تاجر السعادة

الموسم الثاني ( الجزء الحادي عشر )

 
• وقفنا الجزء اللى فات لما كان سليم صقر قاعد عند مليكه وامها فى شقتهم

مليكه : امتى يا سليم هتقدر تواجه والدك وتخطبنى
سليم : المشكله مش فى والدى يا مليكه
مليكه : امال المشكله فين يا سليم
سليم : دلوقتى مش هقدر اقولك بس اكيد هيجى اليوم اللى هتعرفى فيه كل حاجه
مليكه : كل اللى عارفاه انى بحبك ومش قادره استغنى عنك
سليم : ولا انا اقدر استغنى عنك يا حبيبتى .... انتى بالنسبالى الدنيا كلها ومقدرش ابعد عنك
مليكه : بعشقك يا حبيبى

• فجاه ام مليكه ندهت عليها

مليكه : عن اذنك يا حبيبى اشوف ماما عاوزه ايه وارجعلك تانى
سليم : روحى يا حبيبتى

• قامت مليكه ودخلت الاوضع عند والدتها

مليكه : ايوا يا ماما
والدتها : ايه الاخبار
مليكه : كله تمام
والدتها : خدى البرفان ده اديه لسليم على اساس انه هديه منك وحاولى تخليه يجربه واهم حاجه انتى ماتشميش منه
مليكه : انا اخاف اعمل حاجه زى دى
والدتها : متخافيش وجمدى قلبك ..... مجرد ما يشم البرفان هيروح فى النوم بعدها هبعت رساله للجماعه وهما هيتصرفوا
مليكه : صدقينى يا ماما مش هعرف وهرتبك وهفضح الدنيا
والدتها : خلاص تعالى معايا وانا هتصرف

• خرجت مليكه ومامتها لسليم

سليم : ايه اللى اخرك يا مليكه
والدتها : ابدا يا حبيبى احنا كنا بندور على زجاجة البرفان اللى مليكه جابتهالك هديه بس كانت ضايعه ولقيناها
سليم : بمناسبة ايه
مليكه : من غير مناسبه يا حبيبى ..... وجودك معايا ده اجمل مناسبه
سليم : ماشى يا ستى مقبوله منك ..... ورينى البرفان ده كده
والدتها : افتحها وجربها هتعجبك
سليم : متاكد انها هتعجبنى بس مش وقته
والدتها : ليه كده يا سليم .... شكلها مش عاجباك
سليم : لا مش القصد بس علشان خاطر مليكه هجربها

• من ناحيه تانيه فى شركة الجراح ..... دياب قاعد مع المستشارين بتوعه بيحاول يلاقى حل للمصيبه بتاعة الاسهم

دياب : وبعدين فى المصيبه اللى احنا فيها
مستشار 1 : يافندم الاسهم بتاعتنا بتنهار بشكل جنونى بعد انتشار خبر دخول مستر سليم للمستشفى وانه فى غيبوبه
مستشار 2 : ده غير الاخبار اللى انتشرت عن اللى حصل فى مناقصة شركة المقاولات ..... الحكايه انتشرت فى السوق زى النار فى الهشيم ومن الصبح فى عملاء كتير بيهددوا بفسخ او على الاقل تجميد كل العقود اللى بينا لحد مايشوفوا اوضاع الشركه
دياب : الكلام اللى انتوا بتقولوه ده معناه ان احنا داخلين على مصيبه كبيره واقل حاجه ممكن تحصل هى افلاس الشركه
مستشار 1 : الامل الوحيد اللى قصادنا ان مستر سليم يقوم بالسلامه وقتها ممكن نلحق نعمل اى حاجه
دياب : وانت شايفنى ساحر علشان اقوم سليم من غيبوبه
مستشار 1 : انا فاهم كلام حضرتك كويس بس فعلا هو ده الحل الوحيد ..... احنا فى وضع خطير جدا ..... عارف حضرتك يعنى ايه شركه كبيره زى شركة الجراح يتقتل صاحبها وبعدها بأقل من سنه يتعرض ابن اخوه لمحاولة قتل ...... ابن اخوه اللى فى كلام كتير عنه ان هو اللى وراء قتل الدكتور سليم
دياب : بس سليم طلع براءه والناس كلها عارفه الحكايه دى
مستشار 1 : الناس مش كلها مصدقه موضوع البراءه وفى ناس كتير مقتنعه اقتناع تام ان سليم هو اللى وراء قتل عمه
دياب : طب من وجهة نظركم نتصرف ازاى دلوقتى
مستشار 2 : فى الظروف الطبيعيه كنت هقول لحضرتك نحرق شوية اسهم من عندنا علشان نقلل حجم الخساره ويمكن نقدر ننقذ الموقف بس برضه دى حركه مش مضمونه وممكن تقلب بالعكس وتسبب فى انهيار اكتر
دياب : انسى موضوع الاسهم ده نهائى طول ما انا عايش مش هسمح ببيع سهم واحد من اسهم الشركه
مستشار 2 : يبقى مفيش غير حل واحد
دياب : ايه الحل ده
مستشار 2 : نتعامل طبيعى جدا وكأن فى حاجه حصلت ..... الشركه مش مجرد رئيس مجلس اداره وبس لا الشركه اكبر من كده بكتير .... الشركه عباره عن عمال ودكاتره ومهندسين وتعاقدات ..... انا شايف ان احنا نمشى الشغل زى الاول واحسن ومع الوقت العملاء هيرجعوا يثقوا فينا من تانى والاسهم هتعمل تصحيح وترجع لمستواها الطبيعى من تانى
دياب : انا موافقك على الحل ده ..... مفيش قصادنا غير ان احنا نمشى الشغل
مستشار 1 : واتا شايف ان حضرتك لازم تكلم العملاء اللى عاوزين يفسخوا العقود وتحاول تتفاهم معاهم
دياب : ده اكبر غلط ممكن يحصل
مستشار 1 : ليه كده يا فندم
دياب : انا لو عملت كده هيحسوا انى ضعيف ووقتها هيستغلوا الموقف وده ممكن يضعف الشركه اكتر وممكن كمان يدمرنا ..... العملاء دول لازم يعرفوا هما بيتعاملوا مع مين
مستشار 1 : حضرتك ناوى على ايه
دياب : هتعرف دلوقتى