تاجر السعادة

الموسم الثاني ( الجزء التاسع )

• وقفنا الجزء اللى فات لما انا كنت قاعد فى مكتبى بخلص شغل ودخل عليا دياب وباين على وشه علامات الزعر

انا : خير يا دياب فى ايه
دياب : مفيش خير خالص
انا : ايه اللى حصل
دياب : فى قنبله انفجرت فى الموقع وتقريبا نص المبانى اللى خلصناها فى المناقصه وقعت وفى عمال كتير ماتت ده غير اللى اتصاب
انا : دى مصيبه سوده ..... مين السبب فى اللى حصل
دياب : .........
انا : انطق ساكت ليه
دياب : مش عارف واتمنى مايكونش اللى فى بالى
انا : مين اللى فى بالك
دياب : تعالى بينا نروح الموقع وبعدها نشوف هنعمل ايه
انا : يلا بينا

• اتحركت مع دياب على الموقع وكانت الشرطه هناك بتعاين وبيحققوا مع الموجودين

• بعد يوم طويل من التحقيقات روحنا المستشفى واتطمنا على العمال المحجوزين وبعدها رجعت الشركه تانى مع دياب وسبنا كريم علشان يعرف ايه اللى حصل بالظبط ..... بعدها بشويه وصل كريم الشركه

انا : وصلت لحاجه يا كريم
كريم : عرفت كل حاجه
انا : طب احكى كل حاجه بالتفصيل
كريم : فى واحد من العمال جيه النهارده فى معاده عادى جدا وكان معاه شنطه واشتغل عادى بعدها اتحجج بأنه تعبان ومشى وبعد ما مشى بنص ساعه القنبله انفجرت
انا : مين العامل ده
كريم : ده واحد من العمال الجداد اللى جبناهم علشان يساعدوا العمال اللى معانا
انا : قبضوا عليه
كريم : لا لسه محدش عارف طريقه حتى العنوان اللى فى البطاقه مضروب
انا : تفتكر مين اللى وراء الزفت ده
كريم : اكيد استر مفيش غيرها
دياب : لا مش استر
انا : امال مين
دياب : احمد صقر
انا : انت متاكد من كلامك
دياب : هو ده اللى لازم نتاكد منه
انا : وهنتأكد منه ازاى
دياب : اسمعنى يا كريم كويس فى اللى هطلبه منك
كريم : عاوز ايه يا دياب
دياب : عاوزك تزود المراقبه على احمد صقر ..... وعاوزك تقلب الدنيا على العامل ده
كريم : رجالتى قالبين عليه الدنيا ومفيش حد فيهم هينام غير لما نوصل للزفت ده .... بس ايه اللى يخليك تشك فى احمد صقر مش استر او حتى سعد
دياب : علشان احمد صقر محروق ان المناقصه ضاعت منه .... وشخص فى غرور احمد صقر ممكن يعمل اى حاجه علشان ينتقم ..... تقول ايه بقى العرق يمد لسابع جد .... احمد ورث الغل والكره من امه وخاله وجده
انا : طب لو كان احمد صقر هو اللى وراء الحكايه دى انت هتعمل ايه
دياب : يبقى كده الصلح انتهى ومش هعمل حاجه غير انى انتقم منهم وادمرهم واخسرهم كل حاجه حتى لو بعدها اموت معنديش اى مانع
انا : لا سيب الموضوع ده عليا وانا هتصرف مع احمد صقر بنفسى
دياب : هتعمل ايه
انا : اللى بيقول مابيعملش
دياب : انت مش قد احمد صقر يا سليم
انا : متخافش عليا انا هعرف اتصرف معاه كويس
دياب : نتأكد الاول وبعدها نشوف هنعمل ايه
انا : هى الساعه كام دلوقتى
دياب : الساعه دلوقتى 6.30
انا : يادى المصيبه انا اتاخرت على مريم .... المفروض اخدها نتعشى بره
دياب : طب لسه بدرى تقدر تلحق ..... روح انت لمريم وانا هقعد اخلص شغل واشوف حل فى المشكله اللى احنا فيها
انا : طب عن اذنكم

• خرجت بسرعه من الشركه وروحت الفيلا وكانت مريم مستنيانى

مريم : ايه اللى اخرك كده يا سليم
انا : معلش يا حبيبتى كان معايا شغل مهم واضطريت اسيبه علشان وعدتك
مريم : وقافل تليفونك ليه
انا : تلاقيه فصل شحن وانا مش واخد بالى
مريم : طب ايه هنخرج ولا ايه الدنيا
انا : طبعا يا حبيبتى هو انا اقدر ازعلك
مريم : انا بقول لو انت تعبان نأجلها مفيش اى مشكله ومش هزعل
انا : لا يا حبيبتى انا هدخل اخد شاور واغير هدومى وانتى كمان اجهزى علشان نلحق السهره من اولها
مريم : حاضر يا حبيبى

• دخلت اخدت شاور وجهزت وخرجت مع مريم روحنا سينما واتفرجنا على فيلم حلو وبعدها دخلنا مطعم علشان نتعشى

مريم : انت مبسوط معايا يا سليم
انا : ليه بتسالى السؤال ده
مريم : جاوبنى يا سليم
انا : طبعا يا حبيبتى مبسوط ..... انتى بقى مبسوطه معايا
مريم : انا عايشه معاك فى الجنه ..... بالرغم من شغلك الكتير وان احنا مش بنقعد مع بعض وقت كافى بس صدقنى وجودك فى حياتى مخلينى عايشه فى الجنه
انا : ايه الكلام الحلو اللى انا مش قادر ارد عليه ..... طب اعملك ايه يبسطك
مريم : انا كفايه عليا خروجه زى دى كل فتره ومش عاوزه حاجه تانى
انا : انا بحبك اوووووى يا مريم
مريم : وانا بعشقك يا حبيبى

• من ناحيه تانيه عند استر فى الاستراحه بتاعتها قاعده مع احمد صقر والبيرت

استر : ضربة معلم بصحيح يا احمد
احمد : خليه بقى يفرح بالمناقصه اللى اخدها ..... وكل ما يعمل حاجه فيها انا هدمرها
استر : تفتكر دياب وسليم هيسكتوا على اللى حصل
احمد : مفيش فى ايديهم حاحه يعملوها
استر : عاوزين نرتب للخطوه اللى جايه
احمد : الخطوه اللى جايه لازم نعرف بالظبط دياب بيعمل ايه فى سفره الغامض كل شهر
استر : للأسف دى حاجه مش قادرين نعرفها ..... اخر مره سافر فيها الشهر اللى فات وكل مره بيوصل فيها المطار بيتبخر وبيظهر بعدها بكام يوم فى ايطاليا لكن الايام اللى بيختفى فيها محدش عارف هو بيعمل ايه بالظبط
احمد : ممكن يكون دياب بيشتغل مع اى جهاز مخابرات
استر : دى حاجه انا متاكده منها ومش جهاز واحد لا دياب بيشتغل مع اكتر من جهاز مخابرات لكن احنا مش قادرين نعرف هو بيشتغل مع اى جهاز بالظبط
احمد : طب وصلتى لحاجه فى علاقة كريم ودياب
استر : وصلت لحاجات قليله زودت الحيره اكتر بالنسبالى
احمد : وصلتى لأيه
استر : كريم ودياب اصلا اصحاب من زمان وكانوا جيران فى امريكا ..... والد كريم كان ظابط فى الجيش الامريكى واصر ان كريم يدخل مدرسه عسكريه ..... دخل كريم المدرسه العسكريه وقعد فيها سنه ونص تقريبا وكان دايما على اتصال بدياب ..... فى الفتره اللى دياب رجع يعيش فيها فى مصر وتحديدا اول ما دخل الجامعه فى الوقت ده مات والد كريم بعدها بشهر هرب كريم من المدرسه العسكريه واختفى نهائى لمدة 10 سنين واول ظهور ليه كان مع دياب ايام ما كان متنكر فى شخصية مستر ادم
احمد : عندك حق كده الحيره زادت اكتر بالنسبه لكريم ..... بس معنى كلامك ان كريم ودياب كانوا على اتصال ببعض طول فترة ال 10 سنين اللى اختفى فيهم كريم
استر : بنسبه كبيره
احمد : بالطريقه دى ممكن يكون كريم هو اللى بيحرك دياب
استر : لا كريم بيساعد دياب مش بيحركه .... لكن اكيد فى شخص بيحرك كريم ودياب مع بعض وممكن كمان يكون بيحرك سليم الجراح معاهم مع ان ده شئ مستبعد ..... خصوصا ان سليم مش بيتحرك اى تحرك مريب وطول الوقت فى الشركه او الفيلا واى تحرك ليه احنا راصدينه على عكس كريم ودياب اللى تحركاتهم كتير ومريبه
احمد : وارد جدا يكون دى حركه مقصوده علشان نركز مع كريم ودياب ونطنش سليم وبالطريقه دى ياخد راحته ويتحرك زى ما هو عاوز
استر : هو فعلا دياب لمح قبل كده لحاجه زى دى وعلشان كده احنا مراقبين سليم كويس
احمد : طب هنعمل ايه دلوقتى
استر : ولا اى حاجه .... احنا ضربنا الضربه ومستنيين رد الفعل وبالنسبه للسفريات الغامضه رجالتنا قاعدين فى اسبانيا وايطاليا ومجرد ما دياب يسافر هنعرف هو بيعمل ايه بالظبط
احمد : كده تمام
استر : فى حاجه اخيره لازم تعملها
احمد : حاجة ايه
استر : لازم تخلص من الراجل بتاعك اللى زرع القنبله لان ده الخيط الوحيد اللى ممكن يوصلهم ليك
احمد : متخافيش من الموضوع ده .... كمان ساعه هيقابل واحد من رجالتى علشان ياخد حسابه وهو هيتصرف معاه
استر : كده تمام ..... دلوقتى بقى نتفرج على دياب

• من ناحيه تانيه دياب قاعد فى مكتبه بيخلص شغل ودخل عليه كريم

كريم : الفار دخل المصيده
دياب : فار مين ومصيدة ايه
كريم : اسمع بقى الاخبار الجديده
دياب : اشجينى
كريم : ناصر اللى بيشتغل مع احمد صقر واللى يعتبر دراعه اللى بيخلص الشغل القذر قابل العامل اللى احنا بندور عليه وكان هيقتله بس احنا لحقناه وخطفنا الاتنين
دياب : وهما فين دلوقتى
كريم : بعتهم على فيلا المقطم
دياب : حلو ..... كلم سليم وخليه يحصلنا على هناك
كريم : استنى لما تسمع باقى الاخبار
دياب : اخبار ايه تانى
كريم : احمد صقر
دياب : عمل ايه تانى
كريم : احمد صقر عند استر دلوقتى فى الاستراحه
دياب : انت متاكد
كريم : انا بقالى فتره حاطط احمد صقر تحت المراقبه وكل شويه كان بيهرب من المراقبه لحد ما قدرت اركب جهاز GPS فى عربية احمد صقر ودلوقتى هو موجود عند استر بقاله اكتر من ساعتين
دياب : راح علشان يتفق معاها على الخطوه الجديده فى الحرب بعد اللى عمله النهارده
كريم : قولتلك يا دياب مواجهتك لعيلة صقر هتخليهم يقلبوا عليك وهتخلى استر تستغل الموضوع ده لمصلحتها ..... حتى لو كنت صالحتهم تانى يوم ده هيخليهم حاسين من ناحيتك بالغدر
دياب : ........
كريم : ساكت ليه يا دياب
دياب : عاوزنى اقولك ايه يا كريم
كريم : رد عليا فى الكلام اللى بقوله ..... انا حذرتك كتير وانت رفضت تسمع كلامى .... اصل مش معقول احمد صقر هيشوفك بتهدد امه وعيلته ويقعد ساكت لازم يعمل حاجه واهو فعلا بدأ يعمل .... تقدر تقولى هتعمل ايه دلوقتى
دياب : همحى عيلة صقر من على وش الارض ..... فى الاول كنت متردد علشان فى ناس كتير كانت هتتظلم فى انتقامى لكن بعد اللى حصل النهارده والعمال الغلابه اللى ماتوا من غير اى ذنب يبقى احمد صقر لازم يحاسب على اللى عمله
كريم : اهدى كده ونتعامل بالعقل
دياب : انا عارف كويس بعمل ايه ..... خطة الانتقام هتبدأ من الليله
كريم : ناوى على ايه
دياب : اول حاجه نبدأ بيها سعد صقر
كريم : انت اتجننت يا دياب ..... كده هتكشف ورقنا
دياب : بالعكس يا كريم ..... سعد ده ورقه محروقه ولازم نخلص منها علشان نحافظ على باقى الورق
كريم : ازاى مش فاهم
دياب : استر نفسها مش عارفه تستغل سعد وفى الفتره الاخيره يعتبر بتتهرب منه خصوصا بعد ما ضمت احمد صقر لفريقها صح ولا انا غلطان
كريم : كلامك صحيح وسعد صقر بقاله فتره بيحاول يقابل استر وهى بتتهرب منه
دياب : يبقى جيه وقت الانتقام من سعد ومن اولاد العاصى
كريم : انت كده هتقلبها حرب
دياب : متخافش يا كريم نفذ اللى هقولك عليه بالحرف الواحد .... كده ولا كده عيال العاصى بعيد عن حربنا مع استر
كريم : وامل صقر هتعمل معاها ايه
دياب : هخليها تتفرج على كل اللى بيحصل .... لازم كل يوم تعيش فى عذاب وخوف
كريم : انا هسمع كلامك بس مش النهارده
دياب : ليه يعنى
كريم : لان كلامك هيقوم الحرب واحنا مينفعش نعمل حاجه الاسبوعين دول علشان الاجتماع اللى هيتعمل فى مصر .... خصوصا ان الفهد الاسود هيوصل فى خلال ايام
دياب : انت كلمته
كريم : هو اللى كلمنى بعد ما عرف اللى حصل النهارده
دياب : وليه ما كلمنيش انا او كلم سليم
كريم : كان عاوز يعرف ايه اللى حصل من حد غيركم علشان يقدر يكون رأى عن الموضوع قبل ما يكلمك انت وسليم
دياب : وانت قولتله ايه
كريم : حكيتله كل حاجه بالتفصيل ..... وامر ان لو احنا اتاكدنا ان احمد صقر هو اللى وراء الموضوع ده يبقى انت متعملش حاجه وتسيب سليم هو اللى يتصرف
سليم : وسليم بقى هيتصرف ازاى فى الموضوع ده
كريم : دى اوامر الفهد الاسود .... بعد ما عرف ان سليم عاوز يتعامل فى الموضوع ده .... قرر انه يختبر سليم ويسيبه فى مواجهة احمد صقر بدون اى تدخل منى او منك او حتى مساعده .... الفهد الاسود بيقول ان سليم بقاله فتره كبيره بيتفرج علينا وبيتعلم وجيه الوقت اللى ينفذ فيه كل اللى اتعلمه منى ومنك
دياب : بس احمد صقر اقوى من سليم
كريم : دى اوامر الفهد الأسود .... وبعدين سليم عنده اللى مش عند احمد صقر
دياب : اللى هو ايه
كريم : عنده الذكاء ..... سليم ذكى ذكاء خارق .... ذكاء مش موجود عندى ولا عندك ولا عند احمد صقر و لا الفهد الاسود شخصيا
دياب : انا مقدرش اتكلم على ذكاء سليم .... بس سليم ذكى فى الشغل والبورصه واللعب اللى بيحصل فيهم يعنى ملهوش فى الشغل القذر بتاع احمد صقر
كريم : بيتهيألك ..... اقعد واتفرج على سليم
دياب : خلاص كلمه وشوف هو هيعمل ايه
كريم : انا شايف ان احنا نروح الفيلا ونقابله هناك ونحكيله على اللى حصل
دياب : ماشى يا كريم يلا بينا

• خرج كريم ودياب من الشركه

• نرجع عندى انا ..... بعد ما خلصت سهرتى مع مريم واحنا راجعين فى الطريق تليفونى رن وكان دياب وقالى انه مستنينى فى الفيلا عندى

مريم : خير يا سليم فى حاجه
انا : لا يا حبيبتى ده شغل
مريم : شغل ايه اللى فى نص الليل ده
انا : انا سبت الشغل بدرى ومشيت علشان خاطرك وفى ورق مهم تقريبا لازم نراجعه
مريم : يعنى هتسيبنى وترجع الشركه
انا : لا يا حبيبتى دياب جاى عندنا فى الفيلا هنخلص شغل فى السريع ويمشى
مريم : ماشى يا حبيبى

• بعد ما وصلت الفيلا دياب وكريم وصلوا عندى ودخلنا اوضة الجنينه علشان نعرف نتكلم براحتنا وقالولى على كل اللى حصل

كريم : ناوى على ايه يا سليم
انا : ناوى على كل خير
دياب : فهمنا انت ناوى على ايه بالظبط
انا : مش الاوامر ان انا اتعامل لوحدى يبقى خلاص سيبونى اتعامل
دياب : تمام يا سليم ..... طب هنعمل ايه مع العامل والراجل بتاع احمد صقر
انا : ولا اى حاجه ..... احبسهم فى فيلا المقطم لحد ما اقولك نعمل ايه
كريم : تمام
انا : عاوزين حاجه تانى
دياب : اعمل حسابك الاجتماع احتمال كبير يبقى الاسبوع اللى جاى والفهد الاسود مصمم انك تحضر الاجتماع ده بنفسك
انا : ازاى وافق بسهوله كده ان الاجتماع يبقى فى مصر
كريم : بسبب الظروف اللى احنا فيها اقتنع ان احنا نعمل الاجتماع فى مصر
انا : رتبت الفيلا اللى الضيوف هيقعدوا فيها
كريم : متخافش ..... بكره كل حاجه هتكون خلصانه
انا : انا مش خايف طول ما احنا مع بعض
دياب : "واختر خليلَ قلبك بحكمةٍ فليست كُلّ القلوب بالقلوب تليقُ .... واختر لنفسك شخصًا إذا قَست عليك الأيام يكن لكَ فيه عشمٌ لا يخيب"
انا : عندك حق يا دياب
دياب : اهم حاجه دلوقتى تخلص موضوع احمد صقر علشان بعد ما الاجتماع يخلص هكتب نهاية عيلة صقر بنفسى
انا : بالراحه على نفسك يا دياب مش عاوزين نفتح على نفسنا اكتر من جبهه
دياب : متخافش يا سليم ..... عيلة صقر مش هتمثل اى خطر علينا ولا على اى حد تانى
انا : انا مش هقدر الومك بعد اللى حصل ..... انا كمان عاوز اخلص منهم
كريم : عيبكم انتوا الاتنين انكم بتفكروا بقلوبكم مش بعقولكم
انا : يعنى عاوزنا نسكت على اللى عمله احمد صقر النهارده ..... خسارة الفلوس مش مهمه عندى على قد ما انا زعلان على العمال الغلابه اللى ماتوا واللى اتصابوا ..... فى عمال ماتوا وكل واحد ساب وراه عيله محتاجاه انضف الف مره من عيلة صقر ..... ده غير العمال اللى عيشهم اتقطع بعد ما اتصابوا اصابات تعجزهم عن العمل وبرضه كل واحد منهم مسئول عن عيله ..... انت جايز يا كريم ماتعرفش الكلام اللى بقوله علشان ماعيشتش حياة العمال دى .... انا بقى غيركم .... انا عيشت حياتهم اكتر من 25 سنه وعارف اللى انا بقوله ده كويس
كريم : انا فاهم قصدك يا سليم
انا : انا عارضت دياب فى الاول فى موضوع انتقامه من عيلة صقر وكنت بفكر بالعقل لكن للأسف العيله دى مينفعش معاها اى عقل ..... العيله دى عامله زى الوباء اللى لازم نخلص منه علشان نعيش فى امان
دياب : ياما قولتلك يا سليم الكلام ده بس انت اللى مكانش عاجبك وجهة نظرى لحد ما اكتشفت فى الاخر ان انا الصح
كريم : احنا مش فى مين الصح ومين الغلط ..... احنا دلوقتى فى اصعب مرحله فى اللعبه ولازم ناخد بالنا من كل حاجه علشان مانضيعش مجهود سنين ..... وبالنسبه لموضوع عيلة صقر ممنوع نهائى القتل يا دياب
دياب : انتقامى منهم مش بالموت يا كريم ..... انا هعمل فيهم اللى العن من الموت
كريم : انت ناوى على ايه بالظبط
دياب : بعدين هتعرف ..... بس اهم حاجه دلوقتى نخلص الاجتماع
انا : انا فى خطه فى دماغى للإجتماع بحيث نخلى استر دماغها تلف ومتعرفش احنا هنعمل ايه بالظبط
كريم : خطة ايه دى يا سليم
انا : اسمعونى كويس وركزوا معايا ..... وحكيت تفاصيل الخطه اللى فى دماغى
كريم : برافو يا سليم خطه فى منتهى الذكاء
دياب : دلوقتى بس اقدر اثق فى دماغك
انا : ليه هو انا كنت غبى قبل كده
دياب : لا بالعكس انت ذكى جدا بس ذكائك فى الشغل والارقام والحسابات والبورصه لكن شغل الامن ده محتاج ذكاء من نوع تانى
انا : اهم حاجه الخطه تتنفذ زى ما اتفقنا
كريم : من بكره هبدأ فى تنفيذها
انا : كده تمام .... وبالنسبه لأحمد صقر سيبه عليا وانا هتصرف معاه بس انا لازم اسافر الاقصر بكره ضرورى
دياب : هتعمل ايه فى الاقصر
انا : احنا مش اتفقنا انى هشتغل لوحدى يبقى خلاص مش عاوز اسئله
كريم : بس سفرك ده لازمله تأمين
انا : متخافش هسافر من غير ما اى حد يحس بحاجه غريبه
كريم : ازاى بقى
انا : يوسف ولمياء مسافرين الأقصر بكره طبيعى ..... انا هاخد مريم ونسافر معاهم عادى جدا
دياب : فكره حلوه ..... طب هتقعد هناك قد ايه
انا : لازم اخد يومين تلاته هناك علشان محدش يشك فى حاجه
كريم : كده تمام
انا : عاوزكم تعملوا حاجه مهمه فى اليومين اللى هغيبهم
دياب : خير يا سليم
انا : عاوزكم تعملوا حصر بكل اسماء العمال اللى ماتوا او اتصابوا علشان نصرفلهم تعويضات عن اللى حصل
دياب : انا فعلا امرت شئون العاملين والشئون القانونيه يعملوا الكشف اللى انت عاوزه وبكره الصبح هيكون الكشف جاهز
انا : كويس انك عملت كده ..... احنا لازم نعوض الناس دى
دياب : مجرد ما ترجع من الاقصر هنشوف الموضوع ده
انا : طب يلا تصبحوا على خير علشان الحق انام شويه قبل السفر

• مشى كريم ودياب وانا طلعت الاوضه عند مريم

مريم : دياب مشى
انا : ايوا يا حبيبتى مشى ..... عاوزك تجهزى نفسك علشان هنسافر الاقصر مع يوسف ولمياء
مريم : انت مش قولت معاك شغل ومش هينفع نسافر معاهم
انا : دياب هيقعد مكانى ..... بصراحه البلد وحشتنى ومحتاج افضى دماغى شويه من الشغل
مريم : طالما معاك اجازه ايه رائيك نسافر اى مكان جديد
انا : متخافيش انا عامل حسابى الفتره اللى جايه اخدك ونسافر دبى
مريم : بجد يا سليم
انا : مش انتى كان نفسك تسافرى دبى من فتره ..... انا اتفقت مع دياب الفتره اللى جايه اخد اجازه اسبوع او عشر ايام نسافر دبى
مريم : بحبك يا سليم
انا : اهم حاجه عندى تكونى مبسوطه
مريم : انا مبسوطه طول ما انا معاك
انا : طب يلا يا حبيبتى ننام علشان معانا سفر بكره الصبح بدرى

• تانى يوم سافرنا كلنا البلد وروحنا بيت الحاج اكرم العصار وبعد السلام والترحيب قعدنا كلنا مع بعض
اكرم : وحشتونى يا ولاد
انا : اخبارك ايه يا عمى
اكرم : الحمد لله كويس بس من بعد جواز امل وسفرها وانا حاسس بديقه
يوسف : هى دى سنة الحياه يا والدى
اكرم : طمنى عليك يا يوسف وعلى شغلك
يوسف : كله تمام يا حاج
اكرم : وانت يا سليم اخبارك ايه واخبار شغلك
انا : ماشى الحال يا عمى
اكرم : فى مشاكل ولا حاجه
انا : لا يا عمى ده العادى
اكرم : **** يوفقك يا ولدى ويبعد عنك المشاكل
انا : تسلملى يا عمى
اكرم : ايه اخباركم يا بنات
لمياء : كلنا كويسين يا عمى
اكرم : يارب دايما يا بنتى ..... مالك يا سليم شكلك متغير
انا : متغير ازاى يا عمى
اكرم : سرحان كده وساكت مش زى عادتك
انا : لا عادى بس يمكن بسبب مشاكل الشغل
اكرم : ريح نفسك شويه من الشغل حرام عليك صحتك
مريم : قوله يا عمى ده مش بياخد ولا يوم اجازه وبيخرج الصبح بدرى ويرجع اخر الليل
اكرم : حرام عليك نفسك يابنى انت كده هتضيع
انا : مش بأيدى يا عمى .... انا بحاول على قد ما اقدر اريح نفسى من الشغل بس مش بعرف
اكرم : **** معاك يابنى
انا : سيبك من شغلى وطمنى على البلد
اكرم : البلد كويسه وزى الفل
انا : ايه اخبار الحاج عزت والحاجه فاطمه
اكرم : كويسين يابنى وبيسألونى دايما عليك وعلى يوسف
انا : وايه اخبار عيلة صقر ..... انا سمعت ان فى مشاكل بينهم وبين عيلتنا
اكرم : ايوا فعلا فى مشاكل كتير بينهم بخصوص الشغل اللى بينهم
انا : مشاكل ازاى
اكرم : عيلة صقر بقوا محتكرين كل حاجه فى البلد تقريبا ومش سايبين فرصه لأى حد يشتغل غيرهم ..... ده غير ان عيلة الجراح خسروا اراضى كتير نتيجة شغلهم مع عيلة صقر ..... كل ده كوم والاراضى اللى اخدها منهم اسامه قبل ما يموت كوم تانى وانت عارف ان اسامه اخدها منهم بالغصب وبطريقه قذره
انا : ليه هى مش قمر رجعتهلم الارض تانى بعد حبس ابوها
اكرم : قمر رجعت ارض الكل معادا عيلة الجراح
انا : ليه كده
اكرم : الحكومه حطت ايديها على الارض دى وباقى الممتلكات اللى مالحقتش تبيعها قبل ما تسيب البلد وتسافر
انا : ههههههههههه
اكرم : بتضحك ليه
انا : بضحك على الزمن واللى بيعمله ...... الارض اللى اخدها عيال الجراح بالنصب اتاخدت منهم برضه بالنصب
اكرم : ده انتقام ربك
انا : ولسه ياما هيشوفوا طول ما الطمع ماليهم

• اخدنا قعدتنا مع الحاج اكرم وبعد كده اخدت يوسف ولفينا فى البلد ....قعدنا فى البلد 3 ايام وبعد كده رجعنا القاهره تانى

• اول ما وصلت القاهره كلمت دياب وكريم علشان اقابلهم فى الفيلا عندى

دياب : حمد لله على السلامة
انا : **** يسلمكم .....طمنونى ايه اخر الاخبار
كريم : الاخبار عندك انت
انا : طمنونى على الشغل الاول
دياب : قدرنا نلم الدنيا فى الوزاره بخصوص اللى حصل .... واتفقنا ان احنا هنمد شهرين علشان نلحق نسلم الشغل اللى اتدمر ده
انا : تفتكر شهرين كفايه
دياب : بالعافيه قدرنا نوصل للأتفاق ده علشان كده هنضطر نشتغل طول الليل والنهار علشان نعوض
انا : بس كده المناقصه هتوقف علينا بخساره
دياب : خسارة الفلوس ارحم بكتير من اننا نخسر اسمنا فى السوق
انا : متخافش يا دياب مفيش خساره هتحصل
دياب : ازاى يا سليم مفيش خساره ..... احنا خسرنا شغل 5 شهور كاملين ده غير الشرط الجزائى اللى ممكن ندفعه لو اتأخرنا فى التسليم وبنسبه كبيره مش هنقدر نسلم فى المعاد ..... ده غير حاجات تانيه كتير اهمها التعويضات اللى هندفعها للعمال اللى ماتوا واللى اتصابوا
انا : ايه ياعم كمية الاحباط اللى فى كلامك ده .... قولتلك مفيش اى خساره ولا حاجه ..... طمنى على احمد صقر
دياب : مفيش جديد ..... قابل استر مره تانى بعد سفرك ده غير انه قالب الدنيا على الرجاله اللى عندنا
انا : معنى كده ان اعصابه متدمره
كريم : ده شئ اكيد
انا : حلو يبقى ده الوقت المناسب علشان الهجوم
كريم : هتعمل ايه بالظبط
انا : اتقل وهتعرف كل حاجه .... بس اهم حاجه علوز اعرف احنا خسرانين كام فى المناقصه بالظبط
دياب : احنا خسرانين تقريبا 100 مليون جنيه .... الشغل اللى راح بالتعويضات وعليهم الشرط الجزائى
انا : كده تمام ...... يبقى لازم احمد صقر يدفع تمن الخساره دى
دياب : ازاى يا فالح
انا : قولتلك اتقل ..... هو احمد صقر فين دلوقتى
كريم : موجود عند استر فى الاستراحه بتاعتها
انا : بقاله قد ايه
كريم : بقاله ربع ساعه
انا : ياترى بيهبب ايه هناك تانى
دياب : فى الغالب بيحاولوا يفهموا اللى حصل بعد ما خطفنا رجالتهم
انا : او ممكن بيرتبوا لمصيبه جديده
دياب : لا مستحيل يعملوا اى حاجه قبل ما يقفلوا اللعبه اللى قبلها ..... قواعد اللعبه بتقول كده
انا : لازم نغير اسلوبنا فى اللعب المره دى
كريم : قصدك ايه
انا : احنا بقالنا كتير ماشيين بطريقة الدفاع ..... كل اللى احنا بنعمله اننا بنستنى ضربتهم ونحاول نتفاداها وبعد كده نرد عليهم ..... فى الاول مكانش فى مشكله علشان كنا قادرين نتوقع ضرباتهم لكن دلوقتى الامور هتخرج عن السيطره وهنخسر كتير بالأسلوب ده ..... علشان كده لازم نغير طريقتنا ونبدأ احنا فى الهجوم
كريم : مين قالك يا سليم ان احنا بندافع بس ..... لا احنا بنهاجم بس فى طريق تانى هما مش حاسين بيه
انا : انا فاهم كلامك يا كريم كويس بس برضه لازم نشتغل بطريقه جديده شويه
دياب : انت عاوز تعمل ايه بالظبط
انا : اول حاجه لازم نخلص منها سعد صقر
كريم : بس احنا كده بنجازف وبنخسر كارت ممكن نلعب بيه
انا : ليك فى الشطرنج يا كريم
كريم : مش دايما بلعب بس بعرف العب
انا : فى الشطرنج فى نصيحه مهمه جدا بتقول ان لو خصمك معاه زوج من الفيله لازم تكسر واحد منهم بالطريقه دى انت هتعادل قوة خصمك مع قوتك لان خصمك هيخسر السيطره على المربعات اللى كان بيتحرك عليها الفيل اللى انت كسرته ..... واستر دلوقتى معاها اتنين فيله احمد صقر وسعد صقر علشان كده لازم نكسر واحد من الاتنين دول فى اسرع وقت ممكن
كريم : كلامك منطقى بس انا شايف ان احنا لو خلصنا من سعد زى ما انت عاوز اكيد استر هتجيب بديل مكانه وساعتها مش هنبقى عارفين مين البديل ده
انا : متخافش استر مش هتلحق تجيب اى بديل لأن الضربات هتنزل فوق دماغها وراء بعض ومش هتلحق تفوق منها
كريم : ضربات ايه دى
انا : هى دى الطريقه الجديده اللى احنا هنشتغل بيها
كريم : مش فاهم قصدك
انا : انا هفهمك ..... احنا هنضرب فى كل الاتجاهات .....هنضرب فى البورصه وهنضرب فى سوق السلاح وهنضرب فى سوق الادويه ..... للزم نخليهم مش شايفين قصادهم من الضرب
كريم : الكلام اللى بتقوله ده خطر جدا ولازم ناخد موافقة الفهد الاسود قبل ما نعمل اى حاجه
انا : ماتخافش يا كريم انا كلمت الفهد الاسود وشرحتله اللى فى دماغى وهو موافق
دياب : هنبدأ ازاى دلوقتى
انا : انا اللى هبدأ اول خطوه
كريم : هتعمل ايه يا سليم بالظبط
انا : لازم اقابل احمد صقر النهارده بعد ما يرجع من عند استر
دياب : هتقابله ليه
انا : بعد المقابله هتعرف
كريم : طب وسعد هنعمل معاه ايه
دياب : سيب سعد عليا انا هتصرف معاه
انا : انت ملكش دعوه بسعد نهائى يا دياب
دياب : ايه معنى الكلام ده يا سليم
انا : ده مش وقت تصفية حسابات شخصيه يا دياب ..... نخلص اللى احنا بنعمله وبعد كده اعمل اللى انت عاوزه
كريم : انت ناوى على ايه يا سليم
انا : عاوزك تخطف سعد الليله وتخلص على كل رجالته اللى تحت عينك
كريم : وبعدين
انا : تطلع بيه على فيلا المقطم واحبسه هناك مع رجالة احمد صقر
دياب : وهنعمل ايه بعد كده
انا : انا عارفك يا دياب عاوز ايه وهسيبك تلعب شويه مع سعد بس بحدود علشان خاطرى
دياب : ماشى يا سليم
انا : يلا يا كريم اتحرك وشوف هتنفذ ازاى بس اهم حاجه عندى سعد يبات الليله فى المقطم
كريم : حاضر يا سليم
انا : واول ما احمد صقر يوصل الفيلا بتاعته بلغونى علشان اقابله
كريم : حاضر يا سليم

• بعد ما كريم مشى

دياب : هتعمل ايه بالظبط مع احمد صقر
انا : سيبك من احمد صقر دلوقتى وخلينا فى المهم عاوزك بكره تجمعلى كل سماسرة البورصه اللى بنتعامل معاهم
دياب : ليه
انا : لازم نحد خطه للتعامل فى الفتره اللى جايه ولازم نحمى الاسهم بتاعتنا
دياب : ماشى يا سليم
انا : عاوزك كمان تكلم ابراهيم فى اسبانيا ياخد اول طياره ويكون هنا فى مصر
دياب : صعب جدا نخلى ابراهيم ينزل مصر دلوقتى خصوصا انه كان هنا فى مصر من اسبوعين ولو نزل تانى دلوقتى يبقى هنلفت نظر الناس
انا : لازم نتصرف ونلاقى طريقه ندخل بيها ابراهيم مصر من غير ما اى حد يعرف
دياب : طب فهمنى انت محتاجه فى ايه
انا : محتاجه فى اكتر من موضوع بس اهم موضوع فيهم هو تأمين الشغل بتاعنا والضربات اللى هتحصل فى الفتره اللى جايه
دياب : ابراهيم ممكن يخلص كل حاجه وهو فى مكانه مش لازم ينزل مصر
انا : انا عارف ان ابراهيم ممكن يخلص كل حاجه من مكانه بس برضه لازم ينزل مصر ضرورى
دياب : فهمنى ايه اللى فى دماغك يا سليم
انا : هفهمك يا دياب ..... احنا داخلين على حرب كبيره ولازم نجمع الجيش بتاعنا كويس علشان نعرف نكسب ..... لكن لو كل واحد فى بلد هيبقى صعب نكسب
دياب : فهمتك ..... هتصرف والاقى طريقه اجيب بيها ابراهيم
انا : كده تمام
دياب : طب همشى انا دلوقتى ولو فى جديد كلمنى
انا : ماشى يا دياب

• من ناحيه تانيه عند استر يعقوب فى الإستراحه قاعده مع البيرت واحمد صقر

استر : لسه مفيش جديد يا احمد بالنسبه للعامل والراجل بتاعك
احمد : قالب عليهم الدنيا ومش لاقيهلهم اى اثر زى ما تكون الارض اتشقت وبلعتهم البيرت : ممكن يكون دياب وصلهم
استر : كل شئ وارد
احمد : خلينا نفترض ان دياب وصلهم ايه اللى يخليه يسكت طول الايام اللى فاتت من غير ما يعمل اى حركه من حركاته
البيرت : عندك حق .... دياب لو وصلهم كان ابسط حاجه ممكن يعملها انه يواجهك بيهم او يرد الضربه
احمد : هو ده اللى انا اقصده
استر : طب انت ملاحظتش حاجه على دياب فى الايام اللى فاتت
احمد : لا خالص ده بيتعامل عادى جدا ولا كأن فى حاجه حصلت
البيرت : ده اكبر دليل على ان فى حاجه مش مظبوطه بتحصل ولازم نعرفها
استر : عندك حق يا البيرت ف حاجه غلط
البيرت : والحاجه دى انا شاكك انها فى اسبانيا لان رجالتنا هناك رصدوا رجالة دياب بيعملوا حاجات غريبه
استر : حاجات زى ايه
البيرت : رصدناهم بيقابلوا ناس ليها علاقه بالمخابرات
استر : اى جهاز مخابرات بالظبط
البيرت : ده اللى بنحاول نعرفه بالظبط لان كان فى منهم اللى تبع المخابرات المصريه وفى ناس تانيه لسه بنحاول نجمع معلومات عنهم
استر : لازم نعرف مين دول بالظبط وبيعملوا ايه فى اسرع وقت
البيرت : ده اللى شغالين عليه
احمد : خلينا فى المهم دلوقتى ...... هنتصرف ازاى دلوقتى لو طلع الرجاله اللى اختفت موجودين عند دياب
استر : اتصرف طبيعى جدا ولو حصلت مواجهه بينك وبين دياب انكر اى كلام
احمد : حتى لو انكرت دياب مش هيصدق وهينتقم
استر : قولتلك متخافش احنا موجودين حواليك وهنحميك
احمد : الكلام ده هينفع لو كان انتقام دياب انه يقتلنى ساعتها هعرف كويس ادافع عن نفسى ومش هحتاج حمايه من اى حد
استر : قصدك ايه
احمد : انا اعرف دياب من سنين كتير ..... دياب انتقامه مش بالقتل والدم .... انتقام دياب حاجه تانيه خالص .... دياب لو كان انتقامه بالقتل كان قتلنا كلنا من زمان وانتى اولنا ..... دياب هينتقم بطريقه محدش يقدر يمسك عليه بيها اى حاجه .... انتقام دياب محدش فينا هيقدر يتوقعه
استر : .......
احمد : ساكته ليه .... عارفه ان عندى حق فى كلامى
استر : مش للدرجه يا احمد
احمد : لا اكتر من كده كمان ...... دياب بدأ انتقامه من العيله من زمان ..... سيطر على ابنى لدرجة ان انا مابقاش ليا كلام عليه .... وسيطر على اختى ..... وساعد فى القبض على خالى ..... وبقى راعب ابويا وامى ..... دياب قدر يسيطر على العيله بالكامل وكلهم تقريبا بيخافوا منه ..... دياب مش باقيله غير حاجه بس علشان يقدر يحكم العيله
استر : حاجة ايه
احمد : يخلص منى ..... انا العقبه الوحيده اللى فى طريق دياب لو قدر يخلص منى يبقى هيسيطر على العيله
استر : طب والحل ايه دلوقتى
البيرت : انا يا ما حذرتك من دياب يا استر .... قولتلك الحل الوحيد هو ان احنا نقتله ونخلص منه لكن انتى الظاهر انك حبيتى اللعب معاه او يمكن حبيتى دياب نفسه لحد ما بقينا دلوقتى كلنا خايفين منه
استر : خلاص يا البيرت كفايه
البيرت : فعلا كفايه ..... الكلام ملهوش فايده
احمد : هنتصرف ازاى دلوقتى
استر : ارجع مكانك يا احمد واعمل اللى اتفقنا عليه ..... وانت يا البيرت شوف رجالتك وتابع معاهم كويس عاوزين نعرف ايه حكاية المخابرات دى
البيرت : حاضر
احمد : انا همشى ولو فى جديد بلغونى

• خرج احمد صقر من عند البيرت ورجع الفيلا بتاعته

• نرجع عندى انا كنت قاعد فى الفيلا وجاتلى مكالمه بتبلغنى ان احمد صقر رجع الفيلا ..... اتصلت بيه وطلبت اقابله وفعلا روحتله الفيلا

احمد : خير يا سليم فى حاجه
انا : ما أظنش انه خير يا احمد
احمد : فى ايه بالظبط
انا : انت عاوز مننا ايه بالظبط
احمد : انتوا مين بالظبط علشان مش فاهم
انا : انا ودياب
احمد : وانا هعوز منكم ايه
انا : قول لنفسك الكلام ده
احمد : ياريت تدخل على طول فى الموضوع وبلاش شغل اللف والدوران ده انا مش فاضى
انا : ماشى يا احمد هدخل فى الموضوع على طول ..... تقدر تقولى انا ودياب عملنالك ايه علشان تدمر شغلنا بالطريقه دى ..... طب سيبك منى انا ودياب .... تقدر تقولى ايه ذنب العمال الغلابه اللى راحوا فى الرجلين بعد المصيبه اللى انت عملتها
احمد : انت جاى تلبسنى مصيبه يا سليم ولا ايه
انا : انا وانت عارفين كويس ان اللى حصل فى الموقع عندى انت السبب فيه
احمد : وايه دليلك على التهمه دى
انا : انت متاكد انك عاوز الدليل يا احمد
احمد : ايوه متاكد
انا : طب اتفرج يا سيدى

• طلعت تليفونى وشغلت فيديو فيه اعتراف للعامل ولناصر بكل اللى حصل ومين وراهم بالظبط

احمد : كدب وتلفيق .... انا معرفش مين دول ..... دول اكيد ناس انت جايبهم علشان تلبسنى اللى حصل عندك
انا : وانا هستفاد ايه لما اعمل كده
احمد : اسأل نفسك
انا : انا فعلا سألت نفسى بس مالقيتش اى اجابه ..... عارف يا احمد بعد اللى حصل قعدت مع نفسى وفكرت فى حاجات كتير حصلت زمان ولسه بتحصل لحد دلوقتى ..... طول عمرى بحب اخد عبره من كل حاجه بتحصل حتى لو مكانتش ليا
احمد : اخلص يا سليم
انا : صحيح يا احمد هى تجارة الاثار بتكسب اووووى كده
احمد : اثار ايه يا سليم
انا : انا وانت عارفين كويس ان كل اللى انت فيه ده اصله تجارة الاثار
احمد : انت بقى جاى تلبسنى كل التهم دى فى قعده واحده
انا : انا عمرى ما اتكلم من غير دليل
احمد : وايه بقى دليلك على موضوع الاثار ده كمان
انا : زمان .... من سنين كتير ..... بعد ما نجحت فى امتحانات الإبتدائيه انا ويوسف العصار وطلعنا الاوائل على المديريه ..... الحاج اكرم العصار جاب تليفون هديه ليوسف ابنه وجابلى تليفون زيه بالظبط ..... كان تليفون بكاميرا وحلو وغالى وقتها وانا كنت فرحان بيه جدا علشان حاجتين ...... الحاجه الاولى انه كان هديه من الحاج اكرم اللى بعتبره ابويا .... وتانى حاجه انه كان يعتبر احنا اول ناس فى اصحابنا نمسك تليفون محمول
احمد : وانا مالى بالكلام ده كله
انا : ما انا جايلك فى الكلام
احمد : اخلص
انا : بعد الحكايه دى بشهرين تقريبا كنت بتمشى فى البلد بعد العصر تقريبا وشوفتك داخل بيت سيف الهوارى ..... انا قولت عادى مافيهاش حاجه ..... لكن يومها بعد نص الليل كنت راجع البيت عندى وكان معايا يوسف واسامه وشوفناك داخل بيت جدك المهجور وكان معاك سيف وابوه وكام راجل كده ..... فى الاول طنشنا .... انا دخلت بيتنا ويوسف واسامه كل واحد رجع بيته ..... تانى يوم فى نفس الوقت شوفتك داخل البيت تانى مع نفس الناس وقتها شكيت انك بتعمل حاجه غلط
احمد : ......
انا : ساكت يعنى
احمد : بسمعك وبشوف اخرة الخيال اللى بتحكيه
انا : ماشى يا سيدى هكملك الخيال .... بعد يومين بالظبط كنت نايم وصحيت قلقان قبل الفجر بشويه وكان فى صوت عربيات فى الشارع ..... بصيت من الشباك شوفتك واقف وفى عربيه نقل كبيره بتنزل شنط ..... وقتها طلعت بسرعه فوق سطوح بيتنا علشان اعرف اشوف كويس ..... وقتها شوفت اللى كنت متوقعه ..... شوفت ناس خارجه من بيتك بتماثيل دهب واثار ..... وقتها محسيتش غير وانا بمسك تليفونى وافتح الكاميرا واصور كل اللى انا شايفه ..... بصراحه مش عارف كنت بصور ده ليه ولا هعمل بيه ايه بس دلوقتى عرفت .... عرفت ان اى حاجه بتحصل لازم نركز فيها ونعرف نستغلها كويس ودلوقتى وقت الاستغلال

• شغلت الفيديو اللى كنت مصوره لأحمد صقر واول ما شافه اتصدم

احمد : عاوز ايه يا سليم دلوقتى
انا : بسبب اللى انت عملته احنا خسرنا اكتر من 100 مليون جنيه وانت مطالب بيهم
احمد : وايه اللى يخلينى ادفع الرقم ده كله ...... انا اقدر اقولك الفيديو اللى معاك ده تبله وتشرب مايته ...... ده فيديو ملهوش اى لازمه وانا اعرف اطلع منها
انا : ههههههههه عيبك انك متسرع ...... تخيل بقى لما الفيديو ده والفيديو اللى قبله بتاع رجالتك يوصل لدياب ويعرف ان انت اللى وراء المصيبه دى ..... تخيل ايه هيكون رد دياب على اللى حصل
احمد : هو دياب ميعرفش حاجه
انا : لا لسه دياب ميعرفش اى حاجه عن اللى بقوله ..... ورجالتك تحت ايدى انما لو عاوز تذيع قول ذيع وانا اعرف دياب على كل حاجه ..... حتى الحاجات اللى هو ميعرفهاش عن شغلك مع سيف الهوارى
احمد : من الواضح ان انت عارف حاجات كتير جدا
انا : اكتر مما تتخيل
احمد : وانا موافق يا سليم
انا : موافق على الدفع ولا انى اقول لدياب
احمد : لا هدفع
انا : كده متفقين ..... بكره هبعتلك تقرير فيه كل الخساير اللى احنا هنتحملها وانت اللى هتدفعها بالكامل ..... وياريت المره الجايه لما تلعب ابقى العب بشرف
احمد : انا هدفع بس بشرط
انا : انت هتدفع بدون اى مقابل او شرط
احمد : لا يا سليم لازم تسمع شرطى
انا : اتفضل قول
احمد : انا هدفع مقابل انى اخد الفيديو اللى معاك واستلم رجالتى اللى تحت ايدك
انا : وانا مش موافق على الشرط ده ..... انت دلوقتى فى موقف ضعف ومش من حقك تتشرط ..... رجالتك والفيديوهات دى هتفضل تحت ايدى وانت هتدفع ...... على فكره انا مش هاممنى الفلوس اللى بطالب بيها دى ..... انا بطالب بيها بس علشان اعلمك انت بتلعب مع مين وممكن يعمل ايه ..... سلام يا احمد وبكره هيكون عندك التقرير وبعد بكره فلوسى تدخل حسابى اللى هبعتهولك مع التقرير

• سيبت احمد صقر ومشيت رجعت الفيلا ..... اول ما وصلت الفيلا كان بنات عمى متجمعين مع بعض

انا : بخاف لما بلاقيكم متجمعين كده ..... بحس انكم بتخططوا لحاجه
مريم : ليه بتقول كده
انا : مش عارف بس مش مستريح
لمياء : كل الحكايه ان شرين وطارق عاوزين يتجوزوا
انا : مش لسه بدرى شويه ..... وبعدين احنا كنا متفقين انهم يتجوزوا بعد ما شرين تخلص جامعه
لمياء : وفيها ايه لما يتجوزوا وتكمل دراسه براحتها
انا : انتى رائيك ايه فى الكلام ده يا شرين
لمياء : اللى انت شايفه صح انا معاك فيه ..... انت ابن عمى واخويا الكبير واكتر واحد عارف مصلحتى
انا : سيبك منى انا خالص وقوليلى رائيك بصراحه من غير كسوف
شرين : ........
انا : ساكته يعنى
مريم : هى مكسوفه تقولك انها موافقه
انا : اسمعها منها الأول
شرين : مممم ممممم
انا : بتمامأى ليه دلوقتى
شرين : موافقه يا سليم
انا : قولى كده من الاول
شرين : يعنى انت موافق
انا : ادينى وقت افكر وارد عليكى دى حاجه مش بسيطه
مريم : هتفكر فى ايه بالظبط
انا : شرين مسئوله منى واى حاجه تخصها لازم احسبها الاول وبعدين انا قولت عاوز مهله للتفكير
شرين : خد وقتك يا سليم براحتك وانا هحترم قرارك مهما يكون
انا : ايه العقل ده كله
شرين : لانى واثقه فيك وفى قراراتك ومتأكده انك هتختار الصح
انا : ماشى يا ستى انا كل اللى محتاجه كام يوم افكر واحسبها
شرين : وانا قولتلك خد وقتك

• فجأه دخلت علينا الشغاله

انا : خير فى حاجه
الشغاله : دياب باشا منتظر حضرتك بره
انا : انا هخرجله

• خرجت لقيت دياب وكريم منتظرين اخدتهم ودخلنا الأستديو اللى فى الجنينه

انا : طمنونى عملتوا ايه
كريم : كله تمام ..... سعد موجود فى المقطم
انا : ورجالته
كريم : ماتوا كلهم
انا : كده حلو ..... نستعد بقى للنقله الجديده
كريم : هتعمل ايه تانى
انا : عملت ايه يا دياب فى موضوع ابراهيم
كريم : انا اتصلت بيه وطلع بالصدفه نازل مصر علشان فرح اخته الاسبوع اللى جاى
انا : كده حلو جدا ...... يعنى هينزل طبيعى قصاد احمد صقر من غير ما يشك فى حاجه
دياب : ايوه تمام
انا : كلمت السماسره بتوعنا فى البورصه
دياب : ايوه كلمتهم ومعادهم معانا بكره فى الشركه
انا : كده كويس
دياب : طمنا انت عملت ايه مع احمد صقر
انا : بكره هبعتله ميزانيه بالخساير وهو هيدفع كل حاجه
دياب : بسهوله كده
انا : لا طبعا مش بسهوله ..... انا فهمته ان انت متعرفش انه متورط فى الموضوع ده وهددته بيك
دياب : بس كده ..... مش عارف ليه مش مصدقك
انا : انت ليك النتيجه ولا الطريقه
دياب : الاتنين ..... لازم اعرف انت هددت احمد صقر ازاى وايه الحاجه اللى نزلت علشانها الاقصر مخصوص
انا : انا ماسك احمد صقر من رقبته ويادوب هددته ب 10% بس من اللى عندى
دياب : ايه اللى عندك بالظبط واللى يخلى احمد صقر يخاف منك كده
انا : هددته بفيديو قديم معايا لأحمد صقر وهو بيبيع الاثار اللى كانت فى بيت جده زمان
دياب : والفيديو ده وصلك ازاى
انا : انا اللى مصوره بنفسى
دياب : صورته امتى وازاى
انا : صورته من اكتر من 15 سنه
دياب : انت عاوز تقنعنى ان طول السنين اللى فاتت معاك فيديو تقدر تهدد بيه احمد صقر
انا : وفيها ايه دى
دياب : ورينى الفيديو ده كده

• خرجت تليفونى وفرجت كريم ودياب على الفيديو

دياب : ده فعلا فيديو قديم .... بس اللى انا مش قادر افهمه انت ليه ما استغلتش الفيديو ده طول السنين فاتت
انا : استغله ازاى يعنى
دياب : كان ممكن تهدد بيه احمد صقر وتطلب منه فلوس كتير علشان تسكت ..... واعذرنى يا سليم انت كنت فقير ومش لاقى
انا : وليه اهدد واحد مفيش بينى وبينه اى مشكله ..... ولا ليه اطمع فى رزق مش بتاعى اصلا ..... انا الحمد لله طول عمرى راضى بحالى وعمرى ما بصيت على حاجه فى ايد غيرى علشان كده **** كرمنى ورزقنى من وسع
دياب : طب انت صورت الفيديو ده ليه اصلا طالما مش ناوى تستغله
انا : صدقنى وقتها ماكنتش اعرف انا بصوره ليه
كريم : انت غريب جدا يا سليم ..... يعنى كنت راضى تعيش فى الفقر ومعاك اللى يخليك تعيش ملك
انا : ولا غريب ولا حاجه ..... انا طول عمرى عايش ملك حتى لو فقير ..... الغنى فى النفوس مش فى الفلوس ..... تقدر تقولى واحد زى احمد صقر عمل فلوس كتير من الاثار اللى طلعها من بيت جده ..... هل الفلوس ده قدرت تخليه يقتنع ويبطل ..... بالعكس احمد صفر من بعدها اشتغل فى الاثار اكتر وبرضه لسه طمعان ومش راضى وتقريبا هيعيش طول عمره مش راضى ...... لكن انا عشت طول عمرى راضى بالقليل ..... فرحت جدا لما اشتغلت عند طايع لان الشغل ده كان فيه راحه بالنسبالى ..... ولما سيبت طايع ونزلت القاهره اشتغلت مندوب مبيعات وبرضه كنت راضى برغم انها كانت شغلانه صعبه ..... ولما اشتغلت فى شركة عمى فرحت ورضيت ..... عارف يا كريم ... **** بيقيس قوة الصبر عند اى انسان وعلى اساسها بيرزقه وزى ما انت شايف كده **** رزقنى ازاى ..... **** رزقنى بأضعاف الفلوس اللى كان ممكن اخدها من احمد صقر
كريم : عندك حق يا سليم
دياب : وياترى فى حاجات تانى ماسكها على احمد صقر
انا : .......
دياب : ساكت يعنى
انا : سيبك منى دلوقتى وخلينا فى المهم
دياب : ماشى يا سليم اهرب براحتك
كريم : جهزوا نفسكم انتوا الاتنين علشان الجماعه هيوصلوا من السفر فى خلال يومين بالكتير
انا : ازاى ده يعنى ..... احنا مش متفقين على الاسبوع اللى جاى
كريم : فى حاجات جديده حصلت علشان كده كان لازم نعجل بالاجتماع
انا : ايه اللى حصل بالظبط
كريم : استر كشفت اكتر من واحد من رجالتنا فى اسبانيا
انا : دى مصيبه
كريم : مصيبه لو احنا معرفناش فى الوقت المناسب ..... لكن احنا قدرنا نعرف فى الوقت المناسب وهنتصرف فى الموضوع ده
انا : طب انت جهزت المكان اللى هيقعد فيه الجماعه
كريم : كل حاجه جاهزه

• من ناحيه تانيه عند استر قاعده فى مكتبها ودخل عليها البيرت

استر : شكلك بيقول ان فى مصيبه جديده
البيرت : سعد صقر اتخطف وكل رجالته اتقتلوا
استر : انت بتقول ايه
البيرت : زى ما سمعتى كده
استر : دياب اللى عمل كده
البيرت : مفيش غيره اللى يعمل كده
استر : سيبنى يا البيرت دلوقتى

• نرجع عندى انا ودياب وكريم قاعدين بنتناقش مع بعض وفجأه تليفون دياب رن

دياب : استر بتتصل
انا : يبقى اكيد خبر سعد وصلها ..... رد عليها واتصرف طبيعى جدا ولا كأنك عارف حاجه
دياب : كنت هعمل كده فعلا

• رد دياب على استر

استر : ازيك يا دياب
دياب : بخير
استر : كنت عاوزه اقابلك
دياب : خير فى حاجه ضرورى
استر : كنت عاوزه اتناقش معاك فى خط انتاج الدواء الجديد اللى شركة الجراح هتبدأ فى انتاجه
دياب : والموضوع ده يخصك فى ايه
استر : ازاى يعنى يخصنى فى ايه ..... انت ناسى ان انا شريكه فى المصنع
دياب : هى دى حاجه تتنسى برضه
استر : يعنى من حقى اعرف كل حاجه بتحصل فى المصنع واقول رائى فيها كمان
دياب : من حقك تعرفى ده شئ طبيعى واظن انك عرفتى ..... لكن حكاية انك تقولى رائيك ده مش من حقك ..... انتى يادوب شريكه بنسبة 10% وباقى المصنع كله تحت ايد سليم الجراح وبنات عمه وانا معاهم وطالما انا وسليم موافقين يبقى انتى ملكيش رأى ..... واظن ان العقد اللى بينا بيقول كده
استر : حلوه وملعوبه يا دياب ..... طالما كده يبقى ورينى هتاخد موافقة منظمة الصحه ازاى علشان تصنع الدواء ده
دياب : هههههههههه مسكينه يا استر
استر : قصدك ايه بالضحكه دى
دياب : انا اخدت الموافقه خلاص وكل حاجه ماشيه قانونى وخط الانتاج هيبدأ من اول الشهر واوعدك اول جرعه دواء هننتجها هبعتهالك هديه
استر : الظاهر كده انك مش هتجيبها لبر يا دياب
دياب : واجيبها لبر ليه طالما بعرف اعوم كويس
استر : ماتنساش ان البحر غدار وانت مش قد غدره
دياب : متخافيش انا عامل حساب الغدر كويس ..... واذا كان على اللى حصل عندى فى الموقع مسيرى هعرف مين اللى وراها وادفعه التمن ولو انى عارفه كويس بس مش هينفع اواجهه من غير دليل
استر : **** معاك ..... عاوزاك تركز كويس فى كل حاجه اليومين دول
دياب : هعمل بنصيحتك ..... سلام
استر : سلام يا دياب

• قفلت استر مع دياب

دياب : قولتلك يا سليم استر مش هتسكت على الدواء الجديد ..... ده مصنعها يعتبر المصنع الوحيد فى العالم اللى بينتج الدواء ده
انا : علشان كده هى اللى بتتحكم فى سعر الدواء ده ..... علشان نكسب استر لازم ننتف ريشها كله علشان متعرفش تطير وساعتها هتبقى فريسه ساهله
دياب : انا مستغرب انها مجابتش سيرة سعد
كريم : ده شئ طبيعى ..... استر اصلا اتصلت علشان تجس النبض وتشوفك هتعمل ايه ومكانش ينفع تبان مهزومه اكتر من كده
دياب : تفتكر استر هتعمل ايه دلوقتى
كريم : هتمسكك من ايدك اللى بتوجعك علشان تستسلم
دياب : ازاى يعنى
كريم : انت عندك اكتر من نقطة ضعف بس اهم نقط عندك هما سليم صقر وليندا وريهام
دياب : استبعد سليم من الموضوع لانها مش هتجازف بعلاقتها مع احمد صقر
كريم : انت نسيت قواعد اللعبه ولا ايه يا دياب ..... اول خطر تستبعده هو لازم تاخد بالك منه
دياب : عندك حق يا كريم ..... يعنى استر ممكن تخطف سليم وتساومنى
كريم : استر ممكن تعمل اى حاجه وصعب نتوقع دلوقتى هى بتفكر ازاى
دياب : زود الحراسه على سليم من غير ما اى حد يحس ..... وزود الحراسه على الفلل هنا سواء الفيلا بتاعتى او فيلا الجراح .... حتى فيلا احمد صقر حاول تشوف طريقه وتزرع كام واخد من رجالتنا وسط الحراسه بتاعتهم
كريم : بالنسبه لسليم انا هعمل كده فعلا ..... وبالنسبه لأحمد صقر انا قدرت ازرع رجالتنا وسط رجالته من بعد ما غير كل طقم الحراسه القديم
دياب : كده حلو ..... عاوزك كمان تعملى تقرير يومى عن كل تحركات سليم
كريم : حاضر ..... ولو ان سليم مش بيروح اى مكان غريب يادوب بيروح المدرسه او النادى واحيانا بيزور اصحابه فى بيوتهم ..... واصحابه دول عيال تافهه مفيش منهم اى قلق
دياب : والجنس اللطيف يا كريم ..... سليم دلوقتى فى سن المراهقه وده اسهل طريق ممكن اى حد يدخل منه
كريم : بالنسبه للموضوع ده فعلا فى بنت اسمها مليكه معاه فى المدرسه وبتحاول تتقرب منه بس سليم مطنشها ومش مديلها اهتمام
دياب : مين مليكه دى بالظبط وايه حكايتها وياترى بتحاول معاه من زمان ولا الفتره دى
كريم : زى ما قولتلك هى معاه فى المدرسه وعايشه مع والدتها فى كمبوند قريب من هنا ..... والدها منفصل عن امها ومتجوز واحده تانيه وعايش ايطاليا ..... والدتها مديرة بنك
دياب : مش عارف ليه مش مرتاح للبنت دى
كريم : انا حاطط عينى عليها متخافش خالص
انا : كده كل حاجه تمام ..... نتقابل بكره فى الشركه علشان نرتب للجديد
دياب : تصبح على خير يا سليم

• مشى دياب وكريم وانا دخلت الفيلا اخدت شاور ونمت على طول من التعب ..... صحيت الساعه 6 الصبح لقيت مريم صاحيه

انا : صباح الخير يا حبيبتى
مريم : صباح النور يا سليم
انا : ايه اللى مصحيكى بدرى كده
مريم : انا مانمتش اصلا
انا : ليه كده ..... فى حاجه مضايقاكى
مريم : انت مش ملاحظ ان احنا متجوزين بقالنا اكتر من 5 شهور ولحد دلوقتى محصلش حمل
انا : هو ده بقى اللى مضايقك
مريم : وانت شايف ان ده موضوع بسيط ومايستاهلش
انا : انتى ليه محسسانى ان احنا متجوزين من 5 سنين ..... يابنتى احنا يادوب متجوزين من 5 شهور بس ووارد جدا ان الحمل مايحصلش فى اول سنه عادى يعنى
مريم : طب ايه رائيك نروح نكشف ونحلل
انا : وافرض كشفنا وطلع فى عيب فى اى حد فينا احنا الاتنين ايه هيحصل وقتها ..... انتى ممكن تسيبينى
مريم : لا طبعا سواء كان العيب فيا او فيك مش هسيبك مهما حصل
انا : يبقى ايه لازمة الكشف اصلا
مريم : بس لو فى مشكله نحاول نعالجها قبل ما يفوت الاوان
انا : .........
مريم : ساكت ليه يا سليم
انا : مش عارف اقولك ايه
مريم : لا يا سليم لازم تعرف هتقول ايه
انا : حاضر يا مريم هسمع كلامك ونكشف
مريم : امتى يا سليم
انا : اى وقت انتى تكونى مستعده
مريم : انا هكلم لمياء واشوف ايه التحاليل المطلوبه ونعملها على طول
انا : طب تمام شوفيها وبلغينى ..... انا قايم اخد شاور علشان الحق اروح الشغل
مريم : لسه بدرى على الشغل احنا الساعه 6 دلوقتى
انا : معايا اجتماع مهم النهارده وفى شغل لازم اخلصه قبل الاجتماع
مريم : خد الشاور بتاعك وانا هنزل اجهزلك فطار
انا : ماتتعبيش نفسك يا حبيبتى انا مليش نفس اصلا
مريم : انت اتضايقت يا سليم من كلامى
انا : عمرى ما اقدر اتضايق منك يا حبيبتى بس انا فعلا مليش نفس للأكل
مريم : حتى لو قولتلك ان انا جعانه وعاوزه افطر معاك
انا : علشان خاطرك انتى اكل كل الاكل اللى فى البيت
مريم : طب يلا خد الشاور بتاعك وهجيبلك الفطار هنا نفطر وبعد كده روح شغلك
انا : حاضر يا حبيبتى

• اخدت شاور ولبست هدومى وفطرت مع مريم وطلعت على الشركه

• من ناحيه تانيه دياب صحى من النوم واتحرك على الشركه ووصل عندى المكتب وشاف السكرتيره

دياب : مستر سليم فى مكتبه
السكرتيره : انا جيت لقيته موجود وطلب محدش يدخله خالص غير حضرتك ولا احوله اى مكالمات
دياب : ليه كده
السكرتيره : شكله متضايق ومتعصب
دياب : انا هدخله
السكرتيره : اتفضل يا فندم

• دخل عليا دياب المكتب

دياب : مالك يا سليم فى ايه
انا : اقعد يا دياب
دياب : شكلها كده حكايه كبيره
انا : مش عارف بس **** يستر
دياب : فى ايه انت قلقتنى
انا : مريم عاوزانى اروح معاها علشان نكشف ونشوف سبب تأخير الحمل
دياب : المفروض فعلا تعملوا كده
انا : هنا بقى المشكله
دياب : ليه يا سليم هو انت فيك حاجه
انا : المشكله ان انا تمام ومفيش عندى اى مشاكل
دياب : هو انت كشفت
انا : انا كشفت وعملت كل التحاليل قبل ما افاتح مريم اصلا ولا اعترفلها بحبى ..... وقتها قولت لو فى مشكله يبقى اقفل على الموضوع اصلا
دياب : طالما كده يبقى ايه اللى مضايقك
انا : خايف مريم يطلع عندها مشكله ولا حاجه ساعتها ممكن تحصل مشاكل كتير
دياب : مشاكل ايه بالظبط
انا : الست لما تحس ان مفيش منها فايده دماغها بتودى وتجيب فى مصايب كتير ده غير انها هتشك انى ممكن اسيبها او اتجوز عليها
دياب : لو كان العيب منها انت من حقك تتجوز عليها عادى بس انا عارف انك مش هتعمل كده
انا : مريم بقى مش هتفكر غير فى كده وساعتها الحب اللى عايشين فيه هيتحول لجحيم
دياب : طب انت ناوى على ايه
انا : مش عارف ..... انا من الصبح قاعد بفكر ومش لاقى اى حل
دياب : طب انتوا هتكشفوا امتى
انا : لسه مش عارف ..... مريم هتكلم لمياء وتعرف منها التحاليل المطلوبه وعلى اساس كده هنتحرك
دياب : ياعم ممكن يكون مفيش مشاكل ويطلع تأخير طبيعى ..... ياما فى ناس كتير اخدوا سنين من غير خلفه ومفيش اى مشاكل
انا : انا قولت لمريم الكلام ده بس برضه لازم اعمل حساب كل حاجه كويس انا مش ناقص مفاجآت
دياب : انشاء **** مفيش اى مفاجأت وهيطلع فى الاخر تاخير طبيعى
انا : ياريت يا دياب ..... انا هعمل حركه واتمنى انها تنفع
دياب : حركة ايه دى
انا : اتفرج وانت تعرف

• طلعت تليفونى واتصلت بلمياء

انا : صباح الخير يا لمياء
لمياء : صباح النور يا سليم ..... ليه خرجت بدرى كده
انا : سيبك من الكلام الفاضى ده واسمعينى كويس
لمياء : هاه ..... خير يا سليم فى ايه
انا : الاول فى حد جمبك ولا حاجه
لمياء : حد ..... حد زى مين
انا : يوسف او مريم او شرين
لمياء : لا مفيش حد .... اه مفيش حد انا لوحدى
انا : طب كويس ..... دلوقتى يا ستى مريم قلقانه علشان اتاخرت فى الحمل
لمياء : ايوا هى قالتلى الموضوع ده وانا قولتلها ده شئ طبيعى ومش شرط يكون فى مشاكل بس هى دماغها ناشفه
انا : احنا لازم ناخدها على قد عقلها
لمياء : ايه .... قصدك ايه يا سليم
انا : انا اصلا كشفت وعملت تحاليل من قبل ما اتجوز مريم اصلا او حتى افاتحها فى موضوع الارتباط وكل تحاليلى كويسه ومعنديش اى مشاكل
لمياء : وانت عاوز ايه دلوقتى
انا : لو مريم تحاليلها كويسه يبقى تمام ومفيش مشاكل ..... لكن لو لا قدر **** طلع عندها مشكله اوعى تقوليلها
لمياء : ازاى يعنى يا سليم ..... ماهى لو عندها مشكله ولا حاجه لازم تاخد علاج علشان نحل المشكله
انا : ساعتها ابقى قولى ان احنا الاتنين عندنا مشاكل وابقى اكتبيلى معاها على اى علاج ..... اهم حاجه عندى ان مريم ماتحسش انها بأى عيب او مشكله
لمياء : وتفتكر مريم هتصدق الموضوع ده
انا : انا وانتى معايا هنقنعها
لمياء : مش عارفه اقولك ايه يا سليم
انا : ماتقوليش اى حاجه ..... وعلشان نسبك الحكايه انا هعمل تحاليل تانى مع مريم
لمياء : حاضر يا سليم انا هتصرف ..... بس عاوزه اسألك سؤال
انا : اتفضلى
لمياء : انت معندكش مشكله انك تعيش من غير *****
انا : مش هكدب عليكى واقولك انى مش عاوز ابقى اب .... بس انا عاوز اولادى من مريم مش من اى واحده غيرها ..... مريم بالنسبالى اهم من اى حاجه تانى بس ياريت هى تعرف الكلام ده وتبطل تفكير فى اى حاجه وحشه
لمياء : فهمتك يا سليم
انا : طب انا هقفل دلوقتى علشان معايا شغل وبعد ما هخلص هكلمك
لمياء : مع السلامه
• قفلت مع لمياء

دياب : كويس اللى انت عملته ده كده انت ومريم هترتاحوا ..... انسى بقى الكلام ده دلوقتى وركز علشان معانا شغل مهم النهارده
انا : متخافش يا دياب انا مركز كويس جدا وعارف بعمل ايه ..... هو كريم فين
دياب : مش عارف ..... هو دخل معايا الشركه وبعدها قال انه هيخلص حاجه ويحصلنى
انا : هيكون راح فين يعنى
دياب : اكيد عند هبه .... لانى شوفتها واحنا داخلين الشركه وهو وشه اتغير
انا : هههههههه **** يسهله
دياب : كريم ده وش فقر ومش هيرتاح غير لما يطفش البنت منه

• من ناحيه تانيه كريم قاعد مع هبه فى مكتبها

كريم : مالك يا هبه شكلك زعلانه
هبه : وانت يهمك زعلى يعنى
كريم : طبعا يهمنى زعلك
هبه : ولما انت يهمك زعلى عاوز تبعد عنى ليه
كريم : علشان خايف عليكى ..... عاوز ابعدك عن الخطر ..... انا حياتى اصعب مما تتخيلى
هبه : سيبنى اجرب واحكم بنفسى
كريم : ده مش فستان هتجربيه ولو طلح مش حلو هترجعيه
هبه : انا عارفه كويس انها تجربه مش ساهله وياريت بلاش تتعامل مع عقلى بالسذاجة دى
كريم : انا خايف عليكى
هبه : ماتخافش عليا يا سيدى انا كبيره بما فيه الكفايه وعارفه مصلحتى كويس
كريم : ........
هبه : ساكت ليه ما ترد
كريم : مش عارف اقولك ايه
هبه : قول اى حاجه بس ماتقعدش ساكت
كريم : هتصدقينى لو قولتلك انى بوقف قصادك تايه ومش عارف انا عاوز ايه ..... طول عمرى عايش لوحدى عمرى ماربطت نفسى بأى حد لا اهل ولا اصحاب ولا حبيبه .... طول عمرى بتنقل من مكان للتانى زى عسكرى الشطرنج .... مصيرى مش فى ايدى ..... طول عمر مصيرى فى ايد قوه اكبر منى
هبه : وايه اللى غاصبك على كل ده .... ماتسيب كل التعب ده
كريم : قولتلك مصيرى مش فى ايدى
هبه : انت بتكذب على نفسك ..... انت اللى حابب الحياه دى
كريم : انا فعلا حاببها ومقتنع بيها واحلى حاجه ممكن تحصل انى اموت فيها
هبه : للدرجه دى
كريم : واكتر من كده
هبه : هو انت بتشتغل ايه بالظبط وماتقوليش قائد حرس مستر دياب لانى مش هصدق الكلام ده
كريم : هو فعلا جزء من شغلى حراسه دياب وسليم
هبه : والباقى
كريم : مش مسمحولى اتكلم باكتر من كده
هبه : طب انت تعرف مستر دياب من امتى
كريم : ياه ..... من زمان جدا .... من 25 سنه ..... انا تقريبا اعرف دياب من اول ما هاجر امريكا وهو صغير مع والده
هبه : يعنى انتوا اصحاب من يومها
كريم : وعمرنا ما افترقنا يوم واحد ..... كنا جيران واصحاب فى المدرسه حتى الفتره اللى نزل فيها دياب مصر فى الثانويه لعامه وانا دخلت المدرسه العسكريه علاقتنا فضلت مستمره ويمكن زادت اكتر

• فجأه تليفون كريم رن وكان دياب ورد عليه

كريم : ايوا يا مستر دياب ..... موجود يا فندم ..... دقايق واكون عند حضرتك

• قفل كريم مع دياب

هبه : اللى يشوفك وانت بتكلم دياب مايقولش ان انتوا اصحاب
كريم : الشغل حاجه والعلاقات الشخصيه حاجه تانيه ..... عن اذنك انا لازم اروح لمستر دياب
هبه : انا عاوزه اقعد معاك واتكلم بعيد عن الشركه
كريم : بعدين نشوف الموضوع ده
هبه : مفيش بعدين ..... النهارده هستناك بعد الشغل
كريم : النهارده صعب جدا مش فاضى خالص
هبه : خلاص يبقى هستناك يوم الخميس ..... فى كافيه كويس قريب من الشركه بحب اقعد فيه
كريم : حاضر
هبه : اقسملك ب**** لو ماجيتش انا ممكن اعمل مصيبه
كريم : هاجى ياستى خلاص

• نرجع عندى انا ودياب قاعدين ودخل علينا كريم

انا : ايه يا عم كريم مختفى فين
كريم : مش مختفى ولا حاجه انا موجود اهو ..... فى حاجه حصلت
انا : فى رساله وصلت من الفهد الاسود
كريم : بتقول ايه الرساله دى
انا : الجماعه هيوصلوا بكره بعد نص الليل ..... لكن الفهد الاسود هيوصل بعد بكره فى نفس المعاد
كريم : انا جاهز
انا : هتروح انت تستقبلهم وتطلع بيهم على فيلا المقطم ..... اما بالنسبه للفهد الاسود هينزل فى الفيلا عندك انت يا كريم
كريم : غريبه
دياب : مش غريبه ولا حاجه .... الفيلا بتاعتك بعيده عن الانظار نهائى ومحدش يعرفها غيرنا احنا ده غير انها فى الصحراء وبسهوله الطياره هتنزل هناك من غير ما اى حد ياخد باله
انا : ماتنساش يا كريم ان الفهد الاسود مينفعش يدخل اى مطار خصوصا بعد التطورات الجديده اللى حصلت وعيون استر اللى راصده كل حركه
كريم : تمام ..... يبقى لازم اروح الفيلا النهارده واتطمن على كل حاجه بنفسى .... انا بقالى كتير مش بروح هناك
دياب : طب يادوب تلحق تروح دلوقتى علشان تلحق ترجع بالليل
كريم : يعنى مش هتحتاجونى معاكم
انا : لا اتحرك انت ولو احتجناك هنكلمك
كريم : طب تمام

• فجأه الباب خبطت ودخلت السكرتيره وبلغتنى ان سماسرة البورصه وصلوا ودخلتهم غرفة الاجتماعات ..... اتحركت انا ودياب على غرفة الاجتماعات

انا : انا عارف ان انتوا مستغربين من الاجتماع المفاجئ ده
سمسار 1 : خير يا فندم فى ايه
انا : الفتره اللى جايه هتحصل حاجات كتير لازم نكون مستعدين ليها اتم استعداد ..... بس فى الاول لازم اعرف اخبار اسهم شركاتنا
سمسار 2 : ده تقرير مفصل عن حركة الاسهم طول الشهر اللى فات يافندم ..... واسهمنا مستقره وكل يوم قيمتها بترفع على عكس باقى السوق اللى كل يوم فى حال
انا : كده تمام ..... انا عاوزكم بقى تركزوا كويس فى اللى هقوله
سمسار 1 : احنا مركزين يا فندم
انا : الملف ده فى اسماء شركات كلها تابعه بشكل مباشر او غير مباشر بشركة United group وهتلاقوا كمان فيه حركة الاسهم طول ال 6 شهور اللى فاتت .... الشركه دى اسهمها مستقره بشكل غير طبيعى
سمسار 2 : حضرتك عاوز تشترى اسهم فى الشركات دى
انا : لا
سمسار 1 : امال حضرتك عاوز ايه
انا : عاوز الاسهم دى توقع الارض ..... مش عاوز يبقالها اى سعر ومش عاوز مخلوق يفكر مجرد تفكير انه يشترى سهم واحد
سمسار 2 : حضرتك عارف كويس ان الكلام ده ماينفعش مع شركه زى شركة United دى شركه كبيره وليها ناسها فى البورصه واى لعبه مش مظبوطه ممكن نورط نفسنا فى مشاكل ده غير اسمنا اللى ممكن يوقع فى البورصه
انا : الكلام ده لو هنلعب فى الاسهم نفسها ...... انا مش غبى علشان اخليكم تعملوا حاجه زى كده ساعتها يبقى بضحى بيكم ببلاش وانتوا رجالتى ومن قبلها كنتوا رجالة الدكتور سليم الجراح **** يرحمه
سمسار 1 : حضرتك احنا عارفين كويس المشاكل اللى كانت بين الدكتور سليم وشركة United وعارفين كويس شغلهم القذر بس للأسف مفيش اى دليل على الشغل اللى بيعملوه
انا : الدليل عندى وانا هعرف استغله كويس ..... انا طالبكم النهارده علشان تركزوا مع حركة الاسهم الفتره اللى جايه وعاوزكم كمان تعملوا كل اللى تقدروا عليه علشان تعطلوا حركة الاسهم
سمسار 2 : اذا كان كده بسيطه ..... بس فى حاجه لازم اوضحها لحضرتك ..... الشركات اللى حضرتك بتتكلم عليها دى مش مجرد شركات لا دى كيانات كبيره ..... راس مال اقل شركه فيهم ممكن يوقف اقصاد دول
انا : عارف الكلام ده كويس
سمسار 2 : واى هزه فى حركة الاسهم دى هتأثر على العالم كله مش بس شركات الجراح
انا : متخافش احنا فى الامان واسهمنا مش بسهوله تتهز
سمسار 1 : احنا هندرس الملف ده كويس وهنبلغ حضرتك بكل التفاصيل
انا : كده تمام
سمسار 2 : عن اذن حضرتك
انا : اتفضلوا

• بعد ما مشى السماسره قعدت مع دياب

انا : ليه كنت ساكت طول الاجتماع
دياب : كنت بسمعك علشان اتناقش معاك
انا : قول يا دياب كل اللى فى دماغك
دياب : اول حاجه انت جبت الملف ده من فين
انا : مش انت لوحدك اللى عندك مصادرك الخاصه اللى بتجيبلك كل اللى انت عاوزه
دياب : بس الشركات دى مفيش حد يعرف علاقتها بأستر نهائى ولا حتى الفهد الاسود نفسه
انا : قولتلك كل واحد وعنده مصادره الخاصه
دياب : طب سيبك من عرفت من فين ..... قولى بقى هتدمرها ازاى
انا : هو ده الكلام المهم ..... الورق ده بيثبت تورط الشركات دى فى غسيل الاموال ده غير علاقتهم بمافيا السلاح والمخدرات والأدويه
دياب : ده ورق خطير جدا وصلك ازاى ...... الورق ده الفهد الاسود بقاله سنين بيحاول يوصله ومش عارف
انا : قولتلك من مصادرى الخاصه
دياب : لا يا سليم لازم اعرف انت جبت الورق من فين ...... الورق ده مش موجود غير عند استر نفسها ومحدش يعرف لحد النهارده استر بتخبى ورقها فين .... تيجى انت بكل بساطه توصل للورق ده
انا : **** وفقنى وقدرت اوصله عندك اعتراض
دياب : وياترى ايه فى تانى فى جرابك يا حاوى
انا : لسه فى كتير
دياب : فرجنى
انا : الملف ده فيه ورق بيثبت ان استر ممول رئيسى للمستوطنات الصهيونه ده غير انها بتمول جيش الدفاع الصهيونى ..... وبيثبت كمان تورط استر فى اللى بيحصل فى كل الخراب اللى احنا عايشين فيه من ارهاب ومخدرات وسلاح ومصايب غيرها كتير
دياب : .........
انا : ساكت ليه
دياب : بسمعك للأخر
انا : والملف ده كمان هتلاقى فيه اسماء كل الجواسيس والعملاء اللى قدرت استر تجندهم من اول يوم اشتغلت فيه الشغلانه دى مش بس فى مصر لا ده فى كل مكان فى العالم ..... وهتلاقى فى منهم جواسيس فى قلب المقاومه الفلسطينيه نفسها
دياب : انت مدرك الكلام اللى بتقوله ده
انا : طبعا عارف كوبس انا بقول ايه
دياب : الورق اللى انت بتتكلم عنه بمنتهى البساطه فى اجهزة مخابرات بتجرى وراه بقالها سنين
انا : عارف
دياب : الورق ده مش بس ضربه لأستر لوحدها ..... للى ده ضربه للى وراء استر نفسها
انا : علشان كده لازم نستغل الملفات دى بحرص لأن اى غلطه ممكن تدمر كل الشغل اللى فات
دياب : اهم حاجه دلوقتى نتحرك فيها هى البورصه ..... سوق البورصه سوق كبير وبسهوله نعرف نتعامل معاه
انا : احنا هناقش الكلام ده كله فى الاجتماع مع الفهد الاسود
دياب : يبقى لازم تخفى الورق ده لحد معاد الاجتماع
انا : متخافش دول مجرد صور لكن الاصل موجود فى الامان ..... والصور دى هخلص منها دلوقتى
دياب : ازاى
انا : هتشوف

• اخدت الورق وشغلت مفرمة الورق وحطيته فيها

دياب : كده تمام جدا ..... طب احمد صقر هنعمل معاه ايه دلوقتى
انا : انا جهزت التقرير اللى فيه كل الخساير وهبعته النهارده لأحمد صقر وبكره الفلوس هتدخل حسابى
دياب : وتفتكر احمد صقر هيستسلم بسهوله كده
انا : لا طبعا .... هو اكيد دلوقتى قاعد بيفكر هيرد علينا ازاى ..... او بمعنى اصح بيرتب مع استر للضربه اللى جايه
دياب : انت عارف ان البيرت ورجالته راحوا امبارح بعد نص الليل الاستراحه اللى خطفنا منها سعد صقر
انا : كنت متوقع حاجه زى دى ..... خليهم كده مصدومين من الضربه دى لحد ما يتصدموا بالضربه اللى بعدها
دياب : خد بالك من نفسك يا سليم
انا : متخافش عليا يا دياب ..... انا عارف كويس بعمل ايه
دياب : انت الوحيد اللى معاك خيوط المرحله اللى جايه ولو حصلك اى حاجه هنرجع تانى من الاول
انا : متخافش يا دياب ..... انا لو حصلى اى حاجه هتوصلك كل الخيوط اللى عندى
دياب : هتوصلنى ازاى ..... هو الورق ده فى حد تانى معاه نسخه منه
انا : لا طبعا ..... بس انا سايب خبر مع شخص معين معاه نص الطريق للورق ده
دياب : والنص التانى مع مين
انا : النص التانى مع يوسف
دياب : ليه هو الشخص ده مش يوسف
انا : لا مش يوسف
دياب : مين الشخص ده
انا : لو حصلى حاجه هيجيلك من نفسه متخافش هو عارفك كويس جدا وهيعرف يوصلك
دياب : تمام يا سليم زى ما تحب ...... طب اسيبك انا دلوقتى واروح اشوف شغلى
انا : انا تعبان ومحتاج ارجع الفيلا ارتاح
دياب : خير يا سليم تعبان ليه
انا : حاسس بشوية ارهاق محتاج اروح انام شويه
دياب : تحب اطلب دكتور يكشف عليك
انا : لا مش محتاجه انا بس اروح انام وكل حاجه هتبقى تمام
دياب : طب انا جاى معاك اوصلك
انا : لا متتعبش نفسك وشوف شغلك
دياب : مفيش الكلام ده ..... انا هوصلك وبعدين ارجع الشغل تانى

• نزلت مع دياب ووصلنى الفيلا ورجع الشركه تانى ..... انا دخلت الفيلا وكانت مريم ولمياء وشرين قاعدين مع بعض

مريم : ايه اللى جابك بدرى يا سليم
انا : حسيت نفسى تعبان ومحتاج ارتاح شويه
مريم : انت فعلا وشك اصفر وباين عليك التعب
انا : انا هطلع الاوضه انام شويه وهبقى كويس
لمياء : اطلع الاوضه وانا هجيب شنطتى واكشف عليك
انا : الحكايه مش مستاهله يا لمياء

• فجأه اغمى عليا وانا بتكلم

مريم : الحقينى يا لمياء
لمياء : اطلعى بسرعه يا شرين هاتى شنطتى من الاوضه
شرين : حاضر
لمياء : تعالى يا مريم اسندى معايا علشان نقعده على الكنبه
مريم : حاضر

• نادت مريم على الشغالين وشالونى وووصلنى للكنبه

لمياء : ارفعوا رجله عن مستوى جسمه

• نزلت شرين ومعاها شنطتها ومريم قاعده جمبى منهاره

لمياء : ابعدى يا مريم خلينى اشوف شغلى
مريم : حاضر حاضر

• قاست مريم الضغط والسكر ونبضات القلب

مريم : طمنينى يا لمياء
لمياء : الضغط واطى جدا والسكر كمان واطى
مريم : طب والحل ايه
لمياء : انا هعلقله محاليل دلوقتى
مريم : طب بسرعه يا لمياء ابوس ايدك
لمياء : متقلقيش انا هطلع اوضتى اجيب الحاجه من صندوق الاسعافات ..... وانتى ابعتى اى حد للصيدليه يجيب منها العلاج ده بسرعه
الداده : هاتى يابنتى انا هبعت فتحى يجيب الحاجه
لمياء : اتفضلى يا داده

• عملتلى لمياء الاسعافات اللازمه وفوقت

انا : ايه اللى حصل
لمياء : حمد لله على السلامه يا اخى خضيتنا عليك
انا : هو ايه اللى حصل بالظبط
مريم : فجاه وانت بتكلمنا اغمى عليك .... لمياء قاست الضغط والسكر وكانوا واطيين جدا
لمياء : واضح كده انك اتعرضت لضغط عصبى شديد
انا : كان معايا شغل مهم جدا وكان فى مشاكل فى الشغل
لمياء : لازم تاخد بالك من صحتك شويه يا سليم
مريم : الشغل مش هينفعنا بحاجه لو حصلك اى حاجه لاقدر ****
شرين : وجودك وسطينا يا سليم اهم من اى شغل فى الدنيا
انا : ما تعملوهاش حكايه بقى دول شوية هبوط من ضغط الشغل
مريم : انت بقالك كتير ضاغط نفسك ومش مهتم بأكلك ولا بتنام كويس
انا : الفتره دى تعدى وبعدها هرتاح واعمل كل اللى انتوا عاوزينه
مريم : بابا كان دايما بيقول كده لحد ما مات بسبب الشغل
انا : خلاص بقى ماتعملوهاش حكايه قولنا
لمياء : خلاص يا مريم كفايه كلام واطلعى معاه الاوضه خليه يرتاح لحد ما الغداء يجهز واخلى مرفت تطلعه عندكم فى الاوضه
انا : لا انا مش عاوز اكل دلوقتى ..... انا محتاج انام واشبع نوم الاول وبعد ما اصحى اكل كل اللى انتوا عاوزينه
لمياء : خلاص يا مريم سيبيه ينام براحته

• طلعت الاوضه مع مريم وغيرت هدومى واترميت على السرير وروحت فى ماحسيتش بنفسى غير الساعه 8 بالليل ..... صحيت لقيت مريم قاعده جمبى على السرير

مريم : اخيرا صحيت
انا : هى الساعه كام دلوقتى
مريم : الساعه دلوقتى 8
انا : ياه انا نمت كل ده
مريم : ارحم نفسك شويه يا سليم حرام عليك انا محتجالك
انا : استحملينى يا مريم الفتره دى
مريم : حاضر يا سليم ..... قوم خد شاور على ما ابلغهم يجهزوا الاكل
انا : حاضر يا مريم

• اخدت الشاور ونزلت وكان الكل موجود حتى دياب كان قاعد مع يوسف بعد ما عرف باللى حصل ..... اتعشينا كلنا مع بعض وسهرنا شويه مع بعض نرغى ونهزر بعيد عن القرف وضغط الشغل وبصراحه انا كنت محتاج افصل شويه

• خلص اليوم وكنت بعت لأحمد صقر التقرير وبالفعل تانى يوم جالى اشعار من البنك بتحويل المبلغ ..... يومها اخدت اجازه من الشركه وقعدت فى الفيلا بأمر من لمياء ومريم ودياب

• كريم استقبل الجماعه اللى وصلو من السفر قبل الفهد الاسود ووصلهم فيلا المقطم

• من ناحيه تانيه استر قاعده ودخل عليها البيرت

البيرت : مصيبه يا استر
استر : مصيبة ايه تانى
البيرت : كل شغلنا مهدد بالخطر ..... ومش شغلنا احنا بس لا ده شغل المنظمه كله
استر : ايه فى اخلص
البيرت : مصدرنا عند سليم الجراح ودياب بيقول ان سليم حط ايده على ورق مهم يخص شغلنا وشغلك انتى كمان
استر : ورق ايه ده
البيرت : مصدرنا مقدرش يسمع كل حاجه ..... بس كل اللى قدر يسمعه ورق يخص اسماء ناس انتى مجنداها فى مصر وازاى هما هيعرفوا يتعاملوا معاهم
استر : الورق ده فين
البيرت : للأسف سليم فرم الورق ده فى مكتبه وبعد كده حرقه
استر : دى كارثه .... يعنى دياب مش معاه نسخه من الورق ده
البيرت : لا ..... بس سليم سايب طريقه لدياب علشان يعرف يوصل للورق لو حصله حاجه
استر : كده تمام
البيرت : وفى حاجه تانى
استر : كمل باقى المصايب
البيرت : سليم طلع هو اللى خطف رجالة احمد صقر وطلع كمان ماسك حاجات على احمد صقر وساومه بيها وخلاه يدفع كل الخساير اللى اتسبب فيها ..... يعنى من الاخر الضربه اللى عملناها سليم طلع منها اقوى من الاول
استر : سليم كده وجوده بقى خطر علينا كلنا ولازم نخلص منه
البيرت : قوليلى اعمل ايه
استر : سليم لازم يموت ..... ومش سليم بس
البيرت : قصدك دياب
استر : لا سيب دياب للأخر علشان هو اللى هيوصلنا للورق
البيرت : امال نخلص من مين تانى
استر : كريم ..... لازم اقصقص ريش دياب علشان اعرف استفرد بيه وكمان علشان اوصل للورق ده
البيرت : انا هجهز خطه وبعدين نتحرك
استر : جهز خطه مناسبه واتحرك فورا
البيرت : حاضر

• تانى يوم كريم قاعد فى الفيلا بتاعته وفجأه طياره عملت هبوط عند الفيلا ونزل منها الفهد الاسود وكان كريم فى استقباله ..... دخل الاتنين الفيلا مع بعض وسابوا الحراسه من بره

الفهد الاسود : طمنى يا كريم ايه الاخبار
كريم : كله تمام يا فندم
الفهد الاسود : ايه اخبار سليم ودياب
كريم : ماشين على الخطه بالظبط
الفهد الاسود : ايه حكاية الورق اللى مع سليم
كريم : زى ما بلغت حضرتك فى الايميل
الفهد الاسود : سليم جاب الورق ده ازاى
كريم : رفض يقول ..... ده غير انه كان تعبان اليومين اللى فاتوا وقولنا نستنى لما حضرتك توصل وتقعد معاه يمكن يقولك
الفهد الاسود : عاوز اقابل سليم ودياب قبل الاجتماع
كريم : حاضر يا فندم
الفهد الاسود : هاتهم هنا بكره بعد نص الليل
كريم : حاضر يا فندم ..... اطلع حضرتك استريح وانا هنفذ كل اوامر حضرتك
الفهد الاسود : ده مش وقت راحه يا كريم ..... احنا دلوقتى فى مرحله مهمه جدا فى اللعبه
كريم : انا فاهم قصد حضرتك كويس ومش عاوزك تخاف احنا مركزين جدا
الفهد الاسود : انا عارف كويس يا كريم ان انا يوم ما سيبت مصر سايب ورايا رجاله تسد ..... بس برضه لازم اتطمن على كل حاجه بنفسى
كريم : زى ما تحب حضرتك
الفهد الاسود : طب سيبك من الشغل دلوقتى وطمنى على البنات
كريم : كلهم بخير ..... لمياء كويسه جدا مع يوسف وابنها بخير
الفهد الاسود : طب ومريم وشرين
كريم : كويسين جدا ومرتاحين على الاخر
الفهد الاسود : وحشونى جدا
كريم : خلاص هانت يا دكتور كلها ايام وتقدر تشوفهم براحتك ..... وبعدين انا حضرتك يوميا ببعتلك صور ليهم واطمنك على اخبارهم
الفهد الاسود : الصور مش زى الحقيقه يا كريم ..... عارف يعنى ايه اب يتحرم من بناته ويبقى علاقته بيهم مجرد صور
كريم : بصراحه يا فندم معرفش انا ماكنتش اب قبل كده بس مقدر احساس حضرتك
الفهد الاسود : ولا مقدر ولا نيله ..... انا هطلع انام دلوقتى وعاوزك ترجع عند سليم ودياب وتطمنهم ان انا وصلت بالسلامه علشان زمانهم قلقانين وبكره بعد نص الليل تجيبهم عندى
كريم : حاضر يا فندم

• رجع كريم وطمنى انا ودياب وبلغنا بالاجتماع بتاع نص الليل

• تانى يوم اخدت مريم وروحنا معمل التحاليل علشان نعمل التحاليل اللى قالت عليها لمياء .... بعد ما خلصنا ونازلين من المعمل

انا : اهو يا ستى عملت التحاليل زى ما كنتى عاوزه يارب ترتاحى
مريم : انا عارفه انى تاعباك
انا : تعبك على قلبى زى العسل
مريم : بحبك يا سليم
انا : وانا بعشقك
مريم : ايه رائيك نرجع الفيلا نغير هدومنا ونخرج نتعشى مع بعض
انا : احنا فعلا هنرجع الفيلا بس انا هخرج تانى علشان معايا شغل
مريم : شغل ايه ده يا سليم
انا : شغل مهم جدا ..... انا بقالى يومين قاعد معاكى فى الفيلا وفى شغل متعطل لازم يخلص
مريم : طب هتتاخر
انا : ايوا هتاخر نامى انتى
مريم : ماشى يا سليم خلينى وراك لما اشوف اخرتها

• فجأه واحنا خارجين من المعمل فى عربيه عدت قصادنا وفيها ناس مسلحه ضربوا علينا نار ..... انا اخدت طلقه ووقعت ومريم قعدت تصرخ .... والجاردات فى منهم اللى جرى وراء العربيه وفى منهم اللى فضل معانا وطلبوا الاسعاف

• من ناحيه تانيه كريم قاعد مع هبه فى الكافيه

كريم : اهو ياستى جيت علشان ماتزعليش
هبه : عارف لو كمنتش جيت كنت هتشوف منى وش تانى خالص ..... وش ممكن يكرهك فى حياتك كلها
كريم : ليه كده بس

• كان كريم وهبه بيضحكوا ويهزروا مع بعض وكان فى واحد ماسك مسدس موجهه ناحية كريم

• ياترى ايه هيحصل تانى ..... ده اللى هنعرفه فى الحلقه اللى جايه ..... اشوفكوا بخير