سالم بعصبية: شو حركات اليهال هذي ؟؟ أكلمج وأتصل وحاقرتني ليش ؟
شما: لأنك تصرفت بدون شوري، وأنا قلت لك مابا خطبة وزواج الحين، كلامي ماكان واضح يعني ولا شوو ؟
سالم باستغراب: انتي شو هالتناقض اللي فيج ؟ تحبيني وأنا أحبج وأموت فيج شو المانع يعني لو عرسنا ؟
شما: سااااااالم لا ترفع ضغطي ترى احنا حتى تخرج من الجامعه ما تخرجنا، ليييش مستعيل ؟؟ تعرف بتصرفاتك السخيفة هذي في احتمال كبير تخرب على عمرك وعلي وعلاقتنا وحبنا كله يضيع
سالم بتعجب: لا والله!!!!!! كيف ان شاء الله ؟ الحين يوم بتقدم لج بخرب اللي بيننا ؟؟؟؟
شما: هيه نعم بتخرب اللي بيننا، أبوي مستحيل يرضى استوعب، أبوي وأعرفه
سالم: وانتي شدراج ؟ ليش متأكدة انه بيرفض ؟
شما: لأنه هنّاد ومريوم يوهم خطاب وهم يدرسون وأبوي رفض
سالم: ماعليه انتي بتقنعينه، وأنا بعد بحاول أقنعه
شما تتنهد: وبعدين وياك ؟ حق شو هذا كله ؟ خلاص سنة مادري سنتين بتخلص دراستك على خير وبتعرس، بتقنعني انه مافيك صبر ؟
سالم: والله العظيم مافيني صبر أكثر وأبغيج على سنة الله ورسوله، أبغييج بالحلال يا بنت الناس إفهمي، إنتي حسبالج أنا راضي بهالوضع ؟ أكلمج وأسولف وياج وأنا مابيني وبينج حتى خطبة، هالشي مايرضيني، وتبين الصدق مافيني أتمادى وأخاف هالتواصل يأثر علينا سلبيًا
شما بذهول: تتمادى ؟؟؟؟ يعني ممكن تضرني فيوم ؟؟؟ ناوي على هالشي ؟؟؟
سالم بضيق: شموه افهميني، طبعًا ما بضرج ومايهون علي أصلًا، بس أنا ريال، وحبيتج من خاطري، ودي فيج، ودي نكون تحت سقف واحد، المفروض تستانسين بهالشي مب توقفين ضدي وترفضين زواجنا !!
شما بغبنة: وإذا أبوي ماطاع ؟
سالم: تصرفي
شما تصيح: وإذا مارمت أسوي شي ؟
سالم: يا ربيييه ليش الصياح ؟؟ كل شي وله حل ان شاء الله لا تصيحين
شما: تراك وايد ضاغط علي، أنا ماعرف ردة فعل أبوي كيف، أنا ماعرف طريقة تفكيره وشو بيقول وشو بيسوي، أنا ماعرف أي شي عن أبوي سالم
سالم: خلاص ما علييه انتي اهدي بس، ما بناخذ إلا اللي مكتوب لنا
شما: إذا ماصار النصيب الحين بتتخلى عني ؟
أنت تقرأ
ليلة عيد
Romanceرواية ذات طابع اجتماعي، سنقرأ بين طياتها مشاعر مُختلفة، و عميقة، الكثير من لذة الحب ودفء العائلة
