غلسو إذا لگيتو أخطاء أملائية 🤍🤍
فتحت عيونهة عالگيف تفرك راسهة بقوة بسبب الوجع تحاچي روحها بأستغراب: ليش راسي هالگد يوجعني؟؟
رفعت جسمهة من عالچرباية تدحج عالساعة المعلگة بالحايط گايلة بصدمة: عزززة الساعة ثمانية ونص راح علية الدوام
گامت من عالچرباية تتقدم من الشباك فتحت البردة وأنصدمت لمن شافت الحراس متمددين بالگاع وغرگانين بدمهم رگضت طالعة من الغرفه ترجف بخوف دخلت لغرفة بغداد تهز چتفهة گايلة بخوف: بغ... بغداد أگ.... أگعدي ال.... الله يخ.... يخليچ
فتحت بغداد عيونهة تحس بوجع براسهة دحجت على سيلين اللي ترجف وتبچي گايلة: أشبيچ تبچين ومرعوبة هيچ؟؟
بلعت سيلين ريگهة بخوف وجسمهة يرجف تحچي بتلگؤ: ال... الحراس ب.... برا غ... غرگانين ب... بدمهم
رجعت ذاگرة بغداد ليورة تفتح عيونهة على وسعهن لمن تذگرت الملثمين گايلة بخوف: جنة
رگضت بغداد خارج غرفتهة ودخلت لغرفة جنة يرجف جسمهة بهستيرية لمن شافت چربايتهة فارغة: لا جنة معقولة!!
ظل عدهة أمل بأنه تلگة جنة تروح تدورهة بالمطبخ وبالحمامات والغرف بس مالگتهة طلعت من البيت ونزلت دموعها لمن شافت الحراس غرگانين بدمهم
رجعت دخلت للبيت وشافت سيلين گاعدة بالصالة ضامة رجليهة لصدرهة ترجف وتبچي بهستيرية مسحت بغداد دموعها تدخل لغرفتهة
أخذت موبايلهة من جوة المخدة ودگت على عراق ثواني ورد: هلة بغداد،، صاير شي؟؟
تمشت بغداد بالغرفة بتوتر وخوف مقررة أنه ماتفجع عراق وتگلة هسة على أختفاء جنة وموتت الحراس لأن تخاف يصيرلة شي وهو ديسوق لذلك گالت: عقيد تگدر تجي للبيت أريد أگلك شي ضروري
عگد عراق حواجبة بأستغراب گايل: شگو شصاير؟؟ خوما أحد بي شي بالبيت؟؟
مسحت دموعها اللي ماجاي توگف گايلة: عقيد أنت بس تعال وأن شاءلله گلشي ينحل
طلع عراق من المركز وصعد بسيارتة گايل: ساعة وآني بالبيت
سدت الخط تگعد على طرف الچرباية تهز رجليهة بتوتر وخوف گايلة: يارب دخيل أسمك يارب أحمي جنة من گل شر
.............................................................
دخل للغرفة يدحج على بغداد والخوف مبين بعيونة تلفت داير مادايرة گايل بأنفعال لأن شاف الحراس مگتولين: وينننن جنة؟؟
گامت بغداد من عالچرباية تتقدم من عراق ودحجت بعيونة بخوف رادة: البارحة نص الليل حسيت على حرگة بالغرفة وگعدت بس أنصدمت من شفت زلم ملثمين وقبل لاأفك حلگي واحد منهم خدرني ومن گعدت الصبح دورت جنة ومالگيتهة،، عقيد من البداية چان هدفهم جنة
أنت تقرأ
عاصمة گلبي
General Fictionتبتسمين فيفقد الليل وعيه ويگتم القمر تنهده ويسقط من السماء نجم أرهقه أعجابه بقلمي انا الگاتبة ✍🏻: ࢪغد
