قصة 🥂إرحــــمــــــنــــي ★*نور إسحاق*★ بالدارجة المغربية

🥂 الفصل الأول 🥂

🖤 إرحــــمــــنــــي🖤

🍷نــــور إســــــــحــــــــاق🍷

بقلمي : إيمان القاسمي

" لم يحبها سِرّاا...بل غازلها جهرا وبات في هوسها يقهر قهرا"

PArt:01

راجعة من خدمتها اللي دوزت فيها نهارها كامل من الفجر حتا وصل ادان المغرب ..كرشها مقنبلة قدامها والعيا بااين او وااضح على ملامح وجهها ..وصلات الكاريان اللي كتسكن فيه بمشقة النفس وهي كل شوية تحس بمغص فكرشها ..دخلت من بعد ماسدات الباب ...وجلست فواحد الكاتري كتحاول ترد نفسها..وداك المغص غير مكيتزاااد ..دموعها نزلو شاقين طريقهم حاسة بألم رهيب فكرشها خايفة على الجنين اللي فكرشها وخايفة يزيرها الوجع ومكاين لا حنين لا رحيم الراجل اللي خاصو يساندها ويوقف معاها عاطيها للشرابات والقمر ممسوقش ومكاينش فالدنيا ..

غوتات بصوت خافت عاضة على كمامها باش مايتسمعش صوتها لبرا .. حاسة بالخوف وهي كتشوف الما ديال الشقية هابط معاها دليل على موعد ولادتها ..وقفت كتعكز بصعوبة جهة الطاقة( السرجم) كانت الشتا خيط من السما والحسد مقطوع كل واحد ساد عليه دارو ومخشي فمانطوو من غيرها هي اللي حاسة بألم المخاض كيجهااد ..غمضت عينيها بجهد فاش حسات بشي حاجة غتهبط من تحتها ..جلست الأرض هازة كسوتها ومحيدة السروال والكيلوط ..خشات كسوتها ففمها باش ماتغوتش بجهد.... كانت كتزحم بكل قوتها جبعتها نازل مع العرق والدموع فعينيها حلفو مايحبسو ..كتبكي وتنين وهي عاضة على كسوتها .. شهقات بصوت عالي فاش حسات بتحتها تحل وشي حاجة هبطات منها ..رجعات راسها اللور حاسة بالسخفة وداتها ترخات..فيقها من سهوتها صوت بكاء ديال طفل صغير ..استجمعت قوتها ورجعت زحمت كتر حتا هبطو الخوتات وتخوات كرشها تݣعدات هازة البنية كانت زرقة وبااردة بحال الثلج وكتغوت بصوت رقيق يدوب سمعاتو هي ..هزات موس من حداها قطعات المصرانة اللي كتريط بينها وبين بنتها وعݣدتها ليها مزيان هزات مانطة خفيفة لواتها فيها وحطاتها على جنب ..ناضت بصعوبة حاسة بتحتها كيعݣرها والعيا سرح مع جسمها مشات دارت العواد تشعل المجمر باش تدفي بنتها ... جهدات على راسها بزاف رجعت لمكانها هزات الكسوة اللي كانت لابسة طرفات بيها حالها وعرضاتها تحتها باش يهبط فيها داك الد//م ديال النفاس

تخشات حدا بنتها جبدلت بزولتها خشاتها ليها ففمها البنية خير مشات ريحة ماماها بدات كتجر راس البزولة لفمها وتمص الحليب .. حلات عينيها بصعوبة كتشوف البنية نعسات ودفات شوية ...

رحمة هزات يديها كتحسس بشرة بنتها الرطبة تبسمت ابتسامة خافتة ونطقات بهمس: نور...غانسميك نور...نتي هي النور لي غاينور حياتي المضلمة...!

وسرعان ماغمضات عينيها غاايبة عن الوعي ...