تاجر السعادة

فصل العودة

رجعتلكم تاني يابشوات يارب تكونو بخير 

وحشتوني اووووي وحقكم عليا بجد غصب عني مشاكل وحوارات والدنيا مبتخلصش بس رجعتلكم تاني جاهزين ولا ايه 

اتمني تكلموني عالانستا انا عامله مخصوص عشانكم واي حد محتاج حاجه ممكن يتواصل معايا 

يلا بينا ....... 

الفصل الأول​

السعاده ..... اخيرا عرفت معنى السعاده ..... السعاده ماهى الا وهم كبير عشت طول عمرى ادور عليه وللاسف كان قصادى ومش شايفه ..... وانا صغير كنت فاكر ان السعاده فى العيله واللمه والاصحاب ...... بعدها قولت جايز تكون فى الفلوس والمركز الكبير ...... كنت كل ما اوصل لحاجه اكتشف ان هى مجرد شكل من اشكال السعاده لكن مش هى دى السعاده اللى انا كنت بحلم بيها ..... لحد ما جيه اليوم اللى عرفت فيه المعنى الحقيقى للسعاده ...... السعاده الحقيقيه هى الرضا عن حالك مهما كان حالك صعب ..... السعاده ممكن تكون فى روتين الحياه الطبيعى اللى انت كنت شايفه ممل ..... السعاده فى شغلك اللى انت كنت شايفه متعب وبتتمنى تسيبه ..... السعاده فى كل حاجه انت شايفها عاديه مع ان فى غيرك بيحلم يبقى عنده ولو ربع اللى عندك ..... السعاده الحقيقيه فى الرحله نفسها ..... فى الايام المره قبل الايام الحلوه ...... السعاده الحقيقيه فى نومه بعد يوم طويل ومتعب ومليان بالمشاكل والصراعات ..... السعاده فى اكله حلوه بعد جوع ..... السعاده فى فسحه حلوه بعد شغل وتعب ايام وليالى ..... السعاده الحقيقيه لما تلاقى هدف تعيش علشانه وتموت فى سبيل تحقيقه ...... هو ده المعنى الحقيقى للسعاده واللى عرفته بعد رحلة بحث طويله ..... انا تاجر السعاده واللى عشت طول عمرى اوزع السعاده على الناس من غير ما اعرف ايه هى السعاده ولا حتى احس بطعمها بس جيه الوقت اللى اجرب فيه السعاده ..... انا سليم الجراح اللى عيشت حياتى كلها بدور على معنى السعاده واخيرا عرفته ...... يلا بينا نبدأ قصتنا من بعد ما وقفنا

• بعد فرح شرين بنت عمى بكام شهر كانت الامور مستقره ..... صحيت الصبح بدرى كالعاده علشان اروح شغلى ..... مريم كانت نايمه مارضيتش اقلقها لانها طول الليل صاحيه علشان الحمل تاعبها ..... بس وانا خارج بتسحب من الاوضه مريم صحيت

مريم : برضه خارج تتسحب زى الحراميه على الصبح
انا : صباح الورد يا حبيبتى
مريم : صباح الخير يا حبيبى
انا : انا ماكنتش عاوز ازعجك علشان تنامى براحتك خصوصا انك مش بتعرفى تنامى بالليل كويس
مريم : اعمل ايه ابنك تاعبنى الليل كله عمال يرفص
انا : خليه يرفص براحته
مريم : طبعا وانت حاسس بحاجه ما انا اللى تعبانه
انا : يعنى هترتاحى لو بطل ترفيص
مريم : لا طبعا ..... ده لو سكت ساعه واحده انا بخاف واجرى على لمياء علشان اتطمن
انا : حرام عليكى تعبتى لمياء معاكى امبارح اتصلت بيا وبتقولى انها بتفكر تقفل العياده بسببك واحتمال تسيب البلد كلها
مريم : اعمل ايه يا سليم ما انا بقيت بخاف ..... خايفه ان اللى حصل قبل كده يتكرر تانى
انا : احنا قولنا ايه ..... مش اتفقنا ان احنا ننسى اللى فات
مريم : انا بحاول انسى بس خايفه
انا : متخافيش يا حبيبتى طول ما انا جمبك
مريم : هى دى الحاجه الوحيده اللى مطمنانى ..... وجودك جمبى عوضنى عن حاجات كتير
انا : وانا هفضل طول عمرى جمبك
مريم : خدنى فى حضنك يا سليم
انا : بس كده ..... تعالى يا حبيبتى فى حضنى

• اخدت مريم فى حضنى وقعدنا ساكتين اكتر من ربع ساعه لحد ما مريم راحت فى النوم عدلتها على السرير وغطيتها .... ودخلت الحمام اخدت الشاور بتاعى ولبست هدومى ونزلت ...... وانا خارج فى الجنينه شوفت عمى روحت اصبح عليه
انا : صباح الورد على اجمل عم فى الدنيا كلها
عمى : صباح الفل يا حبيبى
انا : ايه اللى مصحيك بدرى كده
عمى : الواحد حاسس بملل بعيد عنك
انا : مش انت اللى قررت تسيب الشغل وتعيش حياتك ورميت كل حاجه عليا انا ودياب
عمى : بناتى كانوا وحشونى ومحتاج اعيش معاهم الباقى من عمرى ده غير ان الصحه معادتش زى الاول ومابقتش استحمل الشغل زى الاول
انا : **** يديم عليك صحتك يا عمى
عمى : طمنى على الشركه يا سليم
انا : كل شئ ماشى تمام ومفيش اى مشاكل
عمى : والشغل التانى
انا : برضه تمام واحنا سابقين بخطوات كتير جدا والجماعه اياهم مش هيعرفوا يحصلونا خلاص
عمى : الحمد لله ..... طب عرفت مين الشخص الجديد اللى مسك الملف بتاعنا
انا : خلاص قربت اوصله
عمى : مش عارف ليه شاكك انك عارف مين الشخص ده ومخبى
انا : هههههههه انت بقيت تشك فيا كتير الايام دى
عمى : اصل اللى انا شوفته منك مش قليل
انا : ههههههههه انت برضه مش عاوز تنسى اللى فات
عمى : هو اللى فات ده حاجه بسيطه علشان يتنسى
انا : على العموم سيبك من ده كله وقولى ..... انت مش ناوى تيجى الشركه ولو حتى زياره ..... كل الموظفين هناك بيسألوا عليك
عمى : ماشى يا سليم اهرب براحتك ..... انا فعلا بقالى يومين بفكر اروح الشركه اتطمن على الشغل بنفسى واشوف خط الانتاج الجديد
انا : طب ما تعمل كده ايه اللى مانعك
عمى : احتمال كبير اروح الشركه النهارده بعد الضهر بس ماتقولش لحد انى رايح الشركه
انا : ليه يعنى
عمى : عاوز اعملها مفاجأه
انا : هتبقى احلى مفاجأه

• واحنا بنرغى دخل علينا يوسف

يوسف : صباح الخير يا عمى ..... صباح الخير يا سليم
انا وعمى : صباح الخير يا يوسف
يوسف : خير كده قاعدين فى الجنينه الصبح بدرى
انا : انا كنت رايح الشركه وشوفت عمى قاعد قولت اقعد معاه
عمى : انت رايح شغلك يا يوسف
يوسف : ايوا يا عمى خير فى حاجه
عمى : بلغ الثعلب ان الاجتماع بتاع الشهر ده هيكون هنا فى مصر علشان كده لازم يرتب اوضاعه ويأمن مكان مناسب للإجتماع
يوسف : حاضر يا فندم انا هبلغه ..... فى حاجه تانيه تحب ابلغه بيها
عمى : لا خلاص كده مفيش حاجه تانيه بس عاوزكم تكونوا جاهزين للاجتماع ده كويس جدا
يوسف : انا عن نفسى جاهز ومحدد اكتر من مكان ينفع للإجتماع مش ناقص غير ان حضرتك وسليم تدولنا الموافقه علشان نبدأ فورا
عمى : جهز تقرير بالاماكن واعرضه على الثعلب وبعد كده نتجمع كلنا ونقرر
يوسف : حاضر يا عمى
انا : طب انا اتاخرت ويادوب اروح اشوف شغلى
عمى : الساعه لسه سبعه يا سليم والشركه على بعد ربع ساعه بالعربيه
انا : حضرتك عارف انى بحب اروح شغلى بدرى يا عمى
عمى : انت فطرت ولا زى عادتك
انا : هفطر فى الشركه
عمى : لا استنى نفطر كلنا مع بعض
انا : حاضر يا عمى

• فطرت مع عمى ويوسف بعدها روحت الشركه ..... اول ما وصلت لقيت عربية دياب موجوده طلعت على طول وروحت المكتب عند دياب

انا : صباح الفل يا دياب
دياب : صباح الخير يا سليم
انا : انت خلاص اتعودت انك تيجى الشركه بدرى
دياب : اعمل ايه بقى ..... منه لله واحد صاحبنا هو اللى عودنى على كده
انا : هههههههه ماشى يا دياب ..... طمنى عليك
دياب : الحمد لله كويس والامور مستقره
انا : وايه اخبار ليندا وريهام
دياب : كويسين جدا والامور مستقره على الاخر
انا : يارب دايما
دياب : طمنى انت على مريم
انا : كويسه بس خايفه
دياب : خايفه من ايه
انا : الظروف اللى احنا مرينا بيها خلت مريم خايفه من المستقبل واللى ممكن يحصل فيه
دياب : سيبها على ربك هيعدلها
انا : طمنى على شغلنا
دياب : كل شئ ماشى تمام وامبارح سلمنا شحنه السلاح للجماعه
انا : كويس جدا
دياب : وبالنسبه لشحنة الادويه اتحركت النهارده الفجر وفى طريقها لسيناء علشان تعبر الانفاق النهارده بعد نص الليل
انا : اخبارك كلها زى الفل
دياب : مش ناوى تريحنى وتقولى مين الشخص اللى مسك بعد استر
انا : انتوا ليه مصممين ان انا عارف مين الشخص ده
دياب : يا سليم انا عارفك كويس ومتاكد انك عارف مين الشخص ده
انا : ايه بقى دليلك على الكلام ده
دياب : دليلى هو اللى انت عملته الاسبوع اللى فات فى شحنة القمح اللى كانت المفروض تسافر وانت وقفتها بعد ما خرجت وامرت انها ترجع فى نص الطريق وامرت كمان بأعدامها
انا : كان لازم يحصل كده لان شحنة القمح كانت مسرطنه
دياب : مين اللى قالك المعلومه دى
انا : عرفتها من مصادرى الخاصه
دياب : معنى كلامك ده ان احنا اتكشفنا واتعرف ان احنا بنبعت معونات لفلسطين ودى فى حد ذاتها كارثه
انا : لا متخافش احنا ماتكشفناش وعلشان كده سيبت شحنة السلاح تتحرك امبارح فى معادها عادى جدا
دياب : امال ايه حكاية القمح المسرطن
انا : دى كانت ضربه لشركاتنا مش اكتر ..... الجماعه اياهم بقالهم فتره بيحاولوا يلاقوا ثغره يضربوا فيها شركاتنا وقدروا فعلا يوصلوا للمورد اللى احنا بنتعامل معاه وعملوا الحركه دى على اساس ان احنا نبيع القمح والناس يحصلها مصايب واسم شركتنا يتهز فى السوق
دياب : ده كده اللعب احلو على الاخر
انا : ولسه هتشوف اللعب اكتر فى الفتره اللى جايه
دياب : مش عارف ليه شاكك ان استر هى اللى وراء الموضوع ده
انا : استر مين يا دياب .... استر ماتت من بدرى
دياب : وانا مش بالع قصة موتها دى خصوصا بعد اختفاء جثتها من المشرحه فى نفس يوم القبض عليها
انا : لا يا دياب انا متاكد من موت استر زى ما انا متاكد انى شايفك قصادى
دياب : طالما ماتت يبقى جثتها راحت فين والسؤال اللى اهم من ده ... لو كانت استر ماتت فعلا يبقى مين اللى بيلعب بنفس اسلوبها
انا : شخص كان عايش مع استر فتره كبيره وبيشتغل معاها من غير ما اى مخلوق يعرفه ولا يحس بيه .... شخص راجع ينتقم لأستر ويكمل شغلها
دياب : وانت عارف الشخص ده
انا : اكيد طبعا عارفه
دياب : مين بقى الشخص ده
انا : هتعرف فى الاجتماع اللى جاى كل اللى انت مش عارفه
دياب : ماشى يا سليم انا هصبر بس خليك فاكر كويس ان احنا كلنا فى مركب واحده
انا : مش محتاج تفكرنى يا دياب وماتفتكرش انى مخبى عليك مين يبقى الشخص ده علشان مش واثق فيك لانى زى ما انا مخبى عليك انا كمان مخبى على عمى
دياب : هو ده كمان اللى انا مش فاهمه انت ليه مخبى السر ده على عمك .... انت ناسى ان عمك يبقى رئيس المجموعه
انا : لا مش ناسى بس عمى واثق فيا وعارف انا هتعامل ازاى ومستحيل اعمل اى تصرف من غير ما ارجعله
دياب : كلنا واثقين فيك يا سليم
انا : سيبك من الكلام ده وطمنى ايه اخر اخبارك مع عيلة صقر
دياب : مفيش جديد ..... انا من بعد اللى عملته معاهم يعتبر قاطع علاقتى بيهم
انا : وامل صقر
دياب : امل صقر بتتجنبنى نهائى حتى لما بتيجى سيرتى قصادها مش بتنطق خالص وبتفضل ساكته وده اللى محيرنى
انا : وايه اللى يحيرك فى حاجه زى دى
دياب : امل صقر مش من الناس اللى ممكن تصفى بسهوله ..... امل صقر الموت اهون عليها من انها تتهزم
انا : بس برضه اللى انت عملته معاهم مش قليل ..... علية صقر شافوا وشك التانى بعد اللى عملته مع سالم وامينه وشافوا برضه انت ازاى انقذتهم من الفقر والسجن يعنى هيفكروا الف مره قبل ما يغدروا بيك
دياب : انا مش بتكلم على غدر يا سليم ..... انا عارف ومتاكد انهم مش هيقدروا يغدروا بس برضه مش عارف امل صقر بتفكر ازاى ..... امل صقر اكتر شخصيه تعبتنى فى حياتى عمرى ما قدرت اعرف هى بتفكر ازاى ولا عاوزه ايه
انا : ازاى يعنى
دياب : يعنى شئ منطقى انها تكره ابويا وامى بعد اللى حصل من ابويا وبرضه شئ طبيعى انها تكرهنى وترفض جوازى من ريهام لكن يوصل بيها الحال انها تحاول تسقط ليندا
انا : كلامك فيه شئ من المنطق بس ممكن يكون الغضب اللى جواها هو اللى كان بيتحكم فيها وفى تصرفاتها
دياب : مش عارف بقى
انا : على العموم طالما عيلة صقر قفلوا ابواب الشر يبقى احنا كمان لازم نسامحهم
دياب : السماح مش بالساهل يا سليم
انا : قصدك ايه يا دياب .... اوعى تكون ناوى على حاجه
دياب : لا طبعا انت اتجننت .... انا وعدتك ووعدت ريهام وسليم انى ابعد عن عيلة صقر كلها
انا : ايوا كده طمنتنى
دياب : مش باقى غير حاجه واحده بس هعملها
انا : حاجة ايه
دياب : سعد صقر
انا : يادى سعد اللى انت مش قادر تطلعه من دماغك ..... سعد فى السجن واتحكم عليه بالإعدام وكلها شوية وقت والحكم بتنفذ
دياب : مش هرتاح غير لما الحكم يتنفذ وسعد يموت لكن طول ما سعد عايش انا مش عارف ايه اللى ممكن يحصل
انا : ماتقلقش مفيش حاجه هتحصل انشاء ****
دياب : سيبك من الرغى ده ويلا على مكتبك شوف شغلك انا معايا شغل هنا
انا : بتطردنى من مكتبك يا دياب
دياب : ايوا بطردك يلا بقى ورينى عرض كتافك علشان اخلص شغلى واروح معايا مشوار مهم بالليل
انا : مشوار ايه ده
دياب : وانت مالك يا اخى
انا : ماشى يا دياب خليك فاكرها
دياب : حاضر هفتكرها يلا بقى اطلع بره

• من ناحيه تانيه فى فيلا احمد صقر ..... احمد صقر قاعد فى اوضته لوحده ودخل عليه سليم .... احمد صقر من بعد ما رجله اتقطعت ركب طرف صناعى مكان رجله المقطوعه وبيتحرك عادى فى كل مكان بس برضه اللى حصله كان صعب وفوق طاقته وحالته النفسيه متدمره وعلى طول حابس نفسه فى اوضته

سليم : صباح الخير يا بابا
احمد : صباح الخير يا حبيبى
سليم : عامل ايه النهارده
احمد : هعمل ايه يعنى اهو قاعد زى ما انت شايف
سليم : حاول يا بابا تخرج من اللى انت فيه ده
احمد : اخرج ليه ولمين
سليم : اخرج لينا .... يا بابا احنا كلنا محتاجينلك
احمد : محتاجينلى فى ايه انا خلاص مبقاش عندى حاجه اديها لحد
سليم : ازاى بقى انت لسه عندك كتير ..... انت برضه احمد صقر ..... احمد صقر هو روح البيت ده ومن غيرك البيت ملهوش طعم ولا فيه اى روح
احمد : ده كان زمان ..... زمن احمد صقر راح وانتهى
سليم : ماعاش ولا كان اللى يقول كده واللى يفكر بس يقول نص كلمه عليك هيشوف الجحيم على ايدى
احمد : لا يابنى مش عاوز اسمع منك الكلام ده تانى ..... انسى الدم والموت والخراب ده كله انا عاوزك تعيش حياتك زى اى حد فى سنك وتتمتع بشبابك ..... ماتبقاش زيى وتضيع حياتك من ايدك علشان كلام فارغ ..... عاوزك تحب وتتجوز وتخلف وتعيش الحياه
سليم : فى حاجات كتير فى الحياه اهم من الجواز والحب والكلام الفاضى ده
احمد : يبقى انت كده ماشى فى الطريق الغلط يا سليم
سليم : بالعكس يا بابا .... انا بالنسبالى الجواز مجرد وسليه علشان اخلف مش اكتر من كده لكن عمرى ما هحب اى واحده ولا اتعلق باى بنت مهما كانت ..... بنات حواء غدارين وانا مش مستعد اخسر نفسى علشان واحده
احمد : مين اللى حط فى دماغك الكلام الفاضى ده
سليم : اللى شوفته يا بابا مكانش قليل
احمد : اللى انت شوفته مايجيش 1% من اللى انا شوفته بس انا برضه حبيت واتجوزت ومامتك وعمتك امانى طلعوا بنات اصول وواقفين جمبى وعمرهم مافكروا مجرد تفكير انهم يغدروا بيا حتى بعد اللى حصلى
سليم : وهى فين اللى زى ماما ولا زى طنط امانى
احمد : لا فى كتير يا حبيبى بس انت شيل الكلام الفارغ ده من دماغك
سليم : مش وقته الكلام ده انا مركز دلوقتى فى دراستى ومستقبلى ده غير ان انا لسه صغير على التفكير فى الجواز
احمد : صغير ايه ده انت خلاص هتدخل الجامعه
سليم : برضه لسه صغير
احمد : ده وانا فى سنك كنت خاطب والدتك واتجوزتها فى تانيه كليه ودى كانت الحاجه الوحيده اللى عملتها صح فى حياتى
سليم : وهى فين الست اللى زى ماما ..... الزمن اختلف يا بابا خلاص وماما وطنط امانى نوعيتهم خلصت خلاص
احمد : ماتقولش كده يابنى ..... البنات الكويسه كتير بس مستخبيه
سليم : لما الاقى واحده كويسه هبقى افكر فى موضوع الجواز ده لكن لحد ما الاقيها يبقى من الاحسن اقفل على الموضوع ده
احمد : طب ماعندك العيله مليانه بنات كويسه
سليم : انسى الموضوع ده خالص انا عمرى ما هفكر اتجوز واحده من العيله لو انطبقت السماء على الارض
احمد : ليه كده يابنى
سليم : ده قرار انا اخدته من زمان ومستحيل ارجع فيه ابدا وياريت ماتكلمنيش تانى على اى واحده من العيله
احمد : سيبك من بنات العيله ..... طب عندك اصحابك هنا وشلة المدرسه معقول مفيش اى واحده فيهم لفتت نظرك
سليم : لا خالص
احمد : انت هتكذب عليا يا سليم
سليم : انت عارفنى كويس يا بابا وعارف انى مش بكذب بس ليه بتقول كده
احمد : لان الحراسه بتاعتك بلغتنى انك دايما كنت بتزور واحده زميتلك فى بيتها
سليم : قصدك مين يا بابا
احمد : مليكه صاحبتك
سليم : ههههههههه
احمد : بتضحك ليه دلوقتى
سليم : علشان مليكه دى لعبه وراحت لحالها خلاص
احمد : لعبه ازاى يعنى مش فاهم
سليم : لان مليكه ووالدتها كانوا مزوعين فى حياتى بالقصد من استر علشان يعرفوا يلعبوا مع دياب مش اكتر
احمد : ازاى ده ..... مين اللى قالك الكلام ده
سليم : محدش قالى انا اللى اكتشفت الكلام ده بنفسى يوم ما استر حاولت تخطفنى عن طريق مليكه ووالدتها
احمد : امتى ده حصل وانت ازاى ماتقوليش حاجه زى كده
سليم : الكلام ده حصل فى اليوم اللى واجهتك فيه وقولتلك انى عارف علاقتك بأستر
احمد : يوم ماكنت متعصب ومشيت الحراسه بتاعتك
سليم : ايوا يا بابا فى اليوم ده استر بعتت ناس علشان يخطفونى من عند مليكه
احمد : طب ليه ماقولتليش اللى حصل ده قبل كده
سليم : اقولك ايه وانا شايفك حاطط ايدك فى ايد استر ومسلملها دماغك تلعب فيها براحتها
احمد : سامحنى يابنى على كل اللى انت شوفته بسببى
سليم : انا عمرى فى حياتى ما زعلت منك يا بابا ..... انا كنت زعلان عليك
احمد : انت شوفت بسببى حاجات كتير صعبه اثرت عليك وعلى تفكيرك وعلى حياتك كلها
سليم : مقدر ومكتوب .... سيبك من الكلام ده ويلا بينا ننزل تحت كفايه حبسه فى الاوضه
احمد : مش قادر يا سليم سيبنى هنا انا مرتاح
سليم : لا طبعا مش هسيبك ..... انا وعدتهم تحت انى مش هنزل من غيرك ..... يرضيك اطلع مش قد كلمتى
احمد : ماعاش ولا كان اللى يكسر كلمتك يا سليم حتى لو كنت انا
سليم : خلاص يلا بينا ننزل مع بعض وبعدين انا جعان وعاوز افطر ومش هاكل من غيرك
احمد : حاضر يا حبيبى

• نزل احمد مع سليم وكان كلهم منتظرين تحت

سليم : يلا بقى حضرولنا الفطار انا جعان وعاوز اخرج معايا يوم طويل النهارده
امانى : دقايق واحلى فطار يكون جاهز يا سليم باشا
فاتن : طلعت قد كلامك يا سليم
سليم : ليه يا ماما هو انتى فاكرانى عيل ولا ايه
فاتن : قطع لسان اللى يقول كده
سليم : عاوزين بقى ننسى كل اللى فات ونبص على المستقبل كفايه اللى حصل
فاتن : علشان ننسى اللى فات بجد ونرميه وراء ضهرنا بجد فى حاجه مهمه لازم انت اللى تعملها مش حد تانى
سليم : حاجة ايه يا ماما وانا اعملها فورا علشان خاطرك
فاتن : جدتك يا سليم
سليم : ياريت مانتكلمش فى الموضوع ده تانى
فاتن : لا هتكلم تانى وتالت ورابع والف ومليون .... يا سليم انت بقالك شهور مخاصم جدتك ومش بتكلمها وبتتجنب اى مكان هى موجوده فيه وهى كمان مجرد ما بتسمع صوتك وانت داخل البيت بتقوم تجرى
سليم : هى اللى عملت فينا كده ووصلتنا للحاله اللى احنا فيها
فاتن : طب علشان خاطرى انا سامحها ..... ماتقول حاجه يا عمى
عمر صقر : اقول ايه يا فاتن
فاتن : عقل سليم وفهمه ان اللى بيتكلم عنها دى مهما كانت جدته ومايصحش الحال يوصل بينهم لكده
عمر : سليم كبير وعاقل بما فيه الكفايه علشان يعرف انها جدته ومايصحش يعمل اللى هو بيعمله ولو حد طلب منه يصالحها يبقى ملهاش لازمه ..... لازم القرار يبقى بإرادته
فاتن : هو ده يا عمى اللى **** قدرك عليه ..... ماتقول حاجه يا احمد
احمد : انا قولت كتير بس الظاهر مفيش فايده
سليم : خلاص يا ماما ارجوكى كفايه كده
فاتن : لا مش كفايه يا سليم وهفضل اتكلم لحد ما تسمع كلامى
سليم : خلاص انا بقى هسيبلكم البيت كله وامشى علشان ترتاحوا

• قام سليم سابهم وخرج اخد عربيته ومشى ..... فاتن خرجت تجرى وراه بس مالحقتهوش ..... بعد كده رجعت تانى للجماعه ومسكت تليفونها وقعد تتصل على سليم فى الاول مكانش بيرد بعد كده قفل تليفونه

فاتن : سليم قفل تليفونه
عمر : قولتلك من الاول الموضوع ده بالذات لازم يتاخد بهدوء وبدون ضغط
فاتن : اعمل ايه يا عمى ..... عمتى صعبانه عليا واليومين دول صحتها على قدها ودايما حابسه نفسها فى اوضتها وبتعيط وانا خايفه عليها
احمد : انا هتكلم مع سليم لما يرجع
فاتن : وتفتكر هيسمع كلامك
احمد : احنا نعمل اللى علينا
امانى : انا شايفه ان احنا نكلم دياب وهو هيعرف يتصرف مع سليم ..... سليم مش بيقدر يكسر كلام دياب
فاتن : عندك حق يا امانى ..... بس تفتكرى دياب هيوافق يصالح سليم على عمتى .... اذا كان دياب نفسه رافض يصالحها
امانى : اهى محاوله وممكن تنجح
فاتن : انا هتصل بدياب بعد اذنك يا احمد
احمد : كلميه يا فاتن ولو انى شايف ان ده غلط ومش لازم نكسر امى اكتر من كده لان ده هيأثر عليها
فاتن : انا هتصرف فى الموضوع ده وهحاول احل الحكايه من غير ما حد يعرف
احمد : ماشى يا فاتن لما نشوف

• مسكت فاتن تليفونها واتصلت بدياب

فاتن : صباح الخير يا دياب
دياب : صباح النور يا فاتن اخبارك ايه وايه اخبار احمد دلوقتى
فاتن : كلنا كويسين يا دياب وبخير
دياب : بنت حلال انا لسه كنت هكلمك
فاتن : خير يا دياب فى ايه
دياب : رنيت على سليم دلوقتى لقيت تليفونه مقفول وقولت اكلمه على تليفون البيت عندك
فاتن : هو ده الموضوع اللى بكلمك علشانه
دياب : خير يا فاتن ..... سليم حصله حاجه .... طمنينى ارجوكى
فاتن : اهدى كده ماتقلقش سليم كويس وبخير
دياب : امال ايه فى وليه قافل تليفونه
فاتن : كنا قاعدين معاه من شويه وكنا بنحاول نصالحه على عمتى بس هو اتعصب وساب البيت ومشى وقفل تليفونه
دياب : انا دلوقتى فهمت
فاتن : وانا كنت بكلمك علشان تساعدنا فى الموضوع ده وتحاول تقنع سليم يصالح عمتى ..... انا عارفه ان سليم مش بيقدر يكسر كلامك انت بالذات
دياب : من غير ما تطلبى منى يا فاتن انا حاولت كتير مع سليم بس هو رافض الكلام فى الموضوع ده بس انا باخده بالهداوه علشان مايقفش .... انتى عارفه ان سليم عنيد ودماغه ناشفه ومش بيجى بالعصبيه بتاعتكم
فاتن : طب والحل ايه دلوقتى
دياب : سيبى الموضوع ده عليا وانا هتصرف فيه بنفسى
فاتن : مش عارفه اقولك ايه يا دياب ..... شكرا بجد على كل حاجه انت بتعملها
دياب : بتشكرينى على ايه يا فاتن ..... سليم ده ابنى زى ما هو ابنك انتى واحمد واى حاجه فى مصلحته انا هعملها بدون تفكير
فاتن : هو ده العشم يا دياب

• فجأه سليم دخل على دياب المكتب

دياب : اهو سليم وصل عندى اقفلى انتى يا فاتن وانا هكلمك بعد ما اشوفه
فاتن : بجد سليم عندك
دياب : ايوا .... هتكلم معاه وبعد كده اكلمك
فاتن : طب سلام يا دياب

• بعد ما قفلت فاتن مع دياب

عمر : سليم راح لدياب يا فاتن
فاتن : ايوا يا عمى لسه واصل عنده
امانى : طب كويس انك كلمتى دياب فى الوقت المناسب وفهمتيه اللى حصل
فاتن : بس ياريت دياب يعرف يعمل حاجه خصوصا بعد ما قالى انه حاول كتير مع سليم بس بدون فايده
امانى : انشاء **** المره دى هينجح
فاتن : ياريت

• من ناحيه تانيه عند دياب وسليم

دياب : ازيك يا مغلبنى
سليم : انت كنت بتكلم ماما
دياب : ايوا يا سيدى بكلم مامتك
سليم : ليه فى ايه
دياب : اتصلت بيا تحكيلى اللى انت عملته من شويه
سليم : ياريت مانتكلمش فى الموضوع ده
دياب : امال انت جايلى ليه لما مش عاوز تتكلم فى الموضوع ده
سليم : حسيت نفسى مخنوق قولت اجيلك .... انت الوحيد اللى بتعرف تخرجنى من اللى انا فيه
دياب : ايه اللى خانقك يا سليم
سليم : هتصدقنى لو قولتلك مش عارف
دياب : هسألك سؤال واحد وتجاوبنى بصراحه زى ما اتعودنا طول عمرنا
سليم : انا هجاوبك يا دياب من غير ما تسأل .... ايوا يا دياب انا عاوز اصالح جدتى بس كل ما احاول الاقى حاجز بينى وبينها ومش عارف ايه فى
دياب : وانت عرفت من فين انى هسألك السؤال ده
سليم : عيب عليك يا دياب لو بعد العمر اللى بينا مش هعرف انت بتفكر فى ايه ولا عاوز ايه
دياب : انت بقيت خطر يا سليم
سليم : ههههههههه سيبك منى وخلينا فى المهم
دياب : ماشى يا سيدى ..... تقدر تقولى ايه اللى مانعك انك تصالح جدتك
سليم : صدقنى مش عارف
دياب : ممكن يكون بسبب اللى بينى وبين جدتك انت مش قادر تصالحها
سليم : لا خالص .... انت ملكش علاقه بالموضوع
دياب : امال ايه السبب
سليم : صدقنى مش عارف ..... انا زى ما قولتلك حاولت كتير اصالحها بس برجع فى كلامى فى اخر لحظه
دياب : طب اسمع منى الكلمتين دول وحطهم حلقه فى ودنك ..... امل صقر فى الاول ولا فى الاخر جدتك ولو حصلها حاجه وماتت قبل ما تتصالحوا هتعيش طول عمرك ندمان انك ضيعت فرص كتير كان ممكن تصالحها فيها والندم ده هيضيع حياتك ..... انت جايز ماتحسش بكلامى دلوقتى لكن بكره لما تكبر هتعرف يعنى ايه الانسان يندم على فرصه كانت فى ايده ..... زى ما انا بندم على حاجات كتير ضاعت منى ومش عارف اعوضها
سليم : ايه الحاجات اللى انت ندمان عليها يا دياب
دياب : حاجات كتير فى منها اللى قدرت اعوضها وفى اللى مستحيل تتعوض
سليم : زى ايه
دياب : ندمان على كل لحظه بعدت فيها عن ابويا ...... وانا فى سنك او اصغر منك بشويه كنت شايف ان ابويا ده شئ طبيعى فى حياتى ومش ممكن هيفارقنى ابدا علشان كده كنت بقضى معظم وقتى مع اصحابى وماكنتش بقعد مع ابويا كتير لحد ما صحيت فى يوم على خبر وفاته ..... ودلوقتى بندم على كل لحظه انا ضيعتها بعيد عن ابويا ..... وبعدها ندمت على ناس كتير دخلتها حياتى وكانوا سبب رئيسى فى مصايب كتير حصلتلى ولسه بتحصلى ..... وندمت على علاقتى بعمتك ريهام اللى كنت هضيعها بغبائى وبسبب غبائى ده ضيعت من حياتنا سنين كان ممكن نقضيها مع بعض ..... علشان كده يا سليم انا مش عاوزك تندم زى ما انا ندمت
سليم : عمرى يا دياب ما هعرف معنى الندم طول ما انت معايا وفى ضهرى
دياب : طب لو ليا خاطر عندك زى ما بتقول حاول تتغلب على اى حاجه جواك وصالح جدتك
سليم : حاضر يا دياب بس ادينى شوية وقت
دياب : خد الوقت اللى يريحك بس ياريت ماتتاخرش
سليم : حاضر يا دياب
دياب : بس انا حاسس ان فى حاجه تانيه تاعباك غير موضوع جدتك
سليم : الحلم اللى ملازمنى بقاله اكتر من سنه دلوقتى
دياب : انت مش قولت بطل يجيلك
سليم : فعلا قعدت فتره مش بحلم الحلم ده ..... لكن بقالى اسبوع تقريبا رجع نفس الحلم من تانى وبشكل اقوى وافظع ..... بقيت كل ما اغفل ولو خمس دقايق اشوف نفس الحلم
دياب : كده فعلا فى مشكله
سليم : المشكله ان انا مش عارف مين البنت اللى بتظهرلى فى احلامى وعاوزانى انقذها ..... انا حاسس انى اعرفها كويس وشوفتها قبل كده بس مش قادر افتكر شوفتها فين
دياب : تحب اوديك لدكتور نفسى
سليم : انت شايفنى مجنون يا دياب
دياب : سلامتك من الجنون يا حبيبى ..... انا بقول ان الدكتور ممكن يكون عنده تفسير للحلم ده
سليم : لا الحكايه مش محتاجه دكتور ..... تقريبا من الضغط العصبى اللى احنا كنا فيه الفتره اللى فاتت
دياب : طب ابه رائيك اجهزلك رحله تسافر وتتفسح وتفك عن نفسك وتريح اعصابك شويه يمكن المشكله دى تتحل
سليم : مش هينفع دلوقتى خالص
دياب : ليه كده
سليم : انت ناسى ان بكره اول يوم فى الدراسه .... بكره اول يوم ليا فى الجامعه
دياب : تصدق نسيت ..... السنين جريت يا سليم .... والطفل الصغير كبر خلاص وهيدخل الجامعه
سليم : ههههههه ..... سنين ايه اللى جريت يا دياب انت خايف تعجز ولا ايه
دياب : انت مش هتبطل لماضه ياد انت
سليم : قول انك عجزت يا دياب
دياب : انا غلطان انى بتكلم مع واحد زيك اصلا
سليم : وانت ليك مين غيرى علشان تتكلم معاه
دياب : بصراحه مفيش
سليم : ايوا كده اتعدل .... همشى انا بقى
دياب : رايح فين انت هتتغدى معايا وتقضى اليوم كله معايا
سليم : انت مش معاك شغل ولا ايه النهارده
دياب : فى داهيه الشغل واى حاجه ممكن تشغلنى عنك يا باشا
سليم : انت ايه يا جدع انت
دياب : ايه فى يا سليم
سليم : انا بحبك اووووى يا دياب .... مش عارف حياتى من غيرك كانت هتبقى ازاى
دياب : انا اللى مش عارف حياتى من غيرك كانت هتبقى ازاى
سليم : طب شوف شغلك انت دلوقتى وانا همشى لانى معايا حاجات مهمه لازم اعملها
دياب : حاجات ايه دى
سليم : بسام صاحبى هيسافر النهارده الامارات وكنت رايحله اسلم عليه واوصله للمطار لانى مش هشوفه غير فى اجازة الصيف اللى جاى لانه زى ما انت عارف انه عايش فى الامارات مع اهله ومش بينزل هنا غير فى الاجازه
دياب : ماشى يا سليم براءه المره دى روح شوف صاحبك وسلم عليه
سليم : يلا سلام وياريت تبلغ كريم انه يخف عليا شويه مش كل فتره يغير طقم الحراسه قولتلك الف مره قبل كده انى بعرف احمى نفسى كويس
دياب : اموت واعرف بتكشفهم ازاى
سليم : عيب عليك لما تسأل سؤال زى ده وانا تربيتك
دياب : هههههه ماشى يا لمض يلا روح الحق مشوارك ...... استنى قبل ما انسى
سليم : خير فى ايه
دياب : خد ده كارت الفيزا بتاعك بدل اللى وقف
سليم : تصدق كنت ناسى .... وياترى اخبار الرصيد ايه
دياب : امشى يا جزمه من قصادى
سليم : هههههه حاضر
دياب : ياريت قبل ما يخلص الرصيد تبلغنى مش زى كل مره تعملنا فضايح فى المولات والمطاعم ويقولوا عليك شحات
سليم : هههههه و**** مش باخد بالى من الرصيد اصلا انا بحاسب وبمشى على طول
دياب : على العموم كلها 3 سنين وتكمل 21 سنه ساعتها هتقدر تتصرف فى حساباتك فى البنوك من غير ما تحتاجنى
سليم : حتى لو قدرت اتصرف فى فلوسى برضه هفضل اخد فلوس منك
دياب : امشى ياض من قصادى بدل ما امد ايدى عليك

• خرج سليم من عند دياب ..... وهو خارج عدى على سكرتارية دياب وكان فى المكتب بنتين مروه السكرتيره ولبنى زميلتها ..... سلم على مروه ومشى

لبنى : مين سليم ده اللى بيدخل مكتب مستر دياب بدون استئذان ..... انا شوفت صورته على مكتب مستر دياب واللى انا عارفاه ان اولاد مستر دياب صغيرين
مروه : سليم ده الخط الاحمر اللى ممنوع اى حد يقربله ..... انا فاكره اول ما استلمت الشغل سليم جيه لمستر دياب بس مستر دياب كان معاه اجتماع مهم وطلبت من سليم يستنى لحد ما الاجتماع يخلص ..... سليم قعد مستنى ولما الاجتماع خلص ومستر دياب خرج وشاف سليم مستنى وقتها خرب الدنيا وكان هيرفدنى لولا تدخل سليم ..... مستر دياب يومها قالهالى بوضوح ممنوع نهائى اى حد مهما كان يتعرض لسليم او يفكر يوقف فى طريقه
لبنى : للدرجه دى
مروه : واكتر من كده ..... مستر دياب بكل قوته وهيلمانه بينسى كل حاجه قصاد سليم
لبنى : ليه ده كله يطلع مين سليم ده
مروه : هو قريب مستر دياب ويبقى ابن اخو مراته
لبنى : بس اللى اعرفه ان مستر دياب متجوز اتنين واحده مصريه والتانيه امريكيه
مروه : سليم يبقى ابن اخو مدام ريهام وعلى فكره مدام ليندا برضه ممكن تخرب الدنيا لو حد اتعرض لسليم
لبنى : طب ازاى دى بقى
مروه : دى حاجه انا معرفهاش ولا اعرف ايه سر العلاقه اللى بين مستر دياب وسليم ..... كل اللى اعرفه ان سليم ده خط احمر عند مستر دياب والحاجات دى عرفتها من دردشة الموظفين مش اكتر ..... ولو عاوزه تحافظى على شغلك هنا لازم تعرفى الخطوط الحمراء واياكى تفكرى تقربى منها لان مستر دياب مش بيسامح فى الخطوط الحمراء اللى من اهمها سليم
لبنى : حاضر يا ستى هاخد بالى كويس

• مر اليوم بعد كده بشكل طبيعى ...... عمى جيه زياره للشركه والموظفين فرحوا لما شافوه واخدنا اليوم كله نلف فى الشركه والمصنع لحد ما خلصنا ورجعنا الفيلا
• سليم بعد ما وصل صاحبه للمطار رجع الفيلا وكان كلهم متجمعين معادا امل صقر اللى قاعده فى اوضتها

احمد : كنت فين يا سليم
سليم : روحت لدياب قعدت معاه شويه بعد كده روحت لبسام صاحبى قعدت معاه ووصلته للمطار علشان راجع الامارات بعد كده روحت مكان بحب اقعد فيه مع نفسى
احمد : وليه قافل موبايلك من الصبح
سليم : كنت محتاج اقعد مع نفسى وافكر فى شوية حاجات بهدوء بعيد عن كل الدوشه
احمد : انت كده كل ردودك جاهزه
سليم : علشان بقول الحقيقه شئ طبيعى ان كل ردودى تبقى جاهزه
احمد : ماشى يا سليم
سليم : طب عن اذنكم انا محتاج اطلع انام علشان معايا جامعه بكره الصبح
فاتن : مش هتتعشى يا سليم
سليم : اتعشيت بره ..... انا عاوز اطلع انام
فاتن : براحتك يا سليم

• سابهم سليم وطلع ..... وهو فى طريقه لأوضته مر من قصاد اوضة امل .... وقف شويه قصاد الاوضه وخبط على الباب

امل : مين
سليم : انا سليم
امل : .......
سليم : ممكن ادخل
امل : .......
سليم : لو مش عاوزانى ادخل قولى وانا هسيبك على راحتك
امل : ادخل يا سليم

• دخل سليم الاوضه وكانت امل قاعده على السرير

سليم : ازيك يا جدتى
امل : ههههههه جدتك انت لسه فاكر
سليم : دى حاجه عمرى ما نسيتها ولا هقدر اغيرها لا انا ولا انتى
امل : عاوز ايه يا سليم
سليم : مش عارف ..... وانا جاى كان فى كلام كتير جوايا كنت مرتبه علشان اقولهولك بس كل الكلام ده راح من دماغى .... كل اللى انا طالبه منك اننا ننسى اللى فات ونفتح صفحه جديده
امل : بسهوله كده عاوزنا ننسى الماضى .... وازاى ننسى الماضى وهو مترتب عليه المستقبل .... الماضى اللى انت عاوز تنساه هو الاساس .... فى الماضى هتلاقى اصلك وعيلتك وجدودك
سليم : هههههه جدودى واصلى وعيلتى ..... تقدرى تقوليلى مين جدودى .... واحد من جدودى مات من غير ما اشوفه او اعرفه بس كل الناس اجمعت انه كان راجل محترم وده معنديش اى مشكله معاه .... وواحد تانى حاول يقتلنى وكان السبب فى انى اعيش بعيد عن عيلتى لسنين كتير ..... والتالت كان طمعان فى البنت اللى ابنه حبها وبسببها قاطعه وسابه يموت غريب ..... ده غير حسين عمك واللى عمله مع ابويا لما حاول يرجع ارضكم اللى كان واخدها منكم ..... ولا اخوكى اللى حاول يقتلنى اكتر من مره وقبلها خطف بنتك .... ولا عيال العاصى واللى عملوه مع دياب .... دياب !! يا عينى عليك يا دياب عشت طول عمرك بتحاول تبعد عن العيله لكن هما اللى كانوا مصممين يحطوك فى حرب انت مش عاوزها ..... كلكم بتكرهوا دياب وانا مش عارف ايه سبب الكره ده ..... دياب اللى انقذنى من جدى وعيشت فى ضله وحمايته سنين كتير ..... دياب اللى علشان يحمينى ضحى بكل حاجه وبعد عن العيله علشان يعيش ليا وبس ..... دياب اللى يوم ما تعبت قطع حته من جسمه علشان اوقف على رجلى من تانى .... دياب اللى انقذنى من اخوكى وقبلها انقذ بنتك .... دياب اللى انقذنا كلنا من الفقر والخراب بعد ما ابويا والعيله اتورطوا فى تجارة الاثار ..... دياب اللى انتى هددتى امه وهو صغير وبسببها ماتت .... دياب اللى انتوا خوضتوا فى شرف امه ..... دياب اللى انتى حاولتى تقتلى ابنه وهو لسه جنين فى بطن امه ..... دياب اللى ابويا حاول يدمره فى شغله وضربه بالنار ومع ذلك لما ابويا وقع ملقاش غير دياب فى ضهره ..... وبرغم كل اللى بقولهولك دياب حاول كتير يبعدنى عن مشاكل العيله وحاول يصلح بينى وبينك ..... انا بقالى شهور عاوز اصالحك ومش قادر فى حاجه جوايا بتمنعنى اعمل كده .... انا فى كل المشاكل اللى اتعرضتلها كنت عارف انا عاوز ايه وايه القرار اللى هاخده لكن معاكى انتى تايه ومش عارف اخد قرار ..... النهارده بس قدرت اخد القرار
امل : وايه بقى القرار ده
سليم : القرار ده انك انتى جدتى اللى مش عاوز اخسرها .... جدتى اللى بحبها واللى عيشت معاها اجمل ايام طفولتى .... جدتى اللى مش عاوز افتكرلها غير كل خير ..... انا هسيبك تفكرى فى كلامى كويس وياريت تحسبيها صح المره دى عن اذنك

• قام سليم خرج من الاوضه وساب امل لوحدها ودخل اوضته اترمى على السرير وقعد يفكر لحد ما راح فى النوم
• تانى يوم الصبح بدرى دخلت عليه فاتن علشان تصحيه لقيته بينازع فى سريه زى ما يكون بيحلم بكابوس وبيتكلم وهو نايم

سليم : انتى مين .... انقذك ازاى
فاتن : اصحى يا حبيبى .... اصحى يا سليم

• قام سليم مفزوع
سليم : انا فين
فاتن : انت نايم يا حبيبى فى اوضتك ..... شكلك كنت بتحلم بكابوس
سليم : حلم غريب بيتكرر بقاله فتره
فاتن : حلم ايه ده يا حبيبى اللى يخليك بالشكل ده
سليم : هى الساعه كام دلوقتى
فاتن : الساعه 6.30 كفاياك نوم هتتاخر على الجامعه
سليم : حاضر يا ماما انا صحيت خلاص
فاتن : ايه اللى نيمك بهدومك كده
سليم : كنت قاعد على السرير والظاهر راحت عليا نومه
فاتن : طب يلا قوم خد الشاور بتاعك على ما اجهزلك الفطار
سليم : لا مليش نفس وكمان هتاخر على الجامعه
فاتن : مفيش الكلام ده اخلص بسرعه خد الشاور بتاعك على ما اجهز الفطار
سليم : حاضر يا ماما

• قام سليم اخد الشاور بتاعه وجهز ونزل تحت كان كلهم متجمعين وبيفطروا قعد سليم معاهم يفطر

احمد : النهارده اول يوم ليك فى الجامعه يا سليم
سليم : انا عارف انها مرحله جديده بس انا قدها
احمد : انا عارف انك قدها
امانى : تصدق يا سليم الجامعه بتاعتك وحشتنى اووووى
سليم : عارف يا طنط انك انتى وبابا كنتوا فى نفس الجامعه
امانى : كانت اجمل ايام

• فجاه الباب خبط وراحت الشغاله تشوف مين بعدها دخل دياب وريهام .... سليم اول ما شافهم قام سلم عليهم

دياب : صباح الخير يا جماعه
احمد : صباح الخير يا دياب تعالى افطر
دياب : لا انا سبقتكم انا وريهام
احمد : طب اقعد اشرب الشاى بتاعك
دياب : شكرا يا احمد انا شربت الشاى بتاعى قبل ما اجيلك
فاتن : ايه الزياره المفاجأه دى
دياب : ايه يا فاتن عاوزانى امشى ولا ايه
فاتن : لا بس مش متعوده انك تيجى الصبح بدرى كده
سليم : سيبيه يا ماما انا عارف ايه سبب الزياره المفاجأه دى
فاتن : وايه سببها يا سيدى
سليم : لا متاخديش فى بالك دى حاجه بينى وبين دياب وهو فاهمنى كويس
دياب : هههههههه ماشى يا لمض .... طب يلا خلص فطارك بسرعه علشان ماتتاخرش على الجامعه
سليم : انا فطرت خلاص ..... يلا بينا علشان مانتأخرش
فاتن : انتوا رايحين فين فهمونى
سليم : رايحين الجامعه يا ماما
فاتن : انتوا الاتنين
سليم : ايوا يا ماما ..... دياب متعود اول يوم فى الدراسه لازم يروح معايا
فاتن : اه انا كده فهمت .... طب يلا علشان متتأخروش

• خرجوا كلهم علشان يوصلوا سليم ودياب لحد الباب

دياب : استنى يا سليم انت رايح فين
سليم : هنزل الجراج اطلع العربيه علشان نروح الجامعه
دياب : لا يا سليم سيبك من العربيه دى
سليم : امال هروح الجامعه ازاى
دياب : هتروح بعربيتك الجديده
سليم : فين دى بقى
دياب : اهى مركونه قصادك يا غبى
سليم : انت بتتكلم بجد يا دياب دى عربيتى
دياب : ايوا يا سيدى وصلت امبارح بالليل

• كانت عربيه دودج موديل السنه ..... كل اللى كانوا واقفين مندهشين من اللى بيحصل

• دخل سليم فى حضن دياب

سليم : انا مش عارف اقولك ايه يا دياب
دياب : علشان الفرحه اللى فى عيونك دى مستعد ادفع عمرى كله
سليم : **** يخليك ليا يا دياب
دياب : طب يلا بينا احنا اتاخرنا على الجامعه
سليم : يلا بينا

• مشى سليم ودياب وراحوا الجامعه
• اول ما وصلوا الجامعه دياب سرح شويه

سليم : مالك يا دياب سرحان فى ايه من اول ما وصلنا
دياب : افتكرت ذكرياتى فى الجامعه دى ..... هنا كان فى ذكريات جميله وذكريات وحشه ..... هنا قابلت يمنى وهنا برضه قابلت ريهام .... فى المكان اللى هناك ده جوبا صاحبى حب وعبر للى بيحبها عن حبه ..... فى المطعم اللى هناك ده كنت بتجمع انا وباسم والشله نفطر الصبح ونتغدى بعد المحاضرات .... فى الجامعه دى قابلت اجدع ناس عرفتهم فى حياتى بس للاسف علاقتى اتقطعت بيهم من زمان ومعرفش اى حاجه عنهم ..... الشغل اخدنى من عشرة العمر وافترقت عن اصحابى
سليم : طب ما تسأل عليهم وتشوف هما فين وحاول ترجع علاقتك بيهم
دياب : هو ده اللى ناوى اعمله ..... مفيش غير باسم صاحبى بس اللى بكلمه من وقت للتانى بس الباقى هحاول اوصلهم
سليم : انت علاقتك مستمره بباسم علشان اتجوز من العيله
دياب : طب ادخل انت الجامعه دلوقتى وانا لازم اروح شغلى علشان اتاخرت
سليم : ماشى يا دياب هخلص واكلمك

• نزل سليم ودياب وكل واحد راح يشوف مصلحته

• من ناحيه تانيه فى فيلا احمد صقر كلهم قاعدين بيتكلموا مع بعض

احمد : كلنا ظلمنا دياب
امانى : عندك حق يا احمد
ريهام : دياب بيحب سليم اكتر من اولاده
عمر : وسليم كمان متعلق بدياب جدا وده خطر
فاتن : خطر ليه يا عمى
عمر : علاقة دياب وسليم بقت ملفته للنظر وكل الناس بتسأل ايه سر الحب ده كله
احمد : سليم ظهر فى حياة دياب فى وقت كان كاره فيه الدنيا وكان يعتبر وحيد علشان كده دياب متعلق بسليم بزياده شويه
فاتن : انا كمان قلقانه على سليم من تعلقه الزياده بدياب ..... خايفه دياب يحصله اى حاجه ساعتها سليم ممكن يتدمر وخصوصا كلنا عارفين ان فى ناس كتير مصلحتها تخلص من دياب
امانى : او ممكن الناس دى يستغلوا سليم علشان يضغطوا على دياب خصوصا ان سليم هو نقطة ضعف دياب
امل : متخافوش على سليم ..... دياب بيحرس سليم كويس جدا ومش هيسمح لأى مخلوق انه يمس ولو شعره منه .... دياب اكتر واحد فينا كلنا بيحب سليم وبيحبه اكتر من نفسه
احمد : هههههههه مين اللى بيقول الكلام ده ..... معقول تكون انتى امى اللى عاشت عمرها كله ماتكرهش غير دياب
عمر : ايه اللى حصل فى الدنيا
امل : حصل كتير يا عمر بس انا اللى كنت مغمضه عيونى ومش عاوزه اشوف الحقيقه
عمر : وايه هى الحقيقه
امل : الحقيقه ان دياب انضف شخص ممكن تعرفه فى حياتك ..... الحقيقه ان دياب ورث من ابوه وامه الحنيه وطيبة القلب .... الحقيقه ان دياب طول عمره كان واقف فى صف الخير واحنا اللى كنا واقفين فى صف الشر ..... الحقيقه ان دياب طول عمره كان بيسامح واحنا كنا فاكرينه ضعيف لكنه كان اقوى واحد فينا ..... كان قوى علشان واقف فى صف الحق وهو كده دايما اللى واقف فى صف الحق قوى ..... احنا قوتنا كانت فى الفلوس والعيله كنا اقوياء على ناس ضعيفه مايملكوش فى حياتهم اى شئ اتعودوا يعيشوا تحت رحمة الاقوى منهم ..... لكن دياب كان قوى على ناس العن من الشياطين .... هو ده الفرق اللى بينا وبين دياب
ريهام : دلوقتى جايه تقولى الكلام ده يا امى بعد ما دمرتى حياتنا
امل : سامحينى يا بنتى السكينه كانت سارقانى .... انا عارفه انك مش بسهوله هتسامحينى
ريهام : عمرى ما قدرت ازعل منك علشان اسامحك ..... يوم ما دياب خيرنى بينك وبينه انا اختارتك انتى لانك امى

• قامت ريهام واخدت امل بالحضن واشتغل الاتنين يعيطوا

فاتن : خلاص يا اخوانا كفايه عياط
ريهام : خلاص يا ماما كفايه كده
امل : حاضر يا بنتى

• من ناحيه تانيه فى الجامعه عند سليم .... دخل الجامعه وبيتمشى فيها وكان سرحان وخبط فى واحده وقعت منها الكتب ونزل التنين يلموا الكتب

سليم : انا اسف بس كنت سرحان ومش واخد بالى
البنت : ولا يهمك مفيش حاجه

• فجأه دخل عليهم ولد

الولد : ايه يا حنين اللى انت عملته ده ..... ده انت قديم جدا وشكلك غاوى تتفرج على افلام هابطه
سليم : انت بتكلمنى انا
الولد : ايوا بكلمك انت يا امور
سليم : ههههههههه
الولد : بتضحك على ايه
سليم : طب ابعد عن طريقى بدل ما ازعلك
الولد : تزعلنى انا ..... طب ورينى ازاى
البنت : خلاص يا حازم الاستاذ مايقصدش واعتذرلى
حازم : انتى تخرسى خالص وماسمعش صوتك

• فجأه كام واحد اتلم عليهم ودخل ولد تانى مع حازم

الولد : ايه فى يا حازم
حازم : ابعد يا يوسف انت ..... ده حتة عيل وانا هعرف اتصرف معاه
سليم : خلصتوا لعب العيال بتاعكم ده .... انا معايا محاضره عاوز احضرها

• سابهم سليم ولسه هيتحرك حازم مسكه من ايده

سليم : انت قد اللى بتعمله ده
حازم : لو مش قده ماكنتش عملته
سليم : الظاهر كده انك مش هترتاح غير لما اعرفك انا ابقى مين
حازم : انا بقى عاوز اعرف انت مين

• لف حازم دراع سليم جامد بس الغريبه ان سليم مش متأثر من الحركه

سليم : ههههههههه هو ده اخرك

• حازم مخضوض من شكل سليم ..... فجأه سليم عمل حركه وعرف يفك نفسه من حازم وعمله كام حركه جابه على الارض .... فى كام واحد من اصحاب حازم اتدخلوا وحاولوا يضربوا سليم بس سليم ضربهم كلهم .... كل الطلبه اتلمت على اللى بيحصل وكمان امن الجامعه اتدخلوا ومسكوا سليم وطلعوا بيه على مكتب عميد الكليه ومعاه الطلبه اللى اتضربت ..... دخل الامن للعميد وشرحله كل اللى حصل بعد كده دخل سليم والطلبه للعميد

العميد : انت بقى الفتوه اللى بتضرب زمايلك
سليم : يا دكتور انا مش هدافع عن نفسى بس هما اللى بدأوا ولو مش مصدقنى تقدر تراجع الكاميرات ولو طلعت انا اللى غلطان مستعد اتحمل اى عقاب حضرتك تقرره
العميد : انت اسمك ايه
سليم : اسمى سليم احمد عمر صقر
العميد : انت ابن احمد صقر بتاع الاقصر
سليم : ايوا يا دكتور
العميد : واضح
سليم : حضرتك تعرف والدى
العميد : عز المعرفه ..... ابوك كان تلميذى هنا فى الجامعه .... على العموم انا هراجع تسجيل الكاميرات دلوقتى ولو طلعت انت غلطان انا هفصلك من الجامعه النهارده الحكايه مش ناقصه احمد صقر جديد فى الجامعه
سليم : زى ما حضرتك شايف
العميد : انت مش خايف من الرفد
سليم : انا عمرى فى حياتى ما عرفت معنى الخوف
العميد : لا ابن احمد صقر بصحيح .... على العموم كل حاجه هتبان دلوقتى

• شاف العميد تسجيلات الكاميرا وحقق مع البنت وعرف الحقيقه

العميد : طلعت فعلا مظلوم يا سليم
سليم : قولت لحضرتك

• بعد كده بص على الطلبه التانيين اللى كانوا خايفين من اللى هيحصل

العميد : اما بالنسبه ليكم انتوا هتاخدوا رفد اسبوع
سليم : مفيش داعى يا دكتور هما خلاص عرفوا غلطهم وبعدين انا اخدت حقى منهم
العميد : انت اه اخدت حقك بس لازم يتعلموا الادب
سليم : على ما اظن بعد اللى حصل هما اتعلموا الدرس كويس ومش هيكرروها تانى
العميد : ماشى يا سليم علشان خاطرك سماح المره دى بس لو اتكرر ده تانى حسابى معاكم هيكون عسير
حازم : اوعدك يا دكتور مش هتسمع حاجه عننا تانى
سليم : بعد اذنك يا دكتور ممكن امشى علشان المحاضره بدأت من خمس دقايق
العميد : يلا كلكم روحوا الحقوا محاضراتكم

• مشى سليم والطلبه على المحاضره وطلع كلهم مع بعض فى نفس المحاضره .... اول ما دخلوا الدكتور وقفهم

الدكتور : كده تاخير من اول يوم ..... سماح المره دى علشان احنا لسه فى اول يوم بس ده تنبيه للكل اى حد يتاخر عن المحاضره يستحسن مايفكرش يدخل لان زى ما انا بحترم معادى وبكون هنا فى المعاد بحب الطلبه كمان تكون ملتزمه
سليم : انا اسف يا دكتور مش هتتكرر تانى
الدكتور : انت اسمك ايه
سليم : اسمى سليم يا دكتور
الدكتور : طب ادخل انت وهو علشان نبدا المحاضره

• دخل سليم والطلبه للمدرج ..... سليم قعد فى البنش الاول

الدكتور : يلا بينا نبدأ ..... انا الدكتور جمال عبدالجليل اللى هدرسلكم رسم هندسى التيرم ده
سليم " بصوت واطى " : جوبا !!!
الدكتور " بدهشه " : مين اللى قال الاسم ده

• الطلبه اللى قاعدين جمب سليم بصوا عليه

الدكتور : انت اللى قولت الاسم ده يا سليم
سليم : انا اسف يا دكتور بس
الدكتور : استنى بس .... انت تعرف الاسم ده من فين
سليم : انا من اول ما دخلت وانا بشبه على حضرتك بس مجرد ما عرفتنا عليك انا عرفتك على طول وماحسيتش بنفسى غير وانا بقول الاسم ده من غير قصد
الدكتور : انا مش زعلان منك لانى بحب الاسم ده جدا بس اللى انا عاوز اعرفه انت عرفت الاسم ده ازاى وتعرفنى من فين
سليم : فعلا صدفه غريبه ..... انا لسه من شويه كنت فى سيرة حضرتك مع شخص حضرتك تعرفه جدا
الدكتور : مين الشخص ده
سليم : دياب
الدكتور : اوعى يكون قصدك دياب العاصى
سليم : ايوا يا دكتور
الدكتور : انت سليم اللى كنت عايش مع دياب
سليم : ايوا يا دكتور
الدكتور : وانا بقول انى حاسس انى اعرفك

• نزل جوبا لسليم واخده بالحضن فى وسط دهشه من كل الطلبه

جوبا : ازيك يا سليم ..... ايه اخبارك واخبار دياب
سليم : كويسين جدا يا دكتور
جوبا : ياترى دياب هنا فى مصر ولا لسه فى امريكا
سليم : لا هنا فى مصر
جوبا : على العموم خلينا فى المحاضره دلوقتى وبعد المحاضره لينا كلام مع بعض
سليم : حاضر يا دكتور

• رجع جوبا تانى للسبوره وبص على الطلبه

جوبا : نكمل المحاضره ..... الهندسه الميكانيكيه قسم جميل جدا .... فى ناس كتير هتخوفكم منه ويقولولكم ده قسم صعب .... بس الجميل فى القسم ده صعوبته .... شئ عظيم جدا لما تشوف ماكينه ضخمه مليانه تروس ومسامير وقطع كتير جدا راكبه مع بعضها فى تشكيله غريبه وبيشتغلوا مع بعض بكفاءه عاليه علشان ينفذوا مهمه محدده .... ولو جزء بسيط جدا حصله عطل الماكينه كلها بتوقف .... زى جسم الانسان كده بالظبط ..... جسم الانسان عباره عن المخ وهو زى جهاز التحكم فى الماكينه بالظبط لو حصل عطل ولو بسيط ممكن الجسم ده لا قدر **** يوقف .... زمان وانا فى سنكم كده اصحابى كانوا بيخوفونى من القسم ده وكانوا دايما بيشبهوه بالمقبره لان فى طلبه كتير بعد ما بتدخله بيسقطوا وبيشيلوا مواد وممكن ياخدوا السنه فى سنتين واحيانا تلاته .... انا فى الاول كنت خايف وكنت هيأس واشوف قسم تانى يكون اسهل علشان انجح وما اسقطش خصوصا ان والدى **** يرحمه عمل المستحيل علشان اقدر ادخل الجامعه .... انا كنت طالب فى الكليه دى وزى ما انتوا شايفين الكليه مصاريفها غاليه وابويا كان زى اغلب اولياء الامور اللى هنا فى منهم اللى استلف واخد قروض وفى منهم اللى عمل جمعيات ملهاش حصر علشان يقدر يدخل ابنه الكليه اللى بيحلم بيها بعد ما اتحرم منها فى التعليم الحكومى .... وقتها كنت محتار مابين اختار القسم اللى انا بحبه وحاسس انى هبدع فيه وما بين انى ادخل اى قسم سهل علشان انجح وخلاص .... كان اختيار صعب جدا وهيحدد مستقبلى فى الحياه ..... وقتها قعدت مع واحد صاحبى كان ليه فضل كبير عليا فى اللى انا فيه دلوقتى .... صاحبى ده وقتها قالى كلمه مهمه جدا قالى اجرى وراء شغفك هتلاقى ابواب النجاح مفتوحه قصادك ..... وقالى كمان الانسان بيعيش الحياه مره واحده بس يبقى حرام يعيشها فى حاجه هو مش بيحبها ..... النهارده انا جاى اقولكم نفس النصيحه .... عيشوا الحياه وحبوها ..... ماتخلوش اى حد مهما كان يحدد مستقبلكم ..... ماتسمعوش لكلام الناس طالما مش بتعملوا اى حاجه غلط ..... اختاروا اصحابكم بس يكونوا اصحاب بجد مش مجرد اصحاب للفسح والتسليه واللعب .... صاحبك اللى بجد هو اللى هتلاقيه وقت شدتك زى ما برضه هتلاقيه وقت اللعب والهزار ..... جايز كتير منكم مايعرفش معنى كلامى لكن مسير الحياه هتعلمكم ..... ولو فتحتوا اول صفحه فى الكتاب بتاعى هتلاقوا انى عامله اهداء خاص .... انا متعود فى اول محاضره اقراء الاهداء بنفسى لكن النهارده فى شخص تانى هيقرأ الاهداء ده ..... افتح يا سليم الكتاب واقرأ الاهداء بنفسك

سليم : انا يا دكتور
جوبا : ايوه يا سليم انت .... خد المايك واقراء الاهداء
سليم : حاضر يا دكتور

• اخد سليم المايك وفتح الكتاب على صفحة الاهداء

سليم : اهداء .... الى اخى وصديقى .... الى الشخص الذى منحنى معنى الحياه .... الى الشخص الذى ارشدنى الى طريق السعاده ...... لقد فرقتنا الدنيا بأشغالها وذهب كل منا الى طريقه .... افتقدك كثيرا .... افتقد نصائحك .... افتقد ضحكنا معا .... اليوم ابعث لك شكرى وتقديرى على كل نصائحك الغاليه التى لولاها لما وصلت لأى شئ مما انا فيه الان .... اتمنى كثيرا ان اجلس معك واحكى لك كل ما حدث معى فى غيابك ..... لولا نصائحك لكانت انتهت حياتى بدون جدوى .... انا اعلم انك لا تقرأ هذا الاهداء ولكنى اتمنى ان يصل لك فى يوم من الايام .... اهداء الى دياب العاصى

• سليم اول ما قرأ اسم دياب ابتسم وعيونه دمعت من الفرحه وحضن الكتاب

جوبا : خلاص يا سليم ارجع مكانك
سليم : شكرا يا دكتور
جوبا : النهارده انا اسعد انسان فى الدنيا لان اخيرا امنيتى هتتحقق والاهداء هيوصل .... يلا بينا نبدأ اول محاضره

• اشتغل جوبا يشرح للطلبه باستمتاع والطلبه كمان كانوا مستمتعين بالمحاضره .... بعد ما خلصت المحاضره الطلبه خرجوا من المدرج وقعد سليم مكانه

جوبا : تعالى معايا يا سليم المكتب انا عاوز اتكلم معاك
سليم : حاضر يا دكتور

• خرج سليم مع جوبا وراحوا للمكتب

جوبا : طمنى على دياب يا سليم
سليم : كويس جدا بس مفتقدكم كلكم .... النهارده لما وصلنى للجامعه افتكر ذكرياته فى الجامعه وافتكر حضرتك
جوبا : انا بقالى سنين معرفش عنه حاجه .... اخر حاجه عرفتها عنه انه سافر امريكا من كام سنه وقطع علاقته بكل الناس هنا فى مصر
سليم : لا ده حصل حاجات كتير فى الفتره اللى فاتت
جوبا : وياترى اتجوز ولا لسه رافض
سليم : اتجوز اتنين
جوبا : اتنين مره واحده ..... ايه اللى حصل وخلاه يغير رائيه بالشكل ده
سليم : اهو اللى حصل بقى
جوبا : وياترى اتجوز مين
سليم : اتجوز طنط ليندا وعمتى ريهام
جوبا : معقول بعد السنين دى اخيرا دياب اتجوز ريهام
سليم : شوفت بقى
جوبا : لا واضح ان فى حاجات كتير اتغيرت فى الفتره اللى فاتت ..... طب هو بيشتغل فين دلوقتى
سليم : فى الشركه بتاعته
جوبا : بس اللى انا عارفه انه باع شركة المقاولات بتاعته قبل ما يسافر امريكا
سليم : هو دلوقتى شريك فى مجموعة شركات الجراح وشغال نائب رئيس مجلس ادارة المجموعة الاقتصاديه
جوبا : مش شركة الجراح دى بتاعة الادويه
سليم : شركة الجراح بتشتغل فى حاجات كتير ..... بتشتغل فى الادويه والمقاولات والاستيراد والتصدير والماس وحاجات تانيه كتير
جوبا : طب دى اخبار كويسه ..... هات رقم تليفونه علشان عاوز اكلمه
سليم : انا شايف من الاحسن تعملها مفاجأه وتقابله على طول هو هيفرح جدا
جوبا : انت شايف كده
سليم : ايوا طبعا ..... انا بعد الجامعه هروحله الشركه ايه رائيك تيجى معايا
جوبا : كده تمام ..... انا هخلص محاضراتى واقابلك ونروح مع بعض
سليم : وهو كذلك
جوبا : طب هات رقم تليفونك علشان اكلمك بعد ما اخلص
سليم : اتفضل يا دكتور

• خرج سليم من عند جوبا وتزل الكافتريا قعد على طرابيزه سرحان مع نفسه بيفكر ..... كل الطلبه بيبصوا على سليم ومندهشين منه ..... فجأه الكافتريا اتقلبت لما دخل دياب فى وسط الجاردات بتوعه

سليم : ايه اللى جابك تانى يا دياب
دياب : اعمل ايه لسيادتك طالما غاوى مشاكل
سليم : هى الاخبار لحقت توصل
دياب : ليه انت فاكر انى سايبك كده فى الجامعه من غير حراسه
سليم : ياعم دى حكايه عبيطه وخلصت
دياب : حاول يا سليم تتحكم فى اعصابك شويه
سليم : حاضر يا دياب

• فجأه دخل جوبا الكافتريا وراح على طرابيزة دياب وسليم

جوبا : تصدق انك طلعت واطى يا دياب

• التفت دياب وراه واتفاجئ بجوبا

دياب : جوبا

• قام دياب واخد جوبا بالحضن وسط دهشه من كل الطلبه الموجودين فى الكافتريا

جوبا : وحشتنى يا صاحبى
دياب : انت اللى وحشتنى اكتر يا صاحبى ..... انت بتعمل ايه هنا
جوبا : انا دكتور هنا فى الجامعه
دياب : بتتكلم بجد
جوبا : ايوه بتكلم بجد ..... وقابلت سليم النهارده وكنت هعملهالك مفاجأه واجيلك الشركه بعد الجامعه ..... وحشتنى بجد يا صاحبى ..... وحشتنى قعدتنا مع بعض ..... فى كلام كتير عاوز احكيهولك
دياب : انت كمان وحشتنى ..... انا لحد دلوقتى مش مصدق انى شوفتك ولا مصدق اصلا انك دكتور فى الجامعه
جوبا : كل اللى انا فيه ده بفضلك .... انت السبب فى كل اللى انا وصلتله
دياب : ازاى بقى
جوبا : بسبب نصايحك ..... انت اللى خلتنى اجرى وراء حلمى واصدقه ..... انت اللى ساعدتنى فى علاقتى برنا لحد ما اتجوزنا وعايشين احلى ايام حياتنا .... انت اللى لولاك كان زمانى تايه لحد النهارده
دياب : انا معملتش معاك غير الواجب ..... واجب على الصاحب انه يساعد صاحبه ويقدمله النصيحه لما يحتاجها
جوبا : طمنى على اخبارك
دياب : بص الكلام مش هينفع هنا ..... انت خلص شغلك وعدى عليا بالليل نتعشى مع بعض ونرغى
جوبا : تمام وانا هجيبلك معايا مفاجأه
دياب : مفاجأة ايه انت عارف انى بقلق من المفاجآت
جوبا : لا متخافش المفاجأه هتعجبك
دياب : ماشى يا سيدى ..... هات رقم تليفونك وانا هكلمك علشان اظبط معاك
جوبا : اتفضل يا سيدى الرقم وانا بعد العصر هكلمك .... انا اخدت رقمك من سليم
دياب : ماشى يا جوبا
جوبا : طب اسيبك دلوقتى علشان معايا محاضره

• مشى جوبا وقعد دياب سرحان ومبتسم

سليم : بقالى كتير ماشوفتش الفرحه فى عنيك
دياب : النهارده من اسعد ايام حياتى
سليم : يارب دايما ايامك تبقى كلها سعاده
دياب : انا دايما سعيد بسببك يا سليم ..... لولاك ماكنتش شوفت صاحب عمرى
سليم : طب يلا روح شوف شغلك وانا هطلع اكمل محاضراتى
دياب : اول ما تخلص كلمنى
سليم : حاضر

• قام سليم ودياب وكل واحد راح يشوف مصالحه ...... دياب رجع الشركه وسليم رجع للمحاضرات بتاعته ..... خلص اليوم وكل واحد رجع بيته

• اول ما دياب وصل الفيلا شاف ريهام وليندا قاعدين مع بعض

ريهام : شكلك مبسوط يا دياب
دياب : النهارده انا اسعد انسان فى الدنيا
ليندا : يارب دايما .... بس ايه السبب
دياب : النهارده قابلت جوبا صاحبى
ريهام : ياه .... قابلته فين وازاى
دياب : جوبا بقى دكتور فى الجامعه عند سليم
ريهام : بجد
دياب : شوفتى الصدفه
ريهام : فعلا صدفه حلوه
دياب : اعملوا حسابكم انا عزمته على العشاء النهارده
ريهام : احلى عشاء يا حبيبى .... هجهز العشاء بنفسى
دياب : طب انا هطلع انام شويه علشان اسهر براحتى بالليل معاه
ليندا : روح يا حبيبى وانا وريهام هنجهز العشاء ونصحيك بعد ما نخلص
دياب : **** ما يحرمنى منكم ابدا
ريهام : طب هو جاى لوحده ولا معاه حد
دياب : مش عارف بس ممكن يجيب رنا مراته معاه علشان كده اعملوا حسابكم
ريهام : روح نام انت وماتقلقش كل حاجه هتكون جاهزه

• سابهم دياب وطلع اوضته بعدها ريهام وليندا دخلوا المطبخ علشان يشوفوا هيعملوا ايه

ليندا : ادم النهارده مبسوط اووووى بقالى كتير ماشوفتش الفرحه دى فى عيونه
ريهام : دياب كان متعلق بشلة الجامعه بتاعته وخصوصا جوبا وباسم وابراهيم
ليندا : طب يلا بينا نجهز العشاء

• اشتغل ريهام وليندا فى تجهيز العشاء وعلى الساعه 7 كانوا قربوا يخلصوا

ريهام : احنا كده يعتبر خلصنا
ليندا : انا هطلع اصحى ادم علشان يجهز

• فجاه دخل عليهم دياب

دياب : مفيش داعى يا حبيبتى انا صحيت خلاص
ريهام : انت لحقت تنام
دياب : انا نمت ساعه واحده بس حاسس انى نايم بقالى كتير ..... اول مره من سنين كتير احس انى شبعان من النوم
ريهام : طب اتصل بجوبا شوفه هيوصل امتى
دياب : اتصلت بيه وقال قدامه ساعه ويوصل
ريهام : كده كويس جدا لسه فى وقت علشان نلحق نجهز
دياب : انا هطلع اخد شاور واجهز وانتوا كمان اجهزوا

• طلع دياب وريهام وليندا يجهزوا .... بعد ساعه اتصل جوبا بدياب وبلغه انه قدامه دقايق ويوصل الفيلا .... خرج دياب علشان يستقبله وهنا كانت المفاجأه .... جوبا مش لوحده .... جوبا كان معاه رنا مراته وابراهيم وفريده مراته اللى هى اصلا من شلة الجامعه بتاعة دياب ..... دياب اول ما شاف ابراهيم جرى عليه واخده بالحضن .... كان لقاء مؤثر جدا حتى ريهام اخدت فريده بالحضن لان بقالها كتير ماتعرفش حاجه عنها ..... بعد السلامات دخلوا كلهم الفيلا

ريهام : وحشتينى يا جزمه
فريده : لو كنت واحشاكى بصحيح كنتى اتصلتى بيا ولا عبرتينى ..... انتى من بعد الجامعه اختفيتى
ريهام : معلش بقى الظروف
دياب : هى دى المفاجأه يا جوبا
جوبا : بس ايه رائيك
دياب : اجمل مفاجأه ..... وحشتنى يا ابراهيم
ابراهيم : انت اللى وحشتنى بجد يا دياب .... عامل ايه وايه اخبارك واخبار شغلك
دياب : نتعشى الاول علشان انا جعان وبعد العشاء نقعد مع بعض واعرف اخباركم وتعرفوا اخبارى
ابراهيم : ماشى يا سيدى
ليندا : انا هروح ابلغ الشغالين يحطوا العشاء يا ادم

• كل اللى قاعدين اول ما سمعوا اسم ادم استغربوا

فريده : ايه حكاية ادم دى كمان
دياب : لا دى حكايه طويله بعدين هحكيهالكم
فريده : انت كده يا دياب كل حكاياتك طويله
دياب : هههههه انتى عارفانى بقى

• جهز العشاء وقام الكل علشان يتعشوا فى جو من الفرحه والهزار وبعد العشاء دياب اخد ابراهيم وجوبا علشان يقعدوا براحتهم وساب ليندا وريهام مع فريده ورنا
• عند جوبا ودياب وابراهيم

دياب : طمنونى عليكم ايه اخباركم
ابراهيم : مش لما تطمنا عليك انت الاول وتقولى ازاى اتجوزت ريهام بعد كل اللى كان بينك وبين العيله وايه حكاية ادم دى كمان
دياب : ياه دى قصه طويله جدا
جوبا : احكى يا سيدى احنا سامعين

• حكى دياب كل اللى حصل معاه بس طبعا بحدود لان فى حاجات مينفعش تتحكى

ابراهيم : كل ده حصل فى الكام سنه اللى فاتوا واحنا مانعرفش
دياب : اهى جات كده
جوبا : بس اكتر حاجه مستغربلها قصة موتك دى
دياب : كان لازم وقتها اعمل كده علشان اعرف اكمل
جوبا : بس مش عارف ليه حاسس انك لسه مخبى حاجات كتير
دياب : فى حاجات مش مسموحلى اتكلم فيها ..... سيبكم منى انا وطمنونى عليكم
جوبا : انا وابراهيم سافرنا اليابان فى بعثه هناك واخدنا الدكتوراه وبعد كده سافرنا لندن مع بعض وبعد كده رجعنا تانى هنا وشغالين فى الجامعه ..... رنا مراتى بتشتغل فى شركة الفهد الاسود بتاعة البرمجه
دياب : انت بتتكلم بجد ..... يعنى رنا بتشتغل فى شركة الفهد الاسود
جوبا : ايوه فيها ايه دى كمان
دياب : علشان انا صاحب شركة الفهد الاسود
جوبا : ايه الصدفه الغريبه دى .... بس ازاى رنا ماتعرفش انك صاحب الشركه دى
دياب : انا مش صاحب الشركه بالظبط .... انا شريك فيها بنسبة 50% بس مش بروح هناك خالص وكل شغلى فى شركة الجراح
جوبا : اه علشان كده
دياب : وانت يا ابراهيم ايه اخر اخبارك
ابراهيم : بعد ما رجعت من لندن وانا بشتغل فى الجامعه ده غير شغلى فى المصانع وفريده كمان كملت دراسات عليا بعد الجامعه وبرضه اشتغلت معانا فى الجامعه
دياب : ايه هو شلتنا كلها اشتغلت فى الجامعه ولا ايه
ابراهيم : الظاهر كده
جوبا : طب ما انت اتعرض عليك تبقى معيد فى الجامعه ورفضت
دياب : انت عارف انى معنديش دماغ للتدريس ..... التدريس ده موهبه مش لازم يعنى علشان الواحد شاطر فى الدراسه هيبقى كمان شاطر فى التعامل مع الطلبه
جوبا : عندك حق فى دى ..... يا ما فى دكاتره كتيره فاشلين فى التعامل مع الطلبه
دياب : اهو انا كنت هبقى من الدكاتره دول لو كملت واشتغلت فى الجامعه
ابراهيم : اجمل حاجه فيك يا دياب انك متصالح مع نفسك وعارف قدراتك كويس علشان كده بقيت ناجح فى حياتك
دياب : رحم **** امرئ عرف قدر نفسه
جوبا : انا فرحت جدا لما شوفت سليم النهارده علشان حسيت انى اخيرا لقيتك
دياب : سليم .... سليم ده احلى حاجه حصلت فى حياتى كلها ..... عاوزكم تاخدوا بالكم منه كويس جدا فى الجامعه مش عاوز اى حد يضايقه او يتعرضله
جوبا : ماتقلقش على سليم احنا كلنا معاه
دياب : مقلقش ازاى والخطر محاوطنى من كل ناحيه
جوبا : ليه بتقول كده يا دياب
ابراهيم : انا من ساعة ما جيت وانا مستغرب من كمية الحراسه الموجوده فى الفيلا .... واللى زود قلقى اكتر المواضيع اللى انت حكيتها .... مش انت دياب صاحبنا بتاع الجامعه .... فى حاجات كتير متغيره فيك
دياب : هى دى سنة الحياه يا ابراهيم ..... مفيش حاجه بتفضل على حالها
ابراهيم : احكيلنا يا صاحبى احنا ممكن نساعدك
دياب : مش كل حاجه ينفع تتحكى يا ابراهيم .... مش علشان مش واثق فيكم بس لان فعلا مش مسمحولى اتكلم فى حاجه
ابراهيم : انا عارف انك واثق فينا ومش مخونا بس احنا عاوزين نساعدك
دياب : لو عاوزين تساعدونى بجد خلوا بالكم من سليم
ابراهيم : ماتقلقش يا دياب على سليم واعتبره من النهارده زى ابنى بالظبط وهخاف عليه زى ما بخاف على اولادى
جوبا : زى ما ابراهيم قالك يا دياب اعتبر سليم زى اولادنا بالظبط واحنا هنعرف نحميه كويس
دياب : هو ده العشم
ابراهيم : ولو الخطر اللى انت خايف منه بخصوص شغلك فى شركات الجراح والفهد الاسود فمتخافش احنا عارفين انك قدها ولو احتاجت اى مساعده احنا معاك
دياب : استنوا هنا انتوا تعرفوا من فين مشاكل شركات الجراح والفهد الاسود
ابراهيم : انت عارف انى من ايام ما كنت طالب بشتغل فى المصانع .... اشتغلت فى مصانع صقر وفى مصانع الجراح وكنت دايما بسمع عن المشاكل اللى كانت بين الدكتور سليم الجراح ومافيا الادويه لكن بعد ما سافرت لندن عرفت ان الحكايه اكبر بكتير من مجرد مافيا ادويه ..... وقتها قابلت جوبا وحكيتله كل اللى بسمعه وعرفت منه وقتها حاجات اكتر
دياب : ايه الحاجات اللى عرفتها
جوبا : قصده مشاكل الدكتور سليم مع الصهاينه
دياب : انتوا بقى عارفين كل حاجه
جوبا : لا طبعا مش كل حاجه بس بحكم شغلى وعلاقاتى عرفت حاجات كتير ..... اهمها ان الدكتور سليم الجراح من انضف الناس اللى ممكن تقابلها فى حياتك
ابراهيم : انا قابلت الدكتور سليم الجراح مرتين بس .... مره كانت قبل محاولة قتله والمره التانيه كانت بعد ما رجع تانى وصدم الناس كلها برجوعه ايام ما كان ابن اخوه فى الغيبوبه
دياب : لا واحده واحده كده فهمونى ايه علاقتكم بالدكتور سليم الجراح
ابراهيم : صدقنا يا دياب مفيش اى علاقه بينا وبين الدكتور سليم الجراح ..... كل الحكايه ان انا وجوبا كنا مسئولين عن خطوط انتاج مصانع جديده كانت بتتفتح فى لندن واليابان والدكتور سليم كان شريك فيها
دياب : ايوا عارف المصانع دى بس دى اول مره اعرف ان انتوا اللى كنتوا مسئولين عنها
جوبا : الدكتور سليم الجراح طلبنا بالاسم علشان نكون مسئولين عن المصانع دى
دياب : غريب الكلام اللى انتوا بتقولوه ده
ابراهيم : مش غريب ولا حاجه بس من معرفتى بالدكتور سليم الجراح بأكدلك انه بيعرف يختار رجالته كويس
دياب : انا عارف ان الدكتور سليم بيعرف يختار رجالته كويس
ابراهيم : على العموم زى ما قولتلك اعتبر ان سليم صقر فى حمايتنا من النهارده وبرضه لو محتاجنا معاك احنا موجودين

• فجأه دخل كريم عند دياب واول ماشاف ابراهيم وجوبا اندهش وهما كمان اندهشوا

دياب : واضح كده انكم تعرفوا بعض
كريم : ازيك يا دكتور جمال .... ازيك يا دكتور ابراهيم
جوبا وابراهيم : ازيك يا استاذ كريم
دياب : واضح فعلا انكم تعرفوا بعض كويس جدا كمان
كريم : حضرتك تعرف الدكتور جمال والدكتور ابراهيم
دياب : اعرفهم جدا ..... دول اصدقاء من ايام الجامعه يا كريم
كريم : اول مره اعرف حاجه زى دى
دياب : مش مشكله ..... خير يا كريم فى حاجه
كريم : الدكتور سليم الجراح بيبلغ حضرتك انه مسافر دلوقتى علشان معاه شغل مهم وكان عاوز يشوفك قبل ما يسافر لانه بيتصل بحضرتك وحضرتك قافل تليفونك
ابراهيم : طب نستأذن احنا دلوقتى يا دياب علشان تشوف شغلك
دياب : على العموم احنا لسه كلامنا ماخلصش
جوبا : لسه الايام جايه كتير يا دياب

• مشى ابراهيم وجوبا ورنا وفريده ..... ودياب وكريهم وصلوهم للعربيات بتاعتهم

دياب : ايه حكاية سفر الدكتور سليم ده يا كريم وبعدين انا مش قافل تليفونى
كريم : الدكتور سليم مش مسافر بس انا اضطريت اقول كده لان فى موضوع مهم كان لازم ابلغك بيه
دياب : والموضوع ده مكانش ينفع يتأجل يا كريم لحد ما الناس تمشى .... وبعدين مش تقولى ان ابراهيم وجمال هما اللى كانوا مسئولين عن خطوط انتاج المصانع اياها فى اليابان ولندن
كريم : انا ماكنتش اعرف انهم يبقوا اصحابك اصلا
دياب : طب ايه الموضوع المهم اللى بسببه قطعت قعدتى مع الناس
كريم : استر يعقوب ظهرت يا دياب
دياب : انت بتقول ايه ..... دى مصيبه

ياترى ايه هيحصل تانى ده اللى هنعرفه الجزء اللى جاى ....