشان ادمرك انت وعيلتك كلها
طارق : خلاص يا دياب اهدى وهنحل كل حاجه
دياب : امك قطعت كل حبال الود ..... اسمعونى كويس كلكم علشان انا استحملت منكم اللى مفيش بشر يقدر يستحمله ...... عاوزك يا عمى توصل رساله مهمه لعيال العاصى قولهم ساعتكم قربت واللى عملتوه فى امى زمان دياب راجع النهارده علشان يدفعكم تمنه
عمر : عملولك ايه كمان
دياب : لا عملوا كتير واسأل مراتك وهى تقولك عملوا ايه هى وسعد اخوها وعيال العاصى
عمر : عملتى ايه تانى يا زفت انتى
دياب : اسيبكم دلوقتى مع بعض تعرفوا هى عملت ايه بالظبط .... يلا يا ريهام
ريهام : انا مش همشى معاك
دياب : مش بمزاجك .... يلا قدامى اخلصى
ريهام : قولتلك مش همشى معاك
دياب : وانا قولتلك مش بمزاجك

• سحبها دياب من ايدها ولسه هيتحرك بيها .... قام احمد صقر علشان يمنعه

دياب : ابعد عن طريقى يا احمد
احمد : مش هبعد يا دياب .... دى برضه اختى اللى انا استأمنتك عليها
دياب : وانا مخونتش الامانه بالعكس الخيانه من عندكم ابعد عن طريقى علشان انت ماتندمش

• اتدخل كريم وبعد احمد صقر عن طريق دياب ..... دياب سحب ريهام واتحرك بيها ولسه هيخرج من باب الفيلا .... احمد صقر خرج مسدسه وضرب طلقه على دياب جات فى كتفه ووقع فى الارض ..... ريهام صرخت ونزلت على الارض بتحضن دياب وبتبكى .... عمر ومحمد مسكوا احمد واخدوا منه المسدس ..... كريم خرج مسدسه ولسه هيضرب بالنار دياب منعه

دياب : استنى يا كريم متعملش حاجه

• سليم جرى على دياب ودخل فى حضنه وهو بيعيط

دياب : متخافش عليا يا سليم انا كويس
سليم : مخافش عليك ازاى وانت مضروب بالنار وابويا هو اللى عمل كده
دياب : وقفنى يا سليم

• وقف دياب بمساعدة كريم وسليم وريهام

دياب : شايفه يا ريهام دول اهلك اللى انتى خايفه عليهم وبتدافعى عنهم .... معندهمش اى مانع يقتلونى ..... احمد اخوكى اللى حافظتله على ابنه وحميته من اخطار كتير معندوش مانع انه يقتلنى
ريهام : كفايه يا دياب
دياب : فعلا كفايه ..... اطلب يا كريم المستشفى بسرعه انا حاسس انى هيغمى عليا
كريم : يلا يا دياب
سليم : انا جاى معاك
دياب : لا يا سليم خليك هنا واسمع كلامى ..... وانتوا بقى يا عيلة صقر استحملوا بقى كل اللى جاى وعاوز دكر فيكم يعرف يوقف قصادى ...... يا كريم خد ريهام على الفيلا وممنوع اى حد فيهم مهما كان يشوفها غير سليم ..... واللى يفكر يقرب ناحية الفيلا اضربه بالرصاص فى مقتل
كريم : حاضر

• وقع دياب مغمى عليه ..... كريم شال دياب وطلع بيه على العربيه ودخل جاردات تانى اخدوا ريهام وطلعوا بيها على الفيلا

• اتحرك كريم بسرعه على المستشفى ودخل دياب على طول غرفة العمليات وفى ظرف نص ساعه كان الخبر انتشر

• مجرد ما كريم كلمنى وحكالى اللى حصل اتحركت انا كمان على المستشفى ولقيت ليندا موجوده هناك ومعاها ابوها وامها

انا : ايه اللى حصل يا ليندا
ليندا : معرفش يا سليم ..... ادم خرج مع ريهام وكريم بعدها بنص ساعه ريهام رجعت مع الجاردات بتعيط وعرفت ان ادم اتضرب بالنار وهو هنا فى المستشفى
انا : كريم فين
ليندا : مش عارفه راح فين من ساعة ما وصلت المستشفى وانا مش شايفاه
انا : اهدى انتى وكل حاجه هتخلص

• بعد نص ساعه دياب خرج من غرفة العمليات وجرينا على الدكتور

انا : طمنى يا دكتور
الدكتور : متقلقوش يا جماعه ده جرح بسيط يادوب الرصاصه جرحت كتفه مش اكتر
ليندا : يعنى هو كويس دلوقتى
الدكتور : كويس وزى الفل وهيخرج من الإفاقه دلوقتى
ليندا : **** يطمنك يا دكتور
الدكتور : عن اذنكم

• سابنا الدكتور ومشى وبعدها دخل علينا كريم

انا : كنت فين يا كريم
كريم : كنت بظبط الدنيا علشان محدش يبلغ الشرطه باللى حصل
انا : هو ايه اللى حصل بالظبط
كريم : احمد صقر ضرب دياب بالرصاص
انا : انت بتقول ايه ..... ليه احمد صقر يعمل كده
كريم : هحكيلك كل اللى حصل بالظبط ..... وحكى كريم كل اللى حصل
انا : دياب اتسرع فى اللى عمله
كريم : انا حاولت اهديه بس انت عارف دياب دماغه ناشفه
ليندا : مش مهم الكلام ده دلوقتى اهم حاجه اننا ناخد حذرنا الفتره اللى جايه خصوصا من عيلة صقر لانهم مش هيعدوها بالساهل خصوصا بعد تهديد دياب الصريح ليهم وحبس ريهام
كريم : انا هزود الحراسه الفتره اللى جايه على الفيلا والشركات
انا : نفذ فى اسرع وقت
كريم : متخافش انا عملت اتصلاتى وفى طقم حراسه جديد هيوصل من السفر فى خلال يومين
انا : تمام كده

• من ناحيه تانيه فى فيلا احمد صقر

عمر : ايه اللى انت عملته ده يا احمد
احمد : يعنى عاوز دياب يتحدانا بالطريقه دى كأننا عبيد عنده واسكت
عمر : وانت فاكر كده انك بتحل مشكله بالعكس انت كده عقدتها اكتر وبدأت حرب انت مش قدها مع ان احنا اللى غلطانين من البدايه
محمد : انا شايف يا عمى انك تروح لدياب وتستسمحه وتحاول تحل المشكله لانى شايف ان دياب بيعاملك معامله خاصه
عمر : دياب كان بيعاملنى معامله خاصه قبل ما مراتى تحاول تقتل ابنه وقبل ما ابنى يحاول يقتله هو شخصيا
محمد : لازم تحاول يا عمى ..... لو سكتنا واتفرجنا دياب هيدمر الكل
امل : انتوا عاملين اعتبار لدياب ولا كأنه سبع الرجال
عمر : انتى بالذات تخرسى خالص لانك انتى اللى شعللتى الحرب اللى ماصدقنا انها انطفت واستحملى بقى اللى جاى
امل : محدش يقدر يقرب منى ابدا انا مهما كنت امل صقر
عمر : ههههههه امال كنتى ساكته ليه لما دياب كان بيهددك وسطنا
امل : سكت علشان كنت فاكره نفسى وسط رجاله يقدروا يحمونى لكن للأسف طلعت مسنوده على حيطه مايله

• قام عمر وضرب امل بالقلم

عمر : احنا اللى حيطه مايله برضه ولا انتى اللى الغضب والكره بقى ماليكى
محمد : خلاص يا عمى كفايه خلينا فى اللى احنا يه دلوقتى
عمر : روح يا محمد المستشفى اعرف الاخبار وطمنى خلينا نشوف هنعمل ايه
محمد : حاضر يا عمى

• فجأه سليم نزل ومعاه شنطة هدومه

احمد : رايح فين يا سليم

• سليم ماشى ومش بيرد على احمد

عمر : رايح فين يا سليم
سليم : ماشى يا جدى
عمر : ماشى رايح فين
سليم : رايح بيت ابويا ولو احتاجت تشوفنى ابقى تعالى هناك
احمد : بتقول ايه يا زفت انت
سليم : عاوز ايه يا احمد
احمد : انا ابوك
سليم : كنت ابويا .... لكن من النهارده انت مش ابويا ولا اعرفك ..... كنت ابويا يوم ما قولتلك ابعد امل عن طريق دياب يا اما انا اللى هوقفلها لكن انت افتكرت انى بهزر .... كنت ابويا قبل ما تحاول تقتل دياب

• اتحرك سليم علشان يمشى واحمد اعترض طريقه

سليم : ارجوك ابعد عنى بدل ما اقتل نفسى وارتاح منكم ومن عمايلكم
عمر : ابعد يا احمد وسيب سليم
احمد : ايه اللى انت بتقوله يا ابويا
عمر : اسمع الكلام واخرس خالص ..... روح يا سليم دلوقتى ولينا كلام تانى مع بعض بعدين

• مشى سليم وساب الفيلا

عمر : مبسوطين دلوقتى ..... مبسوطه يا امل لما خسرتى بنتك وحفيدك ..... مبسوط يا احمد لما خسرت ابنك ..... بقالك سنين عاوز تبقى كبير العيله لكن طلعت اخيب من انك تبقى كبير بيتك ..... للاسف انتوا دخلتوا حرب مش قدها ولا هتعرفوا تصمدوا فيها ..... هتصمدوا فيها ازاى وانتوا ضعاف ..... واقفين قصاد واحد بقاله سنين وسنين بيخطط علشان ينتقم منكم وانتوا كان كل همكم تسيطروا على ناس ضعيفه ونسيتوا الاسد اللى اتظلم زمان وراجع ياخد حقه ..... راجع ياخد حقه منك يا امل انتى وعيال العاصى واخوكى ياترى عملتوا ايه تانى مخليه كده .... عملتوا ايه مخليه راجع عاوز ينهشكم بالطريقه دى
امل : .........
عمر : ساكته ليه يا امل ..... عملتى ايه فهمينى علشان اقدر اتصرف واحميكى
امل : مش عاوزه اتكلم
عمر : براحتك .... روح يا محمد شوف دياب وكلمنى
محمد : حاضر يا عمى
عمر : وانت يا احمد جهز نفسك علشان هتيجى معايا لدياب لازم نصفى كل حاجه النهارده
احمد : انا مش هروح لحد ودياب حسابه معايا عسير
عمر : هتفضل مغرور كده لحد امتى
احمد : دياب هو اللى بدأ الحرب مش انا ..... دياب هو اللى اخد ابنى منى .... من النهارده يستحمل اللى انا هعمله فيه
عمر : انت كده هتقلبها خراب
احمد : دياب هو اللى بدأ بالخراب مش انا ..... انا قعدت سنين بحاول اصلح فى غلط انا مليش اى ذنب فيه وبرضه ده ماشفعليش عنده فى اى حاجه وراجع علشان ينتقم منى
عمر : دياب مش راجع ينتقم منك ..... دياب راجع ينتقم من امك
احمد : وانا مش هسمحله يقرب من امى حتى لو اضطريت اقتله
عمر : ايه اللى انت بتقوله ده .... انت اتجننت خلاص والغرور صم ودانك وعمى عنيك
احمد : دياب هو اللى وصلنا للى احنا فيه ده ودلوقتى يا انا يا هو

• قام احمد وساب ابوه ومشى

• نرجع عندى فى المستشفى ..... دياب فاق ودخلتله مع ليندا وكريم

ليندا : حمد **** على سلامتك يا حبيبى
دياب : **** يسلمك يا حبيبتى
ليندا : ايه اللى انت عملته ده يا ادم
دياب : ارجوكى مش قادر اتكلم فى حاجه دلوقتى
ليندا : حاضر يا ادم هسكت دلوقتى بس لينا كلام مع بعض بعدين
دياب : ماشى يا ستى
انا : وبعدين معاك يا جدع انت هو كل كام يوم هتجرجرنا وراك فى المستشفيات
دياب : معلش يا صاحبى استحملنى انا عارف انى تعبتك معايا وسببتلك مشاكل كتير
انا : عيب عليك الكلام اللى انت بتقوله ده
دياب : طمنى يا كريم عملت ايه
كريم : نفذت اوامر حضرتك بالأمر الواحد
دياب : ايوا يعنى عملت ايه
كريم : وصلت مدام ريهام للفيلا وامرت الحرس انها ممنوعه من الخروج وممنوع اى حد من عيلة صقر مهما كان مين يشوفها ولا يقرب من الفيلا ولو اى حد فكر يدخل يضربوا عليه نار طبعا معادا سليم .... وفى رجاله راصدين احمد صقر
دياب : راصدين احمد صقر ليه
كريم : لازم اعمل علشان اعرف هو ناوى على ايه ولو حضرتك امرت ممكن اخلص عليه دلوقتى
دياب : انت اتجننت يا كريم .... ده احمد صقر ابن عمى وابو سليم وانا مش ممكن اعمله اى حاجه مهما عمل لانى هبقى بأذى سليم ابنى وعم عمر اللى عمره ما عملى اى حاجه وحشه
كريم : بس يا فندم
دياب : انتهى الكلام فى الموضوع ده ..... اتصل برجالتك وابعدهم عن احمد
كريم : حاضر يا فندم ..... بس على فكره سليم ساب الفيلا بتاعة احمد
دياب : سابها وراح فين
كريم : اخد شنطة هدومه وراح الفيلا عند حضرتك
دياب : اتجنن ده ولا ايه ازاى يعمل كده من غير اذنى
كريم : مش عارف بس الحرس بلغونى ان سليم راح الفيلا ومعاه شنطة هدوم
دياب : انا لازم اخرج من المستشفى دلوقتى
ليندا : تخرج فين انت مش شايف حالتك عامله ازاى
دياب : لازم اخرج الحق المصيبه اللى سليم عملها ..... سليم باللى عمله ده هيقوم حرب كبيره بينى وبين احمد صقر
انا : الحرب خلاص قامت واولها الرصاصه اللى خرجت من سلاح احمد صقر
دياب : انا حربى مش مع احمد صقر ومش هينفع احاربه وباللى عمله سليم هيخلى احمد صقر يفتكر انى غسلت دماغ ابنه علشان اخده منه
انا : انت لو خرجت دلوقتى ممكن يحصلك حاجه
دياب : متخافش عليا يا سليم يلا بينا

• غير دياب هدومه واتحركنا ...... انا رجعت الفيلا ودياب وليندا وكريم رجعوا بيتهم ..... دياب اول ما وصل جريت عليه ريهام وسليم واتطمنوا عليه

دياب : بعد اذنك يا ريهام انتى وليندا سيبونى مع سليم لوحدنا
ريهام : انا عاوزه اتكلم معاك يا دياب
دياب : بعدين يا ريهام هتكلم معاكى بس اهم حاجه دلوقتى اتكلم مع سليم
ريهام : حاضر يا دياب

• قعد دياب مع سليم

دياب : ممكن اعرف ايه اللى انت عملته ده
سليم : .......
دياب : ساكت ليه انطق
سليم : عاوزنى اشوف احمد صقر بيقتلك واقعد ساكت
دياب : ده ما اسمهوش احمد صقر .... ده اسمه ابوك ..... ابوك اللى بيحبك وبيخاف عليك
سليم : وانت كمان ابويا ومكانش ينفع اسيبك
دياب : كان ممكن تيجى تطمن عليا فى المستشفى او البيت لكن تسيب بيت ابوك ليه
سليم : اللى حصل كان صعب
دياب : اللى حصل مايخصكش وملكش علاقه بيه
سليم : ازاى مليش علاقه بيه
دياب : زى ما قولتلك كده .... انا وابوك مفيش اى حرب ما بينا .... حربى مع جدتك مش مع ابوك
سليم : بس
دياب : مفيش كلام تانى .... اطلع غير هدومك وهات شنطة هدومك انت لازم ترجع بيتك
سليم : يا دياب افهمنى
دياب : انت هتكسر كلامى
سليم : لا مش هكسر كلامك بس سيبنى على الاقل اقعد معاك كام يوم
دياب : اقعد معايا براحتك بس بعد ما تستأذن ابوك ولازم هو يوافق
سليم : وانت فاكر بعد اللى حصل النهارده ابويا هيوافق انى اجيلك ولا اقعد معاك تانى
دياب : تعالى معايا ولازم نصلح اللى انت عملته
سليم : حاضر

• خرج دياب وسليم وراحوا فيلا احمد صقر ..... مجرد ما دخلوا استقبلهم عمر صقر على الباب

عمر : حمد لله على السلامه يا دياب انا لسه كنت جايلك
دياب : **** يسلمك يا عمى ..... انا جايلك علشان فى غلط حصل وكان لازم الرد
عمر : جاى ليه يا دياب
دياب : احمد فين
عمر : موجود فوق .... انت عاوز منه ايه
دياب : متخافش يا عمى تارى مش معاك ولا مع ابنك .... انا عارف ان اللى عمله احمد كان ساعة غضب علشان كده مش هتكلم فيه .... وانا غيركم بعرف افصل كويس ومش هنتقم غير من اللى غلط وبس
عمر : انا عاوز اعرف ايه اللى جد وخلاك بالغل ده .... طب امل وعارف هى عملت معاك ايه لكن سعد وعمامك عملوا ايه علشان اللى بتفكر فيه ده
دياب : عملوا كتير اوووى بس سامحنى مش هقدر اقول عملوا ايه دلوقتى بس لما هنتقم منهم واجيبهم راكعين ممكن وقتها تسألهم هما عملوا ايه
عمر : انت ناوى على يا دياب
دياب : ناوى اوريهم جهنم على الارض .... انتقامى منهم بدأ وابواب جهنم اتفتحت عليهم بس هما مش واخدين بالهم
عمر : انت عملت ايه بالظبط
دياب : عملت كتير ولسه هعمل اكتر ..... هخليهم يمشوا فى الشارع زى المجانين من اللى هعمله فيهم ..... واول واحد هبدأ بيه هو العاصى
عمر : عاصى مين اللى هتبدأ بيه ..... العاصى مات من زمان
دياب : هو اه مات بس مش معنى كده انى مش هعرف اعاقبه
عمر : انت هتعمل ايه يا دياب
دياب : بعدين هتعرف ..... انا جاى دلوقتى علشان حاجه تانيه
عمر : جاى ليه يا دياب
دياب : جاى ارجع ابنكم .... انا حربى مش معاك يا عمى ولا مع حد من اولادك ..... انتوا ملكمش اى ذنب فى اللى حصل زمان وانا راجع احاسب اللى غلط واللى هيوقف بينى وبينهم هيحاسب معاهم ودى نصيحه ياريت تسمعها منى ..... انا بحبك علشان ابويا كان بيحبك وبيعتبرك اخوه وياما انت وقفت معاه علشان كده بعدتك انت وعيالك عن انتقامى بس لو دخلت نفسك فى الانتقام ده انا هنسى كل حاجه وغضبى هيطول الكل ..... بنتك موجوده فى الفيلا معززه مكرمه اى وقت تقدر تشوفها وتكلمها لكن امل ممنوعه نهائى من انها حتى تلمح خيالها
عمر : بس دى مهما كانت امها
دياب : ده اخر كلام عندى ..... عن اذنك يا عمى انا لازم ارجع الفيلا علشان ارتاح من الرصاصه اللى اخدتها من ابنك .... سلام

• بعد ما دياب مشى

عمر : عاوز اسألك على حاجه يا سليم بما انك اكتر واحد فينا عارف دياب وعاوزك تجاوبنى بصراحه
سليم : اتفضل ياجدى اسأل بس اوعدنى ان الكلام اللى هقولهولك يفضل سر بينى وبينك وميخرجش لأى حد مهمها كان مين
عمر : اوعدك ان اى كلام هتقوله هيفضل سر بينى وبينك
سليم : اتفضل اسأل
عمر : هو دياب كده من زمان وكان مخبى ولا ايه بالظبط
سليم : بالعكس يا جدى دياب مكانش فى اطيب منه بس اللى شافه فى الدنيا كان كتير ..... هو كان احيانا كتير يدخل اوضته ويقفل على نفسه بس كان بيخرج تانى وكأن مفيش اى حاجه ..... لحد قبل موضوع موته بكام شهر كده وقتها كنا فى امريكا وكنت بسمعه دايما بيتكلم كلام غريب وبيتكلم بالالغاز ..... وفى مره من المرات كان قاعد مع شخص فى المكتب وبيتكلموا وانا بالصدفه سمعت شوية كلام
عمر : كلام ايه ده
سليم : كان بيتكلم على اجهزة مخابرات ومنظمات ارهابيه وحاجات زى كده
عمر : : يعنى دياب بيشتغل مع اجهزة مخابرات
سليم : لا هو كان بيتكلم على المنظمه اللى كان فيها ابويا واللى قدر دياب يدمرها وينقذ ابويا منها
عمر : اه كده فهمت .... وبعدين ايه فى تانى
سليم : مفيش حاجه تانى .... بعدها انا سيبت دياب ورجعت اعيش معاكم تانى بعد قصة موته اللى عملها
عمر : طب ايه اللى خلاه يقلب على العيله بالطريقه الغريبه دى وواضح انه بقاله فتره بيخطط لكده
سليم : ........
عمر : ساكت ليه يا سليم
سليم : مش ساكت ولا حاجه
عمر : ايه اللى انت عارفه ومخبيه
سليم : انا مش عارف حاجه تانى
عمر : قولى يا سليم انت عارف ايه علشان الحق اوقف الحرب اللى هتقوم
سليم : ايه اللى حصل بالظبط انا معرفهوش ..... لكن اللى اعرفه ان الاسبوع اللى فات وقع فى ايد دياب مذكرات والده وبسببها كسر كل حاجه ودخل المستشفى ..... المذكرات دى اكيد دياب شاف فيها حاجه حولته بالشكل ده
عمر : المذكرات دى وصلت لدياب ازاى
سليم : معرفش بالظبط وصلته ازاى ..... كل اللى دياب قاله ليا يوم المستشفى ان وقع فى ايده مذكرات عمى عبدالرحمن
عمر : انا كده عرفت ايه اللى غير دياب بالشكل ده
سليم : انا جاوبتك يا جدى على كل حاجه اعرفها علشان تحاول تمنع الحرب لكن لو فكرت تستغل الكلام ده علشان توقف ضد دياب ساعتها انا اللى هخلص على الكل ومش هرحم حد ..... دياب عندى اغلى منكم كلكم واللى يفكر يقربله ساعتها هقتله بأيدى حتى لو كان ابويا نفسه
عمر : متخافش يا سليم على دياب انا عاوز احميه واحمى العيله
سليم : بالعكس انا مش خايف على دياب
عمر : امال ايه
سليم : انا خايف عليكم انتوا ..... محدش فيكم يقدر يوقف قصاد دياب ..... انا اكتر واحد فيكم عارف دياب وعارف هو بقدر يعمل ايه ..... صدقنى يا جدى فى اللى هقوله اللى هيفكر فيكم يدخل حرب مع دياب يبقى خسران وياريت يجهز كفنه من دلوقتى ..... ياريت تسمع نصيحتى

• فجأه دخلت عليهم امل صقر

امل : واضح ان دياب غسل مخك وسيطر عليه
سليم : ههههههههه انتى اكتر واحده صعبانه عليا يا جدتى
امل : صعبانه عليك ليه يا فالح
سليم : عيشتى سنين كتير فاكره نفسك قويه ومسيطره ومحدش يقدر عليكى لحد ما جالك الاسد اللى رعبك وخطف النوم من عنيكى وخلاكى عايشه فى رعب
امل : وانت جاى شمتان فيا يابن دياب ..... لا انسى لسه ماتخلقش اللى يرعب امل صقر او يهز شعره من راسها
سليم : اول مره تقوليلى يابن دياب ..... انتى فاكره ان دى حاجه وحشه بالنسبالى .... دياب فعلا ابويا زيه زى ابويا الحقيقى .... بحب الاتنين وبخاف عليهم اكتر من نفسى ..... ماتفتكريش انى هبقى فرحان لما اشوف الاتنين واقفين لبعض ..... لو ابويا انتصر على دياب هبقى انا الخسران ..... ولو دياب انتصر على ابويا هبقى برضه انا الخسران ..... يعنى انا الخسران فى كل الاحوال فاهمانى يا جدتى ولا قلبك المليان بالغل والكره عمى عنيكى عن الحقيقه
امل : حلوين الكلمتين اللى دياب حفظهملك دول ..... بس الكلمتين دول تضحك بيهم على حد غيرى
سليم : مش قولتلك قلبك الاسود عمى عنيكى عن الحقيقه ..... خليكى زى ما انتى حافظى على غرورك لحد ما تخسرى كل حاجه ..... عن اذنكم

• سابهم سليم وطلع اوضته

• من ناحيه تانيه عند دياب فى الفيلا قاعد مع ريهام

ريهام : عملت ايه يا دياب
دياب : رجعت سليم لبيته
ريهام : وانا
دياب : وانتى مالك ..... انتى قاعده فى بيتك
ريهام : يعنى انت خلاص قررت تحرمنى من امى
دياب : انا هخيرك والقرار قرارك ..... يا اما تختارينى انا يا تختارى امك
ريهام : الاختيارين اصعب من بعض
دياب : مش طالب منك رد دلوقتى فكرى براحتك واختارى بس خليكى عارفه عاقبة قرارك ده كويس
ريهام : انا اختارت خلاص
دياب : فكرى كويس بقولك
ريهام : وانا بقولك فكرت خلاص
دياب : وايه قرارك
ريهام : انا اختارت امى ..... امى اللى ربتنى طول عمرى ومقدرش ابدلها بأى حد مهما كان ..... هى اه فيها صفات وحشه كتير بس مقدرش اغيرها
دياب : براحتك يا ريهام انا مش هقدر اغصبك على حاجه ..... انتى هتفضلى هنا فى الفيلا معززه مكرمه لحد ما تولدى بعدها هطلقك وكل حقوقك هتوصلك لحد عندك
ريهام : وايه اللى يخلينى افضل هنا لحد الولاده ..... طلقنى من دلوقتى وانا مش عاوزه منك اى حقوق ومتنازله عن كل حاجه
دياب : انسى ان ابنى او بنتى يتربوا بعيد عنى
ريهام : انت كمان عاوز تحرمنى من ابنى او بنتى
دياب : لا طبعا مش هحرمك منهم بس تقدرى تيجى تزوريهم فى اى وقت تحبيه لكن تنسى خالص ان ابنى يتربى وسط عيله بتكره ابوه وخصوصا عيلتك مش هيتوصوا وهيشوهونى قصاد ابنى ..... لكن انا عمرى ما اعمل كده ..... ابنك هيكون فى الحفظ والصون تقدرى تزوريه فى اى وقت لكن عمرك ما هتاخديه
ريهام : انت جايب القسوه دى من فين
دياب : بعد كل ده وتقولى عليا قاسى ماشى يا ستى انا قاسى بس برضه ابنى هيعيش معايا
ريهام : ماتنساش انى دكتوره واعرف اسقط نفسى كويس والمحاوله مش هتفشل زى ما فشلت مع امى
دياب : براحتك بس ساعتها هتشوفى القسوه اللى بجد
ريهام : هتعمل ايه يعنى هتقتلنى ..... ياريت علشان ابقى ارتاحت
دياب : لا يا حبيبتى مش هقتلك انتى
ريهام "بخوف" : امال هتقتل مين
دياب : هقتل عيلتك كلها ..... ابوكى وامك واخواتك واى حد عزيز عليكى ..... لو فكرتى تحرمينى من ابنى هحرمك من كل حد انتى بتحبيه
ريهام : انت مجنون
دياب : وهو فين العقل فى اللى احنا عايشين فيه ..... احنا فى زمن الجنون
ريهام : انت خلاص بقيت سايق فيها ومحدش هامك
دياب : اللى شوفته منكم اكبر من قدرات اى حد
ريهام : اخويا وامى هيقتولوك
دياب : هههههههههه
ريهام : بتضحك ومش هامك
دياب : غبى اللى يهدد ميت بالقتل .... انا كده ولا كده ميت ومش باقى فى عمرى كتير علشان اخاف عليه ..... فى ناس كتير بتنام وتحلم بخبر موتى مفيهاش حاجه لما يزيدوا واحد ولا اتنين
ريهام : للدرجه دى بايع حياتك
دياب : حياتى بايعها من سنين وقبضت تمنها من زمان مش باقى غير رصاصة رحمه تريحنى ..... تصبحى على خير يا ريهام
ريهام : انت رايح فين وسايبنى
دياب : عاوز انام وارتاح
ريهام : يعنى هتسيبنى متعلقه كده
دياب : انا سايبك فى بيتك معززه مكرمه ولو احتجتى اى حاجه فى الف واحد يخدمك ويجيبلك اللى انتى محتاجاه لحد ما تولدى وتقومى بالسلامه وبعدها كل واحد هيروح لحاله

• قام دياب وساب ريهام وطلع اوضته علشان ينام ..... يادوب رمى جسمه على السرير ولسه هينام ظهرت قصاده جليله

دياب : جليله ؟!
جليله : ايوا جليله يا دياب
دياب : عاوزه ايه يا جليله
جليله : جايه احذرك من اللى بتفكر فيه
دياب : تحذيرك ملهوش لازمه
جليله : انا زمان قولتلك حاجه مهمه والظاهر انك نسيتها
دياب : حاجة ايه
جليله : قولتلك ان **** كان ساترها معاك علشان كنت مظلوم لكن لو عملت اللى بتفكر فيه هتبقى ظالم وساعتها استحمل العقاب
دياب : وانا مكتوب عليا افضل طول عمرى مظلوم
جليله : اللى فات ما يخصكش واللى ظلمك ربك هياخدلك حقك منه .... اقفل ابواب الماضى احسنلك وخليك ماشى فى طريق الخير
دياب : واسيب حق ابويا وامى
جليله : قولتلك ده مش اختصاصك ..... فى رب بيحاسب لكن انت من ****
دياب : **** مش هيرضى بالظلم اللى اتعرضتله
جليله : لو مصمم على اللى فى دماغك يبقى دى اخر مره هتشوفنى فيها بس قبل ما امشى هقولك حاجه مهمه وياريت تسمعها المره دى .... **** عوضك بخير كتير جدا علشان انت صبرت على الظلم لكن لو فكرت تعصى ارادة ربك ساعتها كل النعم اللى فى ايدك هتروح منك ويبقى تستاهل العقاب ..... سلام يا دياب

• فجأه جليله اختفت وسابت دياب فى حيرته

• من ناحيه تانيه استر قاعده فى مكتبها متعصبه ودخل عليها البيرت

استر : عاوز ايه يا البيرت مش قولتلك عاوزه اقعد لوحدى
البيرت : الاخبار اللى عندى ماتستناش
استر : اخبار ايه دى
البيرت : الحرب قامت خلاص
استر : حرب ايه اللى قامت
البيرت : الحرب بين دياب واحمد صقر
استر : احكيلى كل اللى حصل بالظبط
البيرت : امل صقر حاولت تسقط ليندا امبارح ..... وحكى البيرت كل اللى حصل فى الفيلا عند احمد صقر
استر : ........
البيرت : مالك ساكته ليه
استر : مش عارفه ..... حاسه انها تمثيليه تانى زى اللى عملوها قبل كده
البيرت : لا مش تمثيله وانا اتاكدت بنفسى ..... وفى رجاله من حرس دياب راصدين احمد صقر دلوقتى ..... وبعدين انا وانتى عارفين كويس ان دياب راجع ينتقم من العيله ومن امل صفر بالذات بس هو كان مستبعد احمد صقر من حربه لكن دلوقتى بعد ما احمد صقر وقف فى صف امه الوضع اتغير خصوصا بعد احساسه الدايم بسيطرة دياب على ابنه سليم
استر : انا عاوزه اشوف احمد صقر النهارده
البيرت : اشمعنا النهارده
استر : علشان الاجتماع مع دياب وسليم الجراح بكره
البيرت : هو دياب كلمك
استر : ايوه كلمنى وحدد المعاد بكره فى شركة الجراح
البيرت : انا هتصرف واجيبلك احمد صقر النهارده
استر : روح شوف هتعمل ايه بس ضرورى اقابل احمد صقر النهارده وخلى بالك من رجالة دياب اللى راصدين احمد صقر
البيرت : انا هتصرف

• من ناحيه تانيه فى فيلا احمد صقر ..... احمد قاعد ودخل عليه عمر صقر

عمر : قاعد لوحدك بتخطط لأيه
احمد : عاوز منى ايه يا ابويا
عمر : عاوز احميك من نفسك ومن اللى بتفكر فيه
احمد : وانت تعرف من فين اللى بفكر فيه
عمر : ابعد عن دياب يا احمد
احمد : دياب خلاص حفر قبره بأيده واخرته قربت
عمر : هتفضل طول عمرك غشيم ..... دياب لأخر لحظه عاوز يبعدك عن المشاكل والحروب بس انت اللى مش شايف قصادك
احمد : دياب هددنى وهدد امى بشكل واضح وصريح
عمر : الدنيا يا احمد علمتنى حاجه مهمه جدا وهى ان بيقول ما بيعملش واللى بيعمل ما بيقولش ..... دياب لو كان ناوى على اذى مكانش رجع ابنك وزعقله على اللى عمله .... مكانش سمحلنا نزور اختك تانى ..... دياب جواه حيره كبيره ونار هو بيحاول يطفيها ومش عارف لحد ما جات امك وبغبائها شعللتها من تانى ..... دياب كان ابتدى يسامح لكن تصرفاتكم معاه هى اللى بتزود النار
احمد : دياب من زمان بيفكر فى الانتقام وبيرتبله
عمر : لو كان بيفكر فى الانتقام مكانش اتجوز اختك وخلاها تحمل .... وفى حاجه مهمه جدا انت مش واخد بالك منها ..... دياب مش بيحب الدم ولا بيفكر فى قتل امك ..... دياب كبيره هيحرم امك من اختك ومش هيعمل اى حاجه تانى لأمك .... اما بالنسبه لعيال العاصى وخالك انا مش عارف عما عملوا ايه علشان ينتقم منهم
احمد : يبعد عن امى وبعدها يعمل اللى هو عاوزه ده شئ مايخصنيش
عمر : انا هتصرف فى الموضوع ده

• فجأه تليفون احمد رن ورد عليه

احمد : ايوا مين معايا ..... ايوا انا احمد صقر .... تقابلنى ليه ..... النهارده .... فين ...... هكون عندك فى المعاد

• قفل احمد الخط

عمر : خير مين بيكلمك
احمد : لا دى مكالمة شغل بخصوص مناقصه جديده داخلينها
عمر : انت هتخرج يعنى
احمد : ايوا خارج معايا معاد بخصوص المناقصه

• خرج احمد صقر من الفيلا وكان عربيات مستنيه بره الكمبوند .... نزل احمد صقر من عربيته وركب معاهم واتحركوا بيه لحد ما وصلوا الفيلا عند استر

استر : ازيك يا احمد
احمد : انتى مين وعاوزه ايه ..... وايه علاقتك باللى بينى وبين دياب
استر : فى مثل بيقول عدو عدوى يبقى صديقى
احمد : وفى مثل تانى بيقول انا وابن عمى على الغريب ودياب ده برغم المشاكل والخلافات اللى ما بينا يبقى ابن عمى وجوز اختى
استر : عندك حق فى دى ..... دياب يبقى ابن عمك اللى عاوز ينتقم من امك ..... ابن عمك اللى هيحرمكم من اختك .... ابن عمك اللى قدر يقصص ريشك بعد ما دمرلك المنظمه اللى كنت الملك بتاعها
احمد : المنظمه دى كانت بتتأمر عليا وعاوزين يخلصوا منى
استر : ومين اللى قالك الكلام ده مش دياب ..... دياب اللى خلص من خالك وسيطر على ابنك واخد اختك وعاوز ينتقم من امك وبضربك فى شغلك .... عيبك يا احمد انك مش شايف الصوره كويس
احمد : ........
استر : ساكت يعنى ..... ياترى ساكت علشان عارف ان كلامى صح ولا ايه بالظبط
احمد : انتى عاوزه ايه منى
استر : نحط ايدينا فى ايدين بعض ونوقف قصاد دياب .... ندمره وندمر شغله ساعتها هيبقى ضعيف ومش هيقدر يوقف قصادنا
احمد : انتى عاوزانى ادمر ابن عمى
استر : خلاص يا شاطر روح لأبن عمك علشان يدمرك
احمد : حتى لو وافقتك على اللى انتى بتقوليه ده ..... هنعمل كده ازاى
استر : هو ده الكلام الصح ..... احنا هنقعد مع بعض ونرتب كويس ودى هتبقى فرصه اخيره ليك بعد اللى عملته قبل كده ووقفت مع دياب ضددنا
احمد : قبل اى حاجه انا عاوز اعرف خالى فين
استر : خالك من بعد ما هربناه من السجن وخرجناه من مصر وصلتنا اتقطعت بيه
احمد : سافر فين
استر : سافر ايطاليا ومن بعدها احنا منعرفش حاجه عنه
احمد : تمام ..... اهم حاجه يبقى بعيد عن ايد دياب
استر : دياب خلاص نهايته قربت
احمد : موت لا
استر : موت دياب مش هدفنا ..... احنا هدفنا نخرجه بره السوق ونعرف مين اللى وراه ومقويه بالشكل ده
احمد : انا فى الاول كنت فاكر انه يادوب معاه قرشين وخلاص وشوية علاقات بسيطه بحكم شغله وعيشته فى امريكا لكن كل يوم بكتشف حاجات كتير ..... اهم حاجه انا لاحظتها علاقته بالحارس الشخصى بتاعه اللى اسمه كريم ..... العلاقه اللى بينهم تحسيها اكبر بكتير من مجرد حارس شخصى وواحد بيحرسه
استر : عندك حق فى دى انا برضه مستغربه العلاقه دى ..... وكريم ده عليه علامات استفهام كتيره
احمد : اهم حاجه دلوقتى نعرف ايه طبيعة العلاقه ما بينهم وساعتها هنعرف كل الحاجات اللى شاغله بالنا
استر : دى بداية الخيط اللى لازم نمشى وراه ..... وفى حاجه كمان محتاجين نعرفها
احمد : حاجة ايه دى
استر : من فتره دياب اختفى هو وليندا والمعلومات اللى قدرنا نوصلها انه كان فى ايطاليا ..... لازم نعرف هو كان بيعمل ايه فى ايطاليا
احمد : بس دياب مكانش فى ايطاليا اصلا ..... دياب قضى اخر يومين بس فى ايطاليا
استر : انت متاكد من الكلام ده
احمد : زى ما انا متاكد انك قاعده قصادى
استر : امال كان فين
احمد : دياب وليندا كانوا فى اسبانيا وانا شوفت صوره ليهم فى نفس وقت اختفائهم فى اسبانيا
استر : انت فاهم معنى كلامك ده ايه ..... كلامك ده معناه ان احنا ماشيين فى الطريق الغلط
احمد : انا متاكد من كلامى وعندى الدليل عليه
استر : طب كان بيعمل ايه فى اسبانيا
احمد : لما رجع قال انه كان بيفتح شغل جديد هناك ومضى عقود واتفاقيات هناك بس انا حاسس انه كان بيعمل حاجه تانيه خالص وموضوع الشغل ده ستاره لحاجه تانيه اكبر
استر : واضح اننا هنعيد الشغل اللى اتعمل فى ايطاليا من تانى
احمد : ده اكيد
استر : انا هتصرف فى الموضوع ده بس اهم حاجه دلوقتى انت تهدى اللعب مع دياب اليومين دول لحد ما نعرف هنتصرف ازاى
احمد : حاضر

• نرجع عندى تانى يوم الصبح بدرى صحيت واتحركت على الشركه وبعد شويه دياب وصل ..... اول ما دياب وصل شاف السكرتيره بتاعتى قاعده

دياب : مستر سليم وصل
السكرتيره : ايوا وصل يا فندم ومنتظر حضرتك
دياب : انا هدخل عنده دلوقتى وبعد اذنك انتى هتنزلى فى الدور اللى تحت لاننا هنفضى الدور ده كله دلوقتى وهيبقى تحت مسئولية الامن
السكرتيره : ازاى يا فندم الكلام ده ..... اكيد مستر سليم هيحتاجنى لان انا اللى بنظم مواعيده
دياب : انا عارف كويس بقولك ايه وعاوزك كمان تلغى كل مواعيد مستر سليم النهارده
السكرتيره : هو فعلا طلب منى الغى كل المواعيد اللى قبل الساعه 12 الضهر لكن باقى المواعيد مجابش سيرتها
دياب : وانا بقولك الغى باقى المواعيد لان احنا معانا شغل مهم النهارده
السكرتيره : انا اسفه يافندم بس لازم استأذن من مستر سليم الاول
دياب : زى ما تحبى اتفضلى ادخلى معايا واسأليه بنفسك
السكرتيره : طبعا هدخل

• دخل عليا دياب وكريم والسكرتيره

دياب : صباح الخير يا سليم
انا : صباح النور يا دياب .... ايه الهجوم المفاجئ ده
السكرتيره : مستر دياب طالب منى الغى باقى المواعيد اللى مع حضرتك النهارده
انا : ليه يا دياب كده ..... انا لغيت المواعيد اللى قبل الساعه 12 بس
دياب : احنا مش ضامنين هنخلص الشغل بتاعنا امتى ولا الضيوف اللى عندنا هيمشوا امتى
انا : خلاص يا منى اسمعى كلام مستر دياب والغى باقى المواعيد
السكرتيره : حاضر يا فندم ..... بس فى حاجه تانى انا مش فاهمهاها
انا : حاجة ايه دى اللى مش فاهماها
السكرتيره : مستر دياب طالب منى انزل الدور اللى تحت علشان عاوز يفضى الدور ده
انا : معلش انا نسبت ابلغك بالموضوع ده ..... فى ضيوف مهمين هيوصلوا ولازم نأمن الدور كويس .... والدور ده اصلا مفيش فيه اى حد غير مكتبى ومكتب مستر دياب ومكتب المتر شريف ..... والمتر شريف مسافر يعنى مش هنأثر على حد
السكرتيره : زى ما تحب حضرتك ..... انا هنزل تحت وافضى مكتبى

• بعد ما السكرتيره خرجت

دياب : اتحرك يا كريم زى ما فهمتك ..... مش عاوز اى يدخل علينا واول ما استر توصل انت عارف هتعمل ايه
كريم : متخافش يا فندم انا عارف هتصرف ازاى
دياب : طب يلا اتحرك

• بعد ما كريم خرج

دياب : ايه اخر الاخبار
انا : متقلقش انا مظبط كل الورق والعقود اللى هنمضيها مع استر النهارده
دياب : وعملت ايه مع الحكومه بخصوص المناقصه
انا : امبارح استلمنا الارض ومصطفى هناك دلوقتى ومعاه العمال علشان يبدأ الشغل
دياب : وعملت ايه مع البنك
انا : انا عملت اتصالاتى بالبنوك وظبطت معاهم كل حاجه وهيوفرولنا كل السيوله اللى احنا محتاجينها .... وعملت اتصالاتى مع مصانع الحديد والاسمنت والطوب والمحاجر وظبطت معاهم كل حاجه
دياب : كده كويس ...... مش عاوزين اى تأخير فى الشغل الحكايه مش ناقصه
انا : قولتلك متخافش من حاجه
دياب : انا مش خايف طول ما انت موجود ..... عمك كان عنده لما قال انك راجل وقد المسئوليه
انا : سيبك من الكلام ده وقولى مالك
دياب : مفيش حاجه بس مضغوط شويه
انا : فى حاجه حصلت مع ريهام
دياب : ريهام عملت اللى انت كنت متوقعه واختارت امها
انا : ده شئ طبيعى ومقدرش الومها على اختيارها
دياب : المصيبه ان انا كمان مش قادر الومها على اختيارها
انا : وهتعمل ايه دلوقتى
دياب : بعد ما تولد هاخد ابنى واطلقها وارجعها لأهلها معززه مكرمه زى ما اخدتها منهم
انا : هتاخد ابنها
دياب : امال عاوزنى اسيب ابنى لأمل صقر تربيه انت اتجننت يا سليم
انا : بس ازاى تحرم ريهام من ابنها
دياب : انا مش هحرمها من ابنها ولا حاجه ..... ابنها موجود واى وقت تحب تشوفه البيت مفتوح حتى لو حبت تشوفه كل يوم لكن ابنى مش هيسيب بيتى ويروح يعيش مع جدته اللى بتكرهنى ..... مش هغلط غلطة ابويا يوم ما سابنى عند خالى اللى كان عاوز يضبع مستقبلى
انا : خلاص يا دياب ماتزعلش نفسك ..... وبعدين انت معاك ليندا اللى بتحبك اكتر من روحها وانت كمان بتحبها وريهام مسيرها تعقل وترجع
دياب : اللى بيروح مش بيرجع يا سليم
انا : يعنى ايه مش فاهم
دياب : يعنى ريهام بالنسبالى ماتت فى نفس اللحظه اللى اختارت فيه امها وسابتنى والميت مش بيرجع تانى
انا : بس انت عارف من الاول انها هتختار امها
دياب : كنت بتمنى انها تختارنى ..... عارف وقتها كنت هعمل ايه
انا : كنت هتعمل ايه
دياب : مكنتش هحرمها منها ويمكن كنت اسامح امل علشان خاطر ريهام .... بس للأسف امل قدرت تنتصر عليا تانى وتاخد منى مراتى زى ما اخدت امى زمان
انا : يعنى انت كان ممكن تسامح امل صقر
دياب : اه كان ممكن اسامحها
انا : مش مصدقك
دياب : على فكره امل صقر ضحيه برضه ..... امل مكانتش تعرف ان امى مريضه يوم ما هددتها .... امل كانت مجبره بسبب اوامر العاصى ومجبره بسبب قلبها اللى اتكسر ...... امل بتنتقم انتقام اعمى مش عارفه هيوديها على فين
انا : طب انت ناوى على ايه مع امل صقر
دياب : هتصدقنى لو قولتلك مش عارف
انا : مصدقك وعارف الحيره اللى انت فيها وعلاجك عندى
دياب : دبرنى يا وزير
انا : انا هحكيلك حكايه وانت افهمها بدماغك
دياب : احكى يا فيلسوف زمانك
انا : زمان فى علماء كانوا بيعملوا تجربه على ضفدع ..... جابوا الضفدع ده وحطوه فى وعاء مليان مياه وحطوه على النار .... كل ما كانت المياه بتسخن الضفدع كان بيعدل درجة حرارة جسمه علشان يقدر يستحمل سخونة المياه .... لحد ما وصلت درجة المياه للغليان وقتها الضفدع مات ..... العلماء كانوا بيدرسوا سلوك الضفدع مع ارتفاع درجة الحراره .... الوعاء اللى فيه الضفدع كان مفتوح، ومع ذلك محاولش يقفز للخروج من الوعاء حتى في حال غليان الماء لحد ما مات .... كانت تجربة علمية وتوصل العلماء إلى أن الضفدع استخدم كل طاقته في معادلة درجة حرارته وتأقلمه مع المناخ اللى حواليه على الرغم من صعوبته، لحد ما وصل لدرجة أنه لم يتبقى عنده طاقة للتأقلم ، ولا حتى لإنقاذ نفسه .... واستنتجوا أن اللى قتل الضفدع مش الماء المغلي، ولكن إصرار الضفدع على أقلمة نفسه إلى حد أفقده الطاقة اللازمة لإنقاذ حياته ..... انت بقى عملت زى الضفدع بالظبط .... اتحطيت فى ظروف صعبه وبتحاول تأقلم نفسك عليها وتتعامل معاها مع ان قصادك الطريق اللى تقدر تهرب منه وتريح قلبك وعقلك بس انت رافض الحل ده
دياب : انت عاوزنى انسى كل اللى عملوه فيا وفى امى وابويا
انا : انا مقولتش انك تنسى ..... بس تفتكر انتقامك ده هيرجع ابوك وامك .... بالعكس ابوك وامك خلاص ماتوا وانت قولتها بنفسك ان اللى بيموت مش بيرجع تانى
دياب : على الاقل الانتقام هيريحنى
انا : وانت لما تخسر مراتك اللى بتحبها يبقى هترتاح ..... انت هتقنع نفسك انك مرتاح لكن من جواك هتحس بالعذاب
دياب : انت عاوزنى اعمل ايه يعنى
انا : لحد دلوقتى انت المظلوم لكن لو كملت فى طريقك ممكن تتحول لظالم وتظلم ناس ملهاش اى ذنب ..... سيب ربك يدبرها وياخدلك حقك ساعتها مش هتحس بأى تأنيب لضميرك ..... ولو ركزت كويس هتلاقى ان ربك بياخدلك حقك منهم كل يوم .... فى البدايه جدك اللى مات بعد عذاب المرض وتأنيب الضمير .... سعد اللى عايش هربان وقريب هيتقبض عليه ويتعدم ..... اعمامك اللى ماسكين فى بعض ومشاكلهم كترت بسبب الورث والاراضى والفلوس مش باقى غير انهم ياكلوا بعض ..... يعنى يا صاحبى **** بياخدلك حقك منهم من غير ما تتورط فى حاجه ..... ميزان ربك عادل وعمره ما يظلم
دياب : انت بتقول كده علشان محصلش معاك اللى حصلى
انا : ازاى بقى واللى حصل لعيلتى زمان تسميه ايه ...... عيلتى اللى سرقت فلوس جدى وشردت ابويا وعمى ..... ابويا اللى عاش فى الفقر بعد ما كان عايش فى العز ..... وعمى اللى اتغرب سنين كتير ..... شوف دلوقتى ايه اللى حصل
دياب : ايه اللى حصل يا فالح
انا : ابويا مات نضيف من غير ما ايده تتوسخ بالظلم ..... عمى **** كرمه وعمل كل الثروه اللى انت شايفها دى ..... وانا من بعد ما كنت واحد ملهوش لازمه واخرى اشتغل محاسب فى شركه زى دى بقيت رئيس مجلس ادارتها ومعايا ملايين ملهاش اخر وشركات كل يوم بتكبر ..... ومن ناحيه تانيه شوف ايه اللى حصل لعيلتى اللى سرقونا ..... خسروا تقريبا معظم الأراضى والفلوس اللى سرقوها لما حطوا ايدهم فى ايد عيلة صقر ده غير الاراضى اللى راحت منهم بوضع اليد ..... يعنى يا صاحبى كل حاجه رجعت فى مكانها الطبيعى تانى
دياب : معنى كلامك ان الواحد يتظلم ويسكت ..... ده الموت يبقى ارحم بكتير
انا : يبقى فهمت كلامى غلط
دياب : ازاى يعنى
انا : فى فرق ما بين انك تسكت على الظلم وانت ضعيف ومش قادر ترجع حقك وبين انك قادر ترجع حقك لكن سايب **** يرجعلك حقك علشان لو انت رجعته بأيدك هتظلم ناس ملهاش اى ذنب فى اللى حصل ..... فى حالتك انت قادر ترجع حقك بس هتظلم ناس كتير .... هتظلم ريهام واخواتها وهتظلم اولاد عمامك وهتظلم اولاد سعد وهتحول البلد كلها لخراب وقبل كل ده هتظلم نفسك لانك هتعيش طول عمرك تحاسب نفسك على الظلم اللى انت اتسببت فيه حتى لو كان من غير قصد وياريت بعد كل ده هتعرف ترجع ابوك وامك وتعوضهم ..... ابوك وامك مش مستنيين منك غير حاجه واحده بس وهى انك تعيش حياتك وتبقى مبسوط
دياب : .........
انا : ساكت ليه ..... كلامى مش عاجبك
دياب : بالعكس كلامك منطقى جدا
انا : وبعدين فى حاجه اهم بكتير من المشاكل التافهه دى اللى ممكن تضيع عمرك بسببها
دياب : حاجة ايه
انا : شغلنا يا دياب ..... الناس اللى متعلقه فى رقبتنا ..... القضيه اللى عاهدنا **** ان احنا ننصرها طول ما احنا عايشين
دياب : ايه اللى دخل شغلنا فى المشاكل الشخصيه
انا : مشاكلك الشخصيه ممكن تبقى نقطة ضعف ليك تقدر استر تستغلها ضدك ..... مشاكلك الشخصيه ممكن تدمر كل اللى احنا بنعمله ..... لو شغلنا نفسنا بانتقام ونزاعات ملهاش اى لازمه ممكن نخسر كل حاجه ولما نموت وربنا يسألك عملت اى فى القضيه اللى انت شايلها هترد وتقوله ايه ..... هتقول كنت مشغول بمشاكل شخصيه ..... اصحى يا دياب وفوق لروحك قبل ما السكينه تسرقك وتخسر كل اللى اتعمل طول السنين اللى فاتت بسبب انتقام اعمى
دياب : انت صاحب بجد يا سليم مش عارف من غيرك كنت هعمل ايه ..... انت فعلا لفت نظرى لحاجات كتير كانت غايبه عنى ولازم اصلح كل الغلط ده
انا : ايوا كده يا دياب ..... وبعدين اهم واحد يستحق الانتقام هو سعد صقر واحنا كده ولا كده مش هنسيبه ومجرد ما نخلص اللى بنعمله وقتها اعمل فيه كل اللى انت عاوزه
دياب : عندك حق ..... احنا نخلص اللى بنعمله وبعدها هعرف انتقم منه بمزاج
انا : كويس انك اقتنعت
دياب : انا هسمع كلامك ده واعمل صلح معاهم بس بشرط انت تحضر الصلح ده وتشهد على كل حاجه بنفسك لانى انا متاكد ان الغدر طبع فيهم ولو ده حصل انا مش هقولك انا هعمل فيهم ايه لان مفيش كلام هيقدر يوصف اللى هعمله فيهم
انا : وقتها انا مش هوقف فى طريق وساعتها يبقى معاك حق فى كل اللى هتعمله

• فجأه سمعنا صوت دوشه وزعيق بره

انا : ايه فى بره
دياب : مش عارف فى ايه تعالى نشوف بيحصل ايه

• خرجت مع دياب ولقيت هبه مديرة مكتبى وصاحبة لمياء بنت عمى بتتخانق مع كريم

انا : ايه فى يا هبه .... ايه فى يا كريم
هبه : كنت داخله لحضرتك والاستاذ بيقولى ممنوع علشان حضرتك بتشتغل
كريم : يا فندم انا كل اللى قولته تستنى شويه بسيطه لحد ما تخلص اجتماعك انت ومستر دياب بس هى اللى ما ادتنيش فرصه ودخلت فيا زى القطر
هبه : انا اللى زى القطر ولا انت اللى واقف زى الباب ومانعنى من الدخول ..... يا استاذ لازم تفهم حاجه مهمه انا هنا بشتغل مديرة مكتب مستر سليم وعاوزاه فى شغل مهم يعنى مش جايه العب
انا : اهدوا يا اخوانا مفيش مشاكل ولا حاجه ..... كريم مايقصدش يا هبه انتى بس فهمتى غلط ..... احنا فعلا مانعين اى حد يدخل علينا علشان بنخلص شغل مهم
هبه : واللى انا بعمله ده برضه شغل مهم مش بلعب انا
كريم : شوفت يا فندم دى عامله زى القطر ومش راضيه تتفاهم
دياب : يخرب عقلك يا كريم بقى حد يشبه القمر دى بالقطر ..... هى ممكن تكون عصبيه شوبه مش اكتر ..... اعتذرلها يا كريم على الجليطه بتاعتك
كريم : حاضر يا فندم ..... انا اسف يا استاذه
انا : خلاص يا هبه الراجل اعتذر
هبه : علشان خاطر حضرتك يافندم انا قبلت الاعتذار
انا : كده تمام ..... خير يا هبه كنتى عاوزانى فى شغل ايه بالظبط
هبه : المهندس مصطفى بعتلى الورق ده وطلب منى اخليك تمضيه فورا لانه لازم يتسلم للوزاره النهارده واى تأخير هتحصل مشاكل
انا : ورق ايه ده
هبه : ورق خاص بالمناقصه الجديده اللى الشركه داخلاها
انا : طب سيبى الورق انا هبص عليه وامضيه وابعتهولك
هبه : حاضر يا فندم .... عن اذنك
انا : اتفضلى

• اخدت الورق من هبه ودخلت المكتب مع دياب وكريم

دياب : بالراحه يا كريم البنت مش قدك
كريم : ايه ياعم البنت دى ..... دى عامله زى القطر
انا : ياعم هى مستعجله علشان الورق ده مهم
كريم : حتى لو كان مهم ..... فى طريقه للكلام انا مش بشتغل عندها
دياب : خلاص ياعم انت البنت ماتقصدش
كريم : ماشى يا دياب .... سيبكم من البت دى وخلينا فى المهم
انا : خير فى ايه
كريم : رجالتنا بلغونى ان استر اتحركت من المزرعه بتاعتها وفى طريقها علينا يعنى مش باقى غير نص ساعه وتوصل
انا : طب ايه اخبار الدنيا هنا
كريم : متخافوش كل حاجه تمام
انا : طب تمام .... معلش يا كريم هتعبك ..... ابعت الملف لهبه
كريم : حاضر يا فندم هبعته

• اخد كريم الملف وخرج وراح لهبه ..... خبط على باب مكتبها ودخل

هبه : عاوز ايه تانى
كريم : ايه يا ست انتى بالراحه علينا
هبه : اللهم طولك يا روح
كريم : خلاص يا ستى ماتتعصبيش عليا انا مش قدك
هبه : عاوز ايه
كريم : اول حاجه جاى اعتذرلك على المعامله الرخمه اللى عاملتك بيها
هبه : وانا كمان اسفه على العصبيه بتاعتى بس انا مضغوطه شويه
كريم : يعنى صافى يا لبن
هبه : حليب يا قشطه ..... خير كنت عاوز ايه تانى
كريم : جايبلك الملف ده علشان الشغل ..... انا كان ممكن ابعته مع اى حد بس قولت لازم اجى بنفسى علشان اعتذرلك
هبه : شكرا يا سيدى

• فجأه تليفون كريم رن ورد عليه بعدها بص لهبه

كريم : استأذن انا بقى
هبه : رايح فين
كريم : رايح اشوف شغلى واسيبك تشوفى شغلك
هبه : اتفضل

• وصلت استر الشركه وكريم وصلها لمكتبى واستقبلناها انا ودياب

استر : عارف يا سليم انا كنت مستنيه القعده دى قد ايه
انا : طبعا عارف خصوصا ان عمى كان رافض نهائى يشتغل معاكى
استر : مفيش حاجه بتدوم على حالها والعبره بالنهايه
انا : عندك حق العبره بالنهايه ...... انا عارف كويس انك بتحلمى تقعدى على الكرسى بتاعى وبتخططى لكده من بدرى بس دى حاجه مستحيله
استر : الحياه علمتنى ان مفيش حاجه مستحيله
انا : انتى قولتى من شويه العبره بالنهايه
استر : ماشى يا سليم
دياب : خلينا فى المهم دلوقتى علشان نخلص
استر : ماشى يا دياب ..... احنا اتفقنا على انى هشترى نسبة 10% من اسهم شركة الجراح وزيهم فى الشركه الجديده اللى كان افتتاحها من يومين وقصاد النسبه دى هنسمحلكم بالدخول فى سوق الماس وهنساعدكم انكم تاخدوا مناقصات كبيره
دياب : واحنا اتفقنا على كده مع سيرينا وديفيد فى امريكا
استر : بس انا شايفه ان النسبه اللى انت عارضها دى قليله جدا على المناقصات والشغل اللى احنا هنساعدكم فيه
دياب : بس ده كان اتفاقنا من الاول
استر : احنا هنغير حاجه بسيطه فى الاتفاق ده
دياب : حاجة ايه
استر : احنا عاوزين نسبه فى شركة الفهد الاسود
دياب : يبقى تنسى كل الاتفاقيات اللى حصلت وتتفضلى تمشى من غير ولا سهم واحد
استر : يبقى هتخسر شغلك فى الماس
دياب : اعتبرينا منسحبين من كل شغل الماس
استر : بسهوله كده تضحى بكل الشغل اللى انت عملته فى الماس
دياب : لا متقلقيش انا مش هضحى بأى حاجه
استر : مش فاهمه قصدك ايه
دياب : دى حاجه ما تخصكيش ..... شغلى وانا ادرى واحد بيه
انا : دلوقتى يا مدام استر قدامك حل من الاتنين ..... يا اما نكمل الاتفاق بتاعنا ..... او تنسى كل حاجه كأنها محصلتش
استر : موافقه
انا : موافقه نكمل ولا نلغى
استر : موافقه نكمل الاتفاق
انا : ما كان من الاول ايه لازمتها الحوارات دى
دياب : خلصونا علشان نمضى العقود ونتفق على الشغل هيكون ازاى فى الفتره اللى جايه
استر : انا جاهزه

• قعدنا اكتر من ساعتين اتفقنا فيهم على الشغل ومضينا العقود وبعد كده استر مشيت

انا : تفتكر استر هتعمل ايه دلوقتى
دياب : لسه مش عارف
انا : مش شايف انها غريبه شويه تتنازل عن طلبها فى شركة الفهد الاسود
دياب : هى جايه ومتاكده ان احنا هنرفض
انا : حتى لو كان زى ما بتقول دى حتى مفكرتش تضغط علينا نهائى
دياب : استر كانت عاوزه تتأكد من اهمية شركة الفهد الاسود بالنسبالنا وعاوزه كمان متخسرش العرض اللى بقالها سنين بتحلم بيه علشان كده مينفعش تضحى بيه ده غير انها اكيد هتحط خطه علشان تدخل شركة الفهد الاسود
انا : على العموم خلينا ماشيين فى طريقنا زى ما احنا لحد ما نشوف ايه هيحصل
دياب : عندك حق
انا : اهم حاجه دلوقتى نركز مع سعد صقر لانى متأكد ان استر هتستخدمه الفتره اللى جايه
دياب : متخافش من الناحيه دى ..... سعد صقر تحت عنينا طول الوقت لو دخل الحمام بعرف
انا : كده تمام
دياب : طب يلا بينا نمشى
انا : نمشى نروح فين
دياب : لازم نخلص موضوع العيله دلوقتى لأن اى تأخير مش فى صالحنا نهائى
انا : عندك حق ..... لازم نتحرك قبل ما استر تفوق من اللى حصل النهارده
دياب : طب يلا بينا ..... انت هترجع الفيلا وانا هروح اخد ريهام واطلع على فيلا احمد صقر ولما هحتاجك هتصل بيك
انا : انا مش شايف ان ليها لازمه احضر حاجه زى دى
دياب : ليه بتقول كده .... انت لازم تشهد على الكلام ده بنفسك
انا : انا شايف ان دى قعده عائليه ومينفعش اى غريب يحضرها
دياب : انت مش غريب يا سليم
انا : لا يا دياب انا غريب ومش من العيله والامور دى لازم تتم بينكم وبين بعض ..... وبعدين شهادتى هتفرق فى ايه لو كانوا ناويين على الغدر
دياب : زى ما تحب يا سليم ..... انا هروح اعمل اللى قولتلك عليه
انا : وانا هروح اخد مريم علشان نشوف تجهيزات الفرح
دياب : انتوا خلاص حددتوا المعاد
انا : ايوا خلاص بعد اسبوعين هنعمل الفرح فى الفيلا
دياب : الف مبروك يا صاحبى
انا : **** يبارك فيك

• اتحركنا انا ودياب وكل واحد رجع الفيلا بتاعته

• عند دياب فى الفيلا ..... مجرد ما وصل شاف ريهام وليندا قاعدين مع بعض ..... ريهام اول ما شافت دياب قامت علشان تدخل اوضتها

دياب : رايحه فين يا ريهام
ريهام : داخله اوضتى
دياب : روحى غيرى هدومك علشان خارجين
ريهام : خارجين فين
دياب : هتعرفى بعد ما تجهزى
ريهام : وانا مش هخرج من غير ما اعرف احنا رايحين على فين
دياب : هعمل اللى كنتوا عاوزينه
ريهام : ايه اللى احنا عاوزينه .... وبتتكلم بصيغة الجمع ليه
دياب : هعمل اللى انتى وليندا عاوزينه ..... هقفل باب المشاكل
ليندا : بتتكلم بجد يا ادم
دياب : انا خلاص تعبت من المشاكل ومش كل يوم هعمل عداوه جديده
ريهام : اول مره قلبى يرفض يصدقك
دياب : تعالى معايا وانا اخليكى تصدقى بنفسك
ريهام : حاضر يا دياب انا هاجى معاك واحاول اصدقك
دياب : وانتى كمان ياليندا اجهزى علشان لازم تيجى معانا
ليندا : حاضر يا حبيبى

• جهزت ريهام وليندا وخرجوا مع دياب وراحوا فيلا احمد صقر ..... عمر صقر اول ما شافهم استغرب وبقى مش فاهم

عمر : خير يا دياب جاى ليه تانى وعاوز ايه
دياب : احمد فين
عمر : احمد فى اوضته فوق
دياب : ياريت تقوله ينزل وكلم كمان محمد وطارق ..... عاوز الكل يحضر وياريت كمان مراتك تحضر القعده دى
عمر : ريحنى يا دياب وفهمنى انت بتفكر فى ايه
دياب : متخافش يا عمى انا جاى ومش ناوى على شر بالعكس اللى انا جاى علشانه هيفرحك
عمر : حاضر يا دياب ..... انا هجيبلك الكل

• فى خلال نص ساعه كان الكل موجودين

دياب : انا عارف ان كلكم مستغربين من وجودى هنا النهارده بعد اللى حصل امبارح ..... وكل واحد فيكم ببقول بينه وبين نفسه ايه الانسان اللى كل يوم برأى وكلمه .... وانا عازركم اصله مش طبيعى انى امبارح اهددكم والنهارده ارجع فى تهديدى ..... وعارف ومتاكد ان معظمكم مش هيصدقنى ..... بس انا جيت اقول كلمتين علشان اخلص ضميرى ..... انا ورثت من ابويا حاجه حلوه ووحشه فى نفس الوقت ..... ورثت منه طيبة القلب ..... اللى مانعنى عنكم حاجه واحده وهى قلبى ..... قلبى اللى اتعلق ببنتكم وحبها واتعلق بسليم وحبه
عمر : يعنى خلاص يا دياب هنقفل على الماضى
دياب : علشان خاطرك يا عمى انت وريهام وسليم هقفل على الماضى بس بشرط
احمد : وايه شروطك يا دياب باشا
دياب : بتتريق يا احمد ..... ماشى هعديهالك مع ان لولايا كان زمانك ميت بدل المره الف مره
عمر : اسكت يا احمد انا بس اللى هتكلم فى الموضوع ده ..... ايه شروطك يا دياب وانا هنفذها كلها من غير نقاش
دياب : على فكره شرطى ساهل مش صعب يا عمى ..... اول حاجه امل صقر ممنوعه من دخول بيتى بشكل نهائى ولما تحب تشوف بنتها يبقى تشوفها هنا عندكم .... لكن انت يا عمى مرحب بيك فى اى وقت تقدر تيجى بيتى وقت ما تحب تشوف بنتك
عمر : وايه الشرط التانى
دياب : مفيش شروط تانى يا عمى ..... انا كل اللى طالبه منكم تكفوا شركم عنى ..... انا عارف ان انتوا شايلين منى بالرغم انى لحد دلوقتى معملتش اى حاجه وحشه لحد فيكم وانتوا اللى طول عمركم ظالمينى ..... ظلمتونى وظلمتوا ابويا وامى
احمد : يعنى انت عاوز تقنعنى انك بسهوله هتنسى اللى حصل زمان
عمر : قولتلك يا احمد انا بس اللى هتكلم فى الموضوع ده
دياب : سيبه يا عمى يقول كل اللى عاوزه ..... لا يا احمد انا مش بسهوله هنسى اللى حصل
احمد : امال ايه سبب التغيير المفاجئ ده ومتقوليش حبك لريهام وسليم هو السبب
دياب : هما فعلا سبب بس مش كل الاسباب
احمد : وايه بقى باقى الاسباب
دياب : فى حد عزيز عليا قالى حاجه مهمه كانت غايبه عنى وبسببها رجعت فى انتقامى ..... قالى ان **** بيسترها معايا وبينجنى من اى مصيبه علشان مظلوم لكن لو نفذت انتقامى هبقى ظالم ووقتها استحق العقاب
عمر : عين العقل يابنى
دياب : انا جاى النهارده ومادد ايدى بالسلام واتمنى انى مابقاش غلطان
عمر : واحنا كمان مادين ايدينا بالسلام ومرحب برجوعك لينا يا ابن الغالى
دياب : فى حاجه اخيره عاوز اقولها قصادك يا عمى ولازم تشهد عليها بنفسك وتشهدى عليها انتى كمان يا ريهام علشان ابقى ريحت ضميرى منكم
عمر : حاجة ايه دى
دياب : انا جيت ومديت ايدى بالسلام وقفلت على الماضى علشان خاطركم ..... لكن لو حصل اى غدر من عندكم انا هفتح الماضى على الحاضر ومش هرحم حد ومش بس هنتقم من اللى هيغدر لا انا هنتقم من الكل هحرقكم كلكم مش هرحم لا كبير ولا صغير ومش هفرق بين راجل وست لعنتى هتطول الكل ومش هعمل حساب لأى مخلوق
احمد : انت جاى مادد ايدك بالسلام ولا جاى تهدد
دياب : لا طبعا جاى مادد ايدى بالسلام بس انا للأسف عارفكم كويس الغدر فى دمكم وانا لسه ماخفيتش من رصاصتك يا احمد اللى جات فى ضهرى
عمر : خلاص با دياب احنا قولنا نقفل على الماضى
دياب : انا فعلا قفلت على الماضى ودى كانت اخر حاجه هقولها عن الماضى
عمر : متخافش يا دياب ليك عليا محدش فى العيله يتعرضلك
دياب : اللى عايش حياتى ميعرفش معنى الخوف يا عمى .... عن اذنكم
عمر : رايح فين
دياب : معايا شغل مهم ولازم تمشى وهسيب ريهام دلوقتى عندكم بس بالليل ارجع الاقيها فى بيتى ..... فاهمانى يا ريهام
ريهام : حاضر يا دياب
عمر : استنى يا دياب نتغدى مع بعض
دياب : معلش يا عمى معايا شغل مهم وانا متاخر عليه خليها مره تانى
عمر : براحتك بابنى
دياب : يلا يا ليندا
ليندا : حاضر يا ادم

• خرج دياب وليندا من الفيلا

ليندا : انت راجع الشركه يا ادم
دياب : لا يا حبيبتى انا واخد باقى اليوم اجازه
ليندا : امال ليه قولتلهم معاك شغل
دياب : علشان انتى وحشتينى وقولت اخدك ونخرج نتغدى مع بعض فى مكان نغير جو
ليندا : بحبك يا ادم
دياب : بعشقك يا قلب ادم
ليندا : هتعزمنى فين
دياب : تحبى تروحى فين ..... النهارده انا ملكك
ليندا : اى مكان معاك هيبقى جنه ..... اختار انت
دياب : ماشى يا قمر

• مرت الايام بعد كده بشكل طبيعى جدا واتجوزت انا ومريم واخدت اجازه شهر من الشغل واخدتها وسافرنا واتفسحنا ..... ومر على جوازنا خمس شهور كاملين الشغل فيهم كان ماشى طبيعى والامور مستقره استقرار يقلق ومفيش اى مشكله

• فى يوم صحيت بدرى علشان اجهز لشغلى ومريم كانت نايمه وصحيت على صوتى وانا بجهز

انا : انا اسف يا حبيبتى صحيتك من غير قصد
مريم : هى الساعه كام دلوقتى
انا : الساعه 7
مريم : انت مفيش فايده فيك
انا : ليه بتقولى كده
مريم : يا حبيبى الوقت لسه بدرى على الشغل
انا : معلش بقى اتعودت من زمان اصحى بدرى
مريم : مش ناوى تاخد اجازه ولو يومين نغير فيهم جو
انا : انا عارف انى مقصر معاكى بس الدنيا مضغوطه شويه فى الشغل لكن اوعدك هحاول افضى نفسى يومين واخدك ونسافر نتفسح فى اى مكان انتى عاوزاه
مريم : ماشى يا سليم لما نشوف ..... انا بس حاسه بملل من قعدتى فى الفيلا اليوم كله
انا : حاولى تشغلى وقتك فى اى حاجه اليومين دول بس لحد ما اظبط اوضاعى
مريم : حاضر با حبيبى

• فجأه مريم داخت وكان هيغمى عليها

انا : مالك يا حبيبتى فى ايه
مريم : مفيش حاجه متقلقش بس انا لسه صاحيه ومش مركزه
انا : بس انا ملاحظ انك بتتعبى بزياده اليومين دول
مريم : ممكن يكون بسبب السهر وقلة النوم
انا : تحبى نروح المستشفى
مريم : مستشفى ايه يا سليم انت ناسى ان اختى دكتوره وعايشه معانا فى نفس البيت
انا : طب خليها تكشف عليكى
مريم : حاضر يا حبيبى
انا : طب انا خارج عاوزه حاجه منى قبل ما اخرج
مريم : انت هتتأخر فى الشغل
انا : مش عارف بس غالبا هرجع بدرى لان مفيش مواعيد كتير معايا النهارده
مريم : يعنى هترجع على الغداء
انا : مش عارف بس قبل ما اخلص هكلمك
مريم : طب ايه رائيك نخرج نتغدى مع بعض فى مكان
انا : لا غداء بره صعب بس انا عندى فكره احسن
مريم : فكرة ايه
انا : ممكن نخليها عشاء ..... احنا نروح سينما نتفرج على فيلم ونتعشى بعدها ايه رائيك
مريم : فكره حلوه يا حبيبى ..... خلاص انا هجهز نفسى
انا : طب انا همشى دلوقتى علشان اتاخرت .... يلا سلام
مريم : مع السلامه يا حبيبى

• خرجت من الفيلا وطلعت على الشركه وبعد شويه دياب وصل ودخل عليا المكتب ومعاه كريم

انا : دخلتكم انتوا الاتنين مع بعض مش مريحانى
دياب : ليه بتقول كده
انا : شكلها كده فى مشكله
كريم : بالعكس الدنيا هاديه خالص وده اللى قالقنى
انا : يا باى عليك يا اخى خليك متفائل
كريم : هحاول
انا : وبعدين انت ايه حكايتك مع هبه شايفك مركز معاها من بعد فرحى
كريم : ليه هى اشتكتلك فى حاجه
انا : لا خالص بس انا ملاحظ انك مركز معاها
كريم : لا عادى مفيش حاجه
دياب : كريم شكله وقع
كريم : انتوا الاتنين فاضيين وهتستلمونى معاكم
دياب : ياعم فكها شويه
كريم : سيبكم من الكلام الفاضى ده وخلينا فى المهم
انا : خير فى حاجه
كريم : فى اكتر من حاجه مش مريحانى
دياب : زى ايه
كريم : اول حاجه عيلة صقر مش عارف ليه مش مرتاح من ناحيتهم ..... حاسس كده انهم بيخططوا لحاجه
دياب : ايه اللى خلاك تقول كده
كريم : احمد صقر قابل اعمامك يا دياب اكتر من مره فى الفتره اللى فاتت وبطريقه ملفته للنظر
دياب : انا عارف ومتاكد انهم ناويين على غدر بس هعمل ايه انا بحاول احمى نفسى منهم على قد ما اقدر
كريم : فى حاجه تانى انا مش فاهمهما
دياب : حاجة ايه
كريم : احمد صقر راح اسوان الشهر اللى فات كتير وراح لبيت مهجور هناك .... كان بيروح يقعد هناك ساعه ولا ساعتين وبعدها يمشى
دياب : شكله كده بيدور على اثار وده مكان جديد بيعاينه
كريم : انا دورت وراء البيت ده اكتشفت انه بتاع احمد صقر وجده كتبله البيت ده من اكتر من 30 سنه
دياب : برضه انا مش شايفها غريبه ..... واحد وبيروح بيته مفيهاش حاجه يعنى
كريم : انا حاسس ان البيت ده فيه حاجه مهمه او بيقابل حد هناك
دياب : طب راقب البيت كويس لما نشوف اخرتها
كريم : انا عملت كده فعلا وفى ناس هناك دلوقتى عنيهم على البيت
انا : فى حاجه تانى مش مريحاك يا كريم
كريم : استر مطنشه سعد صقر ..... سعد بقاله كتير عاوز يقابلها والبيرت مفهمه انها مسافره ومش موجوده فى مصر ..... ده غير ان سعد حاول اكتر من مره يخطف سليم صقر لكن استر بتمنعه ..... معنى كده ان استر بترتب لحاجه بخصوص سليم
دياب : بترتب لأيه
كريم : مش عارف بس متهيألى انها حاجه بعيد عن القتل او الخطف
انا : امال ناويه على ايه يعنى
كريم : ده اللى مش قادر اعرفه
دياب : عاوزك تغير طقم الحرس اللى بيتابع سليم
كريم : انا عملت كده فعلا

• فجأه الباب خبط ودخلت هبه

هبه : صباح الخير يا مستر سليم ..... صباح الخير يا مستر دياب
انا ودياب : صباح الخير يا هبه
كريم : يعنى انا هواء قصادك مفيش صباح الخير يا كريم
هبه : انت لو صبرت كنت هصبح عليك
كريم : على العموم انا هطلع احسن منك واصبح عليكى الاول ..... صباح الخير يا استاذه هبه
انا : اتلم يا كريم بقى
هبه : سيبه يا مستر سليم انا هعرف اتصرف معاه كويس
كريم : ايه هتضربينى
هبه : لا يا خفيف بس انا ممكن افرج عليك الشركه كلها واقول انك بتعاكسنى
كريم : لا الطيب احسن
انا : كفايه لعب العيال ده ..... خير يا هبه كنتى عاوزه حاجه
هبه : ايوه يا فندم ..... الورق ده محتاج يتمضى دلوقتى
انا : طب سبيه هراجعه الاول وبعد كده امضيه وابعتهولك
هبه : تمام يا فندم .... عن اذنك
انا : اتفضلى يا هبه

• بعد ما هبه خرجت

انا : خف على البنت شويه يا كريم
دياب : يابنى لو عاجباك اوى كده اتجوزها
كريم : اه اتجوزها وماله مش عيب ..... اتجوزها علشان تموت
انا : ايه التشاؤم اللى انت فيه ده
كريم : هى دى الحقيقه ..... انا شخص حياتى مش ملكى وكل يوم فى مكان جديد ده غير الخطر اللى دايما عايش فيه
انا : احنا كلنا عايشين فى نفس الخطر اللى انت بتقول عليه لكن برضه حبينا واتجوزنا
كريم : ياريت نقفل كلام فى الموضوع ده ..... وخلينا فى شغلنا
دياب : خلاص براحتك اهرب زى ما انت عاوز
كريم : انا كلمت ابراهيم فى اسبانيا علشان يعمل سيستم امنى جديد وكمان نظبط الاجتماع بتاع اول الشهر
انا : الاجتماع المره دى هيكون فى اسبانيا ولا فين
كريم : لا مش هينفع فى اسبانيا لانى رصدت اكتر من واحد من رجالة استر موجودين فى اسبانيا
انا : وياترى دى صدفه ولا عرفوا حاجه
كريم : لسه مش عارف ..... علشان كده انا هخلى الاجتماع هنا فى مصر
دياب : بس كده خطر وممكن نتكشف
كريم : متقلقش انا هرتب كل حاجه
انا : وتفتكر الفهد الاسود هيوافق على الكلام ده
كريم : انا هتصرف واقنعه حتى لو اضطريت اسافرله بنفسى ..... فكره ان كل اجتماع نعمل حوار علشان نسافر بقت ملفته للنظر علشان كده لازم نغير نظام الاجتماعات
انا : خلاص زى ما تحب
دياب : طب حددت مكان الاجتماع
كريم : ايوا فى فيلا المقطم ..... الجماعه مجرد ما يوصلوا هاخدهم على هناك على طول ومش هيخرجوا من الفيلا غير على المطار
انا : كده تمام
كريم : طب اسيبكم تشوفوا شغلكم
انا : رايح فين
كريم : هروح اشوف الرجاله واتمم على الشغل
انا : طب وانت خارج ابعت الملف ده لهبه انا خلاص مضيته
كريم : هات يا سليم

• بعد ما كريم خرج

انا : مالك يا دياب سرحان فى ايه
دياب : حاسس ان فى حاجه مش مظبوطه بتحصل
انا : حاجه بخصوص الشغل ولا ايه بالظبط
دياب : كلها منفده على بعضها
انا : **** يستر ..... طمنى انت عامل ايه مع ريهام
دياب : لسه مش مصدقه انى اتصالحت مع اهلها وخايفه منى
انا : مع الايام هتصدق
دياب : تصدق ماتصدقش براحتها ..... انا وريهام علاقتنا كانت غلط من الاول والحكايه كلها مجرد وقت وكل واحد فينا هيروح لحاله
انا : ليه بتقول كده يا دياب .... انت وريهام بتحبوا بعض
دياب : الحب وحده مش كفايه ..... وبعدين فى حاجه بينا اتكسرت وصعب تتصلح
انا : بكره كل ده يتغير
دياب : طب اسيبك انا بقى
انا : رايح فين
دياب : هروح مكتبى معايا شغل هناك
انا : طب روح

• من ناحيه تانيه عند هبه قاعده على مكتبها ودخل عليها كريم

هبه : خير يا كريم عاوز حاجه
كريم : اتفضلى الملف ده باعتهولك مستر سليم بيقولك هو مضى على كل الورق
هبه : شكرا يا سيدى
كريم : العفو ..... عن اذنك
هبه : استنى انت رايح فين
كريم : رايح اشوف شغلى .... عاوزه حاجه حضرتك
هبه : اقعد يا كريم عاوزه اتكلم معاك
كريم : معلش مشغول فى حاجه ضرورى
هبه : انا بقولك اقعد عاوزه اتكلم معاك
كريم : ادى قعده ..... خير عاوزه ايه
هبه : مالك متغير كده ليه النهارده
كريم : عادى يمكن بسبب ضغط الشغل والمشاكل اللى الواحد بيشوفها
هبه : انت بتشتغل ايه يا كريم
كريم : مش فاهم السؤال
هبه : لا انت فاهمنى كويس
كريم : انا يا ستى بشتغل قائد الحرس بتاع مستر دياب وسليم
هبه : انت متأكد من الاجابه دى
كريم : ايه اللى يخليكى تشكى
هبه : علاقتك بسليم ومستر دياب علاقه غريبه اكبر من موضوع قائد حرس ..... على العموم ده شئ مش مهم بالنسبالى ..... انا كل اللى يهمنى اعرف مالك النهارده
كريم : زى ما قولتلك ضغط الشغل
هبه : انت على طول مضغوط فى الشغل بس برضه ده مش بيمنع انك تيجى وترخم عليا .... انت بقالك اكتر من خمس شهور لازم كل يوم ترخم عليا لكن النهارده انت شخص غريب
كريم : هقولك حاجه يمكن تريحك .... انا شخص حياتى مش ملكى ولازم كل حاجه اعملها تكون بحساب .... النفس اللى بتنفسه بحساب
هبه : ليه كل ده
كريم : علشان انتوا تعيشوا فى امان .... علشان تناموا مرتاحين
هبه : وحياتك انت فين
كريم : قولتلك حياتى مش ملكى .... انا اتنازلت عن حياتى من 15 سنه ومستنى اللحظه اللى تخلص فيها علشان ارتاح ..... عن اذنك انا لازم ارجع اشوف شغلى

• قام كريم وساب هبه سرحانه فى كلامه

• نرجع عندى انا كنت قاعد فى مكتبى بخلص شغل ودخل عليا دياب وباين على وشه علامات الزعر

انا : خير يا دياب فى ايه
دياب : مفيش خير خالص
انا : ايه اللى حصل
دياب : نص المبانى اللى خلصناها فى المناقصه وقعت وفى عمال كتير ماتت ده غير اللى اتصاب
انا : دى مصيبه سوده ..... مين السبب فى اللى حصل
دياب : .........

• ياترى ايه اللى هيحصل تانى ده بقى هنعرفه فى الجزء اللى جاى اشوفكم بخير