السلام عليكم ورحمة الله، مساء الخير عليكم جميعًا🤍
كيف الحال ؟
مباركن عيدكم🤍
بسم الله نبدأ الرواية الثانية
ان شاء الله فكل اسبوع راح أنزل جزء، وممكن لو خلصت كتابة أنزل الجزء من وقت، يعتمد عـ الظروف
أنتظر آراءكم وردودكم اللي تسعدني
قراءة مُمتعة🤍
**********************************************
راحو مصلى العيد كعادتهم في كل سنة، رغم حرارة ورطوبة الجو لكنهم يحسون بلذة العيد فالمصلى الكبير، ردو من الصلاة، ويلست الأم فالصالة معاها بناتها الأربع
علياء باستهزاء: عيل وينه أبوكم ؟ ما شرف للحين!
شما تتنهد: وين بعد، عند الحرمة الثانية
مريم بعصبية: عيب، اللي ترمسون عنه أبوكم، أكيد بعد شويه بيوصل، اصبرو شوي
علياء: ودي أفهم ليش تدافعين عنه ؟ يكفي إنه تزوج على أمي !
مريم: شرع الله، مابتغيرينه، محلل له أربع حريم
علياء بقهر: والله ؟؟؟ كلنا عارفين الشرع وعارفين انه محلل له يتزوج، بس بعد كلنا عارفين انه اللي يسويه حرام وما يرضي رب العالمين، رام يتزوج بس مارام يعدل ؟ تزوج عشان تيب له الولد ونسى عياله وأم عياله ؟ أساسًا قبل مايتزوج مقصر ويالله نشوفه، والحين عاد حدث ولا حرج الوضع
هند بحزم: يالله بصباح خير، سكرو الموضوع ولا ترمسون فيه، عليا وشما للمرة المليون يوم بترمسون عن أبوكم ارمسو عنه باحترام، يبقى أبوكم مهما كان
أم علي تبتسم: بناتي الحلوات ليش يتحرطمون من الصبح ؟ علايه وشماني عيب ماما، أنا مارضى على أبوكم ترى
علياء بوّزت: بعد كل اللي سواه مادري كيف ماترضين عليه!
هند بحدة: أوووهو عاد!!! شو قلت أنا ؟؟؟ لا تطلعيني من طوري عليوه
علياء تتأفف: خلاص بنسسكت
علي بصوت عالي: منوووو بيلعب وياي كورة ؟؟؟؟
شما بضيق: علوي لا تصارخ، ثانيًا منو يلعب كرة صباح العيد وبهالحر ؟؟؟ امسك آيبادك والعب فيه أحسن
علياء بعتاب: لا تكلمينه بهالاسلوب
قامت له علياء وحضنته: حبيبي علاوي، انت لابس كندورة العيد وغترة وعقال، ومتكشخ ما شاء الله عليك مايستوي تلعب برع، أوكي حبيبي ؟
علي باصرار: أنا أبا ألعب، تلعبين وياي ؟
علياء تمسك ايده تحاول تقنعه: وعد بلعب وياك بس عالمغرب أوكي ؟
أنت تقرأ
ليلة عيد
Romanceرواية ذات طابع اجتماعي، سنقرأ بين طياتها مشاعر مُختلفة، و عميقة، الكثير من لذة الحب ودفء العائلة
