𝕯𝖆𝖓𝖈𝖎𝖓𝖌 𝖎𝖓 𝖙𝖍𝖊 𝖆𝖗𝖒𝖘 𝖔𝖋 𝖉𝖊𝖆𝖙𝖍 🩰♡ رقصة بين أحضان الموت

| 𝔓𝔞𝔯𝔱 | 16🍷:

                         | 𝔓𝔞𝔯𝔱 | 16🍷:

عنقات ماماها وليلى مودعاهم بحسرة ، وخرجات من الدار اللي كانت بنسبة ليها سجن تدفنو فيه گاع احلامها، ودابا جا الوقت لي غيذوقو فيه طعم الحرية.

• العمة سمية كانت اكبر من موسى ب 9 سنوات ، فاش ماتو واليديهم كانو باقين صغار، الشي لي خلا سمية تهز الحمل ديال خوها فسن صغير، إعتمادا على حرفة الخياطة اللي تعلماتها من الأم ديالها المرحومة،
ضحات بزاف على ودو حتا وصل لأحسن المراتب، لدرجة انها سمحات فالزواج شحال من مرة على ودو، حتا كبرات فالعمر ووصلات للأربعينات عاد رزقها الله زوج صالح عاشت معاه أحسن ايام حياتها وخا مرزقهمش الله الولاد ولكن كانت كتعتابر ولاد خوها كتر من ولادها ، خصوصا أمينة اللي كانت مربياها على يديها.
سمية كانت معروفة بالطيبوبة والإنسانية ديالها مع كلشي ، لدرجة ان جيرانها فالناظور كانو كيعتابروها فرد من العائلة ، الشي لي خلاها تبقا ساكنة تما من ورا مامات زوجها ،ومترجعش لدار خوها بالرغم من انها عندها حقها فيها.

خرجو أمينة وسمية فين لقاو الشاب اللي كان صايگ الهوندا كيتسناهم.

ركبو حداه عاد نطقات سمية.

سمية بلحاج: سمحيليا اولدي مراد تعطلت عليك

مراد(خدم المحرك ونطالق ): الدنيا هانية أمي سمية ، هادي هي بنت خوك لي دويتي عليها

حنات أمينة راسها بخجل

سمية بلحاج: اه هي، متحشميش ابنتي هادا مراد ولد جارتي ، قلت ليه يوصلني ومردهاش ليا فوجهي مسكين يومين وهو معذب معايا.

مراد: الدنيا هانية أمي سمية خيرك سابق

أمينة(بصوت خافت): فين غنمشيو دابا اعمتي

سمية بلحاج: اييه فكرتيني (جبدات صرة صغيرة من جيب الفاليزة) دوزنا امراد للسوق اللي فالخرجة، بغيت نبيع شي ذهب

مراد: واخا نيت نعمر المازوط.

أمينة: ديالاش هادشي أعمتي

سمية بلحاج: هاذا ذهبك وشي دبالج ديال ماماك، مداتهم ليا خزنة على باك فاش كنا خارجين، وقالتيا أمينة أمانة فرقبتك

نزلات دمعة من عين أمينة، حطات راسها على النافذة وبقات ساهية فالطريق حتا داتها عينيها

فاقت بعد مدة على صوت عمتها اللي كانت كتفيقها

سمية بلحاج: نوضي ابنتي را وصلنا

دارت ملحف على وجهها ومدات لأمينة واحد اخر

هبطو وخلاو مراد مشا يدير المازوط

دارو جولة على الذهايبة ، حتا لقاو التمن اللي يرضيهم عاد باعوه بثمن مهم.

بعدما سالاو تلاقاو بمراد ومشاو عند الجزار باش يتغداو